Английн “Манчестер Юнайтед” клуб дасгалжуулагч Жозе Моуриньюг халах шийдвэр гаргалаа. 

Өнгөрсөн долоо хоногт “Ливерпуль” багт 3:1-ээр хожигдож, 1990 оноос хойш буюу Английн Премьер лиг нэртэй болсноос хойш хамгийн тааруу гараагаа эхлүүлсэн “Манчестер Юнайтед” багийнхан португал мэргэжилтэн Жозе Моуриньюг халах шийдвэр гаргалаа.

“Дэйли Рекордс”-ын мэдээлснээр “Юнайтед” клуб түүнийг нэгдүгээр сараас өмнө халвал 24 сая фунтын нөхөн төлбөр олгох байсан юм. Тэрбээр есдүгээр сард сэтгүүлчдэд өгсөн ярилцлагадаа “Намайг эрт халагдах аюултай гэж анхааруулсан. Гэхдээ би тэгж бодохгүй байна. Эрт халагдвал нөхөн төлбөрт хэдийг төлөхийг мэдэх үү” гэж ярьж байлаа.

“Манчестер Юнайтед”-ийн удирдлагууд шинэ дасгалжуулагчаа 48 цагийн дотор томилно гэдгээ мэдэгдсэн. Харин тэр хүртэл дасгалжуулагчийн албыг Майкл Каррик түр хариуцах аж. 

“Лестер Сити” клубийн эзэн Вишай Шривадданапрабха болон өөр дөрвөн хүний сууж явсан нисдэг тэрэгний ослын шалтгааныг олон нийтэд танилцуулав. Уг нисдэг тэрэгний сүүл хэсгийн сэнсэнд асуудал үүсч, нисэх механизм алдагдсан тул осол болсон гэж шинжээчид үзсэн байна.

Агаарын ослын шалтгааныг тодруулдаг байгууллагын дүгнэлтээр нисдэг тэрэгний дөрөө сүүлний сэнстэй холбогдоогүй байсан тул хэм алдагдаж осолдсон гэж үзлээ. Сүүл хэсгийн сэнс ажиллагаагүй болсноор “AW169” нисдэг тэрэг агаарт удирдлагаа алдаж, “Кинг Пауэр” цэнгэлдэхийн ойролцоо осолдсон юм.

Уг нисдэг тэргэнд “Лестер Сити”-гийн эзэн Вишай Шривадданапрабхагаас гадна түүний арын албанд ажилладаг 2005 онд Тайландын Мисс Универс тэмцээний хоёрдугаар байрт орж байсан Нүсара Сүкнамай, Кавепорн Пунпаре болон нисдэг тэргийг жолоодож байсан нисгэгч Эрик Сваффер, Изабела Роза Лечовиш нар өөд болсон юм.

Нүдээр харсан гэрч нарын яриагаар нисдэг тэрэг 40 орчим секунд хэвийн ажиллагаатай хөөрөөд удалгүй агаар дээр хөдөлгөөнгүй болж, улмаар доош осолдсон гэнэ. Ойролцоогоор 131 метрийн өндрөөс доош унасан юм.

Английн “Челси” клуб ахлагч Сесар Аспиликуэтатай гэрээгээ сунгалаа. Испани хамгаалагч дөрвөн жилийн гэрээг үзэглэж, 2022 он хүртэл багтаа зүтгэх юм.

“Челси”-гийн хамгаалалтын гол тоглогч, өдгөө 29 настай Сесар Аспиликуэта 2012 онд Францын “Марсель” клубээс 7 сая фунтаар Английн багт очиж, одоо долоо дахь улирлаа Лондоны багт өнгөрүүлж байгаа юм. Тэрбээр 2013 оноос улсынхаа шигшээд дуудагдаж, энэ хугацаанд 25 тоглолтод оролцсон аж.

Харин “Челси” клубийн төлөө 298 тоглолтод оролцсон юм.

Түүнчлэн Премьер лигийн аварга цолыг хоёр удаа, Холбооны цом, Лигийн цом, Европа лигийн аварга болжээ. 2014 онд клубийнхээ шилдэг тоглогчоор тодорсон удаатай.

Шинэчлэгдсэн гэрээгээр Сесар долоо хоногт 150 мянган (өмнө нь 120 мянган фунт) фунтын цалин авахаар болжээ.

 

 

Английн шигшээ болон “Манчестер Сити” клубийн довтлогч Рахем Стерлинг одоо байгаа гэрээгээ шинэчилж, дахин гурван жил буюу 2023 он хүртэл багтаа зүтгэхээр боллоо. Энэ хугацаанд тэр долоо хоногт 300 мянган фунтын цалин авах юм.

Өдгөө 23 настай довтлогчийн өмнөх гэрээ ирэх улирлын дараа дуусах байсан ч гэрээгээ сунгахаар болжээ.

Р.Стерлинг 2015 онд “Ливерпуль” клубээс “Манчестер Сити” рүү 49 сая фунтын үнээр очсон. Харин одоо гэрээгээ шинэчилснээр Премьер лигт хамгийн өндөр цалинтай тоглогчдын нэг боллоо. Энэ улирлын өмнөх үзүүлэлтээр долоо хоногт 300 мянган фунтаас илүү цалин авдаг хоёр тоглогч байв. Тэд бол “Манчестер Юнайтед”-ийн хагас хамгаалагч Алекс Санчес долоо хоногт 315 мянган фунт, “Арсенал”-ын хагас хамгаалагч Месүт Өзил долоо хоногт 306 мянган фунтын цалин авч байв. Энэ жагсаалтын гуравдугаарт Р.Стерлинг бичигдэж, Пол Погбаг ардаа орууллаа.

Тэрбээр өмнө нь 150 мянган фунтын цалин авч байсан юм.

 

Английн “Лестер Сити” клубийн тайланд эзэн Вишай Шривадданапрабхагийн хувийн онгоц тус клубийн “King Power” цэнгэлдэхийн ойролцоо осолджээ. Премьер лигийн хүрээнд “Уэйст Хэм Юнайтед”, “Лестер Сити” багууд 1:1-ээр эвийн гэрээ байгуулсан тоглолтын дараа нэг их удалгүй хөөрсөн онгоц ойролцоох машины зогсоолын гадна осолдсон байна. Нүдээр харсан гэрч нарын мэдүүлгээр онгоцны мотор гэнэт ажиллахаа больж, доошоо шидэгдсэн гэнэ. 

2010 оноос хойш “Лестер Сити”-гийн эзэн болсон В.Шривадданапрабха өдгөө 60 настай. Тэрбээр 4.9 тэрбум ам.долларын хөрөнгөтэй юм. Дөрвөн хүүхэдтэй, хөрөнгийнхээ хэмжээгээр улсдаа тавдугаарт жагсдаг. Осол болох үеэр тэрбээр онгоцонд суусан ч одоогоор амь насаа алдсан эсэх нь тодорхойгүй байгаа аж. Түүнчлэн хичнээн хүн уг онгоцонд байсан эсэх нь тодорхойгүй байгаа юм.

Нэрээ нууцлахыг хүссэн нэгэн гэрчийн мэдүүлснээр осол болсны дараахан багийн зарим тоглогчид цэнгэлдэхээс гарч явсан. Багийн хаалгач Каспер Шмэйхель хамгийн түрүүнд осол болсон газар ирж, уйлж байсныг харсан аж. “Лестер Сити”-гийн эзэн тай эр гэртээ хийсэн тоглолт бүрийн дараа талбайн дундаас нисдэг тэргээр хөөрдөг гэнэ.

 

Английн “Челси” клубийн хамгаалагч асан Жон Терри хөлбөмбөгийн замналаа өндөрлөхөөр шийдэв. 1998 оны аравдугаар сард залуухан хүү Жон Терри “Челси”-гийн өмсгөлтэй анх удаа талбайд гарч байв. Түүнээс хойш 20 жил өнгөрч, албан ёсны сүүлийн тоглолтод оролцсоноос хойш таван сарын дараа өдгөө 37 настай Жон Терри хөлбөмбөгөө орхих цаг болсныг зарлав.

Ж.Терри Английн хоёрдугаар дивизионы баг болох “Астон Вилья” дахь гэрээ нь дууссанаас хойш дахин өөр багтай гэрээ хийгээгүй юм.

Тэр бол Английн шигшээд 78 тоглолт хийж, 2017 онд “Челси”-г орхих хүртлээ энэ багтаа үнэнчээр зүтгэсэн ахлагч.

20 жил “Челси”-д данстай явахдаа Английн Премьер лигийн аваргаар таван удаа, холбооны цомд тав, лигийн цомыг таван удаа хүртэж, Аваргуудын лиг, Европа лигт хүртэл түрүүлээд үзчихсэн. “Челси”-д 700 гаруй тоглолтод оролцсон түүхтэй.

Ж.Террид баг олдоогүйдээ их спортоо орхиогүй. “Астон Вилья” дахь гэрээ нь дуусаад ОХУ-ын “Спартак Москва” баг түүнд санал тавьсан ч гэр бүлийнхээ хүнтэйгээ ярилцаад татгалзахаар шийдсэн юм.

Ж.Терри 17 настайдаа буюу 1998 оны аравдугаар сард Лигийн цомын тэмцээний үеэр “Астон Вилья”-гийн эсрэг талбайд гарсан. Клубийнхээ төлөө анхны гоолоо 2000 онд Холбооны цомын тоглолтод “Гильингхэм”-ийн эсрэг оруулж байв.

2009-10 оны улиралд Английн Премьер лигийн аварга, Холбооны цомын аварга болж, багийнхаа төлөө 50-аас дээш тоглолтод оролцсон “Челси” клубийн түүхэнд ийм амжилт үзүүлсэн долоо дахь тоглогч болсон билээ.

Ж.Терригийн онцгой амжилтууд

• 40 – Английн Премьер лигийн түүхэнд тэр хамгийн олон гоол оруулсан хамгаалагч юм.
• 307 – Райан Гигз (407), Фрэнк Лампард (349), Пол Скоулз (321) нар л Премьер лигт Ж.Терригээс илүү олон ялалт байгуулж байв.
• 109 – Түүний Аваргуудын лигт тоглосон тоо. Англи тоглогчдоос П.Скоулз л түүнээс их буюу 124 тоглолтод оролцсон юм.
• 38 – “Челси” клуб 2014-15 оны улиралд лигийн аварга болоход Ж.Терри бүх 38 тоглолтод оролцож байлаа. Түүний тоглосон бүх тоглолтод баг нь 26 ялалт байгуулж, ердөө гуравхан удаа дийлджээ.
• 6 – Замналынхаа турш Премьер лигт зургаан удаа улаан хуудас авч хөөгдсөн. Аваргуудын лигийн нэг тоглолтыг улаан жавтий хүртэж, орхисон удаатай.
• 69 – Шар хуудасны тоо. 2011-12 оны улиралд найман шар хуудас авсан билээ.
• 1 – Хамгаалагч хүн оны шилдэг тоглогч болно гэдэг амаргүй. Боломжгүй зүйл гэж үгүй гэдгийг хамгаалагч эр харуулж, оны шилдгээр тодорсон юм.
• 3 – Европын хөлбөмбөгийн холбооноос оны шилдэг хамгаалагчаар гурван удаа түүнийг нэрлэсэн.

Өнгөрсөн долоо хоногт Английн “Фүлхэм” клуб “Миллуолл”-ыг 3:1-ээр буулган авахад сэлгээнээс талбайд орж ирсэн Харвэй Эллиот олны анхаарлыг татсан юм. Учир нь энэ хүү 15 нас, 174 хоногтойдоо насанд хүрэгчдийн багт гараагаа эхэлж, тус клубийн түүхэнд шинэ рекорд тогтоосон юм. Ингээд Премьер лигийн 20 багийн түүхэнд хамгийн залуудаа насанд хүрэгчдийн багт тоглож байсан 20 тоглогчийг танилцуулья.

1. AFC Борнмут – Жайден Стоклей

Довтлогч Жайден Стоклейг 2009 оны аравдугаар сарын 2-нд “Честерфилд”-ийн эсрэг “Борнмут” талбайд гаргаж байв. Энэ үед дөнгөж 16 настай байсан Ж.Стоклей багийнхаа найдаж байсан ирээдүйн од болж чадаагүй. Өдгөө 25 настай англи довтлогч хоёрдугаар дивизионы “Эксетер Сити” клубт зүтгэж буй.

2. Арсенал – Цеск Фабрегас

Ц.Фабрегас 2003 оны аравдугаар сард 16 нас, 177 хоногтой байхдаа Лигийн цомын гуравдугаар тойрогт “Ротерам Юнайтед” клубийн эсрэг анхны тоглолтоо хийсэн түүхтэй. Хэдийгээр Английн клубт богино хугацааг өнгөрүүлсэн ч дэмжигчдийн хайртай тоглогч болсон Ц.Фабрегас Испанийн “Барселона” клуб руу явсан. Харин одоо “Челси”-д зүтгэдэг.

3. Брайтон & Хоув Албион – Жэйк Форстер Каскей

2010 оны тавдугаар сард 16 нас, 13 хоногтой Форстер-Каскей хэмээх хүү “Брайтон” клубт анхны тоглолтоо хийсэн. Өдгөө 24 настай идэр залуу болсон хөлбөмбөгчин түүнээс хойш дөрвөн удаа өөр баг руу зээлээр явж, эцэст нь өнөгрсөн оноос “Чарлтон Атлетик” клубийн дундын шугамд тоглох болжээ.

4. Барнли – Камерон Ховесон

Довтлох чиглэлийн хагас хамгаалагч К.Ховесон 2012 оны дөрөвдүгээр сард 17 нас, гурван сар, 12 хоногтойдоо “Бирмингэм”-ийн эсрэг талбайд гарсан билээ. Шинэ Зеландын иргэншилтэй хөлбөмбөгчин эр өдгөө нутгийнхаа лигт данстай юм.

Кардифф Сити – Аарон Рамсэй 

Уэйлс хүү Аарон Рамсэй нутгийнхаа “Кардифф Сити”-д 2007 оны дөрөвдүгээр сард 16 нас, 123 хоногтой байхдаа талбайд гарсан удаатай. Үүнээс хойш нэг жилийн дараа “Арсенал”-д очсон А.Рамсэй өдгөө хуучин клубтээ зээлээр тоглож байна.

 6. Челси – Майкл Вудс

2007 оны нэгдүгээр сард Холбооны цомын тоглолтод “Челси”-гээс 16 нас, 9 сартай Майкл Вудс талбайд гарсан билээ. Өдгөө 28 настай энэ тоглогч “Хартлфүүл Юнайтед” багт данстай.

7. Кристал Палас – Жон Босток

Дөнгөж 15 нас, 287 хоногтой “бацаан” 2007 оны аравдугаар сард “Уатфорд”-ын эсрэг талбайд гарсан юм. Дараа жил нь энэ хүүг “Тоттенхэм” худалдаж авсан билээ. Одоо 26 настай Жон Английн лигт дорвитой амжилт үзүүлээгүй ч Бельги болон Францын лигт гялалзаж чадсан.

8. Эвертон – Жозе Бакстер

2008 оны наймдугаар сард “Эвертон” клуб 16 нас 191 хоногтой Ж.Бакстерт итгэл хүлээлгэв. Харамсалтай нь, удаан хугацаанд хөгжөөгүй энэ залууг 2012 онд “Олдхэм Атлетик” клуб руу зарсан юм. Одоо 26 настай Ж.Бакстер “Олдхэм Атлетик” клубийн салшгүй нэгэн хэсэг болсон.

9. Фүлхэм – Харвэй Эллиотт

“Фүлхэм” клуб Карабао цомын тэмцээнд учраа таарсан “Миллуолл”-ыг 3:1-ээр хожсон тоглолтын 81 дэх минутад 15 нас, 174 хоногтой Харвэй Эллиотыг талбайд гаргалаа.

10. Хаддерсфилд Тоун – Петер Харт

1974 оны гуравдугаар сард “Хаддерсфилд” клуб 16 нас, 229 хоногтой Петер Хартыг талбайд гаргаж, хамгийн залуу тоглогчоор бүртгүүлсэн түүхтэй. Хамгаалагч эр зургаан жил энэ багтаа зүтгээд “Уолсолл” клубт 10 жил тоглож, тэтгэвэртээ гарсан аж.

11. Лестер Сити – Эшли Чамбэрс

“Лестер Сити”-гийн хамгийн залуу тоглогч нь 15 нас, 203 хоногтой талбайд гарсан довтлогч Э.Чамбэрс. Тэрбээр 2005 оны есдүгээр сард анхны тоглолтоо хийж байв. Үүнээс хойш зургаан жил энэ багт данстай байхдаа гурван удаа зээлээр явж, 2011 оноос “Ёорк Сити”-д очсон аж.

Өдгөө 28 настай англи эр “Киддерминстер Харриерс” хэмээх жижигхэн багт данстай.

12. Ливерпуль – Жэром Синклайр 

Ж.Синклайр 2012 оны есдүгээр сард 16 нас, зургаан хоногтойдоо “Ливерпуль”-ийн өмсгөлтэй талбайд гарсан юм. Түүнийг тэр даруйд хэвлэлээр Английн шинэ од хэмээн нэрлэсэн ч Улаануудын бүрэлдэхүүнд хоёр тоглолтод оролцоод дахин талбайд гараагүй. Дөрвөн жилийн хугацаанд ердөө гурван тоглолтод оролцсон залууг 2016 онд “Уатфорд” руу явуулж, өдгөө “Сандерланд” клубт зээлээр тоглож байна.

  13. Манчестер Сити – Карим Рекик

Хамгаалагч Карим Рекик 16 нас, 9 сартай 2011 онд “Манчестер Сити”-гийн төлөө анхны тоглолтоо хийж, рекорд тогтоосон. Нидерланд залуу Английн лигт бүтэлгүйтээд Францын “Марсель” руу явжээ. Тэнд хоёр жил тоглосон 23 настай хамгаалагч өдгөө “Херта Берлин”-д данстай юм.

14. Манчестер Юнайтед – Анхель Гомес

Довтлох чиглэлийн хагас хамгаалагч Анхель Гомес 2017 оны тавдугаар сард 16 нас 8 сартай талбайд гарч, Улаан чөтгөрүүдийн бүрэлдэхүүнд талбайд гарсан хамгийн залуу тоглогч болсон. Тэр одоо ч “Манчестер Юнайтед” клубт данстай ч дахин талбайд гараагүй байна.

15. Ньюкастл Юнайтед – Харис Вукич 

Довтлогч Харис Вукич 2009 онд 17 нас, тав хоногтой талбайд гарч, клубийнхээ хамгийн залуудаа талбайд гарсан тоглогч болов. Х.Вукич 2017 он хүртэл багтаа зүтгэсэн ч өнгөрсөн жилээс Нидерландын “ФС Твент” клубт зүтгэх болжээ.

16. Саутхэмптон – Люк Шав

Өдгөө “Манчестер Юнайтед” багт зүтгэж буй Л.Шав 2012 оны арваннэгдүгээр сард 17 нас, 116 хоногтойдоо “Саутхэмптон”-ы төлөө талбайд гарч, мэргэжлийн хөлбөмбөгчний замналаа эхэлсэн юм. Тэрбээр 2014 оноос “Манчестер Юнайтед” клубт зүтгэж буй.

17. Тоттенхэм – Жон Босток

Энэ жагсаалтад хоёр удаа багтсан цор ганц тоглогч бол Жон Босток. 2008 онд Хойд Лондоны “Тоттенхэм” клубт очсон Жон 16 нас, 9 сартай талбайд гарч, “Тоттенхэм” клубт мөн хамгийн залуудаа тоглосон билээ.

18. Уатфорд – Киерон Форбес

Төвийн хагас хамгаалагч К.Форбес 2007 онд 16 нас, 11 сартайдаа анхны тоглолтод оролцож байлаа. Гэхдээ “Уатфорд” дахь түүний замнал удаан үргэлжлээгүй юм. Дараа жил нь өөр багт очиж, өдгөө “Фарнборо” клубт данстай аж.

19. Уэйст Хэм Юнайтед – Рийс Оксфорд

Рийс Оксфорд 2015 оны долдугаар сард 16 нас 6 сартай талбайд гарч байв.

20. Волверхамптон – Жимми Муллен

Жимми Муллен бол тус клубийн бахархал болсон домогт тоглогч. Тэрбээр 1939 оны хоёрдугаар сард 16 нас, 43 хоногтойдоо талбайд гарч, үүнээс хойш 23 жил нэг клубтээ үнэнч зүтгэсэн нэгэн. Ж.Муллен Английн шигшээд 1947-1954 оны хооронд 12 удаа тоглож, зургаан гоол оруулж байжээ.

 

Английн шигшээ багийн ахлагч асан Жон Террид ОХУ-ын “Спартак Москва” клуб нэг жилийн гурван сая фунтын цалин амласан ч гэр бүлийн шалтгаанаар Москвад очихгүй гэдгээ мэдэгдсэн байна.

Өдгөө 37 настай Ж.Терри өнгөрсөн долоо хоногт Ром хотод эмнэлгийн үзлэгт хамрагдсан юм. Тэрбээр гэр бүлийнхэнтэйгээ ярилцаад ийм шийдвэр гаргасан гэж хувийн мэдэгдэлдээ дурджээ.

Ж.Терри “Челси” клубт 700 гаруй тоглолтод оролцож, Премьер лиг болон Холбооны цомыг тус бүр таван удаа өргөж, 2012 онд Аваргуудын лигт түрүүлсэн юм.

Харин өнгөрсөн улиралд “Астон Вилья”-гийн бүрэлдэхүүнд 36 тоглолт хийсэн билээ. Одоогоор Ж.Терри хуучин багтаа үлдэх үү, эсвэл шинэ баг сонгох уу гэдэг нь тодорхойгүй хэвээр байгаа аж.

 

Английн шигшээ болон “Тоттенхэм”-ийн довтлогч Харри Кэйний наймдугаар сард гоолдож үзээгүй “хараал” тайлагдав. “Спэрс” энэ өдөр “Фүлхэм”-тэй учраа таарч, 3:1-ээр буулган авахад англи довтлогч гурав дахь гоолыг оруулснаар “Тоттенхэм”-ийн төлөө Премьер лигт 109 гоолтой боллоо.

Эхний хагаст бразил хагас хамгаалагч Лукас Моура гоолын салхийг хагалж, Премьер лигт анхны гоолоо гүйцэтгэсэн юм. Гэхдээ “Фүлхэм”-ийн серб довтлогч Александер Митрович хоёрдугаар хагасын 52 дахь минутад мөргөж, тооны харьцааг тэнцүүлэв.

Том биетэй, хүчээр ааглаж тоглодог А.Митровичийг колумб хамгаалагч Дэвинсон Санчес дийлэхгүй байсан тул М.Почетино түүнийг суулгаж, хашир туршлагатай Тоби Алдейвералдыг төвд үлдээгээд бельги хагас хамгаалагч Моусса Дэмбэлэг талбайд гаргалаа. Үр дүнд нь Киран Триппьер чөлөөт цохилтоос гоол оруулсан бол төгсгөлд нь Эрик Дайерийн оронд сэлгээгээр гарч ирсэн аргентин хагас хамгаалагч Эрик Ламелагийн дамжуулалтаар Х.Кэйн эцсийн цэгийг тавив. Харрид үүнээс эрт гоол оруулах боломж гарсан ч хөндлөвч оносон. Тэрбээр 2012 оноос хойш Премьер лигт зүтгэхдээ наймдугаар сард нэг ч гоол оруулж чадаагүй юм. Тэгвэл 1000 гаруй минутын турш гоол оруулаагүй хар дарсан зүүд нь төгсгөл боллоо.

“Манчестер Юнайтед”-ийн залуу авьяастан Андрес Перейра тун удахгүй аль шигшээ багт тоглохоо шийдэх бололтой. Бразил гэр бүлээс гаралтай ч Бельгид төрсөн хагас хамгаалагч эр өөрөө Португал хэлээр ярьдаг, Бразилын “Сантос” багийн хөгжөөн дэмжигч аж.

Тэрбээр Бельгийн U15, U16 болон U17 насны шигшээд тоглож байсан ч дараа нь Бразилын U20, U23-т багтсан.

Тэгвэл “UOL” цахим сайтын мэдээлснээр А.Перейра дахин Бельгийн шигшээд дуудагдаж магадгүй бололтой. Өнгөрсөн долоо хоногт “Манчестер Юнайтед”-“Лестер Сити”-гийн тоглолтыг Бельгийн шигшээ багийн дасгалжуулагч Роберто Мартинес үзэж сонирхсон юм.

UOL сайт тоглогчтой ойр байдаг эх сурвалжаас түүнийг Бразилын шигшээд тоглох сонирхолтой байгаа талаар мэдээлэл авсан аж. Гэхдээ Бельгийн шигшээгээс түрүүлж дуудлага ирээд, Улаан чөтгөрүүдийн төлөө тоглохоор шийдчихвэл буцаад Бразилд тоглох боломжгүй болох юм.

Бразилын шигшээ баг “Челси”-д зүтгэж буй Жоржиньог Италид алдсан. Хэдийгээр Өмнөд Америкийн нутагт төрсөн ч өвөө, эмээ нь итали хүн учраас тэр ийм шийдвэр гаргасан гэдэг.

Английн “Челси” клубийг шинэ улиралд удирдаж буй итали мэргэжилтэн Маурицио Сарри архаг тамхичин гэдгээрээ алдартай нэгэн. Учир нь 59 настай М.Сарри Италийн “Наполи” клубийг удирдаж байхдаа талбайн гадна тамхи татаж буй дүр зураг их элбэг бий.

Гэхдээ Их Британид хөлбөмбөгийн цэнгэлдэхэд тамхи татахыг хориглодог журамтай. Англид тамхины эсрэг хуулийг 2006 оноос хойш мөрдөж эхэлсэн бөгөөд олон нийтийн газар, албан тасалгаанд тамхи татахыг хориглосон юм.

Итали эр өдөрт 80 ширхэг тамхи татдаг дуусгадаг талаар Английн хэвлэлүүд онцолжээ.

Тамхи татах эрхээ эдэлж чадаагүй М.Сарри Английн лигийн нээлтийн тоглолтын үеэр тамхины иш зажилж байсан нь олны анхаарлыг татаж, цахим ертөнцөд ч чимээгүй өнгөрөөгүй юм.

“Челси” клуб шинэ мэргэжилтэндээ зориулж, тоглолтын үеэр тамхи татах цэг, тасалгаа гаргаж өгөхөөр шийдсэн бололтой. Одоогоор ямар аргаар энэ асуудлыг шийдвэрлэх гарцаа олоогүй байгаа ч гэртээ хийх тоглолтоос өмнө гарц олно гэдэгтээ итгэлтэй байгаа аж.

 

“Манчестер Юнайтед” 2:1 “Лестер Сити”

Гоол: Поль Погба (3), Люк Шав (83), Жамье Варди (90+2)

Шигшээ багаа дэлхийн аварга руу хөтөлсөн франц довтлогч Поль Погба шинэ улирлын эхний тоглолтод амарч магадгүй байлаа. Зуны турш өөр баг руу явах, үгүй нь эргэлзээтэй байсан ч “Манчестер Юнайтед” багтаа үлдсэн тэрбээр эхний тоглолтод багийн ахлагчаар талбайд гарч, ердөө гурав дахь минутад торгуулийн цохилтоос гоол оруулснаар энэ улирлын анхны гоолыг оруулав. Улаан чөтгөрүүд “Олд Траффорд” цэнгэлдэхдээ хийсэн сүүлийн 122 премьер лигийн тоглолтод эхэлж гоолдсон бол хожигдоогүй үзүүлэлттэй. Хамгийн сүүлд 2009 оны гуравдугаар сард “Ливерпуль”-д 4:1-ээр ялагдсан юм.

Үүнийг батлах мэт хамгаалагч Люк Шав 83 дахь минутад энэ улирлын хоёр дахь, “Манчестер Юнайтед” багтаа 67 тоглолтын дараа анхны гоолоо орууллаа.

Тоглолтын үндсэн цаг дуусахад “Лестер Сити”-гийн туршлагатай довтлогч Жамье Варди тооны харьцааг ойртуулсан ч Жозе Моуриньюгийн шавь нар гурван оноогоо халааслав.

Сонирхуулахад, Жозе Моуринью лигийн эхний тоглолтод 18 удаа багаа удирдаад нэг ч ялагдаж үзээгүй аж. Тэрбээр нийт 11 ялж, долоо тэнцсэн үзүүлэлттэй. Английн лигт бол 10 тоглолтоос есд нь хожиж, нэг тэнцсэн байна.