Аваргуудын лигийн хэсгийн шатны тавдугаар тойргийн тоглолтууд өндөрлөлөө. Шөвгийн 16-д өрсөлдөх багийн 12 нь тодроод байна.

---

Шөвгийн 16-д шалгарсан: Аякс, Атлетико Мадрид, Барселона* Бавари Мюнхен, Борусси Дортмунд, Ювентус, Манчестер Сити, Манчестер Юнайтед, Порту*, Реал Мадрид*, Рома, Шальке

*хэсгийн аваргууд

Хасагдах шатанд өрсөлдөх боломжтой багууд: Интер Милан, Ливерпуль, Лион, Наполи, ПСЖ, Шахтёр Донецк, Тоттенхэм

Европа лигт өрсөлдөх нь тодорхой болсон багууд: Бенфика, Клуб Брюгге, Валенсиа

Европа лигт өрсөлдөх боломжтой багууд: ЦСКА Москва, Ред Стар Белград, Галатасарай, Хоффенхейм, Локомотив Москва, Викторья Пльзень

Хасагдсан: АЕК Афинс, Монако, ПСВ Эйндховен, Янг Бойс

---

ХЭСЭГ А

Атлетико Мадрид 2:0 Монако

Ердөө хоёр минутад л Коке эхний гоолыг оруулснаар “Атлетико Мадрид” багийн түүхэнд Аваргуудын лиг дэх хамгийн хурдан гоолын эзэн болсон юм. Ийнхүү Диего Симоны удирдсан зургаан жилийн хугацаанд тав дахь удаагаа хасагдах шатанд өрсөлдөх боллоо. Испанийн клуб 2013-14 оны улирлаас хойш хаалгандаа гоол алдаагүй тоглолтын тоо 32-т хүрчээ.

Борусси Дортмунд 0:0 Клуб Брюгге

Германы клуб сүүлийн зургаан жилийн хугацаанд тав дахь удаагаа Аваргуудын лигийн хасагдах шатанд шалгарав. Хар шарууд Аваргуудын лигийн гэртээ хийсэн сүүлийн гурван тоглолтод хаалгандаа гоол алдсангүй. Харин “Клуб Брюгге”-гийн хувьд Германы багийн талбайд хийсэн 13 тоглолтод хожиж үзээгүй хар цувралаа үргэлжлүүлэв. Тэд гурав тэнцээд 10 хожигдсон үзүүлэлттэй.

---

ХЭСЭГ Б

ПСВ Эйндховен 1:2 Барселона

Каталаны клуб сүүлийн 12 жил дараалан хэсгээ тэргүүлж байна. Харин Нидерландын “ПСВ Эйндховен” Аваргуудын лигт хийсэн сүүлийн 13 тоглолтод хожиж чадаагүй хар цувралтай үлдлээ (5 тэнцэж, 8 хожигдсон). Тэд сүүлийн таван тоглолтод багадаа хоёр гоол хаалгандаа алдсан юм.

Тоттенхэм 1:0 Интер Милан

Кристиан Эриксений цор ганц гоолын ачаар “Тоттенхэм” өрсөлдөгчөө буулган авч, хасагдах шатанд өрсөлдөх боломжоо хадгалж үлдэв. Хэрвээ дараагийн тоглолтод тус хоёр баг ижил оноотой тоглолтоо дуусгавал “Тоттенхэм” цааш шалгарах боломжтой юм. Лондоны клуб 2017 оны арванхоёрдугаар сараас хойш анх удаа Аваргуудын лигт дараалсан ялалт авч байна.

---

ХЭСЭГ С

ПСЖ 2:1 Ливерпуль

Францын аваргууд эхний хагаст хоёр гоол хийснийхээ ачаар хүссэн үр дүндээ хүрлээ. Бразил довтлогч Неймар энэ тоглолтод гоол оруулснаар Аваргуудын лигт 31 гоолтой болж, Какаг ардаа орхив. Мөн тэд 95 тоглолтод 50 дахь хожлоо авсан нь “Реал Мадрид” (88), “Барселона” (93)-гийн дараа орох үзүүлэлт. Харин тун хүнд байдалд орсон “Ливерпуль” Аваргуудын лигийн хэсгийн шатанд айлын талбайд хийсэн бүх тоглолтод хожигдсон. Энэ нь тус багийн хувьд анх удаа болж буй үзүүлэлт. Түүнчлэн Европын цом, Аваргуудын лигт айлын талбайд дөрөв дараалан ялагдсан нь тус клубийн түүхэнд анх удаа болж байгаа үзэгдэл ажээ.

Наполи 3:1 Ред Стар Белград

Энэ хэсгийн эхний гурван багт бүгдэд нь хэсгээс шалгарах боломж бий. Марек Хамшикийн гайхалтай тоглолтын ачаар Италийн клуб ялалт байгуулсан. М.Хамшик энэ тоглолтод эхний гоолыг оруулж, дараа нь гоолын дамжуулалт өгсөн нь 2011 оны арванхоёрдугаар сараас хойш анх удаа болсон зүйл. “Наполи” хэсгийн шатанд гэртээ хийсэн сүүлийн 15 тоглолтод 10 ялж, гурав тэнцээд хоёр удаа хожигдсон байна.

---

ХЭСЭГ Д

Локомотив Москва 2:0 Галатасарай

ОХУ-ын “Локомотив Москва” клуб 2004 оны хоёрдугаар сард “Монако”-г ялснаас хойш Аваргуудын лигт анхны ялалтаа байгууллаа. Тухайн үед одоогийн дасгалжуулагч Юри Семин бас удирдаж байв. Тус тоглолтын хоёр дахь гоолыг Владислав Игнатьев оруулсан юм. В.Игнатьев энэ гоолоо оруулахдаа 31 нас, 312 хоногтой байсан нь тус багаас Аваргуудын лигт гоол оруулсан хамгийн ахмад тоглогчийн нэг болжээ. Түүний өмнө 34 нас, 10 хоногтой гоолдсон Жефферсон Фарфан бий.

Порту 3:1 Шальке

“Порту” гурван жил дараалан Аваргуудын лигийн хасагдах шатанд шалгарав. Түүнчлэн Аваргуудын лигт дөрөв дараалан ялалт байгуулсан нь 1996 оны аравдугаар сараас хойш анхных юм.

Энэ долоо хоногт Аваргуудын лигийн хэсгийн шатны тав дахь тоглолтууд болж байна. Испанийн “Реал Мадрид”, Италийн “Ювентус” зэрэг шилдгүүд хасагдах шатанд өрсөлдөх тийзээ авсан юм.

---

ХЭСЭГ Е

АЕК Афинс 0:2 Аякс

Сербийн Душан Тадичийн таван минутын дотор оруулсан хоёр гоолын ачаар Нидерландын “Аякс” клуб 2005/06 оны улирлаас хойш анх удаа Аваргуудын лигийн хасагдах шатанд өрсөлдөх тийзээ авлаа. Грекийн клубээс 68 дахь минутад хорват эр Марко Ливая бөмбөгийг гараараа хааж, улаан хуудас авснаар хүн дутуу үлдсэн тул тоог тэнцүүлэх боломж гарсангүй.

Бавари Мюнхен 5:1 Бенфика

“Аякс” өрсөлдөгчөө ялснаар “Бенфика” клуб Германы аваргуудыг хоёр гоолын зөрүүгээр ялах шаардлага тулгарсан. Гэхдээ Арьян Роббен, Роберт Левандовски, Фрэнк Рибери нар ийм боломж өгсөнгүй. Р.Левандовски Аваргуудын лигт 51 гоолтой болж, Ф.Рибери 2015 оны гуравдугаар сараас хойш Аваргуудын лигт анхны гоолоо оруулав. “Бенфика” Европа лигт өрсөлдөх юм.

---

ХЭСЭГ F

Лион 2:2 Манчестер Сити

“Манчестер Сити” энэ тоглолтод оноо авбал шөвгийн 16-д өрсөлдөх болзолоо хангах байв. Максвел Корне хоёр ч гоол оруулж, багаа тэргүүнд гаргасан ч Английн аваргууд барьц алдсангүй. Аргентин довтлогч Серхио Агуэро 83 дахь минутад тоог тэнцүүлсэн юм.

Хоффенхэйм 2:3 Шахтёр Донецк

Эхний 20 минутад гурван гоол орж, тун сонирхолтой эхэлсэн тус тоглолтод “Шахтёр”-ын бразил довтлогч Тайсоны нэмэлт цагт оруулсан гоолын ачаар Украины аваргууд ялалт байгууллаа. Энэ хэсгээс “Манчестер Сити” гарах нь тодорхой болсон. Харин тэдний араас “Лион” уу, “Шахтёр” уу гэдэг нь арванхоёрдугаар сарын 12-нд тодорхой болно. Сонирхолтой нь тэд хоорондоо өрсөлдөх юм.

---

ХЭСЭГ G

ЦСКА Москва 1:2 Виктория Пльзень

ОХУ-ын “ЦСКА Москва” клуб гэртээ ялагдал хүлээснээр хэсгийн сүүлийн байрт бичигдэж эхэллээ. Тус хоёр багийн хэн нь хэсэгтээ гуравдугаар байр эзлэхийг сүүлийн тоглолтоос л бид мэдэх боломжтой.

Рома 0:2 Реал Мадрид

Энэ хэсгийн нөгөө хос тоглолт аль хэдийнэ шийдэгдчихсэн тул тус хоёр баг хоёул хэсгээсээ гарах нь тодорхой болсон юм. Гарет Бэйл, Лукас Васкес нарын гоолын ачаар лигтээ тааруухан буй “Реал” хэсгээ тэргүүлэх нь тодорхой боллоо.

---

ХЭСЭГ H

Ювентус 1:0 Валенсиа

Криштиану Роналдугийн дамжуулалтаар Марио Манжукич энэ тоглолтын цор ганц гоолыг оруулснаар хэсгээсээ гарах нь тодорхой болсон юм. Испанийн клубийн хувьд “Европа лиг”-т өрсөлдөх нь ойлгомжтой болов.

Манчестер Юнайтед 1:0 Янг Бойс

“Улаан чөтгөрүүд” хэсгээ тэргүүлэх боломжоо хадгалж үлдлээ. М.Феллаинигийн 91 дэх минутад Люк Шавийн дамжуулалтаар оруулсан гоолын ачаар тэдэнд энэ ялалт ирсэн юм.

Германы “Бавари Мюнхен” клубийн довтлогч Роберт Левандовски “Бенфика” багийн эсрэг Аваргуудын лигийн 50 дахь гоолоо оруулжээ.

Германы аваргууд өрсөлдөгчөө 5:1-ээр илт давуу ялахад Арьян Роббен хоёр, Фрэнк Рибери нэг гоол хийж, польш довтлогч хоёр гоол оруулснаар Аваргуудын лигт 50, 51 дэх гоолоо бүртгүүлэв.

Ингэснээр Р.Левандовски тус тэмцээнд 50 ба түүнээс олон гоол оруулсан долоо дахь тоглогч болсон юм.

Польш эр нийт 77 тоглолтод 51 гоол оруулсан. Тэрбээр 2011 оноос хойш Аваргуудын лигт өрсөлдөж, 2014 онд “Бавари”-д нэгдэхээсээ өмнө “Борусси Дортмунд”-д эхний 17 гоолоо оруулж байв.

Аваргуудын лигт 50 ба түүнээс дээш гоол оруулсан тоглогчид:

---

• 121 – Криштиану Роналду (Манчестер Юнайтед, Реал Мадрид, Ювентус)
• 105 – Лионель Месси (Барселона)
• 71 – Раул Гонзалес (Реал Мадрид, Шальке)
• 59 – Карим Бензема (Лион, Реал Мадрид)
• 56 – Руд ван Нистелрой (ПСВ Эйндховен, Манчестер Юнайтед, Реал Мадрид)
• 51 – Роберт Левандовски (Борусси Дортмунд, Бавари Мюнхен)
• 50 – Терри Анри (Монако, Арсенал, Барселона)

Аваргуудын лигийн хэсгийн шатны дөрөв дэх тоглолтууд өнөөдөр эхэллээ. Испанийн “Барселона” клуб хамгийн түрүүнд шөвгийн 16-д шалгарах эрхээ “халаасалсан” юм. 

---

ХЭСЭГ А

(Испани) Атлетико 2:0 Дортмунд (Герман)

Германы клуб энэ тоглолтод ялсан бол хэсгээсээ шалгарах, цаашлаад хэсгээ тэргүүлэх боломжтой байв. Гэхдээ Испанийн “Атлетико” клуб амар бууж өгөхийг хүссэнгүй. “Реал”-ын хүүхдийн багийн бүтээгдэхүүн Сауль Ньегис 33 дахь минутад гоолын салхийг хагалсан бол 80 дахь минутад Антоун Гриззман тооны харьцааг холдуулснаар багаа ялалтад хүргэв.

(Франц) Монако 0:4 Брюгге (Бельги) 

Бельгийн даруухан баг Аваргуудын лигийн хэсгийн шатанд ялалт байгуулах гэж 13 жил хүлээжээ. Довтлох чиглэлийн хагас хамгаалагч Ханс Ванакен эхний 17 минутад эхний хоёр гоол оруулж, бразил довтлогч Уэйсли Мораэс 24 дахь минутад тооны харьцааг холдуулав. Улмаар 85 дахь минутад Рууд Вормер сүүлийн цэгийг хатгаж, Терри Анригийн шинэ ажилд үнэлгээ өгсөн юм.

---

ХЭСЭГ B

(Итали) Интер Милан 1:1 Барселона (Испани)

Тус хоёр багийн тоглолт эвийн гэрээгээр шийдэгдсэн тул “Барселона” хасагдах шатанд өрсөлдөх багаар хамгийн түрүүнд тодорлоо. Энэ тоглолтод аргентин довтлогч Лионель Мессиг гэмтлээсээ эргэн ирж, талбайд гарч магадгүй хэмээн цуурхал тарсан ч гарсангүй. Эхний хагас, тэр бүү хэл 80 дахь минут хүртэл гоол ороогүй ч сэлгээнээс талбайд орж ирсэн Малком 83 дахь минутад гоол оруулаад баярын нулимс унагасан ч дөрвөн минутын дараа Мауро Икарди тоог тэнцүүллээ.

(Англи) Тоттенхэм Хотспур 2:1 ПСВ Эйндховен (Нидерланд)

Эхний 61 секундэд л Швейцарьт төрсөн нидерланд довтлогч Люк де Йонг булангаас ирсэн бөмбөгийг мөргөж гоолдоод зочин баг тэргүүлж эхэлсэн ч Харри Кэйний хоёр гоолын ачаар Лондоны клуб хэсгээсээ гарах найдвараа хадгалж үлдлээ. Тэд энэ сарын 28-нд “Интер Милан”-ыг хожиж чадвал оноо тэнцэх боломжтой юм.

---

ХЭСЭГ С

(Итали) Наполи 1:1 ПСЖ (Франц)

Словакийн Марек Хамшик “Наполи”-гийн төлөө 512 дахь тоглолтод оролцож, тус багийн түүхэнд хамгийн олон тоглолтод оролцсон тамирчин болсон юм. Тэрбээр энэ хугацаанд 120 гоол оруулсан үзүүлэлтээр багийнхаа бүх үеийг тэргүүлдэг. Испани тоглогч Хуан Бернат эхний хагасын нэмэлт минутад гоолдсон ч “Наполи”-гийн Лоренцо Инсинье 63 дахь минутад торгуулийн цохилтоор тооны харьцааг тэнцүүлэв. Ийнхүү “С” хэсгийн хүснэгт тун сонирхолтой боллоо.

(Серб) Црвена Звезда 2:0 Ливерпуль (Англи)

Милан Павковын хоёр гоолын ачаар Сербийн “Црвена Звезда” клуб Аваргуудын лигт анхны ялалтаа байгууллаа. Ингэснээр “С” хэсгийн тэргүүлэгч баг болон хамгийн сүүлд бичигдэж буй багийн хооронд хоёр л онооны зөрүүтэй болсноор энэ хэсгийн аль ч баг хасагдаж мэдэх аюул бий болов.

---

ХЭСЭГ D

(Португал) Порто 4:1 Локомотив Москва (ОХУ)

“Порто”-гоос дөрвөн тоглогч гоол оруулж, “Локомотив Москва”-г ялснаар хэсгээ тэргүүлж эхэллээ. Тэд дөрвөн тоглолтоос гурван хожил, нэг тэнцээ авснаар 10 оноотой болов.

(Герман) Шальке 2:0 Галатасарай (Турк)

Германы клуб Аваргуудын лигийн хоёр дахь хожлоо авснаар найман оноотой болж, “Порто”-гийн ард бичигдэж эхэллээ. Гол өрсөлдөгчөөсөө дөрвөн оноогоор холдсон учир дараагийн хоёр тоглолтод алдаа гаргахгүй байхад л хэсгээсээ шалгарна.

Гурван долоо хоногийн турш түр завсарласны эцэст Аваргуудын лигийн хэсгийн шатны гурав дахь тойргийн тоглолт эхэллээ. Сүүлийн үед тун тааруу байсан Испанийн “Реал Мадрид” хоёр дахь ялалтаа авсан бол Италийн “Ювентус” гол өрсөлдөгчөө ялснаар хэсгээ итгэл төгс тэргүүлж байна.

---

ХЭСЭГ Е

АЕК Афинс 0:2 Бавари Мюнхен

Германы аваргууд Грекийн багуудад хожигдож үзээгүй цувралаа үргэлжлүүлэв. Эхний гоолыг Хавьер Мартинес, удаах гоолыг Роберт Левандовски оруулж, багаа ялалтад хүргэв.

Аякс 1:0 Бенфика

Марокко гаралтай нидерланд тоглогч Нуссаир Мазрауи 92 дэх минутад энэ тоглолтын эхний бас эцсийн гоолыг оруулснаар багаа ялалтад хөтлөв. Түүний ачаар “Аякс” Германы аваргуудтай бүх үзүүлэлтээр ижилхэн болж, хэсгээ тэргүүлсэн хэвээр байна.

---

ХЭСЭГ F

Хоффенхейм 3:3 Лион 

Германы багаас Андре Крамарич хоёр гоол оруулснаар баг нь хожиж явсан ч Францын “Лион” амар дийлдэх баг биү гэдгээ харуулсан. Хоёрдугаар үед найман минутын зайтай хоёр гоол оруулснаар тэргүүлж эхэлсэн ч Жоэлинтин тэнцээний гоолыг оруулж, багаа аварлаа.

Шахтёр 0:3 Манчестер Сити

Английн аваргууд зовлон багатай хэсгээ тэргүүлж байна. Украины клубийн хувьд гэртээ хийсэн тоглолтод анх удаа Английн багуудад хожигдлоо.

---

ХЭСЭГ G

Рома 3:0 ЦСКА Москва

Э.Жеко хоёр, Чингиз Ундер нэг гоол оруулснаар “Рома” хэсгээ тэргүүлж эхэллээ.

Реал Мадрид 2:1 Виктория Пльзень

К.Бензема, Марсело нарын гоолын ачаар “Реал Мадрид” сүүлийн зургаан тоглолтод эхний хожлоо авлаа. Тэд “Рома”-тай оноо тэнцүү ч оруулсан гоолынхоо зөрүүгээр ард нь жагсаж яваа юм.

---

Янг Бойс 1 : 1 Валенсиа

Швейцарийн клуб талбай дээрээ Испанийн “Валенсиа”-тай оноо хувааснаар аваргуудын лигт анхны оноогоо авлаа.

Манчестер Юнайтед 0:1 Ювентус

К.Роналду Олд Траффорд цэнгэлдэхэд “Ювентус”-ын өмсгөлтэй эргэн ирсэн ч гоол оруулж чадсангүй. Энэ тоглолтын цор ганц гоолыг 17 дахь минутад Паола Дибала оруулсан юм.

 

Францын “ПСЖ”-д зүтгэдэг бразил довтлогч Нэймар Сербийн “Рэд Стар Белград” багийн эсрэг гурван гоол оруулж, Аваргуудын лигт 30 гоолтой болсноор нутаг нэгт Какатай эн зэрэгцэж, бразилчуудаа тэргүүлж эхэллээ. Ингээд Аваргуудын лиг болон Европа лигт оролцсон бразилчуудын сонирхолтой үзүүлэлтийг сонирхуулья.

---

Аваргуудын лиг/Европа лигт хамгийн олон тоглолтод оролцсон:

• 128: Роберто Карлос (Реал Мадрид, Фенербахчэ)
• 111: Дани Алвеш (Севилья, Барселона, Ювентус, ПСЖ)
• 97: Максуэлл (Аякс, Интер, Милан, Барселона, ПСЖ)
• 90: Марсело (Реал Мадрид)
• 88: Кака (Реал Мадрид, АС Милан)
• 87: Фернандино (Шахтёр Донецк, Манчестер Сити)
• 85: Лусио (Байер Леверкузен, Бавари Мюнхен, Интер, Ювентус)
• 78: Ривалдо (Барселона, АС Милан, Олимпиакос)
• 76: Дида (АС Милан)
• 73: Жиован Элбер (Бавари Мюнхен, Лион)

---

Аваргуудын лигт хамгийн олон гоол оруулсан бразил тоглогч:

• 30: Нэймар (Барселона, ПСЖ)
• 30: Кака (Реал Мадрид, АС Милан)
• 27: Ривалдо (Барселона, АС Милан, Олимпиакос, АЕК Афинс)
• 25: Жиован Элбер (Бавари Мюнхен, Лион)
• 25: Марио Жардел (Порто, Галатасарай)
• 21: Луис Адриано (Шахтёр Донецк, Спартак Москва)
• 18: Жунино (Лион)
• 18: Рональдино (Барселона, АС Милан)
• 17: Халк (Порто, Зенит)
• 17: Уильян (Шахтёр Донецк, Челси)

---

 

Испанийн “Барселона” клубийн хамгаалагч Жерард Пике Аваргуудын лигт 100-гаас олон тоглолтод оролцсон 36 дахь тоглогч боллоо. Тэрбээр Английн “Тоттенхэм” клубийн эсрэг тоглолтод гараанд гарч, энэ үзүүлэлтэд хүрсэн юм. 2008 онд Каталаны багийг зорихоос өмнө Ж.Пике Английн “Манчестер Юнайтед” клубт Аваргуудын лигийн дөрвөн тоглолтод оролцсон бол “Барселона”-гийн өмсгөлтэй 96 тоглолтод оролцжээ.

Энэ хугацаанд Ж.Пике Аваргуудын лигт гурван удаа түрүүлж, 2014-15 оны Аваргуудын лигийн бэлгэдлийн шигшээ багт нэрлэгдсэн билээ.

Аваргуудын лигт 100+ гаас олон тоглолт хийсэн:

• 169 – Икер Касильяс* (Реал Мадрид 150, Порту 19)
• 154 – Криштиану Роналду* (Ман.Юнайтед 52, Реал Мадрид 101, Ювентус 1)
• 151 – Шави Хернандес (Барселона)
• 142 – Рауль Гонзалес (Реал Мадрид 130, Шальке 12)
• 141 – Райан Гигз – (Манчестер Юнайтед)

• 130 – Андрес Иньеста (Барселона)
• 127 – Лионель Месси* (Барселона)
• 125 – Кларенс Сийдорф (Аякс 11, Реал Мадрид 25, Ас Милан 89)
• 124 – Пол Скоулз (Манчестер Юнайтед)
• 120 – Златан Ибрагимович (Аякс 19, Ювентус 19, Интер Милан 22, Барселона 10, Ас Милан 16, Парис 33, Манчестер Юнайтед 1)
• 120 – Роберто Карлос (Реал Мадрид 107, Фенербахчэ 13)
• 119 – Шави Алонсо (Реал Сосьедад 8, Ливерпуль 39, Реал Мадрид 47, Бавари Мюнхен 25)
• 117 – Жианлужи Буффон* (Парма 6, Ювентус 111)
• 115 – Карлес Пуйоль (Барселона)
• 115 – Серхио Рамос* (Реал Мадрид)

• 112 – Терри Анри (Монако 9, Барселона 26, Арсенал 77)
• 112 – Филипп Лаам (Штутгарт 7, Бавари Мюнхен 105)
• 111 – Петр Чех (Спарта Пара 12, Челси 94, Арсенал 5)
• 109 – Паоло Малдини (Ас Милан)
• 109 – Гари Невилл (Манчестер Юнайтед)
• 109 – Жон Терри (Челси)
• 108 – Дани Алвеш* (Севилья 8, Барселона 80, Ювентус 12, Парис 8)
• 108 – Эшли Коул (Арсенал 45, Челси 60, Рома 3)
• 108 – Патрик Евра (Монако 21, Манчестер Юнайтед 65, Ювентус 22)
• 108 – Андреа Пирло (Интер Милан 5, Ас Милан 78, Ювентус 25)
• 107 – Дэвид Бекхэм (Манчестер Юнайтед 77, Реал Мадрид 26, Ас Милан 2, Парис 2)
• 107 – Арьян Роббен* (ПСВ Эйндховен 10, Челси 19, Реал Мадрид 11, Бавари Мюнхен 67)

• 106 –  Карим Бензема* (Лион 19, Реал Мадрид 87)
• 106 – Виктор Валдес (Барселона)
• 105 – Фрэнк Лампард (Челси 102, Манчестер Сити 3)
• 104 – Цеск Фабрегас (Арсенал 55, Барселона 26, Челси 23)
• 103 – Луиш Фигу (Барселона 24, Реал Мадрид 58, Интер Милан 21)
• 103 – Оливер Канн (Бавари Мюнхен)
• 101 – Томас Мюллер* (Бавари Мюнхен)
• 100 – Жерард Пике* (Манчестер Юнайтед 4, Барселона 96)
• 100 – Андрей Шевченко (Ас Милан 59, Челси 15, Динамо Киев 26)

 

Аваргуудын лигийн хоёрдугаар тойрогт Италийн “Ювентус” клубийн аргентин тоглогч Пауло Дибала болон “Рома”-гийн довтлогч Эдин Жеко, “ПСЖ”-гийн лидер Нэймар нар аваргуудын лигийн энэ улиралд хет трик буюу нэг тоглолтод гурван гоол оруулсан тоглогчид болсон билээ.

Аваргуудын лигт ийм тохиолдол тийм ч олон биш. Ийм тэмцээн зохион байгуулах болсон цагаас хойш тоглогчид 116 удаа хет трик гүйцэтгэсэн удаатай.

Ингээд хет триктэй холбоотой сонирхолтой баримтыг хөлбөмбөг сонирхогчдод хүргэе.

---

Тоглогч

Хамгийн олон хет трик гүйцэтгэсэн тоглогч:

• 8 Лионель Месси (Барселона)
• 7 Криштиану Роналду (Реал Мадрид)
• 3= Филиппо Инзаги (Ювентус 2, Ас Милан)
• 3= Марио Гомез (Бавари Мюнхен)
• 3= Луис Адриано (Шахтёр)

Нийт 83 тоглогч Аваргуудын лигт хет трик гүйцэтгэж байжээ. К.Роналду 18 сарын хугацаанд буюу 2015 оны арванхоёрдугаар сараас 2017 оны тавдугаар сар хүртэл бүх хет трикээ бүртгүүлсэн.

Нэг улиралд хамгийн олон хет трик гүйцэтгэсэн тоглогч:

• 3 Криштиану Роналду (2015/16)
• 2= Криштиану Роналду (2016/17)
• 2= Лионель Месси (2011/12, 2016/17)
• 2= Луис Адриано (2014/15)
• 2= Марио Гомез (2011/12)

Энэ улиралд хет трик гүйцэтгэсэн тоглогч:

• Лионель Месси (Барселона 4:0 ПСВ Эйндховен)
• Пауло Дибала (Ювентус 3:0 Янг Бойс)
• Эдин Жеко (Рома 5:0 Плзен)
• Нэймар (ПСЖ 6:1 Рэд Стар Белград)

Хамгийн хурдан хет трик:

• 8 минут: Бафетимби Гомис (Динамо Загреб 1:7 Лион, 07/12/2011)
• 9 минут: Майк Невель (Блакбурн 4:1 Росенборг, 06/12/1995)
• 11 минут: Криштиану Роналду (Реал Мадрид 8:0 Малмё, 08/12/2015)
• 12 минут: Луис Адриано (БАТЕ Борисов 0:7 Шахтёр, 21/10/2014)
• 14 минут: Нэймар (Барселона 6:1 Селтик, 11/12/2013)

Майк Невель богино хугацаанд төгс буюу баруун, зүүн хөлөөр цохиж, нэг гоолоо мөргөж хет трик толилуулсан тоглогч.

Хамгийн залуу:

• Рауль Гонзалес, 18 нас, 114 хоног (Реал Мадрид 6:1 Ференцварош, 18/10/1995)

Хамгийн ахмад:

• Клаудио Писарро, 34 нас, 34 хоног (Бавари Мюнхен 6:1 Лилль, 07/11/2012)

К.Писарро 2015 онд “Вердер Бремен”-ий тоглогч байхдаа Бундес лигт хамгийн ахмад насандаа хет трик гүйцэтгэсэн тоглогч болжээ.

Аваргуудын лигт анхны тоглолтод хет трик гүйцэтгэсэн тоглогчид:

• Марко ван Бастен (АС Милан 4:0 Гётеборг, 25/11/1992)
• Фаустино Асприлья (Ньюкастл Юнайтед 3:2 Барселона, 17/09/1997)
• Якубу Айегбени (Маккаби Хаифа 3:0 Олимпиакос, 24/09/2002)
• Уэйн Руни (Манчестер Юнайтед 6:2 Фенербахчэ, 28/09/2004)
• Винченцо Яквинта (Удинезе 3:0 Панатинаикос, 14/09/2009)
• Графите (Волфсбург 3:1 ЦСКА Москва, 15/09/2009)
• Ясин Брахими (Порту 6:0 БАТЭ Борисов, 17/09/2014)

Марко ван Бастен Аваргуудын лигийн эхнийхээ тоглолтод дөрвөн гоол оруулжээ.

Нэгээс олон клубт байхдаа хет трик хийсэн тоглогчид:

• Филиппо Инзаги (Ювентус 2, АС Милан)
• Марко Симон (АС Милан, Монако)
• Рой Макаая (Депортиво, Бавари Мюнхен)
• Руд ван Нистелрой (ПСВ Эйндховен, Манчестер Юнайтед)
• Андрей Шевченко (Динамо Киев, АС Милан)
• Дидье Дрогба (Марсель, Челси)
• Майкл Оуэн (Ливерпуль, Манчестер Юнайтед)
• Самуэль Это’о (Барселона, Интер)
• Роберт Левандовски (Борусси Дортмунд, Бавари Мюнхен)
• Нэймар (Барселона, ПСЖ)

Нэг тоглолтод хамгийн их гоол оруулсан:

• 5= Лионель Месси (Барселона 7:1 Леверкузен, 07/03/2012)
• 5= Луис Адриано (БАТЭ 0:7 Шахтёр, 21/10/2014)
• 4= Марко ван Бастен (АС Милан 4:0 Гётеборг, 25/11/1992)
• 4= Симон Инзаги (Лацио 5:1 Марсель, 14/03/2000)
• 4= Дадо Пршо (Монако 8:3 Депортиво, 05/11/2003)
• 4= Рууд ван Нистелрой (Манчестер Юнайтед 4:1 Спарта, 03/11/2004)
• 4= Андрей Шевченко (Фенербахчэ 0:4 АС Милан, 23/11/2005)
• 4= Лионель Месси (Барселона 4:1 Арсенал, 06/04/2010)
• 4= Бафетимби Гомис (Динамо Загреб 1:7 Лион, 07/12/2011)
• 4= Роберт Левандовски (Борусси Дортмунд 4:1 Реал Мадрид, 24/04/2013)
• 4= Златан Ибрагимович (Андерлейхт 0:5 ПСЖ, 23/10/2013)
• 4= Криштиану Роналду (Реал Мадрид 8:0 Малмё, 08/12/2015)

К.Роналду ердөө 21 минутад “покер” буюу дөрвөн гоол оруулж байсан билээ. Харин Р.Левандовски дөрвөн гоолынхоо гурвыг нь долоон минутад амжуулсан түүхтэй.

Хет трик хийсэн хамгаалагч:

• Левен Кюрзава (ПСЖ 5:0 Андерлейхт, 31/10/2017)

Хет трик хийж чадаагүй ч хамгийн олон гоол оруулсан:

• 42 Томаш Мюллер (Бавари Мюнхен)
• 32 Эдинсон Кавани (Наполи, ПСЖ)
• 29= Патрик Клуивер (Аякс, Барселона, ПСВ Эйндховен)
• 29= Арьян Роббен (ПСВ Эйндховен, Челси, Реал Мадрид, Бавари Мюнхен)
• 29= Дэвид Трезеге (Монако, Ювентус)

---

Клуб

Хамгийн олон хет трик хийсэн баг:

• 13 Барселона (6 тоглогч)
• 11 Реал Мадрид (4)
• 7 Бавари Мюнхен (5)
• 6= Арсенал (6)
• 6= Манчестер Юнайтед (5)
• 5= АС Милан (5)
• 5= Ювентус (4)

Португалын “Бенфика” (96 тоглолт), Германы “Байер Леверкузен” -ий (95) нэг ч тоглогч хет трик хийж байгаагүй аж.

Эсрэг багтаа хамгийн олон хет трик алдсан баг:

• 6 Андерлейхт (Бельги)
• 5 Олимпиакос (Грек)
• 4 БАТЭ Борисов (Беларусь)

Италийн “Ювентус” (181 тоглолт), Английн “Челси” (156), Германы “Борусси Дортмунд” (107), Английн “Ливерпуль” (102) багууд эсрэг багийнхаа тоглогчдод хет трик хийх боломж олгоогүй гэнэ.

---

Тэмцээн

Хамгийн олон хет трик хийсэн улирал:

• 9 2016/17 оны улирал
• 8= 2013/14
• 8= 2004/05
• 8= 2002/03

Өмнө нь буюу 1999/2000 болон 2000/01 онд 157 тоглолт хийдэг байв. Харин өнөөгийн системээр буюу 2003/04 оноос хойш 125 тоглолт зохион байгуулах болжээ.

 Нэг тойрогт хамгийн олон хет трик хийсэн:

• 3= 02-03/10/2018 (Пауло Дибала, Эдин Жеко, Нэймар)
• 3= 08-09/12/2015 (Криштиану Роналду, Карим Бензема, Оливер Жигу)
• 3= 25-26/11/2014 (Лионель Месси, Серхио Агуэро, Марио Манжукич)
• 3= 22-23/11/2005 (Андрей Шевченко, Леван Кобиашвили, Адриано)

Нэг өдөр хийсэн хамгийн олон хет трик:

• 3 23/11/2005 (Андрей Шевченко, Леван Кобиашвили, Адриано)

Хет трик хийсэн тоглогчдыг улсаар нь харьцуулвал:

• 14 Бразил (9 тоглогч)
• 12 Аргентин (4)
• 10 Франц (9)
• 9 Англи (7)
• 8= Испани (7)
• 8= Португал (2)

34 улсын тоглогчид Аваргуудын лигт хет трик толилуулсан. Харин одоогоор Бельги, Чех, Египет зэрэг улсаас хет трик хийсэн тоглогч тодроогүй аж.

Ялалт, хожигдол эсвэл тэнцээ:

• 112 ялж
• 2 тэнцэж
• 2 хожигдсон

Хет трик хийсэн ч баг нь хожигдсон хоёр тохиолдол бол Бразилын Роналдо (Манчестер Юнайтед 4:3 Реал Мадрид, 2003) болон Уэйлсийн Гарет Бэйл (Тоттенхэм 3:4 Интер Милан, 2010) юм.

Хет трик хийсэн үе, шат:

• 93 Хэсгийн шат
• 12 Шөвгийн 16
• 6 Шөвгийн 8
• 4 Хагас шигшээ
• 0 Шигшээ

Аваргуудын лигийн хоёрдугаар тойргийн тоглолт өндөрлөв. Испанийн “Барселона”, Италийн “Интер” болон “Атлетико Мадрид”, “Борусси Дортмунд” багууд зургаан оноотой болж, хэсгээ итгэл төгс тэргүүлж явна.

---

Хэсэг А

Атлетико Мадрид 3:1 Клуб Брюгге

Испанийн клубт зүтгэдэг франц довтлогч Антоун Гриззман Аваргуудын лигийн 8000 дахь гоолын эзэн боллоо. Тэрбээр 28 дахь минутад гоолын салхийг хагалсан ч эсрэг багийн нигерь тоглогч Арно Груневелд эхний хагаст тоог тэнцүүлсэн. Гэхдээ хоёрдугаар үед А.Гриззман, Кокэ нар тооны харьцааг холдуулж, “Атлетико Мадрид” хоёр тоглолтоос зургаан оноотой боллоо.

Борусси Дортмунд 3:0 Монако

“Атлетико Мадрид”-ын адил Германы “Борусси Дортмунд” хэсэгтээ хоёр тоглоод зургаан оноотой боллоо. Хоёрдугаар үед сэлгээнээс талбайд гарсан дани хөлбөмбөгчин Якоб Бруун-Ларсен эхний гоолыг оруулж, испани довтлогч Пако Алькасер, багийн ахлагч Марко Ройс нар тооны зөрүүг холдуулжээ.

---

Хэсэг Б

Тоттенхэм 2:4 Барселона

Бразил хагас хамгаалагч Филиппе Коутиньо хоёр дахь, хорват эр Иван Ракитич 28 дахь минутад гоол оруулж, эхний хагаст Каталаны баг илүүрхсэн. Хоёрдугаар үед талбай дээрээ тоглож буйгаа “ухаарсан” Хойд Лондоны клубийн ахлагч Харри Кэйн тооны зөрүүг ойртуулсан ч Лионель Месси тэдэнд боломж олгосонгүй. Хоёр багаас аргентин эрчүүд төгсгөлийн гоол оруулж, Л.Мессигийн Аваргуудын лигт оруулсан гоолын тоо 105-д хүрлээ.

ПСВ Эйндховен 1:2 Интер Милан

Талбайн эзэн багаас Пабло Росарио эхний гоолыг оруулсан ч Рада Наингголан, Мауро Икарди нар багаа ялалтад хөтлөв. Ингэснээр Италийн “Интер Милан” клуб зургаан оноотой, Барсагийн хамт хэсгээ тэргүүлж байна.

---

Хэсэг С

ПСЖ 6:1 Рэд Стар Белград

Францын аваргууд эхний тоглолтод хожигдсон уураа Сербийн багт гаргалаа. Бразил довтлогч Нэймар Аваргуудын лигийн энэ улиралд хет трик толилуулсан дөрөв дэх тоглогч боллоо. Түүнчлэн Аваргуудын лигт нэгээс олон удаа хет трик хийсэн гурав дахь бразил тоглогч болсон юм. Түүнээс өмнө Луис Адриано, Адриано нар ийм үзүүлэлт харуулж байв. Үүгээр ч зогсохгүй, Аваргуудын лигт 30 дахь гоолоо оруулж, Какагийн амжилттай зэрэгцлээ.

Наполи 1:0 Ливерпуль

Италийн “Наполи” клуб 90 дэх минутад Лоренцо Инсиньегийн оруулсан гоолын ачаар хоёр тоглолтоос дөрвөн оноотой болж, хэсгээ тэргүүлж эхэллээ.

---

Хэсэг Д

Локомотив Москва 0:1 Шальке

Цаг агаарын хүнд хэцүү нөхцөлд өрнөсөн уг тоглолт америк эр Уэстон Маккеннигийн мөргөж оруулсан ганц гоолоор өндөрлөв. Оросын клуб хоёр дахь ялагдлаа хүлээсэн бол “Шальке” 4 оноотой боллоо.

Порто 1:0 Галатасарай

Моусса Марегагийн 49 дэх минутад мөргөж оруулсан гоолын ачаар “Порто” ялалт байгуулав. Хашир хаалгач Икер Касильяас, хамгаалагч Фернандо Муслерагийн чадварлаг тоглолтын ачаар Португалын клуб хаалгандаа гоол алдаагүй юм.

 

Аваргуудын лигийн хэсгийн шатны хоёр дахь тоглолтууд өнөөдөр эхэллээ. Өнөөдөр нийт дөрвөн хэсгийн найман тоглолт явагдсан юм. Таамаг ёсоор К.Роналдугүй ч “Ювентус”, “Манчестер Сити” зэрэг том багууд ялалт байгуулсан ч “Реал Мадрид” ялагдаж, “Бавари Мюнхен”, “Манчестер Юнайтед” тэнцсэн үдэш байлаа.

---

Хэсэг Е

Бавари Мюнхен 1:1 Аякс

Арьян Роббений хөндлөн дамжуулалтаар Матс Хуммельс тоглолтын дөрөв дэх минутад мөргөн, гоол оруулж, баг нь оноогоор тэргүүлсэн ч марокко гаралтай ч нидерланд тоглогч Нуссаир Мазрауи 22 дахь минутад тэнцээний гоол оруулж, хоёр баг оноо хуваалаа. Германы аваргууд талбай дээрээ өрсөлдөгчөө хожиж чадаагүй юм.

АЕК Афинс 2:3 Бенфика

Харис Сеферович, Алехандро Гримальдо нарын эрт оруулсан гоолын ачаар “Бенфика” хожиж эхэлсэн ч Виктор Клонаридис хоёрдугаар хагаст 10 минутын зайтай хоёр гоолоор хариу барьж, тооны харьцааг 2:2-оор тэнцүүлсэн. Эхний үед “Бенфика”-гийн Рубен Диас хоёр шар хуудас авч, талбайг орхисон нь тоглолтын хэмнэлд нөлөөлсөн ч үр дүн нь ижилхэн байлаа. 62 дахь минутад сэлгээнээс талбайд гарсан Алфа Семедо гурав дахь гоолыг оруулснаар Португалын баг өрсөлдөгчөө талбайд нь ялсан аж.

---

Хэсэг F

Хоффенхэйм 1:2 Манчестер Сити

Алжир гаралтай франц тоглогч Исхак Бельфодиль ердөө 44 секундэд “Манчестер Сити”-гийн хаалгыг гоолоор мялааж, хөгжөөн дэмжигчдээ баярлуулсан ч төгсгөл нь тэдний хүслээр болсонгүй. Серхио Агуэро тооны харьцааг тэнцүүлж, Давид Сильва тоглолтын үндсэн цаг дуусахаас гурван минутын өмнө хожлын гоол оруулсан юм.

Лион 2:2 Шахтёр Донецк

Бразил довтлогч Жуниор Мораесийн хоёр гоолын ачаар Украины клуб эсрэг багийн талбайгаас гурван оноотой буцах тун дөхсөн ч Моусса Дэмбэлэ, Лео Дубоис нарын гоолын ачаар хоёр баг эвийн гэрээ байгуулав.

---

Хэсэг G

ЦСКА Москва 1:0 Реал Мадрид

Английн “Эвертон”-оос зээлээр Орост очсон хорват довтлогч Никола Влашичийн хоёр дахь минутад хийсэн цор ганц гоолын ачаар “ЦСКА Москва” хүчирхэг “Реал Мадрид”-ыг талбай дээрээ буулган авлаа. Тоглолтын 95 дахь минутад багийн ахлагч Игорь Акинфеев улаан хуудас авч, талбайг чөлөөлжээ.

Рома 5:0 Виктория Пльзень

Эдин Жеко хет трик гүйцэтгэж, турк тоглогч Чингиз Ундер, Жастин Клюйверт нар тус бүр нэг гоол оруулснаар Италийн “Рома” Чехийн аваргуудад хөлбөмбөгийн хичээл заалаа.

---

Хэсэг H

Ювентус 3:0 Янг Бойс

К.Роналду улаан хуудасны торгуулийн улмаас энэ тоглолтыг өнжсөн ч түүний эзгүйд Пауло Дибала хет трик гүйцэтгэснээр баг нь хоёр дахь ялалтаа авлаа. Швейцарийн аваргуудаас Мохамед Али Камара улаан хуудас авч, 78 дахь минутаас хүн дутуу үлдсэн.

Манчестер Юнайтед 0:0 Валенсиа

Хоёр багт гоол оруулах боломж их гарсан ч ашиглаж чадаагүй. Ялангуяа М.Рашфорд тоглолтын төгсгөлд хөндлөвч оносон нь Улаан чөтгөрүүдийн хөгжөөн дэмжигчдийг гонсойлгов.

 

 

Португалын Криштиану Роналду, Аргентинийн Лионель Месси хоёрыг энэ цаг үеийн шилдэг хөлбөмбөгчин гэдгийг хүн бүр хүлээн зөвшөөрнө. Аваргуудын лигт тэдний тогтоосон дээд амжилт нэгээр тогтохгүй олон бий. Тэднийг их спортоо орхих үед доор дурдах олон дээд амжилтыг өөрсдийнхөө нэр дээр бичүүлж, алдарын оргилд гарснаа батлах боломж бас байгаа. Одоогоор тэдний хүрч чадаагүй рекорд амжилтыг сонирхуулья.

---

Шигшээ тоглолтод оруулсан гоол

• Шигшээ тоглолтод хамгийн гоол оруулсан: 7 – Алфредо Ди Стефано, Ференц Пушкаш (хоёул Реал Мадрид)
• Хамгийн олон удаа шигшээд дараалан гоол оруулсан: 5 – Алфредо Ди Стефано (Реал Мадрид, 1956, 1957, 1958, 1959, 1960)
• Нэг удаагийн шигшээ тоглолтод олон гоол оруулсан: 4 – Ференц Пушкаш (Реал Мадрид, 1960)

Л.Месси шигшээ тоглолтод хоёр гоол (2009 болон 2011) оруулсан бол К.Роналду дөрвийг (2008, 2014 онд тус бүр нэг, 2017 онд хоёр) шигтгэсэн ч “Реал”-ийн домгуудыг гүйцэхэд гурван гоол дутуу хэвээр байгаа аж. Португал довтлогч зургаан удаа шигшээд оролцсон нь Алфредо Ди Стефаногоос нэг, энэ үзүүлэлтээр рекорд эзэмшдэг Франческо Хенто (Реал Мадрид), Паоло Малдини (АС Милан) нарыг гүйцэхэд дахин хоёр удаа финалдах шаардлагатай.

---

UEFA-д хамгийн олон тоглолтод оролцсон

• Хамгийн олон удаа Аваргуудын лиг/Европа лигт тоглосон: 172 – Икер Касильес
• UEFA-гаас зохион байгуулсан клубийн түвшний тоглолтод оролцсон тоглогч: 179 – Икер Касильес

К.Роналду (123) болон Л.Месси (106) Европын хөлбөмбөгийн холбооноос зохион байгуулсан клубийн тэмцээнд хамгийн олон гоол оруулсан тоглогчид боловч нийт тоглолтод оролцсон тоогоор И.Касильесийг гүйцэхгүй. Одоогоор аргентин довтлогч 130 тоглолтод оролцсон бөгөөд энэ үзүүлэлтээр 35 дугаарт жагсана. Харин түүнээс хоёр жил, 139 хоногоор ах К.Роналду 162 тоглолтод оролцсон үзүүлэлтээр зургадугаарт бичигдэж байна. Одоогоор “Порту”-д зүтгэж буй испани хаалгачийг К.Роналду энэ жилдээ гүйцэхэд хэцүү. Гэхдээ хаалгачийг оролцуулахгүйгээр хамгийн олон тоглолтод оролцсон “АС Милан”-ы Паоло Малдинигийн рекордыг (174) давтахад 12 тоглолт дутуу байгаа аж.

---

Бусад рекордууд

• Аваргуудын лигийн цомыг хоёроос олон клубт байхдаа авсан тоглогч: 3 – Кларенс Сийдорф (Аякс 1995, Реал Мадрид 1998, АС Милан 2003, 2007)
• Аваргуудын лигт хамгийн олон клубийн өмнөөс гоол оруулсан тоглогч: 6 – Златан Ибрагимович (Аякс, Ювентус, Интер, Барселона, Милан, ПСЖ)

Хэрвээ К.Роналду “Ювентус”-ын хамт түрүүлж чадвал К.Сийдорфын рекордтой тэнцэх боломжтой. Тэрбээр “Манчестер Юнайтед”-д байхдаа 2008 онд, “Реал Мадрид”-ын бүрэлдэхүүнд 2014, 2017 оны шигшээд тус бүр гоол оруулж, Аваргуудын лигийн цом авсан билээ.

Харин З.Ибрагимовичийн рекордыг эвдэхийн тулд К.Роналду дахин гурван өөр багт нэгдэх шаардлагатай.

---

Хамгийн ахмад насандаа гоол оруулсан

• Аваргуудын лигийн шигшээ: Паоло Малдини (36 нас 333 хоног) – Милан V Ливерпуль (25/05/2005)
• Аваргуудын лигийн хэсгийн шат болон хасагдах шат: Францеско Тотти (38 нас 59 хоног) – ЦСКА Москва V Рома (25/11/2014)
• Европын цом: Манфред Бургсмюллер (38 нас 293 хоног) – Вердер Бремен V Динамо Берлин (11/10/1988)

П.Малдинигийн рекордыг шинэчлэхийн тулд К.Роналду 2021/22 оны Аваргуудын лигийн шигшээд өрсөлдөх хэрэгтэй. Харин Л.Мессигийн хувьд шигшээ тоглолт тавдугаар сарын 23-наас өмнө зохион байгуулагдвал  2023/24 онд л боломж гарна.

Хэсгийн шатанд гоолдсон рекордыг шинэчлэхэд К.Роналду 2023 оны дөрөвдүгээр сарын 1-нээс хойш, Л.Месси 2025 оны наймдугаар сарын 22-ноос хойш боломж гарна.

---

Хамгийн хурдан гоол

• Аваргуудын лиг: Рой Макаай (10.12 секунд) – Бавари Мюнхен V Реал Мадрид (07/03/2007)
• Аваргуудын лигийн шигшээ: Паоло Малдини (53 секунд) – Милан V Ливерпуль (25/05/2005)

К.Роналдугийн хамгийн хурдан гоол 2013 онд “Ювентус”-ын эсрэг дөрөв дэх минут, Л.Мессигийн богино хугацаанд оруулсан гоол “Селтик”-ийн эсрэг 2016 онд гурван минутад оруулсан гэж тэмдэглэгджээ. Аваргуудын лигийн шигшээд Л.Мессигийн оруулсан хоёр гоол хоёул хоёрдугаар хагасаас, К.Роналдугийн хурдан гоол нь мөн “Ювентус”-ын эсрэг 20 дахь минутад орж байв.

---

Хэт Трик

• Аваргуудын лигт хамгийн хурдан хугацаанд хэт трик хийсэн тоглогч: Бафетимби Гомис (8 минут) – Динамо Загреб V Олимпик Лион, 07/12/2011

К.Роналду, Л.Месси хоёул хамгийн олон хэт трик хийсэн тоглогчид. Гэхдээ Б.Гомисын найман минутад гурван гоол оруулсан үзүүлэлтийг давж чадаагүй. Аргентин довтлогчийн хамгийн богино хугацаанд гүйцэтгэсэн хэт трик 22 минут үргэлжилсэн бол К.Роналду 12 минутад амжуулсан юм.

---

Хамгийн урт үргэлжилсэн цуврал

• Аваргуудын лигийн хамгийн олон улиралд гоол оруулсан: Райан Гигз (16)

Л.Месси 14 улирал дараалан гоол оруулсан амжилтаараа Рауль Гонзалестай тэнцсэн. Харин К.Роналду 13 улирал дараалан гоолдсон. Харин Р.Гигзийн амжилтыг эвдэхийн тулд португал довтлогч 40 нас хүртлээ хөлбөмбөгөө үргэлжлүүлэх шаардлагатай бол Л.Месси 2020/21 онд тэнцэж чадах юм.

---