Category: Хөлбөмбөг

Шөвгийн 16-гийн сугалаа гарлаа

Өнөөдөр буюу энэ сарын 17-нд Монголын цагаар 19:00-д Аваргуудын лигийн шөвгийн 16-гийн сугалаа боллоо. 

Шөвгийн 16-гийн эхний тоглолт ирэх оны хоёрдугаар сарын 12-13 болон 19-20-нд харин хариу тоглолт гуравдугаар сарын 5-6 болон 12-13-нд болох юм.

Сугалаа

  • Шальке (Герман) ——————- Манчестер Сити (Англи)
  • Атлетико Мадрид (Испани) —————- Ювентус (Итали)
  • Манчестер Юнайтед (Англи) ————— ПСЖ (Франц)
  • Тоттенхэм (Англи) ——————– Борусси Дортмунд (Герман)
  • Лион (Франц) ——————– Барселона (Испани)
  • Рома (Итали) ——————— Порто (Португал)
  • Аякс (Нидерланд) ————- Реал Мадрид (Испани)
  • Ливерпуль (Англи) ———– Бавари Мюнхен (Герман)

Азтай “Тоттенхэм” & азгүй “Интер”

Аваргуудын лигийн хэсгийн шатны сүүлийн тоглолтууд энэ долоо хоногт болж буй. Өнөөдөр дөрвөн хэсгийн найман тоглолт боллоо. 

Хэсэг А

Брюгге 0:0 Атлетико Мадрид

“Атлетико Мадрид” ялвал хэсгээ тэргүүлэх байсан ч гоол оруулж чадалгүй хуурай тэнцлээ. 

Монако 0:2 Борусси Дортмунд

Португал хамгаалагч Рафаэль Гуеррейро хоёр гоол оруулсан юм

Германы клуб өрсөлдөгчөө ялснаар хоорондын тоглолтын зөрүүгээр “Атлетико Мадрид”-аас илүү гарч, хэсгээ тэргүүллээ. Францын “Монако” клуб Аваргуудын лигт 14 тоглолт дараалан ялалт байгуулж чадсангүй. 

  1. Дортмунд – 13
  2. Атлетико Мадрид – 13
  3. Брюгге – 6
  4. Монако – 1

Хэсэг B

Барселона 1:1 Тоттенхэм

Нэгэнт хэсгээ тэргүүлэх нь тодорхой болсон “Барселона” энэ тоглолтод Л.Месси, Л.Суарес нарыг амраасан юм. Гэхдээ нутаг дээрээ хожигдохыг хүссэнгүй. Осман Дембеле долоо дахь минутад гоолын салхийг хагалсан. Тэрбээр Аваргуудын лигт хийсэн сүүлийн гурван тоглолтод бүгдэд нь гоол оруулжээ.  Харин Английн клуб 85 дахь минутад Харри Кэйний дамжуулалтаар Лукас Моура хариуг нь барьж, 1:1-ээр эвийн гэрээ байгуулсан. Ийнхүү “Тоттенхэм” клуб хэсгийн шатны эхний хоёр тоглолтод хожигдсон ч хэсгээсээ шалгарсан Английн гурав дахь баг болжээ. (Ньюкастл 2002/03, Арсенал 2015/16)

Интер Милан 1:1 ПСВ Эйндховен

Икардигийн 200 дахь тоглолт

Эхэлж хаалгандаа гоол алдсан ч 73 дахь минутад Икарди тоог тэнцүүлсэн боловч Европа лигийг зорилоо. Икарди “Интер”-ийн төлөөх 200 дахь тоглолтод оролцож, Аваргуудын лигийн гэртээ хийсэн гурван тоглолтод бүгдэд нь гоолдсон тус багийн анхны тоглогч болоод ч багаа хасагдах шатанд шалгаруулж чадсангүй.

  1. Барселона – 14
  2. Тоттенхэм – 8 
  3. Интер Милан – 8
  4. ПСВ Эйндховен – 2

Хэсэг С

Ливерпуль 1:0 Наполи

Мохамед Салах цор ганц гоолыг оруулсан юм

34 дэх минутад Мохамед Салах энэ тоглолтын эхний бас эцсийн гоолыг оруулж, баг нь өрсөлдөгчөө хожоод зогсохгүй хоорондын тоглолтын гоолын зөрүүгээр хасагдах шатанд шалгарав. Ийнхүү Английн клуб Европын түвшинд дасгалжуулагч Юрген Клоппын удирдлага дор гэртээ хийсэн сүүлийн 19 тоглолтод ялагдаж үзсэнгүй.

Ред Стар 1:4 ПСЖ

Парисын багийн довтолгооны гурвал бүгд гоолдлоо. Залуу од Клиан Мбаппе Аваргуудын лигийн хэсгийн шатанд хийсэн 12 тоглолтод 12 гоолд (6 гоол 6 оновчтой дамжуулалт) оролцжээ.

  1. ПСЖ – 11
  2. Ливерпуль – 9
  3. Наполи – 9
  4. Ред Стар – 4

Хэсэг D

Галатасарай 2:3 Порто

“Порто” энэ улиралд Аваргуудын лигт хожигдолгүй хэсгээсээ шалгарлаа. Икер Касильяс Аваргуудын лигт 100 дахь хожилтой хоёр дахь тоглогч (эхнийх нь Криштиану Роналду) болов. 

Шальке 1:0 Локомотив Москва

Оросын баг ялж чадаагүй учир Туркийн “Галатасарай” хэсэгтээ гуравдугаар байр эзэлж, Европа лигт өрсөлдөх эрхтэй боллоо.

  1. Порто – 16
  2. Шальке – 11
  3. Галатасарай – 4
  4. Локомотив Москва – 3

Хөлбөмбөг: Афганистаны хөлбөмбөгийн холбооны тэргүүн эмэгтэй тамирчдад дарамт үзүүлсэн хэргийг шалгана

Афганистаны хөлбөмбөгийн холбооны зургаан хүнийг эмэгтэй тамирчдад бэлгийн дарамт учруулсан хэргээр эрхийг нь хязгаарласан байна. Хэргийг мөрдөн шалгах ажиллагаа дөнгөж эхэлж байгаа тул одоогоор ийм арга хэмжээ авчээ.

Афганистаны хөлбөмбөгийн холбооны удирдлагууд, арын албаны ажилчидтай холбогдох дуулианд тус холбооны тэргүүн Керамуддин Керам хүртэл нэр холбогдсон юм. Энэ талаар Их Британийн “Guardian” сонин анх олон нийтэд мэдээлсэн бөгөөд одоо Афганистан даяар дуулиан тарьж эхэлжээ.

Эмэгтэй хөлбөмбөгчид бие махбодийн болон бэлгийн хүчирхийлэлд өртдөг, олонд мэдэгдвэл амь насанд нь халдахаар сүрдүүлдэг. Орон нутгийн тэмцээн, холбооны төв байр тэр ч бүү хэл өнгөрсөн хоёрдугаар сард Йорданд хийсэн бэлтгэлийн цугларалтын үеэр ийм дарамт байсан талаар Их Британийн хэвлэлд онцолсон юм.

Афганистаны хөлбөмбөгийн холбооноос зориуд бидний нэр хүндийг унагах гэсэн оролдлого хэмээн тайлбарласан.

Тэгвэл энэ мэдээллийг тус улсын Ерөнхийлөгч Ашраф Гани зүгээр өнгөрүүлэхгүй гэдгээ мэдэгджээ. Түүний тушаалаар олон нийтийг цочирдуулсан хэрэгт мөрдөн байцаалт явуулахаар болсон юм. Тиймээс холбооны тэргүүн Керамуддин Керам нарын хэрэгт холбогдсон зургаан хүний албан тушаалыг нь цуцалж, шалгах ажиллагааг эхлүүлсэн байна.

Петер Шмейхель хоёр хоногийн дараа монголд ирнэ

Монголын хөлбөмбөгийн холбооны урилгаар хоёр хоногийн дараа буюу энэ сарын 12-нд дэлхийн шилдэг хаалгачдын нэг Петер Шмейхель манай улсад ирнэ. Тэрбээр Монголын хөлбөмбөгийн оны шилдгийг шалгаруулах “Алтан бөмбөг” ёслолын ажиллагаанд оролцохоор ирж буй юм.

“Лестер Сити” клубийн хаалгач Каспер Шмейхель хоёр жилийн өмнө нэгэн сонинд өгсөн ярилцлагадаа “Би 29 настай, хоёр хүүхдийн эцэг. Гэхдээ хүмүүс намайг ааваар минь илүү таньдаг хэвээрээ” гэж ярьж байв. Тийм ээ, түүний эцэг нь Петер Шмейхель учраас тэр. Данийн шигшээгийн нэгдүгээр хаалгач Каспер Шмейхелийг “Лестер Сити”-г Премьер лигийн аваргаар анх удаа тодроход хүмүүс илүү сайн мэддэг болсон юм. Өнгөрсөн зун болсон ДАШТ-ээр Каспер шаггүй хаалгач гэдгээ дахин нэг бататгаж амжсан.

Петерийн хүү Каспер Шмейхель

1991 оны зун. Данийн “Брондбю” хөлбөмбөгийн клуб лигийнхээ аваргаар тодорч, түүхэндээ тав дахь цомоо өргөв. Аваргалсан клубийнхэн баяраа хөгжөөн дэмжигчиддээ цуг тэмдэглэх үеэр тэр үед дөрвөн настай жаахан хүүг хамгаалагч нар дотогш орохыг хориглож байв. Энэ хүү бол ирээдүйд улсынхаа өнгийг тодорхойлсон, аав шигээ шилдэг хаалгач болно гэдгийг тэд мэдээгүй юм. Тэр дөрвөн настай хүүгийн эцэг нь Петер Шмейхель. Энэ явдлаас хойш хэдэн долоо хоногийн дараа Петер Английн “Манчестер Юнайтед” клубийн нэгдүгээр хаалгач болов. Яг 25 жилийн дараа хүү Каспер нь аавынхаа явсан замаар Англид очиж, “Лестер Сити”-тэй хамт “Үнсгэлжингийн үлгэр” бүтээсэн түүхтэй.

1992 он. Петер Шмейхель хүүгийнхээ хамт “Олд Траффорд” цэнгэлдэхэд

Петер Шмейхель Данийн Копенхаген хотод польш цагаачийн гэр бүлд төрж, өссөн. Түүний эцэг Толек 1960-аад оны үед Дани руу цагаачилсан польш хүн байлаа. Аавынхаа талаар Петерийн хэвлэлд ярьсан түүх гунигтай. Дайны үед хорвоод мэндэлсэн Толекийн хүүхэд нас тун хэцүү өнгөрчээ. Петерийн өвөө нь дайн дөнгөж эхлэх үеэр цэргүүдэд буудуулж нас баржээ. Харин эцэг нь амьдралд амар бууж өгөөгүй, маш тэвчээртэй нэгэн байлаа. Петерийн эцэг хөгжимчин хүн байсан бол хүү нь бас ач хүү нь хөлбөмбөгчин болсон юм.

Петер Шмейхель Английн Премьер лигт таван удаа түрүүлсэн

Петер Шмейхель Данийн клубээс 500 мянган фунтын үнээр “Манчестер Юнайтед” багт очсон. Хожим Сер Алекс Фергюсон түүний талаар “Зууны наймаа” гэж онцолсон удаатай. Польш гаралтай дани эр найман жилийн хугацаанд Улаан чөтгөрүүдийн хаалгыг манахдаа Премьер лигт тав, Холбооны цомд гурван удаа түрүүлж, 1999 онд Аваргуудын лигт аваргалж байв. Аваргуудын лигт түрүүлэх үед Петер тус багийн ахлагч нь байлаа. 1998-99 оны улирлын дараа 35 настай байсан Петер “Манчестер Юнайтед”-ийг орхих шийдвэр гаргаж байв. Түүнийг багаа орхисноос хойш Эдвин ван дер Сарыг 2005 онд авчрах хүртлээ зургаан жилийн хугацаанд “Манчестер Юнайтед”-ийн хаалгыг 9 өөр хаалгач манаж байлаа.

ЕВРО 92 тэмцээний үеэр

Петер зөвхөн “Манчестер Юнайтед” багтаа гайхалтай амжилт үзүүлсэн тоглогч биш. Данийн шигшээдээ ч баатарлаг гавьяа байгуулсан нэгэн. Эрэлхэг тугалган цэрэг, Цасан хатан, Ямх охин, Нугасны муухай дэгдээхэй зэрэг олон гайхалтай үлгэрийг зохиосон Ханс Христиан Андерсений нутгийн хөлбөмбөгчид 1992 оны зун хөлбөмбөгийн түүхэнд бас нэгэн үлгэр бичсэн түүхтэй. Тивийнхээ аварга шалгаруулах тэмцээнд оролцох урьдчилсан шатанд Данийн шигшээ баг Югославын ард жагссан юм. Гэвч Югославт иргэний дайн дэгдсэн учир хөлбөмбөгийн холбооноос хориг тавьж, урьдчилсан шатанд хоёрдугаар байр эзэлсэн даничууд ЕВРО 92-ын эрхээ авчээ.

1992 оны Европын АШТ-д түрүүлсэн Данийн шигшээ баг

Тивийн аварга эхлээд дуусах хүртлээ даничууд үлгэрийг амилуулна гэдэгт итгэх хүн ховор байсан юм. Азаар тэмцээнд оролцох эрхтэй болсон тэд Франц, Англи болон талбайн эзэн Шведтэй нэг хэсэгт орсон. Эхний учраа англичуудтай хийхэд 0:0-ээр эвийн гэрээ байгуулсан юм. Энэ тоглолтын талаар Петер “Тоглолт тэнцсэн ч бид хожсон юм шиг баярлаж байлаа. Англичуудтай нэг түвшинд гэдгээ мэдсэн нь бидний цаашдын тоглолтод их урам өгсөн” гэж ярьсан аж. Харамсалтай нь, дараагийн тоглолтод талбайн эзэн Шведэд 1:0-ээр ялагдсан. Энэ тоглолтын дараа хүн бүр л Данийн шигшээг хасагдсанд тооцож байв. Учир нь хэсгийн сүүлийн учраа нь хүчирхэг Францын шигшээ баг байлаа. Даничууд энэ тоглолтод 2:1-ээр ялснаар хагас шигшээд шалгарсан юм. Хасагдах шатанд Нидерландын шигшээ багтай үндсэн цагт 2:2-ээр тэнцэхэд Хенрик Ларсен хоёр гоол оруулсан юм. Нэмэлт цагт тооны үр дүн өөрчлөгдөөгүй тул торгуулийн цохилтоор шийдэх боллоо. Торгуулийн цохилт цохисон 10 тоглогчоос ердөө ганцхан хүн алдсан нь алдарт Марко ван Бастен.

Аваргын төлөө тэдэнтэй дэлхийн аваргууд болох Германы хүчирхэг баг учраа таарсан. Эхний гоолыг даничууд оруулсан хэдий ч аваргууд тоог тэнцүүлэхээр дайрч байлаа. Эхний хагасын сүүлийн минутад Юрген Клинссманы цохисон бөмбөгийг хаасан талаараа Петер хожим амьдралдаа хийсэн хамгийн шилдэг хаалт гэж онцолсон юм.

Петер Шмейхель шигшээ багийнхаа хамтаар Европын аварга болж, Английн Премьер лигт таван удаа түрүүлж, Аваргуудын лигийн цомыг өргөж байлаа. Гэхдээ түүний хувьд хамгийн үнэ цэнэтэй зүйл бол хүүгийнх нь “Лестер Сити”-д түрүүлсэн амжилт юм.

Түүний Монголд байх цагийн хуваарь:

  • 12-р сарын 12-нд 07:00 цагаас ? Монголд газардана ???️ – Түүнийг тосч авч, уулзахыг хүссэн хүн бүрт нээлттэй. “Манчестер Юнайтед”-ийн өмсгөлтэй ирсэн эхний 40 хүнд “Алтан бөмбөг 2018”-д оролцох урилга өгөх аж.
  • 12-р сарын 12-нд 18:00 цагаас ? Алтан Бөмбөг-2018 Ёслолын Ажиллагаа-нд оролцоно. ⚽️??
  • 12-р сарын 12-нд 21:00 цагаас ? Highland Park Mongolia-д Петер Шмейхельтэй ҮДЭШ арга хэмжээнд оролцож, хөгжөөн дэмжигчидтэй чөлөөтэй ярилцаж, цагийг зугаатай өнгөрөөнө.

Хөлбөмбөг: Криштиану Роналду Мадрид хот руу очихоос татгалзав

Өмнөд Америк тивийн Аваргуудын лиг хэмээн нэрлэж болох “Либертадорес Цом” тэмцээний шигшээд Аргентинийн заналт хоёр баг болох “Бока Хуниорс”, “Ривер Плэйт” баг шалгарч үлдсэн. “Бока”-гийн талбайд болсон эхний тоглолт 2:2 харьцаатай өндөрлөж, хариу тоглолт “Ривер Плэйт”-ийн талбайд энэ сарын 24-нд болох ёстой байлаа.

Харамсалтай нь, хөгжөөн дэмжигчдийн халдлага хэрээс хэтэрсэн тул зохион байгуулагчид тоглолтыг цуцалсан юм. Ингээд зогсохгүй Аргентинаас өөр газар тэмцээнийг зохион байгуулах шийдвэр гаргасан. Ингээд энэ ням гаригт Испанийн Мадрид хотод “Сантияго Бернабеу” цэнгэлдэхэд явуулахаар болсон билээ.

Зохион байгуулагчид Аргентинийн шигшээгийн тоглогч Лионель Мессиг үзэгчийн хувиар урьсан. Тэгвэл Криштиану Роналдуд мөн урилга өгсөн ч португал эр очихгүй гэдгээ илэрхийлэв.

Испанийн хөлбөмбөгийн холбоо хоёр супер од тоглогчийг нэг дор цуг сууж, Өмнөд Америкийн АШТ-ийг үзэхийг хүссэн ч өнгөрсөн зун “Реал”-аас Италийн “Ювентус” руу очсон К.Роналду хуучин багийнхаа хотод очих бодолгүй байгаа аж.

Тоглолт энэ ням гаригт болно

Эх сурвалжийн мэдээлснээр К.Роналду хувийн шалтгааны улмаас татгалзсан хариу өгчээ. Тэрбээр хуучин багийнхаа удирдлагуудад сэтгэл дундуур байгаагаа нэг бус удаа хэвлэлээр ярьж байсан юм. “Ювентус” руу явсныхаа дараа өөрийг нь үл хүндэтгэсэн үйлдэл гаргасан гэж шүүмжлээд амжсан билээ. Тиймээс одоо Бернабеу цэнгэлдэхэд очих цаг нь биш гэж үзсэн бололтой.

Испанийн “Реал Мадрид” болон Италийн “Ювентус” клуб Аваргуудын лигт хоёул хэсгээ тэргүүлсэн тул хасагдах шатанд учраа таарах боломжтой байгаа билээ.

Сонирхуулахад, уг тоглолтын аюулгүй байдалтай холбоотойгоор “Бока”-гийн хулигаан хөгжөөн дэмжигчдийг Аргентин руу буцаасан байна. Түүнчлэн тоглолтын үеэр 2500 гаруй цагдаа хэв журам сахиулах аж.

 

“Лестер Сити”-гийн эмгэнэлт явдлын ослын шалтгаан тодорхой боллоо

“Лестер Сити” клубийн эзэн Вишай Шривадданапрабха болон өөр дөрвөн хүний сууж явсан нисдэг тэрэгний ослын шалтгааныг олон нийтэд танилцуулав. Уг нисдэг тэрэгний сүүл хэсгийн сэнсэнд асуудал үүсч, нисэх механизм алдагдсан тул осол болсон гэж шинжээчид үзсэн байна.

Агаарын ослын шалтгааныг тодруулдаг байгууллагын дүгнэлтээр нисдэг тэрэгний дөрөө сүүлний сэнстэй холбогдоогүй байсан тул хэм алдагдаж осолдсон гэж үзлээ. Сүүл хэсгийн сэнс ажиллагаагүй болсноор “AW169” нисдэг тэрэг агаарт удирдлагаа алдаж, “Кинг Пауэр” цэнгэлдэхийн ойролцоо осолдсон юм.

Уг нисдэг тэргэнд “Лестер Сити”-гийн эзэн Вишай Шривадданапрабхагаас гадна түүний арын албанд ажилладаг 2005 онд Тайландын Мисс Универс тэмцээний хоёрдугаар байрт орж байсан Нүсара Сүкнамай, Кавепорн Пунпаре болон нисдэг тэргийг жолоодож байсан нисгэгч Эрик Сваффер, Изабела Роза Лечовиш нар өөд болсон юм.

Осол болсон газар

Нүдээр харсан гэрч нарын яриагаар нисдэг тэрэг 40 орчим секунд хэвийн ажиллагаатай хөөрөөд удалгүй агаар дээр хөдөлгөөнгүй болж, улмаар доош осолдсон гэнэ. Ойролцоогоор 131 метрийн өндрөөс доош унасан юм.

Катар 2022 ДАШТ-ий цэнгэлдэхүүд

ОХУ-д хөлбөмбөгийн ДАШТ өндөрлөсний дараа спорт сонирхогчдын анхаарал 2022 оны Катар луу шилжсэн. Арабын хойгоос анх удаа хөлбөмбөгийн их наадмыг зохион байгуулах эрх авсан катарчууд олон асуудалтай холбогдсон. Олон улсын хөлбөмбөгийн холбооны тэргүүн Жианни Инфантино Доха хотод  хийсэн ажлын хэсгийн шалгалтын дараа “Оросууд ДАШТ-ийг гайхалтай зохион байгуулсан. Дөрвөн жилийн дараа катарчууд тэднээс илүү хийнэ гэдэгт итгэлтэй байна” гэж ярьсан юм. Ингээд тус ДАШТ-д зориулсан бүтээн байгуулалт болох цэнгэлдэхүүдийг танилцуулья.

Khalifa International Stadium

“Халифа” цэнгэлдэх хүрээлэн

“Халифа” цэнгэлдэх хүрээлэн 1976 онд баригдсан, Дохагийн анхны спортын цэнгэлдэх. Нийт 40 мянган үзэгчийн суудалтай энэ цэнгэлдэхэд 2006 оны Азийн Наадам, Азийн хөлбөмбөгийн холбооноос зохион байгуулдаг Азийн цомын тэмцээн зэрэг болж байв.

Тус цэнгэлдэхийн дотор тал

Al Wakrah Stadium 

“Аль Вакра” цэнгэлдэхийн дээврийн хэсгийг одоо барьж буй

Аль Вакра хотын баруун хэсэгт баригдаж буй шинэ цэнгэлдэх 40 мянган хүний суудалтай. Энэ цэнгэлдэхийг барих ажил одоо бараг дуусч буй бөгөөд ажилчид дээврийн хэсгийг барьж дуусгахаар шаргуу ажиллаж буй. 2014 оноос барьж байгаа бөгөөд загварыг Заха Хадид гаргасан аж. ДАШТ-ий үеэр ашиглахаас гадна орон нутгийн хөлбөмбөгийн клубийн гэртээ хийх тоглолтыг зохион байгуулах юм.

Барилгын дотор

Lusail Stadium

Хөлбөмбөгийн ДАШТ-ий нээлт болон хаалтын үйл ажиллагааг энэ цэнгэлдэхэд хийнэ

Катарын нийслэл Дохахоос хойд зүгт 23 км зайтай орших Лусаил дагуул хотод баригдах супер цэнгэлдэхэд ДАШТ-ий нээлт болон хаалтын үйл ажиллагааг зохион байгуулах юм. Энэ цэнгэлдэх 80 мянган (86,250 байхаар төлөвлөсөн) хүний суудалтай байх болно. Цэнгэлдэхийн барилгын ажил 2017 оны дөрөвдүгээр сард эхэлсэн бөгөөд 2019 оны хоёрдугаар сард дуусгах төлөвлөгөөтэй байгаа юм.



Al Bayt Stadium

60 мянган хүний суудалтай

Аль Хаур хотод баригдаж буй Аль Баут цэнгэлдэх хүрээлэн 60 мянган хүний суудалтай байхаар төлөвлөсөн. Барилгын ажлыг 2014 онд эхлүүлсэн юм. Хэдийгээр дээд хязгаар нь 60 мянган хүний суудалтай ч хөлбөмбөгийн ДАШТ-ий үеэр 45 мянган хүн нэг дор хүлээн авч, сэтгүүлч болон бусад албаны хүмүүст зориулж, 1000 тусгай суудалтай байх юм. Цэнгэлдэхийн автомашины зогсоол нэг дор 6000 автомашин, 350 автобус хүлээн авах боломжтой. Үүн дээр орон нутгийн болон нийтийн албанд явах 150 гаруй автобус, 1000 гаруй такси үйлчилгээнд явахаар төлөвлөж байгаа аж.

Уг цэнгэлдэхийн загвар нь Катарын элсэн дунд том хэмжээний майханг санагдуулах аж.

Education City Stadium

Барилгын ажлын явц. Өнгөрсөн аравдугаар сард

Орчуулвал боловсрол хэмээх үгнээс бүрдэх тус цэнгэлдэх хүрээлэн Катарын Доха хотод орших их сургуулиудын дунд баригдсан. Хөлбөмбөгийн ДАШТ-ий үеэр 45 мянган суудалтай байх боловч тус тэмцээний дараа 20 мянган суудлыг хөгжиж буй орнуудад хандивлах аж. Улмаар 25 мянган хүний суудалтай уг цэнгэлдэхийг их сургуулийн тэмцээн уралдаан зохион байгуулахад ашиглана.

Al Rayyan Stadium

Одоо баригдаж буй болон зураг төсөлийг харьцуулсан зураг

Катарын хоёр дахь том хот Эр-Райян (Оросоор)-д өмнө нь сүндэрлэж байсан Ахмед Бин Алигийн цэнгэлдэхийг нурааж, оронд нь шинэ цэнгэлдэх барьж буй. 40 мянган хүний суудалтай уг цэнгэлдэх Катарын “Эр-Райян” клубийн хөлбөмбөгийн багийн гэр болох аж.

Al Thumama Stadium

Одоо баригдаж буй болон зураг төсөлтэй харьцуулсан зураг

40 мянган хүний суудалтай уг цэнгэлдэх Дохагаас 12 км зайд баригдаж буй уг цэнгэлдэхийн загвар нь араб эрчүүдийн өмсдөг уламжлалт малгай болох гахафын дүрслэл байх аж. Энэ загвар өнгөрсөн тавдугаар сард шилдэг архитектурын шагнал авсан билээ.



Ras Aboud Stadium

Персийн булангийн эрэг дээр баригдаж буй цэнгэлдэх хүрээлэн. 40 мянган хүний суудалтай байх аж.

Сесар Аспиликуэта гэрээгээ сунгалаа

Английн “Челси” клуб ахлагч Сесар Аспиликуэтатай гэрээгээ сунгалаа. Испани хамгаалагч дөрвөн жилийн гэрээг үзэглэж, 2022 он хүртэл багтаа зүтгэх юм.

“Челси”-гийн хамгаалалтын гол тоглогч, өдгөө 29 настай Сесар Аспиликуэта 2012 онд Францын “Марсель” клубээс 7 сая фунтаар Английн багт очиж, одоо долоо дахь улирлаа Лондоны багт өнгөрүүлж байгаа юм. Тэрбээр 2013 оноос улсынхаа шигшээд дуудагдаж, энэ хугацаанд 25 тоглолтод оролцсон аж.

Харин “Челси” клубийн төлөө 298 тоглолтод оролцсон юм.

Түүнчлэн Премьер лигийн аварга цолыг хоёр удаа, Холбооны цом, Лигийн цом, Европа лигийн аварга болжээ. 2014 онд клубийнхээ шилдэг тоглогчоор тодорсон удаатай.

Шинэчлэгдсэн гэрээгээр Сесар долоо хоногт 150 мянган (өмнө нь 120 мянган фунт) фунтын цалин авахаар болжээ.

 

 

Лука Модрич “Алтан бөмбөг”-ийн эзэн боллоо

Францын хөлбөмбөгийн холбооноос тодруулдаг нөлөө бүхий шагнал болох “Ballon d’Or” буюу 63 дахь удаагийн Алтан бөмбөгийн эзнээр Хорватын шигшээ болон “Реал Мадрид” клубийн хагас хамгаалагч Лука Модрич тодорлоо.

Лука Модрич “Алтан бөмбөг”-ийн шагнал авсан 44 дэх, мөн анхны хорват тоглогч болсон юм. Сүүлийн 10 жилд Криштиану Роналду, Лионель Мессигээс өөр хүнд очоогүй уг шагнал энэ удаад 33 настай, хорват тоглогчийнх боллоо.

Энэ жил “Реал Мадрид” клубт Аваргуудын лигт түрүүлж, Хорватын шигшээ багаа ДАШТ-ий шигшээ рүү хөтөлсөн нь уг шагналыг авахад гол нөлөө үзүүлсэн. Тэрбээр өмнө нь “Алтан бөмбөг”-ийн санал асуулгад гурван удаа нэр дэвшиж байв. Хоёр жилийн өмнө 17 дугаарт бичигдсэн бол өнгөрсөн жил тавдугаарт жагссан. Харин энэ удаа түүнээс өөр авах хүн байсангүй.

Энэ шагналыг хамгийн сүүлд 2007 онд Кака авснаас хойш бүтэн 10 жилийн хугацаанд К.Роналду, Л.Месси нараас өөр хүн аваагүй юм.

“Алтан бөмбөг”-ийн санал асуулга

  • 1. Лука Модрич (Хорват/Реал Мадрид)
  • 2. Криштиану Роналду (Португал/Ювентус)
  • 3. Антоун Гриззман (Франц/Атлетико Мадрид)
  • 4. Килиан Мбаппе (Франц/ПСЖ)
  • 5. Лионель Месси (Аргентин/Барселона)
  • 6. Мохамед Салах (Египет/Ливерпуль)
  • 7. Рафаэль Варан (Франц/Реал Мадрид)
  • 8. Эден Азер (Бельги/Челси)
  • 9. Кевин Де Бройн (Бельги/Манчестер Юнайтед)
  • 10. Харри Кэйн (Англи/Тоттенхэм)

Бусад жагсаалтыг эндээс үзнэ үү!

Харин өмнөх “Алтан бөмбөг”-ийн эздийн саналаар тодруулсан 21 хүртэлх насны шилдэг хөлбөмбөгчинд олгох “Копа трофи”-г 19 настай, франц довтлогч К.Мбаппе хүртсэн бол анх удаа олгосон шилдэг эмэгтэй хөлбөмбөгчнөөр Норвегийн шигшээ болон “Лион” клубийн довтлогч, 23 настай Ада Хегерберг хүртлээ. Ада Аваргуудын лигийн шигшээ тоглолтод гоол оруулж, гурав дахь удаагаа Аваргуудын лигт түрүүлсэн юм. Тэрбээр нийт 15 гоол оруулсан үзүүлэлтээр мэргэн буучийн жагсаалтыг тэргүүлсэн.

 

 

Шөвгийн 16-д VAR ашиглана

Европын хөлбөмбөгийн холбооноос VAR буюу видео туслахыг энэ жилийн Аваргуудын лигийн шөвгийн 16-гаас ашиглахаар боллоо. Энэ талаар холбоо өөрсдийн цахим хуудсаар дамжуулан нийтэд зарласан юм.

Тэд өмнө нь VAR-ыг ирэх жилээс ашиглахаар төлөвлөсөн ч хийсэн туршилт, сургалтууд нь амжилттай болсон тул ирэх оны хоёрдугаар сараас эхлэх хасагдах шатны 16-гаас ашиглах нь тодорхой болжээ.

Энэ талаар Европын хөлбөмбөгийн холбооны тэргүүн Александер Кеферин “Төлөвлөсөн хугацаанаасаа эрт ашиглах боломж байгаа тул ийм шийдвэр гаргалаа” гэж ярьсан аж. VAR буюу видео туслахыг 2019 оны Европа лигийн финал, Үндэстнүүдийн лигийн шигшээ тоглолт, Европын 21 хүртэлх насны АШТ-ий үеэр ашиглахаар төлөвлөж байгаа юм.

 

Хөлбөмбөг: Грегг Берхалтер албан ёсоор АНУ-ын шигшээ багийг удирдах боллоо

АНУ-ын хөлбөмбөгийн шигшээ баг 2017 оны аравдугаар сарын 13-нд дасгалжуулагч Брюс Аренаг ажлаас нь чөлөөлснөөс хойш ахлах дасгалжуулагчийн албанд хүн томилоогүй удсан. Энэ хугацаанд түр дасгалжуулагч томилж, өдийг хүртэл явсан юм.

Тэгвэл өнөөдөр албан ёсоор шинэ дасгалжуулагчаа зарлав. MLS-ийн “Коламбус Крюв” багийг зургаан жил удирдсан туршлагатай, 45 настай Грегг Берхалтерийг албан ёсоор шинэ дасгалжуулагчаар томиллоо.

Г.Берхалтер залуудаа төвийн хамгаалагчаар тоглодог байсан юм. Тэрбээр 2002 оны хөлбөмбөгийн ДАШТ-д АНУ-ын баг шуугиан тарьж, шөвгийн наймд өрсөлдөх үеэр багийн нэг гишүүн байсан билээ. Ийнхүү Г.Берхалтер АНУ-ын шигшээ багийн түүхэнд өмнө нь ДАШТ-д тоглогчоор оролцоод дараа нь дасгалжуулагчаар ирсэн анхны мэргэжилтэн болов.  Тэрбээр 2006 оны ДАШТ-ий бүрэлдэхүүнд багтсан ч талбайд тоглох боломж бүрдээгүй юм.

Г.Берхалтер буурал тивд дасгалжуулагчийн замналаа эхэлсэн анхны америк хүн. Тэрбээр 2011 онд Шведийн “Хаммарбю” багийг удирдсан аж.

Футзалын хөлбөмбөгчид манай зурагчны дуранд (Тайвань – Монгол)

Футзалын 20 хүртэлх насны Азийн АШТ-ий урьдчилсан шатны тэмцээн манай улсад болж байгаа юм. Тус тэмцээний Монголын шигшээ баг эхний тоглолтоо Тайванийн эсрэг хийсэн юм. Уг тоглолтын гэрэл зургийг сонирхуулья.

Монголын шигшээ баг маргааш буюу даваа гаригт БНХАУ-ын багийн эсрэг сүүлийн тоглолтоо хийнэ. Өнөөдөр Тайвань-БНХАУ-ын багийн тоглолт 7:3-гаар өндөрлөж, тайваньчууд хоёр дараалан ялалт байгуулснаар хэсгээ тэргүүлэх болзлоо хангасан юм.

Гэрэл зургийг: Д.Бямбажаргал