Испанийн “Реал Мадрид” клубийн хагас хамгаалагч, хорват залуу Матео Ковачич Английн “Челси” клуб рүү зээлээр тоглохоор тохиролцоонд хүрчээ. Хэрвээ энэ шийдвэр богино хугацаанд өөрчлөгдөхгүй бол хоёр тал тун удахгүй гэрээнд гарын үсэг зурах гэнэ.

М.Ковачичийн хувьд “Реал”-аас явах хүсэлтэй байгаагаа илэрхийлээд удсан. Тэрбээр шигшээ багийн хамтаар ДАШТ-д мөнгөн медаль зүүснийхээ дараа багаасаа явах хүсэлтэй байгаагаа мэдэгдсэн юм. Улмаар амралтаасаа эргэн ирээд бусад тоглогчидтой бус ганцаарчилсан бэлтгэл хийж, “Реал”-ийн нэг ч дасгалжуулагчтай холбоогүй байсан аж.

М.Ковачич “Реал”-д тоглох цаг бага байгаад сэтгэл дундуур байгаагаа илэрхийлсэн юм. Зарим эх сурвалжийн мэдээлснээр “Реал Мадрид” Лондоны клубийн хаалгач Тибо Куртуаг багтаа авахын тулд хагас хамгаалагчаа зээлээр явуулахаар тохиролцсон гэж мэдээлсэн. Гэхдээ одоогоор энэ нь баттай мэдээ биш гэнэ.