Tag: фс улаанбаатар

ФС Улаанбаатар клуб Супер цомын эзэд боллоо

Цар тахлын нөхцөл байдлын улмаас хэзээ эхлэх эсэх нь тодорхойгүй байсан Монголын хөлбөмбөгийн холбооны 2021 оны улирал эхлэхэд бэлэн боллоо. Лигийг угтаж уламжлал ёсоор Супер цомын төлөө түрүү улирлын аварга Атлетик 220 клуб, мөнгөн медаль хүртсэн ФС Улаанбаатар багууд хоорондоо тоглосон юм.

Энэ жил ФС Улаанбаатар клубтэй нэгдсэн Серб мэргэжилтэн Воислав Бралушич дасгалжуулагч анхны тоглолтынхоо бүрэлдэхүүнд нэлээд өөрчлөлт оруулсан бөгөөд энэ жил багт шинээр нэгдсэн Д.Төрбат, Э.Өнөр-Эрдэнэ, Ц.Бат-Оргил, Т.Мөнхсүлд гэсэн дөрвөн тоглогчийг гараанд илгээв. Мөн өнгөрсөн 2 улиралд зээлээр тоглосон Ц.Мөнх-Эрдэнэ багтайгаа дахин нэгджээ.

Супер цомын төлөөх тулаан тэр чигтээ маш сонирхолтой болсон бөгөөд эхний 20 гаруй минутад Атлетик 220 клуб ялимгүй илүүрхэн тоглосон. Харин ФС-чүүд бага багаар өөрсдийн тоглолтоо олсоор давамгайлж эхэлсэн бөгөөд үндсэн цагт гоол оруулах хэд хэдэн боломжийг үүсгэсэн юм. Тэд тоглолтын турш 55%-тай бөмбөг эзэмшиж, хаалга руу 16 удаа цохисноос 12 нь байгаа оножээ. Үндсэн цаг өндөрлөхөөс яг өмнөхөн Атлетик 220 клубын ахлагч Н.Наранболд хаалгачийн эсрэг гарч, маш аюултай довтолгоо өрнүүлэхэд Улаанбаатарын ахлагч А.Сайханчулуун багаа аварсан. Энэ тоглолтод 2 улаан хуудас өргөгдсөн бөгөөд хоёр багийн зүүн жигүүрийн хамгаалагчид болох Цогт-Очир, Бат-Эрдэнэ нар талбайг орхилоо.

Ингээд нэмэлт цагт хоёр баг 10 хүнтэй тоглохоор болсон. Улмаар нэмэлт цагийн 97′ минутад ФС Улаанбаатар клубын авьяаслаг тоглогч Б.Балжинням булангийн цохилтоос ирсэн бөмбөгийг мөргөж оруулснаар багтаа тэргүүллийг авчирлаа. Үүнээс ердөө 4 минутын дараа Улаанбаатарын төлөө дэбют тоглолтоо хийж буй төвийн хамгаалагч Д.Төрбат дахин гоолдож, 2:0 болгосон юм. Тэрээр 4 жил хүчин зүтгэсэн хуучин багаа хүндэтгэж, гоол оруулсан ч баяраа тэмдэглээгүй билээ.

  • 97′ – Б.Балжинням
  • 101′ – Д.Төрбат

Шаардлагатай тэргүүллээ нэгэнт олж авсан ФС Улаанбаатарын залуус үлдсэн хугацаад алдаа гаргалгүй тоглож чадсанаар клубынхээ 10 жилийн ойн босгон дээр МХБХ-ны Супер цомыг өөрийн болголоо. Тэд өмнө нь энэ цомыг хүртэж байгаагүй билээ.

Гарааны бүрэлдэхүүн:

Сайханчулуун (С), Өнөр-Эрдэнэ, Төрбат, Өсөхбаяр, Цогт-Очир, Бат-Оргил, Баяржаргал, Мөнхсүлд, Мөнх-Эрдэнэ, Балжинням, Энх-Амгалан

Супер цом 2021 – ФС Улаанбаатар гарааны 11

Та фото мэдээллийн булангаас тус тоглолтын эргэн тойрны агшин үзэх боломжтой. (Супер цом 2021 фото мэдээ)

“ФС Улаанбаатар”-тай хамтран ажиллахаар боллоо

Спортын хэвлэл мэдээллээр дагнан ажиллаж буй “Koo.mn” цахим сайт хөлбөмбөгийн дээд лигийн шилдгүүдийн нэг “ФС Улаанбаатар”-тай хамтран ажиллахаар боллоо.

Саяхан 25 нас хүрсэн хөлбөмбөгийн “Үндэсний Дээд Лиг”-т данстай болоод 10 жилийн нүүр үзэж буй “ФС Улаанбаатар” клуб болон KOO.MN спортын медиа багийн хооронд урт хугацаанд хамтран ажиллах гэрээг үзэглэлээ.

Хамтын ажиллагааны хүрээнд гурван жилийн хугацаатай гэрээ байгуулснаар “ФС Улаанбаатар” клубын лигийн хүрээний болон томоохон чухал тоглолтуудтай холбоотой шигшмэл мэдээлэл, шинэлэг контентыг цаг алдалгүй бэлтгэж, тоглолт бүрийн тоймыг бид хүргэх болно.

  • ФС Улаанбаатар клубын Гүйцэтгэх захирал В.Чинбаатар, KOO.MN вэбсайт Гүйцэтгэх захирал Д.Бямбажаргал
ФС Улаанбаатар клуб, KOO.MN спорт медиа агентлагын хамтын ажиллагаа эхэллээ

Хүнсний манлай үйлдвэр АПУ компани ивээн тэтгэдэг “ФС Улаанбаатар” клуб нь 2011 онд байгуулагдсан бөгөөд “Үндэсний дээд лиг”-т элссэн эхний жилээ лигийн аваргаар тодорсон бөгөөд гурван удаа дэд байр (2005, 2018, 2020) эзэлж, нэг удаа (2013) гуравдугаар байрт орж байв. Багийн энэ улирлын үндсэн ивээн тэтгэгчдээр АПУ компани, Шунхлай групп, GS25 конвениенс сүлжээ болон Яард фит клубууд оролцож байна.

Өдгөө Серби мэргэжилтэн Бралушич Воиславын удирдлага дор шинэ улиралдаа бэлдэж буй “ФС Улаанбаатар” клуб наймааны цонхоор шигшээ багийн шилдэг хамгаалагч Д.Төрбат тэргүүтэй шинэ залуусаар хүчээ сэлбэж 10 жилийн дараа дахин лигийн аварга болох том зорилго тавьжээ.