ОХУ-ын шигшээ багийн довтлогч Артем Дзюба мэргэжлээ сольжээ. Өдгөө 29 настай довтлогч эр ДАШТ-д гурван гоол оруулж, багийнхаа амжилтад их үүрэг гүйцэтгэсэн билээ.

Тэгвэл Оросын зам заагч төхөөрөмж (GPS) үйлдвэрлэдэг нэгэн компанийн шинэхэн бүтээгдэхүүний дуу оруулагчаар А.Дзюбаг сонгожээ.

Оросуудын түгээмэл хэрэглэдэг “Yandex Navigator GPS” төхөөрөмжийн дуу оруулагчаар “Зенит” багийн 195 см өндөртэй довтлогч сонгогдсон аж.

«У Черчесова не забалуешь. Прострел не пройдёт — впереди дорожные работы».
Новый суперкрутой проект Комитета по маркетингу РФС: Яндекс. Навигатор заговорил голосом Артёма Дзюбы!
Скачивай бесплатное приложение Яндекс.Навигатор и устанавливай голос Дзюбы https://t.co/xduVa7DNE2 pic.twitter.com/56t8mC8moS

— Сборная России (@TeamRussia) August 6, 2018

Уг төхөөрөмжийг та утсандаа суулгаж ашиглах боломжтой гэнэ. Хэрэглэгчдэд А.Дзюбаг сонсох эсэхээ өөрсдий шийдэх боломжтой бөгөөд тэр таньд хурд хэмжигч камер ойртож байгааг, мөн явах замыг тань чиглүүлэхэд туслах аж.

Португалын алдарт хөлбөмбөгчин Криштиану Роналду Испанийн “Реал Мадрид”-ыг орхисноос хойш Италийн “Ювентус” клубтэй анхны бэлтгэлээ хийлээ. Мөн “Хөгшин хадагтай”-гийн бусад шилдэг тоглогчид болох Гонсало Игуайн, Родриго Бентанкур, Пауло Дибала, Доуглас Кошта, Хуан Куадрадо зэрэг ДАШТ-д улсаа төлөөлөн оролцсон тоглогчид багийнхаа бэлтгэлд эргэн нэгджээ.

Сонирхуулахад, “Ювентус” энэ долоо хоногийн сүүлээр “Реал Мадрид”-тай учраа таарсан ч тус тоглолтод К.Роналду оролцох боломжгүй аж. Харин тэр энэ сарын 18-нд болох Сери А-гийн нээлтийн тоглолтод “Кьево” клубийн эсрэг гараанд гарахаар төлөвлөж байгаа юм.

Өдгөө 33 настай португал эрийг Туринд эмнэлгийн үзлэгт орсны дараагаар түүний биологийн нас 20 настай залуу хүнийх шиг гэж эмч нар дүгнэсэн.

К.Роналду ирсэн тул энэ багт аргентин довтлогч Г.Игуайны орон зай байхгүй гэж хэлж болно. Ямартай ч түүнийг наймаанд явуулахаар бэлдэж байгаа юм. Английн “Челси”, Италийн “АС Милан” багууд түүнийг сонирхож буй.

Мексикийн шигшээ багийн менежер Хуан Карлос Осорио хөлбөмбөгийн холбооноос санал болгосон шинэ гэрээнд гарын үсэг зурахаас татгалзлаа. Ингэснээр өдгөө 56 настай, колумб мэргэжилтэн өөр баг дасгалжуулахаар шийдсэн бололтой.

Тэрбээр Эл Триг удирдсан гурван жилийн хугацаанд 52 тоглолтод оролцож, 33 ялалт байгуулсан юм.

Х.Осорио ДАШТ-ий эхний тоглолтод Германыг 1:0-ээр илүүрхэх хүртэл хөгжөөн дэмжигчдээсээ дэмжлэг авдаггүй, нэр хүнд муутай байсан аж. Учир нь тэр бол мексик хүн бус колумб учраас нутгийн иргэд нь таагүй хүлээж авсан. Мексикийн тоглолтын үеэр “Осориог хал” гэж шаардаж байсан удаатай. Харин колумб эр багаа тун сайн бэлдэж, ДАШТ-д хэсгээсээ гарсан ч шөвгийн 16-д Бразилын багт 2:0-ээр хожигдсон билээ.

Английн шигшээ багийн дасгалжуулагч асан, швед мэргэжилтэн Свен-Горан Эрикссон Иракийн шигшээ багийн ахлах дасгалжуулагчаар томилогдлоо.

Хэдхэн хоногийн өмнө Туркийн Истанбул хотод С.Эрикссон Иракийн хөлбөмбөгийн холбооны удирдлагуудтай уулзсан юм. Ингээд хэд хэдэн ажлын саналыг бодож үзсэний эцэст Иракийн хөлбөмбөгийг хөгжүүлэх үйлсэд зүтгэхээр шийдсэн гэнэ.

С.Эрикссон 2001-2006 оны хооронд Английн шигшээ багийг удирдсан туршлагатай. Хоёр дэлхийн аваргад багаа шөвгийн наймд хүргэсэн юм. Үүний дараа “Манчестер Сити”, “Лестер”, Мексикийн шигшээ баг болон Кот Д’Ивуарын шигшээг дасгалжуулсан. Харин 2013 оноос Хятадын “Шанхай”, “Шензен” хотын багт менежерийн ажил хийсэн юм.

Иракийн шигшээ баг Олон улсын хөлбөмбөгийн холбооноос гаргасан чансаагаар 89-д бичигдэж буй. Тэд наймдугаар сарын 4-нд Палестиний шигшээ багтай нөхөрсөг тоглолт хийх бөгөөд нэгдүгээр сарын 8-нд Азийн АШТ-ий хэсгийн шатанд Вьетнамтай хүч үзэх аж.

ОХУ-ын хөлбөмбөгийн шигшээ багийг амжилттай удирдаж, ДАШТ-ий шөвгийн найм руу хөтөлсөн дасгалжуулагч Станислав Черчесов дахин хоёр жил шигшээгийн дасгалжуулагчаар ажиллахаар боллоо.

Түүний шавь нар хэсгээсээ Уругвайн ард бичигдэж, хоёроор шалгарсан ч шөвгийн 16-д Испанийг хожиж, дараагийн шатанд шалгарсан. Гэвч Хорватын шигшээ багт торгуулийн цохилтоор ялагдсан юм. Гэхдээ дээрх амжилт нь Зөвлөлтөөс салсан Оросын хөлбөмбөгийн хувьд хамгийн оргил амжилтаар бүртгэгдсэн юм.

Оросын хөлбөмбөгийн холбоо дээрх амжилтад талархаж байгаагаа илэрхийлсэн юм. ОХУ-ын ерөнхийлөгч Владимир Путин тун удахгүй Кремлинд шигшээ багийн дасгалжуулагч, тоглогчдыг урьж, шагнал гардуулахаар бэлдэж байгаа аж.

Аргентинийн хөлбөмбөгийн холбоо (AFA)-ийн ерөнхийлөгч Клаудио Тапиа хөгжөөн дэмжигчиддээ хандаж, шигшээ багийн лидер тоглогч Леонил Мессид бодох хугацаа өгөхийг хүслээ. “Бид түүнээс хэтэрхий их зүйл хүсч байна. Одоо түүнийг тайван орхиж, ирээдүйгийнхээ талаар бодох хугацаа өгөх хэрэгтэй” гэж “Radio Mitre”-д өгсөн ярилцлагадаа онцолжээ.

К.Тапиа хамгийн сүүлд өнгөрсөн баасан гаригт буюу Аргентинийн найзуудын баярын өдрөөр Л.Месситэй холбогдсон гэнэ. “Миний бодлоор бидний харилцаа сайн байгаа” гэж холбооны тэргүүн ярьсан юм. Л.Мессиг ДАШТ-ий дараа шигшээ багаасаа зодог тайлна хэмээх цуурхал тараад буй учир үүнд хариулт өгсөн бололтой.

Түүнчлэн Аргентинийн шигшээ багийн ахлах дасгалжуулагч асан Хорхе Сампаолигийн оронд хэнийг томилох талаар одоогоор төлөвлөсөн зүйл үгүй, хэн нэгэн нь холбогдоогүй гэнэ. Аргентинийн хөлбөмбөгийн холбооны удирдах зөвлөл долдугаар сарын 31-нд хуралдана. Энэ үеэр ямар шийдвэр гаргах талаар хэлэлцэхээр төлөвлөж байгаа бололтой.

Өмнөх дасгалжуулагч Х.Сампаоли 15 тоглолтод багаа удирдаж, энэ хугацаанд 57 тоглогч шигшээд дуудсан. Үр дүнд нь долоон тоглолтод хожиж, дөрөв тэнцээд, дөрвөн удаа хожигдсон юм.

ДАШТ-ий хагас шигшээд учраа таарсан Англи, Хорватын тоглолтын үеэр нэмэлт цагт Марио Манжукич гоол оруулснаар хорватууд финалд шалгарсан билээ. Тэгвэл “Супер Марио” хожлын гоолын баяраа тэмдэглэх үеэр нэгэн гэрэл зурагчинг дайрч унагасан явдал болсон юм. Тэгвэл энэ зурагчин нь 53 настай, Эл Салвадор улсын иргэн Юри Кортес гэгч аж. Баярлаж хөөрсөн хорватуудаас санамсаргүй бэлэг авч, “хөлсөнд нь хүрч” хийморь нь сэргэсэн латин эрийг “анти орос” үзэлтэй Домагой Вида хүртэл үнсэлтээр бэлэг барьсан юм.

Хэдийгээр ажлаа хийж яваад гэнэтийн халдлагад өртсөн ч Ю.Кортес ажраагүй. Тэрбээр ялалтаа тэмдэглэж буй хорват тоглогчдын онцгой хормыг хамгийн ойроос, тод мэдэрсэн хүний хувьд түүхэн зураг авч, урын сандаа нэмэрлэсэн юм.

Сонирхолтой нь, Хорватын аялал жуулчалын яам түүнийг болон гэр бүлийнхэнийг нь эх орондоо урьсан байна. Зурагчин эр ч тэдний хүсэлтийг хүлээн авч, наймдугаар сарын сүүл эсвэл есдүгээр сарын эхээр гэр бүлийн хамт зочлохоор болжээ.

Энэ талаар тус яамны сайд Кристан Станичич “Ажлаа ямар ч нөхцөлд хийж чаддаг хүний төгс жишээг түүнээс харж болно. Манай хөлбөмбөгчдийн баяраа тэмдэглэж буй зураг дэлхий даяар түгсэн. Манай улс бол найрсаг, жуулчдад ээлтэй орон. Тиймээс ноён Ю.Кортесийг бидний урилгыг хүлээн авсанд талархаж байна” гэж ярьжээ.

ОХУ-ын шигшээ багийн залуу од Александр Головин “Монако”-гийн эмнэлгийн үзлэгээр орж, тун удахгүй гэрээнд гарын үсэг зурахаар тохиролцов.

Түүнийг шигшээ багтаа гялалзсаных нь дараагаар Английн “Челси” клуб идэвхтэй сонирхож байсан ч А.Головин “Монако”-г илүүд үзсэн байна. Английн клуб бразил гаралтай итали тоглогч Жоржиньотой гэрээ байгуулсан тул орос залуу өөр сонголт хийхээр шийдсэн бололтой.

Одоогоор Францын клуб түүнийг ямар үнээр авсан нь эцсийн байдлаар тодорхой болоогүй ч ойролцоогоор 30 сая еврогийн үнэ хүрсэн гэнэ. Улмаар А.Головин шинэ багтайгаа таван жилийн гэрээ байгуулахаар тохиролцсон аж.

Хэрвээ гэрээ албан ёсоор баталгаажвал А.Головин ОХУ-аас тодорсон хамгийн үнэтэй хөлбөмбөгчин болох юм.

Бразилын хөлбөмбөгийн холбоо (CBF) дасгалжуулагч Титетэй гэрээгээ дөрвөн жилээр сунгаж, 2022 оны ДАШТ хүртэл үргэллжлүүлэх тохиролцоонд хүрчээ.

Тите Бразилын шигшээ багийн дасгалжуулагчаар 2016 оны зургадугаар сард сонгогдсон.

Шигшээ багийн дасгалжуулагчид нэг багийн хамт хоёр дахь ДАШТ-д оролцохдоо тааруу байдаг үзүүлэлт бий. Уругвайн шигшээг 12 жил дасгалжуулж буй Оскар Табаресын шавь нар л тогтвортой амжилт үзүүлдэг гэхэд болно.

Испанийг Европын хошой аварга, ДАШТ-ий алтан медальд хүргэсэн Висен дел Боске 2014 оны ДАШТ-д хэсгийн шатандаа бүдэрсэн юм. Тэрбээр Евро 2016-д шөвгийн 16-гаас хэтрээгүй бөгөөд үүнийхээ дараа ажлаа өгсөн билээ.

Италийг 2006 онд дэлхийн аварга болгосон мэргэжилтэн Марсельо Липпи дөрвөн жилийн дараа хэсгийн шатнаас гэртээ харьсан тул ажлаасаа халагдсан. Тэр жил багаа финалд хүргэсэн Францын дасгалжуулагч Рэймонд Доменеч дөрвөн жилийн дараа Өмнөд Африкт багаа удирдсан ч амжилт олоогүй юм.

Харин одоо Тите багаа амжилтад хүргэх эсэхийг харах үлдэв.

Германы хөлбөмбөгийн холбоо (DFB) Мэсүт Өзилийг арьс өнгөний үзлээр ялгаварлан гадуурхсан гэх ярианд хариулт өгчээ. Тэд чухал тоглогчоо арьс өнгөөр ялгаварлаагүй, харин ч ийм зүйлээс түүнийг хамгаалахыг оролдож байсан гэдгээ мэдэгдсэн юм.

Өдгөө 29 настай М.Өзил дахин Германы шигшээ багт тоглохгүй гэдгээ зарласан. Учир нь арьс өнгөний үзэл газар авч, Германы шигшээ баг ДАШТ-ээс эрт хасагдсаны дараагаар түүний амь насанд халдах заналхийлал их ирэх болсон юм.

М.Өзил өнгөрсөн тавдугаар сард Туркийн ерөнхийлөгч Тайип Эрдоганыг Лондонд ирэх үеэр түүнтэй зурагаа авхуулсан нь олон хүнд таалагдаагүй. Үүний дараа Германы хөлбөмбөгийн холбоо болон хэвлэл мэдээллээр ялгаварлан гадуурхаж эхэлсэн хэмээн мэдэгдсэн юм.

М.Өзил бол Турк гэр бүлээс гаралтай Германд төрсөн хөлбөмбөгчин. Тэрбээр дөрвөн жилийн өмнө Германы шигшээ багийг ДАШТ-д түрүүлэхэд гол үүрэг гүйцэтгэсэн тоглогчдын нэг. 

Германы шигшээд зүтгэдэг өөр нэг турк гаралтай тоглогч болох Илкай Гюндоган, Мэсүт Өзил нар Туркийн ерөнхийлөгчийг Лондонд ирэх үеэр дээрх зургийг авхуулсан бөгөөд тамирчид дараа нь хөлбөмбөгийн талаар ярилцсан гэж тайлбарласан билээ.

Германы шигшээ багийн хагас хамгаалагч, турк гаралтай Мэсүт Өзил гомдолтой байна. Өнгөрсөн тавдугаар сард М.Өзил болон “Манчестер Сити”-гийн Илкай Гюндоган нар Туркийн ерөнхийлөгч Тайип Эрдогантай хамт зурагаа авхуулсан нь “цэвэр цусны германчуудад” огт таалагдаагүй юм. Улмаар ДАШТ-д оролцох шигшээ багаас тэднийг хасахыг шаардсан нь баг доторх уур амьсгалыг эвгүйтүүлж орхисон. Тэд тавдугаар сард Туркийн ерөнхий сонгуульд Т.Эрдоганы нам ялалт байгуулсны дараа энэ зургийг авхуулсан аж.

Үүнд Германы хэсэг улс төрчид дургүйцсэн. Германы улс төрийн бодлогыг эсэргүүцсэн зураг хэмээн цоллосон. Учир нь тэдгээр улс төрчид Т.Эрдоганыг зүй ёсны ерөнхийлөгч гэж үздэггүй, дарангуйлагч гэж хардагтай холбоотой юм.

Харин хэргийн эзэд болох И.Гюндоган, М.Өзил нар ерөнхийлөгчтэй уулзсан шалтгаанаа хөлбөмбөгтэй холбож тайлбарладаг.

Энэ явдлаас хойш М.Өзил арьс өнгөний эсрэг үзэлд багагүй өртөж, үзсэн ядсан утга бүхий емайл, заналхийлсэн утасны дуудлага цөөнгүй ирсэн хэмээсэн юм. Энэ бүхнээс улбаатайгаар М.Өзил шигшээ багаасаа зодог тайлах шийдвэр гаргажээ. Тэрбээр “Арьс өнгөөр ялгаварлан гадуурхах үзэл ийм хүчтэй байгаа үед Германы өмсгөлтэй дахин талбайд гарахгүй. Энэ өмсгөлтэй талбайд ялалтын төлөө зүтгэх нь миний хувьд нэр төрийн хэрэг байлаа. Гэхдээ одоо ийм мэдрэмж авч чадахгүй байх. Ялгаварлан гадуурхах үзлийг хэзээ ч хүлээн зөвшөөрч болохгүй” гэж өөрийн твиттер хуудсандаа онцолжээ.

Хорватын шигшээ багийн довтлогч Никола Калинич ДАШТ-ий мөнгөн медалиас татгалзжээ. Италийн “Милан” багийн довтлогч Никола гарааны довтлогч Марио Манжукичийн сэлгээгээр дуудагдсан ч хэсгийн тоглолтод Нигерийн эсрэг сэлгээнээс талбайд гарахаас татгалзсан учир дасгалжуулагч Златко Далич багаасаа хөөсөн юм. Өдгөө 30 настай Н.Калинич нуруу нь өвдөж байна гэж баашилсан ч үүнд нь З.Далич болон шигшээ багийн эмч нар итгээгүй. Тиймээс туршлагатай довтлогчийг гэр лүү нь буцаасан юм.

Хэдийгээр хүн дутуу болсон ч гайхалтай тоглолт үзүүлсээр ДАШТ-ий шигшээд шалгарсан ч финалд Францын багт дийлдсэн билээ.

Гэхдээ нэгэнт шигшээгийн албан ёсны бүртгэлд багтсан учир түүнд медаль, шагналын мөнгө зэргийг олгох ёстой. Хорватын хөлбөмбөгийн холбоо ч түүнд медалийг нь өгөх хүсэлтэй байсан ч Н.Калинич өөрөө татгалзжээ. Тэрбээр “Сайхан санал тавьсанд баярлалаа. Гэхдээ би ДАШТ-д оролцоогүй. Тиймээс уг шагналыг хүлээн авч чадахгүй” гэж тайлбарлажээ.