Испанийн хамгийн олон жилийн түүхтэй, 1903 оноос уламжлал болон зохиогдож ирсэн “Копа Дел Рей” буюу эзэн хааны цомын аваргаар “Барселона” клуб тодорлоо. Тэдний хувьд өнгөрөгч шөнийн шигшээ тоглолтод Баск үндэстний төлөөлөл “Атлетик Билбао” клубийг 4:0 харьцаатай бут ниргэлээ.

Тоглолтын эхний хагас гоолгүй өндөрлөсөн бол, хоёрдугаар хагас эхлээд удалгүй Франц залуу Антуан Гризманн хаалганы торыг хөдөлгөж чаджээ. Үүний дараа ердөө 12 минутын дотор тэд гурван гоолыг нэмж оруулсанаар тоглолтын эцсийн цэгийг тавьжээ. Тус хоёр клубын хувьд энэ оны эхэнд Испанийн сүпер цомын финалд тоглож Билбаочууд хожоод байсан бол Барса энэ удаад хариугаа авлаа. Ийнхүү тэд тус тэмцээний түүхэнд 31 дэх цомоо өөрсдийн болгосон ба тэдний араас “Атлетик Билбао” 23, “Реал Мадрид” 19 цомтой тус тус жагсаж байна.

Хамгийн сүүлд 2019 онд лигийн аваргыг хүртэснээс хойш ямар нэгэн цом өргөөгүй каталончууд 720 өдрийн дараа ийнхүү цомын бараа харлаа. Тэмцээний шилдгээр финалын тоглолтод хоёр гоол оруулсан Лионель Андрес Месси тодорчээ. Түүний хувьд энэ өдөр бүх тэмцээний хүрээнд 13 улирал дараалан 30-аас дээш гоол оруулсан манай гарагийн цорын ганц хөлбөмбөгчин боллоо.

Тоглолтын дараа:

“Энэ бол үнэхээр хүнд өрсөлдөөн байлаа. Цом өргөх үргэлж сайхан байдаг, манай залуус үүнийг хүртэх эрхтэй. Энэ багийн ахлагч байна гэдэг гайхалтай, цом өргөх мэдрэмж үнэхээр онцгой байлаа. Баяраа гэр бүл, хөгжөөн дэмжигчидтэйгээ тэмдэглэж чадахгүйдээ сэтгэл дундуур байна.”

Лионель Месси

“Тоглолтын тухайд бид боломж хайж тэвчээртэйгээр бөмбөгөө тал талруу шилжүүлж тоглосон. Эхний үед байдал хэцүү байсан ч хоёрдугаар хагаст тэд бага зэрэг удааширч эхэлсэн. Иймээс бид давуу талаа ашиглаж чадлаа.”

“Бусад улирлаас ялгаатай нь энэ жил олон зүйл өөрчлөгдсөн. Бүрэлдэхүүнд олон залуу тоглогч орж ирсэн. Улирлын эхлэл тааруу байсан ч бид бага багаар хүчирхэгжсэн. Эцэстээ “Атлетико Мадрид”-тай хоорондын оноогоо ойртуулж чадсан ч харамсалтай нь Эл Классикод хожигдсон. Гэхдээ лиг дуусахад олон тоглолт дутуу байгаа. Бид илүү хүчтэй баг нь. Иймээс эцсээ хүртэл тэмцэх болно.”

Энэ зун гэрээ нь дуусч, клубээ орхих магадлалтай байгаа Аргентин эрийн шийдвэрт энэ цом нөлөөлөх болов уу?

Өдгөө 29 настай, бельги тоглогч КДБ буюу Кэвин Де Брейне хугацаанаасаа өмнө гэрээгээ дахин сунгаж, 2025 он хүртэл Этихадад үлдэхээр болсон. Сонирхолтой нь, гэрээ шинэчлэх ажилд ямар нэг төлөөлөгчийн туслалцаа аваагүй байна

2015 онд анх Сити клубт нэгдсэнээс хойш 2018 онд байгуулсан таван жилийн гэрээ 2023 онд дуусах байсан ч ийнхүү багтайгаа тохиролцоонд хүрч дахин дөрвөн жил хүчин зүтгэхээр болсон байна.

Гэрээгээ сунгаж чадсандаа бахархаж байна. Миний хувьд замналдаа хамгийн удаан тоглож буй клуб Манчестер Сити бөгөөд гэр шиг миг санагддаг болсон. Нас маань ч хөлбөмбөгчний хувьд оргил үе дээрээ байна. Надад итгэж гэрээгээ сунгасанд баяртай байна бас манай гэр бүл их бахархаж байгаа. Энэ шийдвэрийг гаргахад надад хүндрэлтэй байгаагүй ээ…

Кевин Де Брейнегийн ярилцлагаас

Тэгвэл энэ гэрээний дараа Сити клубийн ойрын ирээдүйг дараах тоглогчид тодорхойлохоор болж байна.

ГЭРЭЭНИЙ АРД ЮУ БОЛОВ?

Өмнө дурдсанаар гэрээ байгуулах явцад мэргэжлийн төлөөлөгч оролцоогүй. КДБ болон түүний аав, өөрийн хуульч нар голлосон ба Рок Нэшн хэмээх реппэр Жэй Зигийн байгуулсан урлаг, спортын оддыг дэмждэг агентлагийн зөвлөгөөг алсаас авчээ.

Харин үнэлгээний тухайд хөлбөмбөгчдийн дата шинжилгээний Аналитикс ФС компанитай хамтарч өөрийнхөө Манчестер Сити клубт үзүүлж буй нөлөөг хэмжиж, тооцоолсоноор гэрээний үнийн дүнг багцаалжээ.

Тодруулбал: Аналитикс ФС системд багтах ТрансфэрЛаб хэсэг нь тоглогчдын үзүүлж буй статистик мэдээллүүдийг шинжилж, зах зээлийн үнэлгээ тогтоох, аль баг тухайн тоглогчид илүү тохирох гэх мэт шилжилт хөдөлгөөнтэй холбоотой үр дүнг таамаглан гаргадаг байна. Яг л хөрөнгийн зах зээл, крипто болон форэксийн платформууд шиг.

Үүгээр тооцоолж үзэхэд КДБ-гийн Ситид үзүүлж буй нөлөө 30 хүртэл хувь өсөх боломжтой гэж гарчээ. Энэ нь түүнд гэрээний дүнгээ 30 хувь хүртэл өсгөх боломж буйг илтгэсэн бололтой. Илүү сонирхолтой нь түүнд хамгийн сайн тохирох клубээр Ситиг нэрлэсэн нь шийдвэрээ эцэслэхэд шууд нөлөөлсөн гэж болохоор байна.

Үүнтэй төстэй өөр нэгэн жишээ гэвэл Мэмфис Дэпай 2016 онд СкиСпортс хэмээх бас нэг дата тооцооллын компанитай ажилласны үр дүнд Манчестер Юнайтедаас Францын Лион клуб рүү шилжиж байжээ. Системээс түүнд таван клуб санал болгосон байна. Харин Дэпай лавшруулан илүү чөлөөтэй довтолж, бүтээлч тоглох боломжийг нь харахад Лион клуб үлджээ. Ийнхүү Францад ирсэнээсээ хойш 70 гаран гоол оруулаад байгаа ажээ.

Тэгэхээр цаашид өндөр төлбөртэй төлөөлөгчийн үйлчилгээ үзүүлдэг хувь хүн, компаниудаас тоглогчид татгалзаж, дата тооцооллын системтэй нөхөрлөх болов уу, яах бол?

Хөлбөмбөгийн ЕАШТ цар тахлын улмаас бүтэн жил хойшилсоны эцэст энэ оны зургадугаар сарын 11-нээс долдугаар сарын 11-ны хооронд буурал тивийн 12 улсын 12 цэнгэлдэхэд зохион байгуулагдах болсон билээ.

Энэ удаагийн ЕАШТ-ий нээлтийн тоглолт Италийн Ром хотын “Стадио Олимпико” цэнгэлдэхэд болно. Зургадугаар сарын 11-нд болох тус тоглолтод цэнгэлдэх 25 хувийн дүүргэлттэй явагдах болсоныг зарласан юм. Тасалбар авсан үзэгчид Италийн засгийн газраас гаргасан цар тахлын үед баримтлах дүрэм журмыг мөрдөх хэрэгтэйг анхааруулжээ.

Энэ удаагийн тэмцээний хагас шигшээ болон шигшээ тоглолт Английн алдарт “Вэмбли” цэнгэлдэхэд болох аж. Эдгээр тоглолтууд цэнгэлдэх дүүрэн үзэгчидтэй болох магадлал өндөр байгаа юм. Учир нь Британид тахлын эсрэг вакцинжуулалтад зорилтот хүн амын талаас илүү хувь нь хамрагдсан бөгөөд засгийн газраас гаргасан төлөвлөгөө тодорхой, иргэд нь ч дуулгавартай дагаж байгаа гэнэ.

Европын шилдэг 24 баг бүтэн сарын хугацаанд 51 тоглолтыг зохион байгуулах цэнгэлдэхүүд

Бэлтгэсэн: Г.Дарханбаяр

АНУ-ын их сургуулийн цуцлагдсан тэтгэлэг, “ВфБ Штутгарт”-д зээлээр тоглосон нэг жил, бэртэл гэмтлийн асуудлыг ашиглаж өөрийгөө таниулсан цаг хугацаа гээд л Натаниэл Филлипсийн “Ливерпүүл”-ийн гараанд гарах зам тийм ч дардан байгаагүй.

“Ливерпүүл” клубын туслах дасгалжуулагч Эрик Линдерс саяхан клубын албан ёсны вэбсайт дээр өгсөн ярилцлагадаа “Хэрэв би ширэнгэн ойд амьд үлдэх ёстой байсан бол хамт явах эхний хоёр хүн нь Натаниэль, Майлли байх болно. Жеймс Милнер бол 35 настай, туршлагатай, замналдаа ихийг үзсэн дайчин эр. Натаниэл Филлипс үү? Түүнд арслангийн зүрх байдаг” гэж хэлжээ.

Залуу хамгаалагчид

Английн “Ливерпүүл”-д Виржил ван Дайк, Жо Гомес, Жоэл Матип нарын шилдэг хамгаалагч бий. Гурвуулаа хэдэн долоо хоног, зарим нь бүтэн улирал дуустал тоглохгүйгээр хүнд бэртэж багтаа тусалж чадахгүй болсон билээ. Тус багийн дасгалжуулагч Юрген Клопп хамгаалалтын байрлалд 20 гаруй хослол гарган туршиж үзсэн ч амжилттай болоогүй. Тэрбээр хэдэн долоо хоногийн өмнө уналтад орсон “Шалке 04” клубээс залуу хамгаалагч Озан Кабакыг зээлээр авч , сэлгээнд банз халааж байсан Натаниэл Филлипсд итгэл хүлээлгэн шинэ хамгаалалтын хослол гаргаснаар тэдний хамгаалалт тогтворжсон билээ.

Тэтгэлгийн оронд “Ливерпүүл”-ийг сонгов

Ливерпүүлээс зүүн тийш 45 минутын зайд орших Болтон хотод төрсөн Н.Филлипс “Болтон Уондерерс” багийн залуучуудын багт хэсэг тоглож байсан. Харамсалтай нь, клубын удирдлага түүнийг мэргэжлийн хөлбөмбөгчин болох ирээдүйгүй гэж үзсэнээр 19 настай залуу хүү 2016 онд АНУ-ын Шарлотт хотын Хойд Каролинагийн их сургуульд тэтгэлэгээр суралцах шийдвэр гаргажээ.

АНУ руу явахаар төлөвлөсөнөөс хоёр хоногийн өмнө “Ливерпүүл” түүнтэй холбогдож нөөц багт тоглох гэрээ санал болгов. Н.Филлипс ч шууд зөвшөөрч тив алгасан нисэх өдрөө гэрээнд гарын үсэг зурснаар Англидаа үлджээ. “Ливерпүүл”-ийн нөөц багт гурван жил тоглоод 2019 онд “Штутгарт” руу зээлээр очлоо.

“Штутгарт”-аас “Ливерпүүл”-ийн гараанд

Н.Филлипс “Штутгарт”-ын төвийн хамгаалалтад тогтмол тоглож байсан боловч өнгөрсөн оны нэгдүгээр сард үндсэн багтаа түр хугацаагаар дуудагдлаа. “Ливерпүүл”-ийн тоглогчид ээлж дараалан бэртсэн нь ийм шийдвэр гаргахад нөлөөлжээ.

Н.Филлипс ч “Ливерпүүл”-ийн төлөөх дебютээ Английн цомын тэмцээнд заналт өрсөлдөгч “Эвертон”-ы эсрэг хийж баг нь 1:0-ээр хожсон юм. Гэхдээ үндсэн багтаа удсангүй улирал дуустал “Штутгарт”-д үлдэхээр болжээ.

“Баг маань аварга авах нь нэгэнт тодорхой болсны дараа би “Штутгарт”-ын бэлтгэлдээ явж байхдаа “Чи хэзээ ч ганцаараа алхахгүй ” дууг дуулж явсан. Би залууст цагаахнаар атаархаж, хэзээ нэгэн цагт тэр сайхан мэдрэмжийг авахыг хүсэж байлаа” гэж Натаньел дурссан байдаг.

Зээллэгээс эргэн ирсэн ч Филлипс үндсэн багаасаа явах талаар эргэцүүлж байхад Английн зарим багууд сонирхож байв. Эцэст нь багтаа үлдсэн боловч бэлтгэлийн үеэр ноцтой бэртэл авчээ. Үүний уршгаар улирлын эхний хагаст сэлгээнээс цөөн хэдэн тоглолт хийж багтаа улам бүр ууссан бол оны шинэ оны эхнээс л гараанд гарах болжээ.

Түүний сайн тоглолтыг хөгжөөн дэмжигчид ч анзаарч өнгөрсөн гуравдугаар сарын клубын шилдэг тоглогчоор тодруулсан билээ.

“Түүний өдрөөс өдөрт үзүүлж байгаа тоглолт итгэмээргүй сайн байгаа. Яг зөв зүйлийг зөв цагт нь хийж чаддаг, агаарын тулаанд яг мангас шиг л гэсэн үг. Магадгүй Н.Филлипс хуучны Англи хэв маягаар ирсэн бөмбөгийг хол цөлж явуулахыг илүүд үздэг. Үүнийг хамтрагч Кабакаас илүү олон удаа хийсэн байх. Техникийн хувьд хамгийн сайн нь биш ч гэлээ анхаарал төвлөрүүлж байгаагаар хэнээс ч илүү. Энэ улирлын турш ноцтой алдаа олон гаргаагүй” багийн менежер Ю.Клопп ярилцлагадаа хэлсэн юм.

Филлипс энэ улиралд аль хэдийн 111 удаа агаарын тулаанд ялалт байгуулж хамтрагчаасаа хоёр дахин илүү байгаагаа батлан харуулсан билээ. “Тэр бусад тоглогчид хөлөө ч явуулахгүй газарт толгойгоороо тоглодог” гэж туслах дасгалжуулагч Пепин Лийндерс хошигнож байв.

Түүний гэрээ 2023 он хүртэл үргэлжлэх боловч одоогоор бэртэлтэй байгаа гурван төвийн хамгаалагч нь эргэн ирвэл тоглох магадлал эрс буурах магадлалтай. Үүнээс гадна “Ливерпүүл” клуб “Лейпциг”-ийн Ибрахима Конате авах талаар шуум сонсогдож буй. Залуухан, авьяаслаг франц хамгаалагчийг багтаа авчирвал Н.Филлипсийн Улаанууд дахь ирээдүй бүрхэг болох юм. Тогтвортой тоглолтоороо шагшигдаж буй түүнийг багтаа авчрах хүсэлтэй олон менежер бий болов уу.

Английн “Челси” клуб өнгөрсөн долоо хоногт Сэм Алардайсын “Вэст Бромвич Албион”-д 2:5 харьцаатайгаар бут ниргүүлсэн билээ.

Харин энэ удаад Томас Тухелийн залуус заавал хожих даалгавартай гарч ирсэн юм. Германы Бундеслигээс ирсэн немц тоглогч Кай Хавертц, америк залуу Кристиан Пулишич нар онцгойрлоо. Хаверц найм дахь минутад гоолын салхийг хагалсан бол, ердөө хоёр минутын дараа түүний дамжуулалтаар Пулишич тооны харьцааг холдуулав. Улмаар эхний хагасын 30 дахь минутад хамгаалалтын ноён нуруу Курт Зума гоолдсон юм. Харин Рой Хожсоны “Болор орд”-ны залуусаас бельги довтлогч Кристиан Бендекэ 63 дахь минутад нэр төрийн ганц гоол оруулжээ. Харин 78 дахь минутад өнөөх Пулишич гоолдож “Болор орд”-ны залуусын эргэн ирэх хүсэл зоригийг бүрмөсөн үгүй хийв. Ийнхүү угсаатнууд маш чухал хожил байгуулж, гэзэг даран нэхэж байгаа Юргэн Клоппын залуусаас хоёр онооны дээр бичигдэж байна.

Тоглолтын шилдгээр нэрлэгдсэн Кай Хаверц өнгөрсөн оны аравдугаар сараас хойш лигт анхны гоолоо хийжээ. Сүүлд хэвлэл мэдээллээр олон удаа  шүүмжлүүлсэн тэрбээр тоглолтын дараа сэтгүүлчдэд өгсөн ярилцлагадаа “Миний байрлалд олон гоол оруулах боломж бий. Харин өнгөрсөн хугацаанд тийм боломж ч надад хангалттай олдоогүй .Харин энэ тоглолтод боломж их гарлаа. Бүр хоёр ч гоол нэмж оруулах боломж гарсан ч ашиглаж чадаагүй. Гэхдээ үр дүнд сэтгэл хангалуун байна” гэж ярьжээ.

Харин энэ улиралд гол хамгаалагчдаа бэртэлд алдсанаас хойш алдарт “Энфилд” цэнгэлдэхдээ найман тоглолт хожил аваагүй Юрген Клоппын “Ливерпүүл” клуб “Астон Вилла”-г 2-1 харьцаагаар хожиж “Челси”-г гэзэг даран нэхэж байна.

Тоглолт эхлэхэд Улаануудаас ахлагч Жордан Хендерсон, Жоел Матип, Виржил Ван Дайк, Жо Гомес, Келлехар, Дивок Ориги нар гэмтэлтэй байсан бол “Астон Вилла”-гийн гол тоглогч Жек Грелиш, Уэсли нар гэмтэлтэй өнжсөн. Тоглолтын эхнээс л бөмбөг эзэмшин эсрэг багийнхаа эсрэг нэлээд боломж үүсгэж байлаа. Харин зочин баг сөрөг довтолгоо хийж гоолын боломж хайж байв. Тоглолтын эхэнд Английн шигшээ багийн дасгалжуулагч Гарретт Саутгетийн анхааралд өртсөн Тайрон Мингс бүдүүлэг алдаа гаргаж бөмбөгнөөсөө зөрсөн ч египет довтлогч Мохаммед Салах сайхан боломжийг ашиглаж чадаагүй. Үүнээс нэг их удалгүй Роберто Фирминогийн оруулсан гоолыг шүүгч бичлэг үзсэний эцэст тооцоогүй. “Бирмингхэм”-ээс ирсэн зочид бөмбөг таслан сөрөг довтолгоогоо хийж, тэр нь ч амжилттай болж тоглолтын 43 дахь минутад Олли Уоткинсийн оруулсан бөмбөгөөр хошуучилж эхлэв. Харин Улаанууд эсрэг багийнхаа нягт хамгаалалтыг эвдэхээр олон довтолгоо зохион байгуулсаны эцэст жигүүрийн хамгаалагч Робертсоны алсын хүчтэй цохилтыг Мартинэс дутуу зайлуулахад Салах зөв газраа зөв цагтаа мөргөж тоог тэнцүүлэв. Түүний дараа Салахын нутгийн довтлогч Трезегет Олли Уоткинсын дамжуулалтыг хүлээн авч, хөлийн гадар хэсгээр хүчтэй цохиж хаалганы шонг онож нэлээн сандаргасан. Улаанууд сэлгээгээр Шакириг оруулж ирэн довтолгоог улам эрчимжүүлсний үр дүнд тоглолтын 90+1 минутад Трент Александр Арнолдын хожлын гоолоор маш чухал гурван оноогоо халааслав.

Луис Суарез энэ зуны солилцоо наймааны цонхоор “Атлетико Мадрид”-ыг орхиж хуучин баг болох “Ливерпүүл”-дээ эргэн очих хүсэлтэй байгаа талаараа Испанийн хэвлэлд өгсөн ярилцлагадаа дурджээ.
Уругвай довтлогч “Атлетико Мадрид”-д очсон эхний улиралдаа 19 гоол оруулж баг нь лигээ тэргүүлж байсан боловч аргентин дасгалжуулагч Диего Симеонетай таарамжгүй харилцаатай байгаа нь багаа орхиж явахад хүргэж магадгүй гэнэ. Энэ талаар Л.Суарез “Д.Симеонегийн хөлбөмбөгийн арга барил маш их дарамт, өндөр энерги шаарддаг учраас бие махбодийн хувьд туйлдаж байна” гэж ярьжээ.
Испанийн багтай хийсэн гэрээнд энэ зун ямар нэгэн торгууль төлөхгүйгээр түүнийг явахыг зөвшөөрч тэр ч бүү хэл MLS-ийн “Интер Майами’-д тоглох боломжтой гэж заасан хэмээн Испанийн “Тодофичажез” хэвлэлийн агентлаг мэдээлэв.

Үүний үр дүнд Лиус Суарез энэ зуны солилцоо наймааны цонхоор “Ливерпүүл” эсвэл “Интер Майами” клубтэй тохиролцоо хийх боломжтой гэнэ.
Уругвай эр 2011 онд “Аяакс”-аас “Ливерпүүл”-д 22.8 саяар ирсэн бөгөөд 2014 онд “Барселона” клубтэй нэгдэх хүртлээ багийнхаа төлөө нийт 133 тоглолтод оролцож 82 гоол оруулсан юм.

Хөлбөмбөгийн ертөнцийн хамгийн заналт өрсөлдөгч нарын тулаан өнөөдөр болно. Энэ бол алдарт Эл Классико, Гранд Дерби. “Барса” болон “Реал”. Уг тоглолт зөвхөн хөлбөмбөгийн ногоон талбайгаас давсан тэмцэл юм. Энэ бол спорт, улс төрийн нэгдмэл тулаан юм.

Тэдний тэмцэл хаанаас эхэлсэн бэ?

1936 онд Франциско Франко ардчилсан Испанийн Бүгд Найрамдах Улсын эсрэг төрийн эргэлт хийж энэ үеэр Мадридад улс төрийн асуудлаар ирээд байсан “Барселона”-гийн Ерөнхийлөгч, Каталоны Бүгд найрамдах намын гишүүн Хосеп Сунёлыг түүний цэргүүд баривчилж цаазаар авчээ. Франкогийн дарангуйллын үед каталончууд фашист маягийн дэглэмийг хүчтэй эсэргүүцсэн учир нь тэрбээр Испанийн бүх бүс нутгийн хэл, таних тэмдгийг үзэн яддаг байснаас үүдэн каталан хэлээр ярихыг хуулиар хориглосон юм. Энэ үед Каталон үндэстний эрх чөлөө, үзэл санааны илэрхийлэл нь “Барселона” клуб байжээ. Иймээс тэд “Més que un club” буюу “клубээс ч эрхэм” гэх уриатай болсон байдаг. Харин энэ үед Мадрид хотын баг Кастиль үндэстэн болон Франкогийн фашист дэглэмийн үзэл санааны илэрхийлэл, бэлгэ тэмдэг болж байлаа.

1943 оны Испанийн цомын тэмцээний хагас шигшээд тэд хоорондоо таарч эхний тоглолт Каталон дахь “Барселона”-гийн Лес Кортс цэнгэлдэх хүрээлэнд болоход тэд 3:0-ийн харьцаатай ялалт байгуулсан юм. Гэхдээ хариу тоглолтын үр дүн итгэмээргүй байсан ба Реал 11:1-ийн харьцаатайгаар илүүрхжээ. Уг тоглолтын өмнө “Барса”-г хожигдохыг Франко тушааж, сүрдүүлсэн мөн шүүгч хэт Реалын талд шүүж тэдний бохир тоглолтыг дэмжсэн гэх олон таамаг байдаг. Гэхдээ эдгээр мэдээллийн аль нь ч нотлогдоогүй тул ОУХХ (FIFA) болон ЕХХ (UEFA) уг үр дүнг хууль ёсны гэж үздэг байна.

Үүний дараа тухайн үеийн сүпер од Альфредо Ди Стефано “Барселона” клубтэй гэрээ байгуулсан ч Засгийн газрын оролцоотойгоор гэрээг цуцалж Эзэн хааны клубтэй гэрээ байгуулсан нь тэмцлийг улам хурц болгосон түүхтэй.

Хоёр багийн түүхэн статистик

Дэлхийн хамгийн арвин түүхтэй хоёр багийн гал гарсан, ганган нэгэн тулаан эхлэхэд хэдхэн цаг үлдлээ. Энэ тоглолтод “Реал”-ын зүгээс багийн ахлагч Серхио Рамос, Рафаель Варане, Эден Азар зэрэг гол тоглогчид нь оролцохгүй бол “Барса”-гаас Ансу Фати болон Филиппе Коутиньо нар тоглох боломжгүй.

Каталоны клуб он гарсаар дотоодын лигийн хүрээнд хожигдоогүй бол Эзэн хааны баг бүх тэмцээний хүрээнд 12 тоглолтод ялагдал амсаагүй мөн Аваргуудын лигийн гайхалтай гүйцэтгэлийн дараагаар энэ тоглолтод тулж ирлээ. Уг тоглолтыг SPS National суваг шөнийн 3:00 цагаас Монгол орон даяар албан ёсны онцгой эрхтэйгээр анх удаагаа шууд дамжуулан хүргэнэ.

Бүх цаг үеийн  279 дэх, албан ёсны 246 дахь ногоон талбайн сонгодог тулаан . Чи цом алдаж болно. Гэхдээ тэднийг л хожих ёстой.  Эл Классико бол энгийн нэг тулаан биш. Энэ бол Дэлхийн III-р дайн. Шүгэл дуугархад дэлхий зогсож, хүн төрөлхтөн хоёр хуваагдана. “Барса” юу? “Реал” уу? “Альфредо Де Стефано”-д тавтай морил!!!

Б.Цогтбаяр

Монголын хөлбөмбөгийн шигшээ багийн ахлах дасгалжуулагчаар Японы Шүйчи Масэ томилогдлоо. Өдгөө 47 настай довтлогч асан Ш.Масэ 2023 оны нэгдүгээр сарын 31-нд хүртэл Монголын насанд хүрэгчдийн шигшээ болон 23 хүртэлх насны залуучуудын багийг удирдах аж.

Японы хөлбөмбөгийн холбооноос зохион байгуулдаг Азийн хөлбөмбөгийг хөгжүүлэх хөтөлбөрийн хүрээнд Ш.Масэ манай улсад дасгалжуулагчаар ажиллах болжээ.

Энэ талаар өнөөдөр буюу дөрөвдүгээр сарын 8-нд Японы хөлбөмбөгийн холбооны захирлуудын зөвлөлийн цахим хурлаар зарласан юм.

Ш.Масэ 2006 оноос “Жэфф Юнайтед Чиба” багийн дасгалжуулагч Ивица Ошимын хэлмэрч, дасгалжуулагчаар ажлын гараагаа эхэлсэн. Улмаар “Фагиано Окияама”, “Токио Верди” багт туслах дасгалжуулагчаар ажиллаад “Акита Блаублиц”, “Эхимэ ФС”-д ахлах дасгалжуулагчаар томилогдож байв. Хамгийн сүүлд “Акита Блаублиц” багийн спорт хариуцсан тэргүүнээр ажилласан аж.

Тэрбээр Ниппон Спортын шинжлэх ухааны их сургуулийг төгсөөд 1997-2000 оны хооронд Хойд Америкийн лигт довтлогчоор тоглосон. Зодог тайлаад багагүй хугацаанд Хорватад амьдарсан нь хожим Ивица Ошимын хэлмэрч хийхэд тус болжээ. Англи, Испани, Хорват, Португал хэлээр ярьдаг аж.

Монголын шигшээ багийн ахлах дасгалжуулагчаар 2020 оны есдүгээр сараас хойш ажилласан словак мэргэжилтэн Растислав Бозикийн гэрээний хугацаа хэдхэн хоногийн өмнө дуусаж ажлаа өгсөн билээ. Тэрбээр Японоос шууд нутагтаа буцсан юм.