Монголын хөлбөмбөгийн шигшээ багийн ахлах дасгалжуулагчаар Японы Шүйчи Масэ томилогдлоо. Өдгөө 47 настай довтлогч асан Ш.Масэ 2023 оны нэгдүгээр сарын 31-нд хүртэл Монголын насанд хүрэгчдийн шигшээ болон 23 хүртэлх насны залуучуудын багийг удирдах аж.
Японы хөлбөмбөгийн холбооноос зохион байгуулдаг Азийн хөлбөмбөгийг хөгжүүлэх хөтөлбөрийн хүрээнд Ш.Масэ манай улсад дасгалжуулагчаар ажиллах болжээ.
Энэ талаар өнөөдөр буюу дөрөвдүгээр сарын 8-нд Японы хөлбөмбөгийн холбооны захирлуудын зөвлөлийн цахим хурлаар зарласан юм.
Ш.Масэ 2006 оноос “Жэфф Юнайтед Чиба” багийн дасгалжуулагч Ивица Ошимын хэлмэрч, дасгалжуулагчаар ажлын гараагаа эхэлсэн. Улмаар “Фагиано Окияама”, “Токио Верди” багт туслах дасгалжуулагчаар ажиллаад “Акита Блаублиц”, “Эхимэ ФС”-д ахлах дасгалжуулагчаар томилогдож байв. Хамгийн сүүлд “Акита Блаублиц” багийн спорт хариуцсан тэргүүнээр ажилласан аж.
Тэрбээр Ниппон Спортын шинжлэх ухааны их сургуулийг төгсөөд 1997-2000 оны хооронд Хойд Америкийн лигт довтлогчоор тоглосон. Зодог тайлаад багагүй хугацаанд Хорватад амьдарсан нь хожим Ивица Ошимын хэлмэрч хийхэд тус болжээ. Англи, Испани, Хорват, Португал хэлээр ярьдаг аж.
Монголын шигшээ багийн ахлах дасгалжуулагчаар 2020 оны есдүгээр сараас хойш ажилласан словак мэргэжилтэн Растислав Бозикийн гэрээний хугацаа хэдхэн хоногийн өмнө дуусаж ажлаа өгсөн билээ. Тэрбээр Японоос шууд нутагтаа буцсан юм.