Өмнөд Америк тивийн XXXXVII дахь удаагийн аварга шалгаруулах тэмцээн ирэх сарын 14-ны өдөр Аргентина улсад эхлэх билээ. Цагаан цэнхэрүүд 1916 онд анхны тэмцээнийг зохион байгуулж байсан бол тэр цагаас хойш 10 дахь удаагаа тивийн аваргыг нутагтаа хүлээн авахад бэлэн болжээ. Тэмцээнийг хамтран зохион байгуулах байсан Колумб улсад ерөнхийлөгч Иван Дюкегийн эсрэг жагсаал цуглаан эрчимтэй өрнөж  буй учир ийнхүү тэднийг хассан байна.

Уг тэмцээнд 1993 оноос хойш 12 баг оролцдог байсан бол энэ удаад 10 улс өрсөлдөх юм. 1990 оноос эхлэн Ази болон Хойд Америк тивийн хоёр улсыг урьж оролцуулдаг байсан ба энэ удаад Катар болон Австралын шигшээ багуудыг сонгоод байсан ч ДАШТ-ий урьдчилсан тоглолтуудтай холбоотойгоор татгалзсан юм. 

Хэсгийн хуваарилалт

А хэсэг / Өмнөд /	Б хэсэг / Хойд /
Аргентина	Колумб
Боливи	Бразил
Уругвай	Венесуэл
Чили	Эквадор
Парагвай	Перу

Тэмцээний түүхэн амжилт

Улс	Алт	Мөнгө	Хүрэл	Нийт
1. Уругвай	15	6	9	30
2. Аргентина	14	14	5	33
3.Бразил	9	11	7	27
4. Парагвай	2	6	7	15
5. Чили	2	4	5	11
6. Перу	2	1	8	11
7. Колумб	1	1	4	6
8. Боливи	1	1		2
9. Мексик		2	3	5
10. Гондурас			1	1

Хэсгийн шатны цагийн хуваарь/ Улаанбаатарын цагаар /

VI сарын 14 

• Аргентина vs Чили 05:00
• Парагвай vs Боливи 08:00

VI сарын 15

• Бразил vs Венесуэл 07:00
• Колумб vs Эквадор 10:00

VI сарын 18

• Чили vs Боливи 05:00
• Аргентина vs Уругвай 08:00

VI сарын 19

• Колумб vs Венесуэл 07:00
• Перу vs Бразил 10:00

VI сарын 21

• Уругвай vs Чили 04:00
• Аргентина vs Парагвай 07:00

VI сарын 22

• Венесуэл vs Эквадор 06:00
• Колумб vs Перу 09:00

VI сарын 24

• Боливи vs Уругвай 05:00
• Чили vs Парагвай 08:00

VI сарын 25

• Эквадор vs Перу 06:00
• Колумб vs Бразил 09:00

VI сарын 28

• Уругвай vs Парагвай 05:00
• Аргентина vs Боливи 05:00

VI сарын 29

• Эквадор vs Бразил
• Венесуэл vs Перу

Онцлох гурван улсыг шинжихүй

Аргентина

Тэмцээний онцлох баг бол зохион байгуулагч Аргентина. 1993 оноос хойш цомын бараа хараагүй тэд дасгалжуулагч Лионель Скалонигийн удирдлага дор тун сайн тоглолтыг үзүүлж буй. Тэр тангочдыг удирдсан эхний тивийн аваргадаа хүрэл медаль зүүсэн. Гэхдээ энэ удаад түүний зорилго түрүүлэх. Сүүлийн жилүүдэд довтолгоо гайхалтай хэдий ч дундын шугамандаа асуудалтай байсаар ирсэн тэдний нөхцөл байдал энэ удаад өөр. Леандро Паредес /ПСЖ/, Жиовани Ло Селсо /Тоттенхэм/, Rodrigo De Paul / Удинезе/ зэрэг багтаа чухал үүрэг гүйцэтгэдэг залуус энэ удаад талбайн төвд улсаа төлөөлнө. Мөн Лаутаро Мартинес /Интер Милан/, Эмилиано Мартинес /Астон Вилла/, Николас Таглиафико /Аякс/, Анхель Ди Мариа /ПСЖ/ зэрэг тоглогчид ачааны хүндийг үүрэлцэнэ. Мэдээж тэдний хамгийн том хөзөр бол Лионель Месси. Түүний хувьд багтайгаа тааруухан улирлыг үдсэн ч хувийн үзүүлэлт гайхалтай хэвээр байсан. Тэр шигшээ багтайгаа хүсэн хүлээсэн цомоо өргөж Диего Армандо Марадонад зориулж чадах болов уу?

Уругвай

Тивийн аваргад хамгийн олон түрүүлсэн улс бол тэд. Гэхдээ магнайд шалгарч чадаагүй 10 жил болсон байна. Иймээс дахин нэг удаа аваргын цомыг эх орондоо авчрахыг Оскар Табарезын залуус хүсч байгаа нь дамжиггүй. Тэдний бүрэлдэхүүн бүх тал дээрээ жигд сайн байгаа. Родриго Бентанкур /Ювентус/, Роналд Араухо /Барселона/,Николас Де Ла Круз /Ривер Плэйт/ зэрэг залуус энэ удаад шигшээгийн чухал тоглогчид байх болно. Гэхдээ онцлох нь Федерико Вальверде /Реал Мадрид/ байх учиртай. Зинедин Зиданы удирдлага дор гайхалтай гүйцэтгэлийг үзүүлж довтолгоо хамгаалалтын олон байрлалд тоглох чадвараа харуулаад авсан тэрбээр Эдинсон Кавани /Манчестер Юнайтед/, Луис Суарес /Атлетико Мадрид/ нартай хэрхэн зохицож тоглох нь сонирхолтой.

Бразил

Отгон тивийн аваргууд энэ жил мөн л зузаан бүрэлдэхүүнтэйгээр Аргентиныг зорих болно. Хаалгачаас эхлүүлээд байрлал бүр дээр олон сонголт тэдэнд бий. Гэхдээ санаа зовж болох нэг асуудал бол Филиппе Коутиньо /Барселона/. Түүний хувьд энэ улирлыг бүтэн эмнэлгийн орон дээр өнгөрүүлсэн юм. Сүүлийн жилүүдэд Бразилд тоглолт найруулдаг хагас хамгаалагч төрөөгүй гэхэд хилсдэхгүй. Иймээс Коу Титегийн дундын шугаманд яалтачгүй хэрэг болно. Мөн энэ улиралд олигтой амжилт үзүүлж чадаагүй Неймар /ПСЖ/ шигшээ багтайгаа амжилт үзүүлэхийг хүсч буй нь ойлгомжтой. Ямартай ч бүрэлдэхүүний хувьд хамгийн хүчтэй нь тэд. Самбачид ногоон талбайд өөрсдийн бүжгийг толилуулж чадах болов уу?