Монголын хөлбөмбөгийн ертөнцийн шилдгүүдийг тодруулдаг “Алтан бөмбөг” ёслолын үйл ажиллагаа 2020 оны 12-р сарын 12-нд цахим хэлбэрээр явагдаж өнгөрсөн билээ.
Цаг үеийн нөхцөл байдлаас үүдэн олон хүн цуглах боломж олдохгүй байсаар өдийг хүрсэн тул “Алтан бөмбөг”-ийн шилдгүүд лигийн тоглолтуудын үеэр шагналаа авч эхэллээ.

Hisense үндэсний дээд лигийн 6-р тойргийн нэгэн сонирхолтой тулаан болох “Дэрэн” “Атлетик 220” клубүүдийн тоглолтын өмнө А.Дөлгөөн, О.Мөнх-Оргил, А.Тэмүүжин, Э.Мөнх-Эрдэнэ, Н.Наранболд нар “Бэлгэдлийн 11”-т багтсаны шагналаа авав.

“Атлетик 220” клубийг анх удаа үндэсний дээд лигийн аварга болоход үнэтэй хувь нэмэр оруулсан Б.Гарьдмагнай “Шилдэг эрэгтэйчүүдийн багийн дасгалжуулагч” номинацийн шагналаа хүртлээ.

Мөн “Атлетик 220” клубийн довтлогч Н.Наранболд “Атлан бөмбөг” ёслолын ажиллагааны гол номинац “Оны шилдэг эрэгтэй тоглогч” болон “Оны шилдэг гоол”-ын шагналаа хамтад нь гардан авсан юм.
Шагнал гардуулах ёслолд МХБХ-ны Ерөнхийлөгч А.Ганбаатар, Ерөнхий Нарийн Бичгийн Дарга Д.Тэрбаатар, Техникийн захирал Б.Буман-Учрал нар оролцлоо.