Дэлхий дээрх хамгийн олон үзэгчтэй, хамгийн алдартай хөлбөмбөгийн лигийн сүүлийн тойрог гайхалтай өрнөлтэй бас сэтгэл хөдлөл өндөртэй ер бусын үдэш болж өнгөрлөө. Олон өдөр, сар үзэчгүй хоосон, хөндий цэнгэлдэхэд үргэлжилсэн лигийн хаалтын тойрог багахан тооны үзэгчтэй явагдсан нь ч хөг нэмлээ.

SPS телевизийн баг хамт олны нөр их хөдөлмөр, хичээл зүтгэлээр цар тахалтай, хүнд хэцүү цагт ч бид английн лигийн тоглолтуудыг торох юмгүй үзэж байлаа. Сүүлийн тойрог зэрэгцэн явагдсан гайхалтай мөчүүдийг ч мөн тэдэнтэй хамт гэрчиллээ. Баярлалаа та бүхэнд.

Яагаад ер бусын үдэш болов гэж үү?

АВАРГУУД

Тиймээ тэд английн лигийн сүүлийн арван жилийн түүхэнд ийнхүү 5 дахь удаагаа түрүүлж байна. Түүгээр зогсохгүй гурван удаа аман хүзүүдсэнээс харвал үнэхээр тогтвортой, эзэрхэг он жилүүдийг үдэж буй нь илт. Энэ жилийн хувьд тэд бас болоогүй улаанбаатарын цагаар энэ ням гарагийн үүрээр аваргуудын лигт шигшээ тоглолт хийнэ гээд хотынхоны хувьд ааг омог, баяр хөөр дүүрэн буй билээ.

Харин энэ бүх амжилтын хажуугаар тэдэнд ер бусын мэдрэмж төрүүлж буй нэгэн бол яахын аргагүй цагтаа цалгиж, таарсан баг, хаалгач бүрийн торийг хөдөлгөж явсан аргентин залуу Кун Агуэрогийн үдэлт байв. 2011 онд нарлаг испаниас ирж байсан түүний түүх энэ клубын сүүлийн арван жилийн дардан амжилтын үетэй яв цав давхцаж байгаа нь нэгийг илтгэх буйзаа.

Ийнхүү ситид арван улирлыг өнгөрүүлэхдээ 182 гоолыг бүртгүүлээд байсан тэрээр энэ үдэш талбайд сэлгээгээр орж ирэхдээ хоёр гоолыг нэмж бүртгүүлсэнээр тийм ч хялбар арилахгүй нэгэн дээд амжилтыг өөрийн нэрээр тамгалчих нь тэр. Тиймдээ ч энэ үдэш хотынхоны хувьд ер бусын гэхээс өөр аргагүй байлаа. Болоогүй ээ түүнд дахин аваргуудын лигийн шигшээ тоглолт байгаа. Хотынхонд баяр хүргэе.

НЭГ ХОТЫНХОН

Орчин цагийн английн лигийг премьер лиг гэгдэх болсон цагаас эзэрхэг явсан Шотланд эрхэм Фергюсоноос хойш санасанд хүртлээ сэргэж чадахгүй яваа улаан чөтгөрүүд энэ улирлыг дэд байрт улирлын аваргуудаас 12 оноо дутуу, өнгөрсөн улирлын аваргуудаас 5 оноо илүү өндөрлүүлж байгаа нь тун олзуурхууштай үр дүн гэж болно.

Сүүлийн улирлуудын тааруухан амжилтад цөхөрсөн улаан чөтгөрүүд дасгалжуулагч Сульшераа солих гэж үзлээ, эцэстээ багийн эздээ эсэргүүцэж, олд трафорддоо бослого хүртэл гаргаад амжив. Харин урд шөнийн хувьд найман улирлын аялалаа өндөрлүүлж буй Хуан Матагийн гоол, түүний тэнгэрт халин одсон ээждээ зориулсан гоолын баяр ер бусын мэдрэмж төрүүлсэн юм.

КОПУУДЫН ҮДЭШ

Эзэрхэг хотынхоны ноёрхолыг сөрөн зогсож, хуучны эрин үеэ сэргээхээр шулуудсан Клоппын улаанууд сүүлийн гурван жилд аваргуудын лигт аман хүзүүдэж нэг үзээд, ирэх жил нь түрүүлсэн бол премьер лигт мөн аман хүзүүдэж нэг үзээд, ирэх жил нь түрүүлсэн тэднийг энэ улирлын аваргууд гээд зогсож байхад олон хүн гайхахааргүй байлаа. Хамгаалалтын шугамдаа Голланд азарга Ван Дайкийг залсан тэд тавдугаар тойргийн тэр нэг харамсалтай явдал болох хүртэл ийм адармаатай улирлыг өнгөрүүлнэ чинээ төсөөлөөгүй явсан бизээ.

ВВД-гээ улирал дуустал алдаад улмаар Матип, Гомез, Хэндо гэх мэтчилэн хамгаалалтын байрлалдаа суларсан нь ийнхүү улирлын төгсгөлийг ер бусын болгосон юм. Аварга болох нь бүү хэл эхний дөрөвт багтаж аваргуудын лигийн эрх авах эсэх нь эргэлзээтэй байсан тэд сүүлийн есөн тоглолтдоо 2 тэнцээ, 7 хожил байгуулсанаар бүр гуравдугаар байраар лигийг өндөрлүүллээ. Энэ бүх хугацаанд бэртэл гэмтлээс холуур, үргэлж бэлэн байсан нэгэн залуу, улаануудын гуравдугаар ахлагчаар нэрлэгдэх болсон Жини Виналдум таван улирлын эцэст ливерпүүлийн өмсгөлтэй мөн ахлагчийн туузтай сүүлийн удаа талбайд гарав.

Копуудын он удаан жил хүлээсэн, цомын бараа харалгүй хатсан сэтгэлийг дэвтээсэн аваргуудын лигийн 6 дахь цом нь хийсэн одож байх үед каталоны нэр төр Барселонагийн эсрэг толилуулсан тэр гайхалтай ер бусын мөчүүд нь түүнийг копуудын дунд домгийн хэмжээнд хүндлэгдэхэд хангалттай шалтгаан болох бизээ.

АЗТАЙ ЦЭНХЭРҮҮД

Сүүлийн хоёр долоо хоногийн хугацаанд эмэгтэйчүүдийн баг нь аваргуудын лигийн шигшээ тоглолтод бут ниргүүлж, харин эрчүүд нь английн цомын тэмцээний шигшээд үнэгнүүдэд ялагдаад байсан хэдий ч хүснэгтийн байрлал, авсан оноо, аваргуудын лигийн шигшээ тоглолтод шалгарч үлдсэн гээд тун давгүй нөхцөл байдалтай байв. Гэтэл ер бусын гэмээр тойрогт араас нь нэхэж явсан, гэхдээ аюул холуур гэж тооцоолж байсан Ливерпүүл ялалт байгуулж оноо дээшлээд, нэг цомыг нь булаагаад удаагүй Лейстэр тоглолтыг давамгай эхлүүлж, өөрсдөө Виллад гоол алдан хожигдож явахад цэнхэрүүдийн хөгжөөн дэмжигчдэд амар байгаагүй бизээ.

Улирлын дундуур клубын домогт тоглогч асан Лампардыгаа халж, Тушел гэх герман эрийг авчирсан нь нүдээ олсон гэж болохоор юм. Учир нь улирлын эхэнд тийм том хүлээлтгүй байсан тэдэнд магадгүй гурвалсан цомтой улирлыг өндөрлүүлэх ч боломжит нөхцөл бүрдэж байлаа. Харин одоо тэдэнд бодитоор биелүүлж болох нэг боломж аваргуудын лигийн галзуу ганц тоглолт үлдээд байгаа юм. Юутай ч үнэгнүүд эцсийн мөчид бүтэлгүйтсэнээр ирэх жилийн аваргуудын лигийн эрхээ баттай халаасласан цэнхэрүүдэд одоо алдах юмгүй, авах юмтай шигшээ тоглолт болох нь ойлгомжтой. Амжилт хүсье.

АЗГҮЙ ҮНЭГНҮҮД

Цагтаа Ливерпүүлийн жолоог атган лигт аман хүзүүдэж явсан Брендан Рожерстой үнэгнүүд өнгөрсөн улирлын нэгэн адил аваргуудын лигийн эрхээс үл ялиг дутуу оноотой хоцорлоо. Энэ удаад улирлын эцсийн шүгэл дуугартал боломж тэдний гарт байсаар байсныг хэлэх нь зүйтэй.

2019 онд Рожерстой зам нийлсэн Лейстер ситийг ийм дориун амжилттай бүр хоёр улирал дарааллан энэ амжилтаа бататгана гэж олон хүн тоцоолоогүй, бодоогүй болов уу. Гэхдээ тэд хоосонгүй одоогоос таван жилийн тэртээ лигийн түрүү хүртэж тайланд эзнээ алдаршуулж байсан бол энэ удаад английн цомын тэмцээнд түрүүлж тайланд эзнийхээ гэгээн дурсгалыг мялааж, удам залгасан хүүтэй нь хамт баяраа тэмдэглэсэн ер бусын улирал боллоо тэдний хувьд.

Ийнхүү европын хөлбөмбөгийн том лигүүд өндөрлөж, европ тив хэсэг амхийх боллоо. Гэхдээ бас болоогүй тун удахгүй европын хөлбөмбөг улс улсын түвшинд хүчтэй нүргэлэх болно.

Английн “Тоттенхэм” клуб дасгалжуулагч Жозе Моуриньюг халлаа. Өдгөө 58 настай португал мэргэжилтэн 2019 оны арваннэгдүгээр сард тус албанд очсоноосоо хойш буюу 19 сарын дараа үүрэгт ажлаасаа чөлөөлөгдөв.

Хойд Лондоны клуб өнгөрсөн даваа гарагт Жозе Моуринью болон түүний туслахаар ажиллаж байсан Жоа Сакрамэнто, Нуно Сантош, Карлос Лалин, Жиованни Керра нарыг халсан юм.

Ж.Моуриньюгийн халагдсан шалтгаан бүрэн тодорхой болоогүй байгаа ч “Тоттенхэм” клуб Европын супер лигт нэгдсэнийг эсэргүүцэн даваа гарагийн бэлтгэлээ тасалсан тул удирдлагууд нь ийм шийдвэр гаргалаа гэж Английн хэвлэлүүд онцолж байна.

Хэдийгээр албан ёсоор баттай болоогүй ч ийн хардах үндэслэл бий. Европын супер лигт орно гэж зарласнаас ердөө нэг хоногийн дараа, “Карабао” цомын шигшээд “Манчестер Сити”-тэй тулахаас зургаан хоногийн өмнө ийм шийдвэр гаргасан нь гэнэтийн явдал байв.

“Тоттенхэм” клуб аргентин мэргэжилтэн Мауриссио Почетинног үүрэгт нь ажлаас нь чөлөөлөөд Ж.Моуриньютой дөрвөн жилийн гэрээ байгуулсан. Энэ хугацаанд тэрбээр жилийн 19.3 сая ам.доллар халааслах гэрээтэй. Түүний энэ гэрээ тухайн үед Англидаа “Манчестер Сити”-гийн босс Пэп Гуардиолагийн дараа орох өндөр гэрээгээр тооцогдож байв.

Одоогоор түүний гэрээг хугацаанаас нь өмнө цуцалсан төлбөртөө хэдийг өгөх нь олон нийтэд зарлагдаагүй байна. Гэхдээ Ж.Моуринью өмнө “Челси” (хоёр удаа), “Манчестер Юнайтед” клубээс ойролцоогоор 50 сая фунтын нөхөн төлбөр авсан гэдэг. Тодруулбал, “Челси”-гээс анх гэрээгээ цуцлахдаа 23.07 сая фунт “халаасалсан” бол дараа нь 8.3 саяыг олжээ. Харин “Манчестер Юнайтед”-аас явахдаа 19.6 саяын төлбөр авсан гэнэ. Харин Испанийн “Реал Мадрид” түүнд хэдийг өгснөө олонд дэлгээгүй юм. Одоо “Тоттенхэм”-ээс “ажилгүйдлийн тэтгэмжээ” авбал нийт дүн нь 100 сая фунт давна гэж “football london” цахим сэтгүүл тооцоолжээ.

Жозегийн хувьд халагдаж байгаа нь сонин биш. Харин “Тоттенхэм”-д цом авч чадалгүй “хөөгдсөн” нь замналынх нь анхны тохиолдол болсон гэнэ.

Ж.Моуриньюг “Тоттенхэм”-ийн тоглогчдын хөгжил хариуцсан дасгалжуулагчаар ажиллаж буй Райан Мэйсон түр орлох юм. Р.Мэйсон одоо дөнгөж 29 настай ч гурван жилийн өмнө эрүүл мэндийн шалтгаанаар хөлбөмбөгчний замналаа төгсгөсөн. Үүнээс хойш “Спэрс”-ийн арын албанд ажиллаж буй.

АНУ-ын их сургуулийн цуцлагдсан тэтгэлэг, “ВфБ Штутгарт”-д зээлээр тоглосон нэг жил, бэртэл гэмтлийн асуудлыг ашиглаж өөрийгөө таниулсан цаг хугацаа гээд л Натаниэл Филлипсийн “Ливерпүүл”-ийн гараанд гарах зам тийм ч дардан байгаагүй.

“Ливерпүүл” клубын туслах дасгалжуулагч Эрик Линдерс саяхан клубын албан ёсны вэбсайт дээр өгсөн ярилцлагадаа “Хэрэв би ширэнгэн ойд амьд үлдэх ёстой байсан бол хамт явах эхний хоёр хүн нь Натаниэль, Майлли байх болно. Жеймс Милнер бол 35 настай, туршлагатай, замналдаа ихийг үзсэн дайчин эр. Натаниэл Филлипс үү? Түүнд арслангийн зүрх байдаг” гэж хэлжээ.

Залуу хамгаалагчид

Английн “Ливерпүүл”-д Виржил ван Дайк, Жо Гомес, Жоэл Матип нарын шилдэг хамгаалагч бий. Гурвуулаа хэдэн долоо хоног, зарим нь бүтэн улирал дуустал тоглохгүйгээр хүнд бэртэж багтаа тусалж чадахгүй болсон билээ. Тус багийн дасгалжуулагч Юрген Клопп хамгаалалтын байрлалд 20 гаруй хослол гарган туршиж үзсэн ч амжилттай болоогүй. Тэрбээр хэдэн долоо хоногийн өмнө уналтад орсон “Шалке 04” клубээс залуу хамгаалагч Озан Кабакыг зээлээр авч , сэлгээнд банз халааж байсан Натаниэл Филлипсд итгэл хүлээлгэн шинэ хамгаалалтын хослол гаргаснаар тэдний хамгаалалт тогтворжсон билээ.

Тэтгэлгийн оронд “Ливерпүүл”-ийг сонгов

Ливерпүүлээс зүүн тийш 45 минутын зайд орших Болтон хотод төрсөн Н.Филлипс “Болтон Уондерерс” багийн залуучуудын багт хэсэг тоглож байсан. Харамсалтай нь, клубын удирдлага түүнийг мэргэжлийн хөлбөмбөгчин болох ирээдүйгүй гэж үзсэнээр 19 настай залуу хүү 2016 онд АНУ-ын Шарлотт хотын Хойд Каролинагийн их сургуульд тэтгэлэгээр суралцах шийдвэр гаргажээ.

АНУ руу явахаар төлөвлөсөнөөс хоёр хоногийн өмнө “Ливерпүүл” түүнтэй холбогдож нөөц багт тоглох гэрээ санал болгов. Н.Филлипс ч шууд зөвшөөрч тив алгасан нисэх өдрөө гэрээнд гарын үсэг зурснаар Англидаа үлджээ. “Ливерпүүл”-ийн нөөц багт гурван жил тоглоод 2019 онд “Штутгарт” руу зээлээр очлоо.

“Штутгарт”-аас “Ливерпүүл”-ийн гараанд

Н.Филлипс “Штутгарт”-ын төвийн хамгаалалтад тогтмол тоглож байсан боловч өнгөрсөн оны нэгдүгээр сард үндсэн багтаа түр хугацаагаар дуудагдлаа. “Ливерпүүл”-ийн тоглогчид ээлж дараалан бэртсэн нь ийм шийдвэр гаргахад нөлөөлжээ.

Н.Филлипс ч “Ливерпүүл”-ийн төлөөх дебютээ Английн цомын тэмцээнд заналт өрсөлдөгч “Эвертон”-ы эсрэг хийж баг нь 1:0-ээр хожсон юм. Гэхдээ үндсэн багтаа удсангүй улирал дуустал “Штутгарт”-д үлдэхээр болжээ.

“Баг маань аварга авах нь нэгэнт тодорхой болсны дараа би “Штутгарт”-ын бэлтгэлдээ явж байхдаа “Чи хэзээ ч ганцаараа алхахгүй ” дууг дуулж явсан. Би залууст цагаахнаар атаархаж, хэзээ нэгэн цагт тэр сайхан мэдрэмжийг авахыг хүсэж байлаа” гэж Натаньел дурссан байдаг.

Зээллэгээс эргэн ирсэн ч Филлипс үндсэн багаасаа явах талаар эргэцүүлж байхад Английн зарим багууд сонирхож байв. Эцэст нь багтаа үлдсэн боловч бэлтгэлийн үеэр ноцтой бэртэл авчээ. Үүний уршгаар улирлын эхний хагаст сэлгээнээс цөөн хэдэн тоглолт хийж багтаа улам бүр ууссан бол оны шинэ оны эхнээс л гараанд гарах болжээ.

Түүний сайн тоглолтыг хөгжөөн дэмжигчид ч анзаарч өнгөрсөн гуравдугаар сарын клубын шилдэг тоглогчоор тодруулсан билээ.

“Түүний өдрөөс өдөрт үзүүлж байгаа тоглолт итгэмээргүй сайн байгаа. Яг зөв зүйлийг зөв цагт нь хийж чаддаг, агаарын тулаанд яг мангас шиг л гэсэн үг. Магадгүй Н.Филлипс хуучны Англи хэв маягаар ирсэн бөмбөгийг хол цөлж явуулахыг илүүд үздэг. Үүнийг хамтрагч Кабакаас илүү олон удаа хийсэн байх. Техникийн хувьд хамгийн сайн нь биш ч гэлээ анхаарал төвлөрүүлж байгаагаар хэнээс ч илүү. Энэ улирлын турш ноцтой алдаа олон гаргаагүй” багийн менежер Ю.Клопп ярилцлагадаа хэлсэн юм.

Филлипс энэ улиралд аль хэдийн 111 удаа агаарын тулаанд ялалт байгуулж хамтрагчаасаа хоёр дахин илүү байгаагаа батлан харуулсан билээ. “Тэр бусад тоглогчид хөлөө ч явуулахгүй газарт толгойгоороо тоглодог” гэж туслах дасгалжуулагч Пепин Лийндерс хошигнож байв.

Түүний гэрээ 2023 он хүртэл үргэлжлэх боловч одоогоор бэртэлтэй байгаа гурван төвийн хамгаалагч нь эргэн ирвэл тоглох магадлал эрс буурах магадлалтай. Үүнээс гадна “Ливерпүүл” клуб “Лейпциг”-ийн Ибрахима Конате авах талаар шуум сонсогдож буй. Залуухан, авьяаслаг франц хамгаалагчийг багтаа авчирвал Н.Филлипсийн Улаанууд дахь ирээдүй бүрхэг болох юм. Тогтвортой тоглолтоороо шагшигдаж буй түүнийг багтаа авчрах хүсэлтэй олон менежер бий болов уу.

Английн “Челси” клуб өнгөрсөн долоо хоногт Сэм Алардайсын “Вэст Бромвич Албион”-д 2:5 харьцаатайгаар бут ниргүүлсэн билээ.

Харин энэ удаад Томас Тухелийн залуус заавал хожих даалгавартай гарч ирсэн юм. Германы Бундеслигээс ирсэн немц тоглогч Кай Хавертц, америк залуу Кристиан Пулишич нар онцгойрлоо. Хаверц найм дахь минутад гоолын салхийг хагалсан бол, ердөө хоёр минутын дараа түүний дамжуулалтаар Пулишич тооны харьцааг холдуулав. Улмаар эхний хагасын 30 дахь минутад хамгаалалтын ноён нуруу Курт Зума гоолдсон юм. Харин Рой Хожсоны “Болор орд”-ны залуусаас бельги довтлогч Кристиан Бендекэ 63 дахь минутад нэр төрийн ганц гоол оруулжээ. Харин 78 дахь минутад өнөөх Пулишич гоолдож “Болор орд”-ны залуусын эргэн ирэх хүсэл зоригийг бүрмөсөн үгүй хийв. Ийнхүү угсаатнууд маш чухал хожил байгуулж, гэзэг даран нэхэж байгаа Юргэн Клоппын залуусаас хоёр онооны дээр бичигдэж байна.

Тоглолтын шилдгээр нэрлэгдсэн Кай Хаверц өнгөрсөн оны аравдугаар сараас хойш лигт анхны гоолоо хийжээ. Сүүлд хэвлэл мэдээллээр олон удаа  шүүмжлүүлсэн тэрбээр тоглолтын дараа сэтгүүлчдэд өгсөн ярилцлагадаа “Миний байрлалд олон гоол оруулах боломж бий. Харин өнгөрсөн хугацаанд тийм боломж ч надад хангалттай олдоогүй .Харин энэ тоглолтод боломж их гарлаа. Бүр хоёр ч гоол нэмж оруулах боломж гарсан ч ашиглаж чадаагүй. Гэхдээ үр дүнд сэтгэл хангалуун байна” гэж ярьжээ.

Харин энэ улиралд гол хамгаалагчдаа бэртэлд алдсанаас хойш алдарт “Энфилд” цэнгэлдэхдээ найман тоглолт хожил аваагүй Юрген Клоппын “Ливерпүүл” клуб “Астон Вилла”-г 2-1 харьцаагаар хожиж “Челси”-г гэзэг даран нэхэж байна.

Тоглолт эхлэхэд Улаануудаас ахлагч Жордан Хендерсон, Жоел Матип, Виржил Ван Дайк, Жо Гомес, Келлехар, Дивок Ориги нар гэмтэлтэй байсан бол “Астон Вилла”-гийн гол тоглогч Жек Грелиш, Уэсли нар гэмтэлтэй өнжсөн. Тоглолтын эхнээс л бөмбөг эзэмшин эсрэг багийнхаа эсрэг нэлээд боломж үүсгэж байлаа. Харин зочин баг сөрөг довтолгоо хийж гоолын боломж хайж байв. Тоглолтын эхэнд Английн шигшээ багийн дасгалжуулагч Гарретт Саутгетийн анхааралд өртсөн Тайрон Мингс бүдүүлэг алдаа гаргаж бөмбөгнөөсөө зөрсөн ч египет довтлогч Мохаммед Салах сайхан боломжийг ашиглаж чадаагүй. Үүнээс нэг их удалгүй Роберто Фирминогийн оруулсан гоолыг шүүгч бичлэг үзсэний эцэст тооцоогүй. “Бирмингхэм”-ээс ирсэн зочид бөмбөг таслан сөрөг довтолгоогоо хийж, тэр нь ч амжилттай болж тоглолтын 43 дахь минутад Олли Уоткинсийн оруулсан бөмбөгөөр хошуучилж эхлэв. Харин Улаанууд эсрэг багийнхаа нягт хамгаалалтыг эвдэхээр олон довтолгоо зохион байгуулсаны эцэст жигүүрийн хамгаалагч Робертсоны алсын хүчтэй цохилтыг Мартинэс дутуу зайлуулахад Салах зөв газраа зөв цагтаа мөргөж тоог тэнцүүлэв. Түүний дараа Салахын нутгийн довтлогч Трезегет Олли Уоткинсын дамжуулалтыг хүлээн авч, хөлийн гадар хэсгээр хүчтэй цохиж хаалганы шонг онож нэлээн сандаргасан. Улаанууд сэлгээгээр Шакириг оруулж ирэн довтолгоог улам эрчимжүүлсний үр дүнд тоглолтын 90+1 минутад Трент Александр Арнолдын хожлын гоолоор маш чухал гурван оноогоо халааслав.

Английн “Ливерпүүл” клуб Аваргуудын Лигийн шөвгийн наймын шатанд “Реал Мадрид”-ын эсрэг хийх тоглолтын өмнө Мохамед Салах Испанийн “Марка” сэтгүүлд ярилцлага өгжээ. Тэрбээр уг ярилцлагын үеэр улаануудын бүрэлдэхүүнд өөрийн ирээдүйг хэрхэн харж буй талаараа ярьлаа.

–Та “Энфилдээс” явах цаг болсон гэж бодож байна уу?

-Энд үлдэх эсэх нь надаас шалтгаалах зүйл биш. Ирээдүйд юу болохыг харцгаая, одоо энэ тухай ярьмааргүй байна. Клопп бид хоёр мэргэжлийн хүмүүсийн энгийн харилцаатай л байдаг.

-Та Англи, Италид тоглож явсан харин одоо Испанид хөлбөмбөг тоглох сонирхол бий юу?

-Яагаад болохгүй гэж? Би олон жил тоглоно гэж найдаж байна.  Ирээдүйд юу болохыг мэдэхгүй, тиймээс хэзээ нэгэн цагт Испанид тоглохыг үгүйсгэхгүй.

–Испанийн “Реал Мадрид” багийн дасгалжуулагч Зинедин Зиданы талаарх таны бодлыг сонирхоё.

Тэр бол гайхалтай дасгалжуулагч. Одоо ч гэсэн багтайгаа маш сайн ажиллаж байгаа. Реал Мадридтай хамт гурван удаа  Аваргуудын лигт түрүүлсэн шүү дээ . Дараа нь тэр клубыг орхисон ч буцаад цом авахад нь туслахаар эргэж ирсэн. Дахин хэлэхэд тэр миний хүүхэд насны шүтээн байсан. Харин одоо дасгалжуулагчийн хувьд гайхалтай ажиллаж байна.

Харин энэ талаар Ливерпүүл клубын сурвалжлагч Нил Жонс:

“Салахын одоогийн гэрээ 2023 онд дуусна. Энэ зун тэр хаашаа ч явахгүй. Учир нь “Ливерпүүл” клуб мэргэн буучийнхаа хамт ирэх улирлыг төлөвлөж байгаа ба түүнд шинэ гэрээний санал бэлдсэн. Хэрэв явахаар болвол үнийг нь хэн одоо хэн төлж чадах вэ, Санхүүгийн хувьд хүнд байдалд байгаа “Барселона”, “Реал”-д боломж бага болов уу. Тэд ойрын арван жилийн хугацаанд клубээ авч явах чадвартай залуу тоглогчдыг хараандаа авсан. “Ливерпүүл” энэ улиралд олон бэрхшээлтэй тулгарсан ч гэсэн ирээдүйд гаргах амжилтад тэднийг удирдана гэж найдаж байна” хэмээн ярьжээ.

Б.Цогтбаяр

Английн “Манчестер Юнайтед” клуб 534.8 сая фунт стерлинг (626 сая евро / 736 сая ам.доллар) –ийн өртэйгөөр энэ зуныг эхлүүлж байна гэж “Manchester Evening News” сонин мэдээлэв. Улаан чөтгөрүүд 2005 оноос хойш 500 сая фунт стерлингийн зээл авч, үүнээс хүүгийн төлбөрт 837 саяыг төлжээ. Өрний асуудал нь тус багийн ирээдүйн солилцоо, наймааны зарцуулалтанд хэрхэн нөлөөлөх нь тодорхойгүй боловч телевизүүдтэй байгуулсан үлэмж гэрээний ачаар санхүүгийн хямралыг давна гэж шинжээчид таамаглаж байна.

М.Ану

Английн “Манчестер Сити” клуб аргентин довтлогч Серхио Агуэрог энэ улирлын дараа багаа орхих болсныг албан ёсоор мэдэгдлээ.

Өдгөө 32 настай С.Агуэро энэ улирлын дараа гэрээ шинэчлэхгүй болжээ. Тэрбээр 2011 онд Испанийн “Атлетико Мадрид” клубээс Английн “Манчестер Сити”-д ирж байв. Түүнээс хойш 384 тоглолтод оролцож 257 гоол оруулсан билээ.

Гэхдээ “Хотынхон” лидер тоглогчоо зүгээр нэг явуулчихгүй. Удирдлагуудын зүгээс гаргасан албан ёсны мэдэгдэлд ирэх жил С.Агуэро болон Давид Сильва, Винсент Компани нарын хөшөөг “Этихад” цэнгэлдэхийн гадна босгохоор төлөвлөж байгаа аж.

С.Агуэро энэ улиралд бэртлийн улмаас цөөн тоглолтод оролцсон. Нийт 14 тоглолтынхоо есөд нь гараанд гарч, гурван гоол оруулсан юм.

Хэдийгээр тааруухан улирлаа өнгөрүүлж байгаа ч түүнийг сонирхох багууд буурал Европоор их бий. Испанийн “Барселона”, Францын “ПСЖ”, Италийн “Ювентус”, “Интер Милан” гээд энэ жагсаалт цаашаа үргэлжилнэ. Өнгөрсөн долоо хоногт “Челси” клуб түүнийг Англид үлдэх шийдвэр гаргавал багтаа авчрах хүсэлтэй байгаагаа мэдэгдсэн юм.

С.Агуэро ба түүний тогтоосон дээд амжилтууд

Английн шигшээ багийн баруун жигүүрт тоглож явсан Ричардс нэгэн удаа С.Агуэрог Премьер лигийн шилдэг довтлогч гэж онцолж байв. Аргентин довтлогч одоогоор Английн дээд лигт 181 гоол шигтгэсэн. Энэ үзүүлэлтээрээ Алан Шьерер (260), Уэйн Руни (208) болон Андрью Коул (187) нарын ард бичигддэг. Премьер лигт 1992 оноос хойш өдгөө хүртэл 29 тоглогч 100-гаас дээш гоол оруулсан бөгөөд тэднээс цор ганц аргентин тоглогч нь Серхио юм. Түүнчлэн талбай дээр гоол оруулсан дундаж хугацаагаар тэр тэргүүлдэг.

Гоолын дундаж үзүүлэлт

Тоглогч	Талбайд гоол оруулсан дундаж хугацаа	Нийт гоол
Серхио Агуэро	108.3 минут	181
Терри Анри	121.8 минут	175
Харри Кэйн	123.1 минут	157
Мохамед Салах	127.8 минут	92
Руд Ван Нистелрой	128.2 минут	95

Өнгөрсөн жил С.Агуэро 90.9 минут тутамд нэг гоол оруулсан үзүүлэлт нь түүний замналынх нь хоёр дахь шилдэг амжилт болсон юм. Тэрбээр “Манчестер Сити”-д ирсэн гурав дахь улиралдаа гоол оруулахад дундажаар 81.8 минут зарцуулсан нь оргил амжилт. Харин энэ улиралд 14 тоглолтод 453 минут талбайд гарахдаа гурван гоол оруулсан буюу дундажаар 151 минут зарцуулжээ.

Улирал	Тоглолт	Минут	Гоол	Гоол оруулж буй дундаж минут
2011-12	48	3,477	30	115.9
2012-13	40	2,71	17	159.5
2013-14	34	2,289	28	81.8
2014-15	42	3,198	32	99.9
2015-16	44	3,520	29	121.4
2016-17	45	3,500	33	106.1
2017-18	39	2,934	30	97.8
2018-19	46	3,368	32	105.3
2019-20	32	2,091	23	90.9
2020-21	14	453	3	151

“Манчестер Сити”-гийн түүхэнд хамгийн олон гоол оруулсан (257), легионер тоглогчдоос Премьер лигт хамгийн их гоолдсон (181) тоглогч гээд түүний нэр дээр бичигдэх рекорд цөөнгүй. Түүний оруулсан гоолын ачаар ситичүүд 2012 онд “Куинс Парк Ренжерс”-ийг хожоод анх удаа лигийн аварга болж байлаа. Одоогоор “Манчестер Сити”-гийн өмсгөлтэй 10 жил зүтгэхдээ 10 цом гардсан. Премьер лигийн аваргаар дөрөв, Холбооны цомд нэг, Лигийн цомд таван удаа түрүүлсэн юм.

Английн “Эвертон” клуб 52 мянган хүний суудалтай шинэ цэнгэлдэхтэй болох зөвшөөрөл авчээ.

Английн Ливерпуль хот дахь Брэмли Мур боомтын эрэг дагуу “Эвертон” клуб шинэ цэнгэлдэх барих зөвшөөрөл авсан талаар тус багийн албаны төлөөлөгч мэдээлэв.

“Эвертон” клуб 1892 оноос хойш “Гудисон Парк” цэнгэлдэхэд тоглож буй. Тус багийн зүгээс сүүлийн 25 жилд шинэ цэнгэлдэх барих зөвшөөрөл авахаар хөөцөлдөж байсан бөгөөд эцэст нь үр дүнд хүрчээ.

Шинэ цэнгэлдэх нь ойролцоогоор 52,888 үзэгчийн суудалтай, нийт өртөг нь 500 сая паунд болох аж. Уг цэнгэлдэхийн зураг төслийн багийг өнгөрсөн оны хоёрдугаар сард томилсон. Их Британид төвтэй “Лианг О’Роурк” компани цэнгэлдэхийг босгох үүрэг авсан билээ.

Английн Ливерпуль хот 2026 оны Хамтын нөхөрлөлийн орнуудын наадмыг зохион байгуулах хүсэлтээ 2017 онд өгч байв. Харамсалтай нь, тус наадмыг зохион байгуулагчаар Бирмингэм сонгогдсон нь шинэ цэнгэлдэхийн ажилд саад болсон удаатай. Түүнчлэн клубын санхүүгийн асуудалд санаа зовнисон тул хотын удирдлага энэ асуудлыг удаа дараа хойшлуулсан юм.

Вэст Бромвич Албионыг талбай дээр нь 4-0 харьцаагаар хожсон тоглолтын өмнө бие халаалт хийхдээ энгийн шорт футболктой гарч хавийн амьтдын амыг ангайлгасан манай 23 настай шотланд залуу энэ талаараа ийнхүү ярьжээ.

Насаараа л Шотландад тоглосон болохоор иймэрхүү юманд дасчихжээ. Жаахан хүйтэн байхад хэнд ч гай болохгүй л дээ. Манайхан намайг хөндлөн дамжуулалт өгсөн гэж шоолоод байгаа. Ахиж нэг харахаас. Мэдээж гоолдсондоо баяртай байлгүй яахав, би ямар дандаа гоолдоод байдаг биш.

Артэта: Манайхан бүгд л ороолт, бээлий, малгай өмсөцгөөж байтал мань хүн шууд л шорт, футболктойгоо гараад явчихсан. Дүр үзүүлж байгаа юм биш л дээ, надад итгээрэй, угаасаа тэгээд сурчихсан юм байгаам. Намайг анх клубт ирэхэд мөрөндөө гэмтэлтэй гээд байж байсан. Надад бол маш авьяастай, элдэв ааш авиргүй, яг сайхан зүтгэлтэй тоглогч харагдсан. Хамт ажиллахад маш урамтай байдаг, өдөр болгон улам сайжрах гэж чармайн бэлтгэдэг болохоор гоол хийсэнд нь өмнөөс нь их баярлаж байгаа.

Мартин Кеовн: Яалт ч үгүй хуучны барилтай залуу. Магадгүй ахлагчийн материал ч юм уу. Бэлтгэл дээр жаахан дарж тогло гэж захихгүй бол болдоггүй гэж сонссон. Тиймэрхүү авирт бол би их дуртай. Хамгаалагчийн хувьд их сайн, ер нь хамгаалалт, довтолгоо аль алинд нь их сайн. Цасан дунд футболктой бие халаалт хийгээд, бас маш гоё гоол хийсэн. Арсеналд өөрийн гэсэн ул мөрөө үлдээх гэж их яарч байна, бараг л чадлаа шүү дээ.

Гарет Барри: Би ч гэсэн ахлагчийн материал гэж бодож байна. Хамгаалалт болон довтолгоонд маш нэмэртэй байгаа нь үнэн гэхдээ надад хамгийн их таалагдсан юм нь юу вэ гэхээр баг нь маш муу байх үед ч дагаж муудаагүй цөөхөн тоглогчийн нэг нь мань хүн байсан. Магадгүй ганц хоёрхон тоглогч л тоглолтоороо илт ялгарч харагдаж байсны нэг нь яахын аргагүй мөн.

Орчуулсан: Даваадорж Цогчулуун

Мэдээллийн эх сурвалж:
https://www.bbc.com/sport/football/55522579
https://talksport.com/…/arsenal-news-kieran-tierney…/

Зургийн эх сурвалж:
https://talksport.com/…/arsenal-news-kieran-tierney…/

Каталон хамгаалагчийн Сититэй байгуулсан гэрээ энэ улирлын төгсгөлөөр дуусна. Тиймээс тэр 2021 оны нэг сарын нэгнээс эхлэн англиас бусад орны багтай урьдчилсан гэрээ байгуулах боломжтой болно. Харин премьер лиг дотроо шилжилт хийх бол зун хүртэл хүлээх шаардлагатай. Гарсиа өнгөрсөн найман сард Манчестерийн багтай байгуулсан гэрээгээ сунгахгүй гэдгээ албан ёсоор мэдэгдсэн.

Виржил Ван Дейк, Жозеф Гомес аль аль нь хүнд бэртэл авсан учир Ливэрпүүл найдвартай, итгэл даах төвийн хамгаалагчийн эрэлд гараад байгаа. Ван Дейк өвдөгний чагтан холбоос, Гомес шөрмөсний бэртэл тус тус авч удаан хугацаагаар талбайд гарах боломжгүй болоод байгаа.

Испаний хэвлэлүүдэд бичсэнээр (AS, Marca) Ла Масиагийн суралцагч Эрик Гарсиа төрөлх багтаа буцах хүсэл их байгаа аж. Тиймээс Ман Ситигийн санал болгосон өндөр цалинтай саналыг хүлээж аваагүй юм байна. Блауграна өнгөрсөн зунаас эхлэн Гарсиаг идэвхтэй сонирхож эхлэн Сититэй тохиролцоонд хүрэхээр яриа хэлэлцээр хийж байгаа юм.
19 настай Гарсиа Барселон хотод төрж Ла Масиад суралцаж байгаад 2017 онд 16 настайдаа Английг зорьсон. 2019–20 оны улиралд тэр лигийн 13 тоглолтонд оролцсон бол энэ улиралд 3 удаа талбайд гараад байгаа.