“Forbes” сэтгүүлээс энэ оны хамгийн өндөр орлоготой хөлбөмбөгчдийн жагсаалтыг гаргалаа. Уг жагсаалтыг Аргентинийн шигшээ багийн болон Испанийн “Барселона” клубийн довтлогч Лионель Месси тэргүүлсэн юм.

Аргентин довтлогч 2017 оны арваннэгдүгээр сард “Барселона”-тай гэрээгээ сунгасан. Энэ гэрээнийхээ ачаар Л.Месси дэлхийн хамгийн өндөр орлоготой тамирчин гэх жагсаалтыг хоёр дахь жилдээ дараалан тэргүүлж байна.

Түүнчлэн бүх насаараа “Adidas”, “Mastercard”, “PepsiCo” брэндийн сурталчилгааны хүн болсон Л.Месси энэ жил үнэт эдлэл, бугуйн цагаараа алдартай “Jacob & Co” компанитай шинэ гэрээ байгуулсан юм. Түүний нэрийн бугуйн цаг 180 ширхэг үйлдвэрлэгдэж тус бүр нь 28 мянган “ногоон”-оор худалдаанд гарсан аж.

2019 оны хамгийн өндөр орлоготой хөлбөмбөгчид

20. Жерард Пике

• Нийт орлого: 21.7 сая ам.доллар
• Цалин ба Урамшуулал: 17.7 сая
• Бусад орлого: 4 сая
• Хамтрагч байгууллага: Nike компани
• Клуб: Барселона Улс: Испани Нас: 32

Өнгөрсөн оны нэгдүгээр сард “Барселона” багтайгаа хийсэн гэрээгээ шинэчилж, 2022 оны зургадугаар сарыг дуустал Кэмп Ноуд зүтгэх болсон Ж.Пике талбайн гадна ч чадварлаг бизнесмэн. Токиод төв нь байрладаг, “Барселона” клубийн өмсгөлийн ивээн тэтгэгч “Rakuten” группийн эзэн ноён Хироши Микитанитай хамтарч, спортын “Kosmos” фирмийг үүсгэн байгуулаад өөрөө ерөнхийлөгчөөр нь ажилладаг. Уг фирм саяхан Олон улсын талбайн теннисний холбоотой хамтарч, 25 жилийн хугацаанд гурван тэрбум ам.долларын хөрөнгө оруулалт хийхээ амласан.

19. Гразиано Пелле

• Нийт орлого: 21.7 сая ам.доллар
• Цалин ба Урамшуулал: 20.7 сая
• Бусад орлого: 1 сая
• Хамтрагч байгууллага: Nike компани
• Клуб: Шандон Лунэнг Улс: Итали Нас: 33

Пелле 2016 онд Английн “Саутхэмптон” клубийг орхиж, БНХАУ-ын “Шандон Лунэнг” клубтай гэрээ байгуулснаар хамгийн өндөр цалинтай хөлбөмбөгчин болсон билээ. Өнгөрсөн нэгдүгээр сард Европын багууд түүнийг сонирхсон ч Хятадын багийг орхиогүй юм.

18. Серхио Рамос

• Нийт орлого: 21.9 сая
• Цалин ба Урамшуулал: 19.9 сая
• Бусад орлого: 2 сая
• Хамтрагч байгууллага: Nike компани
• Клуб: Реал Мадрид Улс: Испани Нас: 33

С.Рамосыг Хятадын клуб сонирхож, өндөр гэрээ санал болгосон ч 2020 оны дуустал “Реал Мадрид”-д үнэнч зүтгэхээ амласан билээ. Энэ сард гурван хүүхдийнх нь ээж, Испанийн телевизийн шоуны од Пилар Рубиотой албан ёсоор гэрлэсэн С.Рамос “Amazon Prime”-тай хамтарч, өдөр тутмынхаа амьдралын тухай баримтат кино хийж байгаа юм.

17. Хамес Родригес

• Нийт орлого: 22.1 сая
• Цалин ба Урамшуулал: 16.3 сая
• Бусад орлого: 4.5 сая
• Хамтрагч байгууллага: Adidas, Marc Jacobs, Hublot
• Клуб: Байерн Мюнхен/Реал Мадрид Улс: Колумб Нас: 27

2014 оны ДАШТ-ээр гялалзаж, алтан шаахай авсныхаа дараагаар “Реал Мадрид”-тай нүсэр гэрээ байгуулсан ч сэлгээний суудлаас салаагүй билээ. Улмаар 2017 оноос хойш Германы “Байерн Мюнхен” клубт зээлээр тоглож байгаа юм. Талбай дээр гялалзах нь багассан ч Хамес одоог хүртэл бизнесийн хүрээнд эрэлттэй хэвээр байгаа аж.

16. Тиаго Сильва

• Нийт орлого: 22.5 сая
• Цалин ба Урамшуулал: 21.5 сая
• Бусад орлого: 1 сая
• Хамтрагч байгууллага: Nike компани
• Клуб: ПСЖ Улс: Бразил Нас: 34

Францын “ПСЖ” багийн ахлагч Тиаго Сильва зургаан жил хагас Францад тоглосныхоо дараагаар буюу өнгөрсөн гуравдугаар сард тус улсын иргэншилтэй болсон билээ. Өдгөө 34 настай Т.Сильва 2020 оны зургадугаар сар хүртэл гэрээгээ үргэлжлүүлэх юм.

15. Серхио Агуэро

• Нийт орлого: 22.6 сая
• Цалин ба Урамшуулал: 17.1 сая
• Бусад орлого: 5.5 сая
• Хамтрагч байгууллага: Puma, Pepsi
• Клуб: Манчестер Сити Улс: Аргентин Нас: 31

“Кун” Агуэро 2011 оноос хойш “Манчестер Сити”-гийн довтлогчоор талбайд гарах болсон тэр үеэс хойш өнгөрсөн жил багийнхаа бүх цаг үеийн мэргэн бууч болсон билээ. Энэ хугацаанд тэрбээр 201 тоглолтод оролцохдоо 199 гоол оруулсан юм. Уг онцгой амжилтад нь зориулж, “Puma” брэнд алтан шаахай бэлэглэсэн удаатай. Тэрбээр багтайгаа байгуулсан гэрээг нэг жилээр сунгаж, 2021 оны есдүгээр сар хүртэл хүчин зүтгэхээр болсон юм.

14. Луис Суарес

• Нийт орлого: 23.6 сая
• Цалин ба Урамшуулал: 20.1 сая
• Бусад орлого: 3.5 сая
• Хамтрагч байгууллага: Puma
• Клуб: Барселона Улс: Уругвай Нас: 32

Уругвай довтлогч 2021 оны долдугаар сар хүртэл “Барселона”-тай гэрээтэй. Энэ хугацаанд тэр 20 сая орчим ногооныг цалин болон урамшуулалд авах билээ. Өнгөрсөн наймдугаар сард “Adidas” брэндээ “Puma” болгон өөрчилсөн Л.Суарес саяхнаас бизнесийн ертөнцөд хөл тавьсан. Тодруулбал, БНХАУ-д “Tronsmart” хэмээх техник, технологи компанид хөрөнгө оруулалт хийсэн бол Малайзид аялал жуулчлалын салбарт компани байгуулсан аж.

13. Анхел Ди Мариа

• Нийт орлого: 23.7 сая
• Цалин ба Урамшуулал: 21.7 сая
• Бусад орлого: 2 сая
• Хамтрагч байгууллага: Adidas
• Клуб: ПСЖ Улс: Аргентин Нас: 31

Аргентин довтлогч өнгөрсөн аравдугаар сард Францын “ПСЖ” клубтэйгээ гэрээгээ шинэчилж, 2021 оны зургадугаар сар хүртэл сунгасан.

12. Мохамед Салах

• Нийт орлого: 25.1 сая
• Цалин ба Урамшуулал: 16.1 сая
• Бусад орлого: 9 сая
• Хамтрагч байгууллага: Adidasь EA Sports, Vodafone, DHL, AlexBank
• Клуб: Ливерпуль Улс: Египет Нас: 26

М.Салах 2018 оны долдугаар сард гэрээгээ шинэчилж, таван жил багтаа зүтгэхээр болсон юм. Ингэснээр урамшуулал нь нэмэгдээд жилд 16.1 сая “ногоон” халааслах болжээ. Одоо тэр “Adidas” брэндийн нүүр царай болоод буй.

11. Гарет Бэйл

• Нийт орлого: 27.1 сая
• Цалин ба Урамшуулал: 20.6 сая
• Бусад орлого: 6.5 сая
• Хамтрагч байгууллага: Adidas, Wish
• Клуб: Реал Мадрид Улс: Уэйлс Нас: 29

Г.Бэйл 2016 оны аравдугаар сард гэрээгээ шинэчилж, 2022 оны зургадугаар сар хүртэл сунгасан. Энэ гэрээний дагуу Г.Бэйл дээд тал нь 33 сая ногооны цалин болон урамшуулал авах боломжтой. Уэйлс залуу хөлбөмбөгөөс гадна гольф сонирхдог. “Adidas” брэндтэй 2020 он хүртэл гэрээ байгуулсан билээ.

10. Антон Гриззман

• Нийт орлого: 27.7 сая
• Цалин ба Урамшуулал: 23.2 сая
• Бусад орлого: 4.5 сая
• Хамтрагч байгууллага: Puma, Huawei
• Клуб: Атлетико Мадрид Улс: Франц Нас: 28

А.Гриззман өөрийнхөө твиттер хуудсаар дамжуулан таван жил зүтгэж, 260 тоглолтод 133 гоол оруулсан “Атлетико Мадрид” багаа энэ жил орхихоор зарласан юм.

9. Оскар

• Нийт орлого: 29 сая
• Цалин ба Урамшуулал: 27 сая
• Бусад орлого: 2 сая
• Хамтрагч байгууллага: Adidas
• Клуб: Шанхай СИПГ Улс: Бразил Нас: 27

Английн “Челси” клубт таван жил данстай явж, энэ хугацаанд хоёр ч удаа лигийн аварга болсон Оскар 2017 оны нэгдүгээр сард бүгдийг гайхшруулсан шийдвэр гаргаж байлаа. Өдгөө 27 настай бразил эрийн цалин ч тэнгэрт хадсан. Оскар Хятадын лигт 19 дамжуулалт, 12 гоол оруулсан үзүүлэлттэйгээр баг нь лигийн аварга болсон билээ.

8. Мэсүт Өзил

• Нийт орлого: 30.2 сая
• Цалин ба Урамшуулал: 23.7 сая
• Бусад орлого: 6.5 сая
• Хамтрагч байгууллага: Adidas, Mercedes Benz, Beats by Dre
• Клуб: Арсенал Улс: Герман Нас: 30

Мэсүт Өзил өнгөрсөн онд eSports-ын “M10” хэмээх багийг санхүүжүүлж, EA SPORTS FIFA-гийн тэмцээнд оролцож байлаа. Ьүүний шинэ бизнес энэ жил ч өргөжин тэлсэн юм.

7. Клиан Мбаппе

• Нийт орлого: 30.6 сая
• Цалин ба Урамшуулал: 26.6 сая
• Бусад орлого: 4 сая
• Хамтрагч байгууллага: Nike, Hublot, Good Gout
• Клуб: ПСЖ Улс: Франц Нас: 20

Энэ жагсаалтад хамгийн залуудаа багтсан К.Мбаппе 2022 он хүртэл “ПСЖ”-дээ зүтгэх гэрээтэй. ДАШТ-д түрүүлсэн шагналынхаа 500 мянган ам.долларыг хөгжлийн бэрхшээлтэй хүүхдүүдэд зарцуулсан К.Мбаппе өнгөрсөн онд алдартай цаг үйлдвэрлэгч компани болох “Hublot”-ын албан ёсны элч болсон билээ.

6. Алекс Санчес

• Нийт орлого: 30.8 сая
• Цалин ба Урамшуулал: 28.3 сая
• Бусад орлого: 2.5 сая
• Хамтрагч байгууллага: Nike
• Клуб: Манчестер Юнайтед Улс: Чили Нас: 30

А.Санчес долоо хоногт 500 мянган ам.долларын цалин авч, Улаан чөтгөрүүдтэй гэрээ байгуулсынхаа урамшуулалд 2022 оны хүртэл нэг сая ногооны урамшуулал авах болсон билээ.

5. Андрес Иньеста

• Нийт орлого: 32.5 сая
• Цалин ба Урамшуулал: 30 сая
• Бусад орлого: 2.5 сая
• Хамтрагч байгууллага: Asics
• Клуб: Виссель Кобэ Улс: Испани Нас: 35

Испани эр “Барселона”-гийн хүүхдийн академиас хойш 22 жил энэ багт үнэнч зүтгэсний эцэст 2018 оны тавдугаар сараас хойш Япон руу нүүсэн билээ. Багаа сольсныхоо дараа 19 жил хамтарч ажилласан “Nike”-тай хийсэн гэрээ нь дууссан тул Японы “Asics” брэндийг сурталчлах болсон юм.

4. Пол Погба

• Нийт орлого: 33 сая
• Цалин ба Урамшуулал: 29 сая
• Бусад орлого: 4 сая
• Хамтрагч байгууллага: Adidas
• Клуб: Манчестер Юнайтед Улс: Франц Нас: 26

Дөрвөн жил “Ювентус”-т зүтгэсэн Пол Погба 2016 онд “Манчестер Юнайтед” багт эргэн ирсэн. Таван жилийн хугацаанд жилд багадаа 20 сая ам.долларын цалин авах гэрээтэй.

3. Нэймар

• Нийт орлого: 105 сая
• Цалин ба Урамшуулал: 75 сая
• Бусад орлого: 30 сая
• Хамтрагч байгууллага: Nike, Red Bull, EA Sports, Mastercard, Gaga Milano, Gillette, Beats by Dre, DAZN
• Клуб: ПСЖ Улс: Бразил Нас: 27

Өдгөө 27 настай бразил эр “Барселона”-гаас Францын “ПСЖ”-д ирэхдээ ойролцоогоор 600 сая ам.долларын цалин ба урамшуулал авахаар таван жилийн гэрээ байгуулсан. Зөвхөн цалин нь гэхэд 350 сая “ногоон” хүрэх аж. Нийгмийн сүлжээнд ч 223 сая дагагчтай гэдгээрээ К.Роналдугийн ард жагсдаг тамирчин юм.

2. Криштиану Роналду

• Нийт орлого: 109 сая
• Цалин ба Урамшуулал: 65 сая
• Бусад орлого: 44 сая
• Хамтрагч байгууллага: Nike, Herbalife, Altice, DAZN, MTG, Electronic Arts, CR7 line of denim
• Клуб: Ювентус Улс: Португал Нас: 34

“Реал Мадрид” багийн төлөө 9 жил зүтгээд эцэст нь Италийн “Ювентус”-ыг сонгосон К.Роналду дөрвөн жилд дунджаар 65 сая “ногоон” авах гэрээг байгуулсан. “Ювентус” түүнийг авсан эхний өдрөө л 520 мянган өмсгөл борлуулж, 60 сая ам.долларын ашиг хийсэн билээ.

1, Лионель Месси

• Нийт орлого: 127 сая
• Цалин ба Урамшуулал: 92 сая
• Бусад орлого: 35 сая
• Хамтрагч байгууллага: Adidas, Gatorade, Lays, Pepsi, Ooredoo, Mastercard, Jacobs & Co
• Клуб: Барселона Улс: Аргентин Нас: 32

Л.Месси багийнхаа төлөө 687 тоглолтод оролцож, 603 гоол оруулсан. Нийт 33 цом өргөж, 10 удаа Ла Лигт түрүүлсэн билээ. Өдгөө “Барселона” багтаа 2020-21 оныг дуустал зүтгэх гэрээтэй бөгөөд жилд дунджаар 80 сая орчим ам.долларын цалин авах юм.

Испанийн шигшээ болон “Барселона” клубийн хамгаалагч Жерард Пике тоглогчоос гадна багийн эзний статустай. Тэрбээр Испанийн тавдугаар лигт хүч үздэг “FC Андорра” багийн эзэн билээ.

Далайн түвшнээс дээш 1219 метрт байрлах 530 хүний суудалтай “Эстади Прада де Молес” цэнгэлдэх хүрээлэнд “ФС Андорра” баг тоглолтоо хийдэг. Испанийн тавдугаар дивизионд харьяалалтай энэ жижигхэн багийн эзэн нь нэрт хөлбөмбөгчин Жерард Пике юм. Өнгөрсөн оны арванхоёрдугаар сард Ж.Пике тэргүүтэй “Kosmos” бизнесийн групп энэ багийг худалдаж авсан билээ.

“ФС Андорра” клуб 1942 онд байгуулагдсан. Испанийн лигт 1948 оноос хойш зүтгэж байгаа аж. Ж.Пике энэ багийг худалдаж авахаас өмнө тэд санхүүгийн хувьд тун хүнд байдалд орсон байжээ. Тухайн үед энэ багийг худалдаж авах зүрхтэй бизнесмэн байсангүй.

Харин Ж.Пике багийг худалдаж авсан даруйдаа шинэчлэл хийв. Хамгийн түрүүнд “Барселона” багт зүтгэж явсан Габри болон Алберт Хоркера нарыг ахлах болон туслах дасгалжуулагчаар томилжээ. Габри бол “Барселона”-д 13 жил зүтгэж, 2006 онд Аваргуудын лигийн цом хүртсэн нэгэн. Өдгөө 40 настай испани эр Барсагийн академи болон Швейцарийн “ФС Сион” клубт дасгалжуулагчаар ажиллаж байгаад “ФС Андорра”-г удирдах болжээ.

Габри өмнө нь хагас мэргэжлийн багт ажиллаж байсангүй. Энэ багийн тамирчид нь өдрийн цагаар ажиллаж, орой нь бэлтгэлээ хийдэг.

Энэ клуб өнгөрсөн сард лигтээ түрүүлж, дээшээ дэвших болзлоо хангасан юм. Жирийн тоглолтыг нь 300-400 хүн үздэг байсан бол аварга болохыг нь харах чухал тоглолтыг 1500 хүн үзэж, рекорд тогтоожээ. Дэвших болзлоо хангасан тэд ирэх улиралд “Tercera” лигт тоглож, 24 жилийн дараа “Copa del Rey”-д тоглох эрхээ авсан юм. Испанийн цомын тэмцээн сугалаагаар өрсөлдөгч нь тодордог тул тэд багийн эзнийхээ харьяалагддаг “Барселона”-тай ч учраа таарч мэдэх аж.

Испанийн шигшээ багийн дасгалжуулагч Луис Энрике хувийн шалтгааны улмаас албан тушаалаа орхиж байгаагаа зарлав. Ингэснээр Испанийн шигшээг түүний туслах байсан Роберт Морено удирдахаар болжээ.

Өнгөрсөн оны долдугаар сард Испанийн шигшээ багийг удирдахаар хоёр жилийн гэрээ байгуулсан Луис Энрике албан тушаалаасаа огцорлоо. Тэрбээр өнгөрсөн гуравдугаар сараас хойш гэр бүлийн шалтгаанаар албан үүргээ гүйцэтгэх боломжгүй болсон аж.

Испанийн хөлбөмбөгийн холбооны тэргүүн Луис Рубиалесийн мэдээлснээр ийм шийдвэрийг Л.Энрике өөрөө гаргасан гэнэ.

Л.Энрике ар гэрт нь асуудал гарснаар гуравдугаар сард Малтатай хийх нөхөрсөг тоглолтын өмнөхөн гэртээ харьсан билээ. Түүний оронд туслахаар ажиллаж байсан Роберто Морено ахлах дасгалжуулагчийн үүрэг гүйцэтгэж байлаа. Түүний удирдлага дор испаничууд сүүлийн гурван тоглолтод ялалт байгуулсан юм.

Английн “Манчестер Юнайтед” клуб түр менежерийн үүрэг гүйцэтгэж байсан Оле Сульшертэй албан ёсоор гурван жилийн гэрээг үзэглэллээ. Өдгөө 46 настай норвеги мэргэжилтэн өнгөрсөн арванхоёрдугаар сард Жозе Моуриньюг халагдсаны дараа Улаан чөтгөрүүдийг удирдах болсон билээ. Тэрбээр эхний найман тоглолтод дараалан ялж, түүний удирдлага дор баг нь сүүлийн 19 тоглолтын 14-т нь хожил авч, хоёр удаа тэнцсэн юм.

Норвегийн хэвлэлд онцолсноор Оле Сульшерийн цалин нэмэгдсэн бололтой. Түр орлогчоор ажиллаж байхдаа долоо хоногт 100 мянган фунтын цалин авч байсан бол одоо жилийн 7.5 сая фунтын цалин авахаар тохиролцсон гэх мэдээллийг Их Британийн хэвлэлүүд өгч байна.

Оле идэр залуу тоглогч байхдаа “Манчестер Юнайтед” багт 11 жил зүтгэсэн. Энэ хугацаанд 20 сая фунтын цалин авч байв. Тодруулбал, долоо хоногт 35 мянган фунтын цалин авч байсан юм.

Тэрбээр Улаан чөтгөрүүдээс ажлын санал авахаасаа өмнө нутгийнхаа “Молде” клубийг удирдаж байхдаа долоо хоногт 9600 фунтын цалин авч байлаа.

Францын нэрт хөлбөмбөгчин асан Зинедин Зидан Испанийн “Реал” багийн ахлах дасгалжуулагчаар томилогдлоо.

Өмнө нь “Реал”-ын хамт Аваргуудын лигт гурван жил дараалан түрүүлсэн амжилттай З.Зидан өнгөрсөн жил өөрийнхөө хүсэлтээр ажлаа өгсөн юм. Гэвч 9 сарын дараа буюу 284 өдрийн дараа эргэн ирлээ. Энэ удаад З.Зидан гурван жилийн гэрээ байгуулж, 2022 оны улирал дуустал зүтгэхээр болжээ.

Испанийн Ла Лигт “Реал” тэргүүлэгч “Барселона”-гоос 12 оноогоор хоцорч, хүснэгтийн гуравдугаарт бичигдэж буй. Мөн сүүлийн гурван жил дараалан түрүүлсэн Аваргуудын лигийн шөвгийн 16-гаас хасагдсан нь дасгалжуулагчийн түр үүрэг гүйцэтгэж байсан С.Солариг халах том шалтгаан болсон юм.

“Реал”-ын Ерөнхийлөгч Флорентина Перес дөрөв хоногийн өмнө З.Зидан руу утасдаж, эргэн ирэх санал тавьсан гэнэ.

З.Зидан хэвлэлийн бага хурлын үеэр “Эргэн ирсэндээ баяртай байна. Маргаашнаас ажилдаа орно. Багаа одоогийн түвшнээс ахиулахын тулд өөрийнхөө чадах бүхнийг хийх болно. Би “Реал”-д хувьцаа эзэмшдэггүй, ямар ч өр зээл байхгүй. Энэ багт хайртай учраас саналыг нь хүлээн авсан юм” гэж ярьжээ.

З.Зиданы өмнө нь “Реал”-ыг дасгалжуулж байхдаа дэлхийн хамгийн өндөр цалинтай дасгалжуулагч нарын нэг байв. Харин одоо 2022 он хүртэл жилд 9.5 сая “ногоон” халааслах бололтой.