Домгийн шувуу үргээж, хөлбөмбөгийн их баяр наадам эхэллээ. Италийн шигшээ үнэхээр хүчирхэг, юм дуулгахаар байгаагаа битүү морь гэгдэж байсан Туркийн шигшээг 3:0 харьцаагаар бут ниргэн нотлон харууллаа. Энэ нь тэдний ЕАШТ-д сүүлийн 39 тоглолтод гурван гоол хийсэн анхны тохиолдол гэхэд нөгөө талд Туркийн шигшээ урьдчилсан шатны 10 тоглолтод алдсантайгаа тэнцүү гоолыг нэг тоглолтод хүртлээ. Гэхдээ тэдний горьдлого тасрахгүй. Учир нь энэ удаагийн тэмцээнд зургаан хэсгийн тэргүүн, дэд багууд дээр сайн үзүүлэлттэй гутгаар багуудаас зургаан баг нэмэгдэн шөвгийн 16-д үлдэх юм.
Өнөөдрөөс эхлээд өдөр тутам гурван тоглолт явагдана. Бид тоглолт бүрийн талаар чухал статистик, мэдээллийг хүргэхийг эрмэлзэнэ. Бэтний хувьд итгэлийн түвшингээ 1-3 од (өсөх дарааллаар) тавьж илэрхийлэх болно.
Уэльс-Швейцарь тоглолт хэсгийн эхний тоглолтын уламжлал ёсоор гоол багатай тоглолт болох нягууртай. Хоёр баг нягт нямбай тоглож, хожихоос илүү хожигдохгүй байхыг эрмэлзэнэ. Уэльс урьдчилсан шатанд хамгийн бага гоол хийсэн боловч 2019 оны намраас хойш Бельги, Франц, Англи гэсэн томчуудад л хожигдсоноос бусадтай эн тэнцүү тоглосон. Эдгээр 18 тоглолтод 14-т нь 2.5-аас бага гоол орсон байна. Швейцарийн хувьд хэдийгээр илүү ранктай, бөмбөг эзэмшиж тоглох баг боловч гэмтэл бэртэл, формгүй улирлыг үдсэн Шердан Шакириг эс тооцвол гоол хийх тоглогч дутагдалтай харагдана. Тэгээд ч Азербайжаны Бакуд үдийн халуунд тоглох тоглолтыг гал гарсан тоглолт болно гэхэд эргэлзэнэ. Тиймээс бэт бийлдэр буюу гурван сонголт өрж, зорилтот одд бүхий бэтний хувилбар гаргаж авъя. Ингэхдээ Швейцарь 5-2-2-1 хувилбараар жигүүрийн довтолгоо хийдэг гэдгийг тооцон булан, Уэльс урьдчилсан шатан, нөхөрсөг тоглолтуудад хамгийн бохир багаар (дунджаар 5.5 карт) тодорсон зэргийг харгалзан үзлээ.

Бэт бийлдэр: 2.5-аас бага гоол, Швейцарь 3.5+ дээш булан, Уэльс 0.5+ дээш карт, одд 2.10

Данийн шигшээг Туркийн адилаар хол явах багаар нэрлэсэн учир “шинэ цэргүүдэд” юм үзүүлэх байх гэж итгэнэ. Тэд сүүлийн 21 тоглолтод 12-т нь хаалгаа хуурай манаж, хаалгандаа ердөө 0.78 гоолын боломж алдаж байгаа үзүүлэлтийг нутгийн дэвжээний хүчин зүйлтэй тооцож үзвэл Дани зовлон багатай хожих магадлалтай. Урьдчилсан шатанд Финляндын оруулсан 16 гоолын 10-ыг нь өөрийн нэр дээр бичүүлсэн довтолгооны гол найдвар Теему Пукки бэртлээс дөнгөж эдгээд формоо олоогүй байгаа нь асуудал. Тэд энэ тоглолтоос ядаж оноо салгая гэвэл хамгаалалтдаа найдна. Гэтэл саяхан болсон ДАШТ-ий урьдчилсан шатны Босниа, Украйнтай хийсэн тоглолтуудад хаалгандаа 19, 17 удаа цохиулж, гурван гоол алдсаны зэрэгцээ нөхөрсөг тоглолтуудад гурав дараалан хожигджээ. Тиймээс Дани хожих дээр 3.5-аас бага гоол орох сонголт (1-0, 2-0, 3-0, 2-1 харьцааг агуулна.) нэмээд 1.83 одд гаргав.

Бельгийн шигшээ хоёр жилийн өмнө өнөө шөнө болох Санкт-Петербург хотын Крестовскийн цэнгэлдэхэд ДАШТ-ий хагас шигшээ тоглолтод 0:1 харьцаатай Францад хожигдож байлаа. Өрсөлдөгч багууд урьдчилсан шатанд нэг хэсэгт таарч мөн энэ цэнгэлдэхэд тоглоход зочид 4:1 харьцаагаар илт илүүрхэж байв. Хариу тоглолтод 3:1-ээр Бельги хожсон гэвэл өнөөдрийн үр дүнг таамаглахад амархан санагдана. Гэтэл тэдний гол зүтгүүр Кевин Де Брюйн, Эден Азар (эргэлзээтэй) өнжих нь итгэл сулруулав. ОХУ-ын шигшээ нутгийн дэвжээ, үзэгчдийнхээ дэмжлэгтэй боломжоосоо дээр тоглодог гэдгээ харуулсаны зэрэгцээ сүүлийн 21 тоглолтын 19-т нь гоол оруулжээ. Артём Зюба, Александр Головин, Алексей Миранчук нар сүүлийн 14 тоглолтод 9 гоол алдаад байгаа Бельгийн хамгаалалтыг ядаж 1 удаа сэтлэх боломжтой тул аль нэг багийг хожно гэхээс илүү 2.5-аас дээш гоол орох (2.0), харилцан гоолдох (1.83) сонголтууд дээр төвлөрөхийг хүслээ.

Өдрийн шилдэг бэт: Дани хожих 1.40+Бельги-ОХУ +1.5 гоол орох (1.83)

KOO.MN уншигчдадаа зориулж 2021 оны 6 сарын 11-ээс 7 сарын 11-ний хооронд болох 16 дахь удаагийн Европын аварга шалгаруулах тэмцээнд өрсөлдөх шигшээ багуудыг цувралаар танилцуулж байгаа билээ.

Энэ удаад бид алдарт Италийн шигшээ багийг танилцуулж байна.

Ерөнхий мэдээлэл

ЕАШТ-д оролцсон тоо: 9
Амжилт: 1968 оны ЕАШТ-ний аварга, 2000 болон 2012 оны ЕАШТ-ний мөнгөн медаль
Еврод: 38 тоглолт, 16 хожил, 16 тэнцээ, 6 хожигдол
Нийт: 39 гоол оруулж, 27 гоол хаалгандаа алдсан

Италийн шигшээ багийн бүрэлдэхүүн

Хаалгач: Жианлужи Доннарумма (АС Милан), Алекс Мэрэт (Наполи), Салвадорь Сиригу (Торино)

Хамгаалагч: Франческо Акерби (Лацио), Алессандро Бастони (Интер), Леонардо Бонуччи (Ювентус), Жоржио Киллини (Ювентус), Жиованни Ди Лоренцо (Наполи), Эмэрсон Палмьери (Челси), Алессандро Флоренци (ПСЖ), Леонардо Спинацола (Рома), Рафаел Толой (Аталанта)

Хагас хамгаалагч: Николо Барелла (Интер), Брайн Кристанте (Рома), Жоржиньо (Челси), Мануэл Лочателли (Сассуоло), Лоренцо Пэллэгрини (Рома), Стефано Сенси (Интер), Марко Верратти (ПСЖ

Довтлогч: Андрэ Белотти (Торино), Домэнико Бэрарди (Сассуоло), Фэдэрико Бэрнардески (Ювентус), Фэдэрико Киеза (Ювентус), Чиро Иммобилэ (Лацио), Лоренцо Инсинье (Наполи), Жиакомо Распадори (Сассуоло)

Дасгалжуулагч: Роберто Манчини

Хэсгийн тоглолтын хуваарь

Турк – ИТАЛИ
6 сарын 12-нд, Ром хот
ИТАЛИ – Швейцар
6 сарын 17-нд, Ром хот
ИТАЛИ – Уэльс
6 сарын 21-нд, Ром хот

Онцлох тоглогч – Николо Барелла

Энэ удаагийн ЕАШТ-ий үеэр Италийн шигшээ багаас гялалзаж, өөрийгөө дэлхий дахинд таниулах хамгийн өндөр магадлалтай тоглогч бол хагас хамгаалагч Николо Барелла юм.
Италийн Сериа А лигийн өнгөрсөн улирлын хамгийн шилдэг хагас хамгаалагч шагналын эзэн, олон жилийн дараа Скудетто хүртсэн “Интер Милан”-ы гол тоглогч болж чадсан Барелла өөрийн гайхалтай формоо Еврогоор харуулах гэж зорих нь гарцаагүй. Довтолгооны өндөр чадамжтай, тоглолт найруулах, дамжуулалт өгөх, тулаан хийх, хамгаалалтад туслах гээд төвийн хагас хамгаалагчид шаардагдах бүхий л чадварыг эзэмшсэн энэ залуугийн тоглолтыг хөлбөмбөг сонирхогч та бүхэн анхааран үзээрэй.

Багийн талаар

Хөлбөмбөгийг Италичуудын хөх өмсгөлөөр төсөөлөхийн аргагүй. “Аззуричууд” дэлхийд дөрвөнтөө магнайлсан ч тивийн дэвжээнд азгүйтдэг талтай. Тэд тэртээ 1968 оноос хойш Еврогийн цомын бараа хараагүй. Шинэ зуун гарснаас хойш 2000, 2012 онд финалдсан ч Франц, Испанийн шигшээ багт хожигдож байв.

2016 оны Еврогоор тааруухан амжилттай тоглож, 2018 оны ДАШТ-д ч оролцож чадаагүй италичуудаас хөгжөөн дэмжигчид нь их зүйл хүлээж буй нь лавтай. Хэзээнээс яхир чанга хамгаалалтаараа зартай Манчинигийн багт туршлагатай хамгаалалт, чадварлаг дундын шугам болоод авьяаслаг довтолгооны тоглогчид бий. Аззуричуудыг хэрхэн тоглохыг хамтдаа харцгаая. Тэд энэ тэмцээний салхийг хагалж “Мөнхийн хот”-ын олимпын цэнгэлдэх хүрээлэндээ Туркын шигшээ багтай нээлтийн тоглолтыг хийх болно.

Таамагласан гарааны XI

Б.Бадруул

KOO.MN уншигчдадаа зориулж 2021 оны 6 сарын 11-ээс 7 сарын 11-ний хооронд болох XVI дахь удаагийн Европын аварга шалгаруулах тэмцээнд өрсөлдөх шигшээ багуудыг цувралаар танилцуулж байгаа билээ.

Энэ удаад бид Европын гурван удаагийн аварга, хүчирхэг Германы шигшээ багийг танилцуулж байна.

Ерөнхий мэдээлэл

ЕАШТ-д оролцсон тоо: 12

Амжилт: 1972, 1980, 1996 оны ЕАШТ-ний аварга

Еврод: 49 тоглолт, 26 хожил, 12 тэнцээ, 11 хожигдол

Нийт: 72 гоол оруулж, 48 гоол хаалгандаа алдсан

            Германы шигшээ багийн бүрэлдэхүүн

Хаалгач: Бэрнд Лено (Арсэнал), Мануэл Нойер (Байерн Мюнхен), Кевин Трапп (Айнтрахт Франкфурт)

Хамгаалагч: Маттис Гинтер (Боруссиа Мюнхенгладбах), Робин Госенс (Аталанта), Кристиан Гунтер (Фрайбург), Марсел Халстэнбэрг (РБ Лайпциг), Мэц Хюммелс (Боруссиа Дортмунд), Лукас Клостерманн (РБ Лайпциг), Робин Кох (Лийдс Юнайтед), Антонио Рудигер (Челси), Никлас Суле (Байерн Мюнхен)

Хагас хамгаалагч: Эмрэ Жан (Боруссиа Дортмунд), Сөрж Гнабри (Байерн Мюнхен), Леон Горецка (Байерн Мюнхен), Илкай Гундоган (Ман сити), Кай Хаверц (Челси), Йонас Хофманн (Боруссиа Мюнхенгладбах), Жошуа Киммих (Байерн Мюнхен), Тони Кроос (Реал Мадрид)

Довтлогч: Томас Мюллер (Байерн Мюнхен), Жамал Мусиала (Байерн Мюнхен), Флорэн Нойхаус (Боруссиа Мюнхенгладбах), Леро Санэ (Байерн Мюнхен), Кевин Волланд (Монако), Тимо Вернер (Челси)

Дасгалжуулагч: Йохим Лёв  

Хэсгийн тоглолтын хуваарь

Франц – ГЕРМАН
6 сарын 16-нд, Мюнхен хот

Португал – ГЕРМАН
6 сарын 20-нд, Мюнхен хот

ГЕРМАН – Унгар
6 сарын 24-нд, Мюнхен хот

            Онцлох тоглогч – Кай Хаверц

Европын 24 орны шилдэг хөлбөмбөгчид хуран цугларах энэ удаагийн тэмцээнд Германы шигшээ багаас тод гялалзах өндөр магадлалтай тоглогч нь яах аргагүй Кай Хаверц!

Хэдхэн хоногийн өмнө “Челси” клубынхээ хамтаар Аваргуудын лигт түрүүлэхэд Кай Хаверц хожлын цор ганц гоолыг оруулсан юм. Евро эхлэх өдөр Хаверц 22 нас хүрэх бөгөөд шигшээ багийнхаа хамтаар анхны том тэмцээндээ амжилттай оролцохыг юу юунаас илүү хүсч буй биз ээ. “Челси”-д хамтран зүтгэдэг Тимо Вернерийн хамтаар “Германы машинууд”-ын довтолгоог хариуцах болно.

            Багийн талаар

Энэ удаагийн ЕАШТ нь дасгалжуулагч Йохим Лёвийн сүүлийн тэмцээн байх болно гэдгийг хэдийнэ зарласан. Германы шигшээ багийн жолоог 15 жил атгасан Лёв эрхэм 2008 онд анхны том тэмцээндээ оролцоод Еврод аман хүзүүдэж байлаа. Германчууд хамгийн сүүлд 1996 оны Еврод түрүүлснээс хойш тивдээ аваргалж чадаагүй яваа бөгөөд дасгалжуулагч Лёв сүүлчийн дайралтаа хийхээр бэлтгэн суугаа нь ойлгомжтой.

Тэд үнэхээр хүнд хэсэгт орсон. Энэ удаагийн Еврод түрүүлэх хамгийн өндөр магадлалтай хоёр багтай хэсэгтээ хүч үзнэ. Гэхдээ германчуудыг басна гэдэг том тэнэглэл билээ. Тэд үргэлж л том тэмцээнд түрүүлэх чансаатай баг хэвээр ирсэн юм.

Германы шигшээ баг маш шинэчлэгдсэн ч залуустаа туршлага болгож багийн ахлагч Мануэл Нойер болон 2014 оны дэлхийн аварга Томас Мюллер, Мэц Хюммелс нарыг багтаа дуудсан билээ.

            Таамагласан гарааны XI

Б.Бадруул

KOO.MN уншигчдадаа зориулж 2021 оны 6 сарын 11-ээс 7 сарын 11-ний хооронд болох 16 дахь удаагийн Европын аварга шалгаруулах тэмцээнд өрсөлдөх шигшээ багуудыг цувралаар танилцуулж байгаа билээ.

Энэ удаад бид ЕАШТ-ий хошой аварга, түрүүлэх хамгийн өндөр магадлалтай багуудын нэг хүчирхэг Францийн шигшээ багийг танилцуулж байна.

Ерөнхий мэдээлэл

• ЕАШТ-д оролцсон тоо: 9
• Амжилт: 1984, 2000 оны ЕАШТ-ий аварга, 2016 онд мөнгөн медаль
• Еврод: 39 тоглолт, 20 хожил, 10 тэнцээ, 9 хожигдол
• Нийт: 62 гоол оруулж, 44 гоол хаалгандаа алдсан

            Австрийн шигшээ багийн бүрэлдэхүүн

Хаалгач: Уго Лорис (Тоттэнхэм), Стив Манданда (Марсейль), Майк Майнан (Лилль)

Хамгаалагч: Бэнжамин Павар (Байерн Мюнхен), Лео Дубоис (Лион), Рафаел Варан (Реал Мадрид), Прэснэл Кимпэмбэ (ПСЖ), Лукас Эрнандэз (Байерн Мюнхен), Лукас Дийн (Эвэртон), Клэмэн Лэнгле (Барселона), Курт Зума (Челси)

Хагас хамгаалагч: Н’Голо Канте (Челси), Пол Погба (Ман Юнайтед), Адриэн Рабио (ПСЖ), Корэнтин Толиссо (Байерн Мюнхен), Моусса Сиссоко (Тоттэнхэм)

Довтлогч: Карим Бэнзэма (Реал Мадрид), Оливье Жиру (Челси), Килиан Мбаппэ (ПСЖ), Маркус Тюрам (Боруссиа Мюнхенгладбах), Кингсли Коман (Байерн Мюнхен), Виссам Бэн Едэр (Монако), Антуан Гризманн (Барселона), Томас Лемар (Атлетико Мадрид), Усман Дэмбэлэ (Барселона)

Дасгалжуулагч: Дидье Дешам

Хэсгийн тоглолтын хуваарь

ФРАНЦ – Герман
6 сарын 16-нд, Мюнхен хот

Унгар – ФРАНЦ
6 сарын 19-нд, Будапешт хот

Португал – ФРАНЦ
6 сарын 24-нд, Будапешт хот

            Онцлох тоглогч – Килиан Мбаппэ

19 настайдаа дэлхий дахиныг шуугиулж, гурван жилийн өмнө ДАШТ-д түрүүлсэн Францын шигшээ баг болон “ПСЖ” клубын супер од Килиан Мбаппэ анх удаа ЕАШТ-д оролцох гэж байна. Анх том тэмцээнд оролцоод ДАШТ-д түрүүлж гангарсан 22 настай Мбаппэ тивийнхээ аваргад түрүүлэхийг зорих нь ойлгомжтой.

Тэрбээр “Гурван өнгөтнүүд”-ийн төлөө 43 удаа талбайд гарч, 17 гоол оруулсан. “Мэлхий нинжа” энэ удаагийн Еврогийн гялалзах од нь байж чадах болов уу? Хамтдаа хүлээх л үлдлээ…

            Багийн талаар

2018 оны Дэлхийн аварга францчууд энэ удаагийн Еврод “ногт ганзгалж” ирсэн нь ойлгомжтой. Байрлал бүрээ шилдэг тоглогчдоор зэвсэглэсэн тэдний бүрэлдэхүүнийг харвал үнэхээр сүрдмээр. Таван жилийн өмнө нутагтаа зохиогдсон тэмцээнд аман хүзүүдэж, аваргалж чадаагүй хонзонгоо авахаар эхнээсээ л тэд хичээх болно. Учир нь өнгөрсөн тэмцээний шигшээд тоглосон багууд энэ удаа нэг хэсэгт таарсан билээ. Мөн тэдний хэсэгт хүчирхэг Германы шигшээ баг бий.

Яах аргагүй тэмцээний үхлийн групп бол F хэсэг мөн. Анхнаасаа чангахан багуудтай тоглоод эхлэх нь давуу тал үүсгэх тохиолдол ч бий. Тэд 1998 онд ДАШТ-д, 2000 онд Еврод түрүүлсэн Зидан тэргүүтэй “алтан үеийн” Францын амжилтыг давтах зорилготой ирсэн. Хүчирхэг бүрэлдэхүүн, супер довтолгоо, од тоглгогчид, туршлага, чадварлаг дасгалжуулагч гээд тэдэнд бүх зүйл бий!

            Таамагласан гарааны XI

Б.Бадруул

KOO.MN уншигчдадаа зориулж 2021 оны 6 сарын 11-ээс 7 сарын 11-ний хооронд болох XVI дахь удаагийн Европын аварга шалгаруулах тэмцээнд өрсөлдөх шигшээ багуудыг цувралаар танилцуулж байгаа билээ. Энэ удаад Австрийн шигшээ багийг танилцуулж байна.

Ерөнхий мэдээлэл

• ЕАШТ-д оролцсон тоо: 2
• Амжилт: 2008, 2016 онд хэсгийн шат

            Австрийн шигшээ багийн бүрэлдэхүүн

• Хаалгач: Александр Шлагер, Павао Перван, Даниэл Бахманн
• Хамгаалагч: Андрэас Улмэр, Александр Драгович, Мартин Хинтэрэггэр, Стефан Пош, Давид Алаба, Филипп Лиэнхарт, Стефан Лайнэр, Марко Фридл
• Хагас хамгаалагч: Стефан Илсанкер, Марсел Сабицер, Флориан Гриллич, Юлиан Баумгартлингер, Кристофер Триммэл, Луис Шоб, Алессандро Шопф, Кристоф Баумгартнер, Карим Онисиво, Валентино Лазаро, Шавер Шлагер, Конрад Лаймер
• Довтлогч: Марко Арнатович, Михайл Грегорич, Саша Калажич
• Дасгалжуулагч: Франко Фода

Хэсгийн тоглолтын хуваарь

Австри – Умард Македон
6 сарын 13-нд, Бухарест хот

Голланд – Австри
6 сарын 18-нд, Амстердам хот

Украин – Австри
6 сарын 22-нд, Бухарест хот

            Онцлох тоглогч – Давид Алаба

Австрийн шигшээ багийн энэ цаг үеийн алдартай тоглогч бол Давид Алаба билээ. “Байерн Мюнхен” багийн хамтаар клубын түвшинд бүхий л цомд түрүүлсний дараа тэрбээр Испанийн “Реал Мадрид”-д ирсэн юм. Давид Алаба нь зүүн жигүүрийн хамгаалагч байсан боловч сүүлийн жилүүдэд клубтээ төвийн хамгаалагчаар голдуу тоглож буй. Харин шигшээ багтаа төвийн хагас хамгаалагчийн байрлалд тоглодог. Тун удахгүй 29 нас хүрэх Д.Алаба Австрийн шигшээ багийн төлөө 80 тоглолт хийж, 14 гоол оруулжээ.

            Багийн талаар

ЕАШТ-д ердөө гурав дахь удаагаа оролцох гэж буй Австрийн шигшээ баг тус тэмцээний түүхэн дэх анхны ялалтаа байгуулахаас тэдний зорилго эхлэх болно. Эхний тоглолтоо Умард Македоны эсрэг хийх бөгөөд хожих магадлал арай илүү хэмээн таамаглаж байна. Улмаар хэсгийн топ багууд болох Нидерланд, Украины эсрэг хэрхэн тоглохоос Авсрийн хувь заяа шийдэгдэх нь ойлгомжтой.

Бүрэлдэхүүний хувьд Германы Бундеслигт тоглодог олон чадварлаг залуус бий бөгөөд Давид Алабагаар удирдуулсан Австричууд “хатуу самрууд” болохоо хэдхэн хоногийн өмнө Английн шигшээ багийн эсрэг хийсэн тоглолтоороо харуулж чадсан. Тэд маш өрсөлдөөнтэй тоглож, 1:0 харьцаатай ялагдал хүлээсэн юм.

            Таамагласан гарааны XI

Б.Бадруул

2021 оны 6 сарын 11-ээс 7 сарын 11-ний хооронд болох 16 дахь удаагийн Европын аварга шалгаруулах тэмцээнд өрсөлдөх Английн шигшээ баг бүрэлдэхүүнээ зарлалаа.

Дэлхий нийтийг хамарсан аймшигт Коронавирусын улмаас өнгөрсөн жил зохиогдох байсан “Евро 2020” тэмцээн завсарласан бөгөөд хүсэн хүлээсэн тэмцээн эхлэхэд хэдхэн хоногийн хугацаа үлджээ. Цар тахлын хар сүүдэр хөлбөмбөгийг ч дайраад өнгөрсөн бөгөөд цаг үеийн нөхцөл байдалтай холбогдуулж зарим нэгэн өөрчлөлтийг оруулсан. Үүний нэг нь шигшээ багууд бүрэлдэхүүндээ 23 тоглогч дууддаг байсныг нэмж 26 болгосон юм.

Ингээд “Гурван арслангууд”-ын бүрэлдэхүүнтэй танилцъя.

БҮРЭЛДЭХҮҮН

Хаалгач: Дин Хэндэрсон (Манчэстэр Юнайтэд), Сэм Жонстон (Вэст Бромвич Албион), Жордан Пикфорд (Эвэртон)

Хамгаалагч: Жон Стоунс (Манчэстэр Сити), Люк Шо (Манчэстэр Юнайтэд), Харри Магуэр (Манчэстэр Юнайтэд), Трэнт Александр-Арнолд (Ливэрпүүл), Кайл Уокэр (Maнчэстэр сити), Тайрон Мингс (Астон Вилла), Рис Жэймс (Челси), Конор Коади (Уолвэрхэмптон), Бэн Чилвэлл (Чэлси), Киран Триппьер (Атлетико Мадрид)

Хагас хамгаалагч: Мэсон Моунт (Чэлси), Дэклан Райс (Вэст Хэм), Жордан Хэндэрсон (Ливэрпүүл), Жюд Бэллинхэм (Боруссиа Дортмунд), Калвин Филлипс (Лийдс Юнайтэд)

Довтлогч: Харри Кэйн (Тоттэнхэм), Маркус Рэшфорд (Манчэстэр Юнайтэд), Рахим Стэрлинг (Манчэстэр сити), Доминик Калвэрт-Льюн (Эвэртон), Фил Фоден (Манчэстэр Сити), Жэк Грилиш (Астон Вилла), Жэдон Санчо (Боруссиа Дортмунд), Букаяо Сака (Арсэнал)

Дасгалжуулагч: Гарет Саутгэйт

Английн шигшээ баг “Евро 2020” тэмцээний “D” хэсгийг толгойлсон бөгөөд Хорват, Шотланд, Чехийн шигшээ багтай нэг хэсэгт орсон. Хэсгийн тоглолтуудын хуваарь,

Англи – Хорват
6 сарын 13-нд (дэлгэрэнгүй хуваарь)

Англи – Шотланд
6 сарын 18-нд (дэлгэрэнгүй хуваарь)

Чех – Англи
6 сарын 22-нд (дэлгэрэнгүй хуваарь) болно.

Онцлох тоглогч: Харри Эдвард Кэйн

Английн шигшээ багийн ахлагч, Тоттэнхэм клубын супер довтлогч Харри Кэйнийг онцолж байна. Евро 2020 тэмцээний дараа 28 нас хүрэх Кэйн энэ удаад шигшээ багтайгаа хамт 3 дахь том тэмцээндээ оролцоно. Тэрээр Гурван арслангуудын төлөө 53 тоглолтод оролцож 34 гоол хийсэн мундаг үзүүлэлттэй.

Премьер лигийн 2020/21 оны улирлын мэргэн бууч болсон Харри Кэйн Тоттэнхэм клубээ орхих болно гэдгээ саяхан мэдэгдсэн нь шуугиан тариад буй. Түүнийг багтаа элсүүлэхийн төлөө Европын бүхий л том багууд хичээж, санал зэхэж буй нь ойлгомжтой.

Шинэ нэр: Жюд Бэллинхэм

Г.Саутгэйтийн дуудсан 26 тоглогч дунд нэгэн содон нэр нь хилийн чанадад тоглодог авьяаслаг хагас хамгаалагч Жюд Бэллинхэм байлаа. Евро 2020 тэмцээний дундуур 18 нас хүрэх тэрээр өнгөрсөн улиралд тодрон гарсан авьяаслаг залуусын нэг юм.

Жюд Бэллинхэм нь 2019 онд Английн хоёрдугаар лиг буюу Чэмпионшип дивизионд өөрийгөө таниулсны дараа залуу авьяастнуудыг нээн хөгжүүлдгээрээ зартай Германы Боруссиа Дортмунд клуб дор нь шүүрээд авсан билээ. Тэрээр өнгөрсөн улиралд “Хар шар”-уудын төлөө 46 тоглолтод оролцоод амжжээ.

Энэ удаагийн “Евро 2020” тэмцээн Лондон, Ром, Мюнхен, Баку, Санкт-Петербург, Будапешт, Севилл, Бухарест, Амстердам, Глазгоу, Копенгаген зэрэг 11 хотод зохиогдоно гэдгээрээ онцлог болж байна. Английн шигшээ багийн хувьд хэсгийн 3 тоглолтоо гэртээ буюу Лондоны алдарт Уэмбли цэнгэлдэх хүрээлэндээ хийх нь давуу тал авчрах биз.

Тивийн аварга шалгаруулах тэмцээндээ 10 дахь удаагаа оролцох гэж буй Английн шигшээ баг Еврод түрүүлэх боломжтой багуудын тоонд зүй ёсоор орно. Гэвч тэдний хувьд Еврод түрүүлж үзээгүй бөгөөд өмнөх тэмцээнд шөвгийн 16-аас мултарч байлаа. Харин үүнээс хоёр жилийн дараа ОХУ-д болсон ДАШТ-ний хагас шигшээд хүрч чадсан нь “залуу арслангууд”-д найдвар бий гэдгийг харуулсан.

Таамагласан гараа:

Германы шигшээ баг 2024 он хүртэлх гэрээгээр Ханс Фликийг дараагийн дасгалжуулагчаараа томиллоо. Ийнхүү өдгөө Байерн Мюнхений менежер дэлхийн аварга Йоахим Лёвын орыг залгамжлахаар болжээ.

Ханс Флик нь 2006 оноос 2014 оны хооронд Германы шигшээ багт Лёвын туслахаар ажиллаж байсан. 2019 онд Нико Ковач Байерн клубээс халагдсанаар тус багийн ерөнхий дасгалжуулагч болж өнөөдрийг хүртэл удирдахдаа долоон удаагийн цомд түрүүлээд зогсохгүй, Байерныг удирдсан нийт тоглолтынхоо 83 хувьд ялалт байгуулсан нь түүхэнд дээгүүр бичигдэх үзүүлэлт юм.

Буурал тивийн хөлбөмбөгийн аварга шалгаруулах тэмцээн хаяанд иржээ. Иймээс тус тэмцээний тухай түүх болон сонирхолтой баримтыг танилцуулъя.

1927 онд тухайн үеийн Францын хөлбөмбөгийн холбооны ерөнхий нарийн бичгийн дарга асан Анри Делаунай анх тивийн аварга шалгаруулах тэмцээн зохион байгуулах санааг гаргаж байжээ. Тухайн үед ажил хэрэг болж чадаагүй ч Делаунайг нас барснаас гурван жилийн дараа буюу 1958 онд түүний санаа ажил хэрэг болсон юм. Түүний дурсгалыг хүндэтгэн цомыг нэрлэж, 1960 онд Францад анхны буурал тивийн аварга “Европын үндэстнүүдийн цом” нэртэйгээр зохион байгуулагдсан юм. Анхны тэмцээний урьдчилсан шатанд 17 баг оролцож шигшээ шатанд дөрвөн баг өрсөлдсөний эцэст ЗХУ-ын залуучууд аваргаар тодорчээ. Энэ цагаас хойш дөрвөн жил тутамд зохион байгуулагдаж буй.  

Баримтууд

• Европийн аварга нь үзэгчээрээ ДАШТ-ий дараа орох хөлбөмбөгийн тэмцээн бөгөөд 2012 оны финалын тоглолтыг 300 сая, 2016 онд 284 сая хүн дунджаар үзсэн байдаг.
• Испани болон германчууд түүхэндээ гурван удаа түрүүлсэн амжилтаар тэргүүлдэг бол тэдний араас Франц улс хоёр түрүүтэй жагсдаг. 
• Испани нь 2008, 2012 онуудад дараалан түрүүлж байсан цор ганц баг.
• 1996 оноос эхлэн өнөөдрийн “Евро” нэрээр зохион байгуулагдаж буй.
• Тэмцээний бүх цаг үеийн мэргэн бууч бол Криштиану Роналду болон Мишель Платини. Тэд хоёул есөн гоолтой. Мөн Роналду хамгийн олон буюу 21 тоглолтод оролцсон.
• 2016 он хүртэл тэмцээний ялагчид холбооны цомын тэмцээнд оролцох эрх өгдөг байв.
• 2008 онд цомыг шинэчилсэн. Одоогийн цом нь мөнгөөр хийгдсэн бөгөөд найман кг жинтэй, 60 см өндөр.
• Тус тэмцээнд нийт 10 улс түрүүлж байсан юм.

Тэмцээний түүхэн үзүүлэлт

Цар тахлын улмаас нэг жил хойшлогдоод байсан XVI удаагийн буурал тивийн аварга шалгаруулах тэмцээн ирэх зургадугаар сарын 11-нд Италийн Ром хотын “Стадио Олимпико” цэнгэлдэхэд  хөшгөө нээнэ. Тус тэмцээнийг Ирланд, Шотланд, Уэльс улс хамтран, Гүрж, Азербайжан мөн Турк улс зохион байгуулах саналаа хүргүүлсэн ч 2012 оны арванхоёрдугаар сард ЕХХ-оос 2020 оны тэмцээнийг Европын янз бүрийн улс орнуудын хэд хэдэн хотод зохион байгуулж, хагас шигшээ ба шигшээ тоглолтыг Лондонд явуулна гэж мэдэгдсэн. Иймээс энэ удаагийн тэмцээнд анх удаа Европын 12 улс хамтран зохион байгуулах юм. (ЕАШТ-2020 арван хоёр өөр улсад болно)

ЕХХ-ны Шигшээ багуудын хороо өнгөрөгч Даваа гарагт хуралдлаа. Уг уулзалтаар Ковид-19 цар тахалтай холбогдуулан шигшээ багууд ирэх Евро 2020 тэмцээнд 26 тамирчны бүрэлдэхүүнтэй оролцохоор болсон байна.

Өмнө нь шигшээд 23 тоглогч дуудагддаг байсан бол энэ удаад 26 залуу буурал тивийн аваргын төлөө эх орноо төлөөлөхөөр болжээ. Энэхүү шийдвэр нь ирэх улирлын өмнө тоглогчдод ирэх ачааллыг бууруулах мөн коронавирус тархсан тохиолдолд дасгалжуулагч нарт илүү өргөн бүрэлдэхүүнтэй байх боломжийг олгож буй явдал юм.

Өнгөрөгч шигшээ багийн цугларалтын үеэр Бельгийн дасгалжуулагч Роберто Мартинес “Бүрэлдэхүүнд багтах тоглогчдын тоо нэмэгдэх нь сайн зүйл. Энэ нь дэлхийн хөлбөмбөгийн өнөөгийн нөхцөл байдалд гарсан өөрчлөлтүүд, таван сэлгээ хийх эрхтэй болсон, цар тахлын тодорхойгүй байдал, тоглогчдын ачааллаас үүдсэн бэртэл гэмтэлтэй холбоотой учир зайлшгүй шаардлагатай” хэмээн мэдэгдсэн. Мөн Италийн шигшээгийн дасгалжуулагч Роберто Манчинез үүнийг дэмжиж байгаа илэрхийлээд байсан ба ийнхүү тэдний хүсэл биелэлээ олжээ.

Тэгвэл уг шийдвэр хамгийн сайнаар нөлөөлөх багийг “Атлетик” сайтын зүгээс Английн шигшээг гэж үзэж байна. Учир нь тэдний сүүлд дуудагдсан бүрэлдэхүүнд олон авьяаслаг залуу тоглогч багтаагүй билээ. Энэ дунд Александр Арнолд, Жеймс Маддисон, Жек Грилиш, Харри Уинкс зэрэг клубдээ чухал үүрэг гүйцэтгэдэг залуус байсан юм.

Хөлбөмбөгийн ЕАШТ цар тахлын улмаас бүтэн жил хойшилсоны эцэст энэ оны зургадугаар сарын 11-нээс долдугаар сарын 11-ны хооронд буурал тивийн 12 улсын 12 цэнгэлдэхэд зохион байгуулагдах болсон билээ.

Энэ удаагийн ЕАШТ-ий нээлтийн тоглолт Италийн Ром хотын “Стадио Олимпико” цэнгэлдэхэд болно. Зургадугаар сарын 11-нд болох тус тоглолтод цэнгэлдэх 25 хувийн дүүргэлттэй явагдах болсоныг зарласан юм. Тасалбар авсан үзэгчид Италийн засгийн газраас гаргасан цар тахлын үед баримтлах дүрэм журмыг мөрдөх хэрэгтэйг анхааруулжээ.

Энэ удаагийн тэмцээний хагас шигшээ болон шигшээ тоглолт Английн алдарт “Вэмбли” цэнгэлдэхэд болох аж. Эдгээр тоглолтууд цэнгэлдэх дүүрэн үзэгчидтэй болох магадлал өндөр байгаа юм. Учир нь Британид тахлын эсрэг вакцинжуулалтад зорилтот хүн амын талаас илүү хувь нь хамрагдсан бөгөөд засгийн газраас гаргасан төлөвлөгөө тодорхой, иргэд нь ч дуулгавартай дагаж байгаа гэнэ.

Европын шилдэг 24 баг бүтэн сарын хугацаанд 51 тоглолтыг зохион байгуулах цэнгэлдэхүүд

Бэлтгэсэн: Г.Дарханбаяр