Tag: Италийн лиг

Дарангуйлагч Mуссолинигийн ачинцар мэргэжлийн хөлбөмбөгийн багтай гэрээ байгуулжээ

Италийн фашист дарангуйлагч Бенито Mуссолинигийн дөрөв дэх хүүгийн зээ хүү болох Романо Mуссолини Италийн мэргэжлийн хөлбөмбөгийн “Лацио” багтай гэрээ байгуулсан байна.

            Энэ жил 18 настай Романо өнгөрсөн хоёрдугаар сард Ром хотын багийн 19-өөс доош насны багт дуудагдаж , сүүлийн таван тоглолтын дөрөвт нь оролцсон юм. Харин одоо үндсэн багийн тоглогч болж, гурван жилийн гэрээ байгуулжээ.

            Романо өөрийн Инстаграм хуудсандаа гэрээ байгуулж байгаа зурагаа оруулан “Өөрийн хаанаас эхэлсэнээ сайн тунгаан бодож байна. Анхнымэргэжлийн гэрээгээ “Лацио” багтай байгуулсандаа болон энэ өмсгөлтэй гурван жилийг өнгөрөөхдөө маш их баяртай байна ” хэмээжээ.

            Tэрбээр Алессандра Mуссолини болон Mауро Флорианигийн гурав дахь хүү юм.

            Tүүний ээж Алессандра Mуссолини Европын Холбооны Парламентад Итали улсыг төлөөлсөн гишүүн байжээ.

            Романо Италийн “Il Messaggero” сонинд өгсөн ярилцлагадаа

“Mуссолини гэсэн нэрийг минь биш миний тоглолтыг л шүүмжил” гэсэн байна.

            “Лацио”-гийн ултра хөгжөөн дэмжигчид арьс өнгө угсаа гарвалиар ялгаварлан гадуурхдагаараа зартай билээ.

Дибалагийн Юве дэх ирээдүй бүрхэг байна

Тааруу улирлыг үргэлжлүүлж буй Пауло Дибала Ювентустай гэрээгээ сунгах эсэх нь тодорхойгүй хэвээр байна. (Одоогийнх нь 2022 оны 6 сарын 30-нд дуусна) Өнгөрсөн улиралд нийт 17 гоол оруулж лигийн MVP болсон Аргентин довтлогч шинэ улирал эхэлснээс хойш Сери А-д ганцхан гоол бүртгүүлээд байгаа. Түүнийгээ 12 сарын 13-нд Женоагийн эсрэг оруулсан юм. Тоглолтын дараа Дибала хэвлэл болоод клубтээ хандсан хатуу үгсийг хэлсэн юм.

“Миний гэрээний тухай олон худал мэдээлэл хэвлэлд тавигдаж байгаа. Үүнээс болоод Ювентусын фэнүүд надаас хөндийрч, хүйтэн хандаж эхэлж байна. Би ийм зүйлийг хүсэхгүй байна. Би энэ клубт хайртай. Үлдэхийг хүсдэг гэдгээ үргэлж л хэлдэг. Гэхдээ одоогоор гэрээтэй холбоотой хэлэлцээрт ямар ч ахиц гарахгүй байна. Агентыг маань Туринд байх хугацаанд клубээс нэг ч залгаагүй”

Клубын ерөнхийлөгч Андреа Аньелли маргааш нь Дибалагийн хэлсэн зүйлст ийн хариулсан юм.

“Бид түүнийг Ювед хайртай, авьяаслаг тоглогч гэдгийг нь мэднэ. Бүр ирээдүйн багийн ахлагчаа гэж хардаг. Ковид тусаж эдгэснээс нь хойш түүнд зарим зүйлс амаргүй байгаа байх. Гэрээний шинэ саналаа бид түүнд хүргүүлсэн. Хэрэв Дибала үүнийг зөвшөөрвөл Европын хамгийн өндөр цалинтай топ 20 тоглогчдын нэг болно. Би түүнээс хариуг нь хүлээж байна. Ялангуяа талбай дээрх хариултыг нь. Бид түүнийг Европын Топ 5 тоглогчдын нэг байгаасай гэж хүсэж байгаа. Тэр энэ түвшинд хүрээгүйгээ өөрөө мэднэ”

Дээрх өндөр цалинтай саналыг Ювентус Дибалаг 7 сард Сери А-гийн MVP-гээр нэрлэгдэхээс өмнө хүргүүлсэн. Харин Дибала болон түүний агент Хорхе Антун нар жилийн 15 сая евро (одоо жилийн 13-г авч байгаа)-г хүсэж байгаа гэж зарим хэвлэлүүд бичсэн.

Хэрэв хоёр тал тохиролцоонд хүрч чадахгүй бол Дибала 2021 оны өвөл эсвэл зун өөр баг руу явж магадгүй. Роналдуг ирснээс хойш түүний багт гүйцэтгэх үүрэг бага багаар хуримдаж байгаа. Пол Погба 2021 оны зун Туринд эргэн ирж Дибала Манчестер Юнайтед руу зөрөөд явна гэсэн цуу яриа хөлбөмбөгийн сайтуудаар үзэгдэж эхэлсэн.

Одоо 27 настай Дибала Палермод тоглож байхдаа олон нийтэд танигдаж улмаар 2015 онд Ювентуст өндөр хүлээлт үүсгэн ирсэн. Ювентус түүний төлөө 32 сая евро төлж, 5 жилийн гэрээ байгуулан Пирлогийн үлдээсэн 21 дугаарыг өгч байлаа.

Жанлуижи Буффон

Хүндэт 17 настай Жанлуижи,
Эрээнтэй бараантай амьдралын олон даваа нугачааг туулж, олон алдаа эндэл гаргасан 41 настай нэгэн эр энэ захидлыг чамд бичиж сууна.

Чамд дуулгах сайн болон муу мэдээ надад байна.
Би чамтай чиний сэтгэл зүрхний чинь тухай ярилцмаар байна.
Тийм ээ, чиний зүрх. Итгэнэ үү байна уу өөрөө мэд. Чамд тийм зүйл байгаа.

Муу мэдээнээс нь эхэлье. Чи одоо 17 настай. Жинхэнэ хөлбөмбөгч болох гээд хөл чинь газар хүрэхгүй явж байгааг би мэдэж байна. Яг мөрөөдөж байсан шигээ. Чи өөрийгөө том эр хүн болчихсон, бүхнийг ойлгоод мэдчихсэн гэж бодож байгаа. Гэхдээ юу гээч найз минь, чамд мэдэх юм түй ч байхгүй.

Хэдхэн хоногийн дараа чи Сери А-гийн анхны тоглолтоо Пармагийн өмсгөлтэй хийнэ. Айна эмээнэ гэдгийг мэдэхгүй 17-той жаал.
Уг нь чи орой нь гэртээ харьж халуун сүүгээ уугаад л орондоо орох ёстой. Гэтэл чи яана гээч? Примавера (өсвөрийн баг)-гийн найзтайгаа хамт шөнийн клуб орно.

Мэдээж чи ганцхан пиво л ууна биздээ?
Үгүй чи тэгэхгүй. Чи хэтрүүлнэ. Шугам давна. Чи киноны дүрд тоглоно. Чанга залуу.

Хэцүү дарамттай нөхцөл байдалд орохоороо чи ихэнхдээ ингэж авирладаг. Яагаад ингэдэг гэдгээ ч мэддэггүй. Нэг их удалгүй чи баарны гадна гарчихсан цагдаа нартай шөргөөцөлдөөд зогсож байна. Шөнийн нэг цагт шүү.Зүгээр л гэртээ харь жаалаа. Орондоо ор.
Тэгээд гуйж байна. Битгий л цагдаагийн машины дугуй руу шээж үзээрэй. Цагдаа нарт тэр үйлдэл чинь таалагдахгүй. Клубын удирдлагад чинь ч гэсэн. Бүтээж босгосон бүхнээ чи энэ мунхаг үйлдлээрээ нөгмөсөн нураах дөхнө.

Ийм утгагүй, ухаангүй бодлогогүй үйлдлийг чи заримдаа ямар ч шалтгаангүй хийдэг. Дотор чинь ямар нэг юм шатаж, нэг л мэдэхэд чи хийчихсэн байдаг.

Хүчирхэг, өөрийнхөөрөө, баригдмал биш гэдгээ чи багийнхандаа харуулж байна гэж бодох боловч үнэндээ тийм биш. Энэ бол ердөө л чиний өмсөж байгаа баг.

Хэдхэн хоногийн дотор чи үргэлж хүсдэг байсан гурван зүйлээ өөрийн болгоно. Гэхдээ хүссэн юм хүзүүгээр татна гэдэг үг байдгийг санаарай. Юм болгон хоёр талтай.

Дурласан зүйл чинь чиний дайсан ч болж болно.
Мөнгө, алдар нэр тэгээд чиний мөрөөдлийн ажил.
Энэ гурав гэнэтхэн л атганд чинь ороод ирнэ.
Айж сандраад байх аюултай юм энд юу байна гэж чи бодож байгаа байх?

Парадокс гэж сонсож байсан уу? Тэгвэл одоо чи мэднэ.
Тиймээ, хаалгач өөртөө итгэлтэй байх хэрэгтэй.
Арслангийн зүрхтэй байх ёстой. Айдас эргэлзээ үгүй.
Ур чадвар сайтай хаалгач уу эсвэл улаан галзуу зоригтой хаалгач уу гэж асуувал ямар ч дасгалжуулагч тэр солиотой зоригтой новшийг эргэлзээгүй сонгоно гэдэгт би итгэлтэй байна.
Гэтэл юу гээч. Хүн хэтэрхий их зоригтой болоод ирэхээрээ хэн гэдгээ мартчихдаг юм. Тэд оюун бодлоо огоордог. Сэтгэл зүрх нь сэмэрдэг. Хөлбөмбөгөөс өөр юм бодохгүй ингэж нихилист амьдарвал яваандаа сүнс чинь сарниж алга болж эхэлнэ.
Эцэст нь сэтгэл гутралд идэгдэж орноосоо ч босох тэнхэлгүй хүн дүрстэй сүг болно.
Инээ инээ. Чамд одоо инээдтэй санагдах нь аргагүй. Гэхдээ санаж аваарай. Яг ийм зүйл чамд тохиолдоно. Тэгээд хэзээ гээч. Ид залуу насан дээр чинь.

Амьдрал, карьерын дээд оргилд гарсан үед чинь. Чи Ювентусын үндсэн хаалгач. Бас Италийн шигшээ багийн номер нэг. Амьдралаас хүсэж болох бүхнээ өөрийн болгосон байхад чинь тохиолдоно.
Чамд мөнгө байна. Хүндлэл байна. Хүмүүс чамайг бүр Супермэн гэж дуудна.
Гэхдээ чи Супермэн бишээ. Чи бусадтай л адилхан мах цуснаас бүтсэн хүн. Хүн хүндээ бүр эмзэг нэгэн. Энэ ажил, мэргэжлийн спорт, хүнийг робот болгож хувиргадаг. Нэгэн хэвийн хэвшмэл амьдралдаа хүлэгдэж хүн хоригдол нь болдог.
Бэлтгэлдээ явна. Гэртээ ирнэ. Зурагт үзнэ. Унтана. Маргааш нь ахиад давтагдана. Чи ялна. Эсвэл ялагдана. Маргааш нь ахиад л бэлтгэл.
Нэг өглөө босоод бэлтгэлдээ явах гэтэл хөл чинь өөрийн мэдэлгүй чичирч эхэлнэ. Ямар ч хяналтгүй. Хамаг бие чинь сульдаж бүр машинаа ч барих тэнхэлгүй болно.
Ядаргаа эсвэл ханиад хүрснээс болсон байх гэж бодоод тоохгүй байх чинь буруу. Учир нь нөхцөл байдал илүү дордоно. Унтаад л баймаар санагдана чамд. Өөр юу ч хиймээргүй. Орноосоо ч босмооргүй. Юм ч идмээргүй.
Бэлтгэл дээр ганц хаалт хийх гэж чи хамаг эд эс, булчин шөрмөсөө хүчлэхээс өөр аргагүйд хүрнэ. Бүхэл бүтэн долоон сар. Долоон сар чи ийм байдалтай байна. Энэ хугацаанд чиний амьдралд аз жаргал, баяр баяслын үртэс ч байхгүй. Үзэхийн ч төдий.
Энэ хүргээд түр завсарлая хоёулаа.
Учир нь үүнийг уншаад толгойд чинь ямар бодол төрж байгааг би мэдэж байна.
Чи бодож байгаа. “Юу гэсэн үг вэ? Байж боломгүй юм. Би чинь өөдрөг зантай. Төрөлхийн лидер. Ювентуст тоглоод сая саяыг олж байгаа юм бол амьдрал минь ийм байх боломжгүй. Юуны чинь сэтгэл гутрал вэ?”
Тэгвэл би чамаас нэг чухал асуулт асууя. Чи яагаад амьдралаа хөлбөмбөгт зориулахаар шийдсэн юм, Жижи? Санаж байна уу?
Тома Н’Коногоос болсон л гэж битгий хэлээрэйдээ. Тэрнээс илүү гүн зүйл бий. Ахиад сайн бод. Хором мөч бүхнийг эргэн сана. Дурсамжаа онгич.

Чи 12 настай байсан.
1990 оны Дэлхийн аварга. Тийм. Италид болсон.
Сан Сирод явагдсан Аргентин – Камеруны нээлтийн тоглолт. Тийм.
Тэр тоглолтын үеэр чи хаана, юу хийж байлаа? Нүдээ ань. Төсөөл. Чи зочны өрөөндөө сууж байна, ганцаараа. Найзууд чинь хаачсан юм? Нөгөө хаа ч явсан салдаггүй найзууд чинь. Санахгүй байна аа.
Эмээ чинь гал тогоонд өдрийн хоол хийж байна. Үдийн нар шарж байсан ч гэсэн эмээ чинь бүх цонхоо хаагаад битүүлчихсэн. Яагаад юм бүү мэд. Өрөөнд хав харанхуй. Ганцхан зурагтны шар гэрэл л цацарна.
Чи юу харж байна?
Өмнө нь огт сонсож байгаагүй хачин орны нэр. КАМЕРУН.
Камерун гэж хаана байдгийг чи мэдэхгүй. Ийм газар байдгийг одоо л мэдэж байна. Мэдээж чи Аргентинийг мэднэ. Марадона. Батиста.
Гэхдээ л Камеруныханд нэг тийм ид шидийн гэмээр онцгой зүйл байв. Юу гэдгийг нь чи мэдэхгүй. Зуны халуун нар шатаж байхад хаалгач нь бүр өмд цамцтайгаа. Халууцаж байгаа ч юм алга. Урт хар өмдтэй. Ягаан захтай урт ногоон цамцтай. Хөдөлж байгаа, үсэрч байгаа, өөртөө итгэлтэй байгаагий нь. Живэр сахал нь зохисон гэж жигтэйхэн.
Нэг тийм сэтгэл зүрх соронзодсон зүйл түүнд байв. Хэлж тайлбарлахын аргагүй.
Чиний харж байсан хамгийн тасархай залуу.
Тома Н’Коно гэж нэрийг нь тайлбарлагч дурдахад чи амандаа давтан хэлнэ.
Тэгээд ид шид.
Аргентинийг булангийн цохилт хийхэд Тома үсэрч очоод бөмбөгийг агаарт 25 метр хол хатгав. Итгэмээргүй.
Яг энэ мөчид л чи үлдсэн амьдралдаа юу хийхийг хүсэж буйгаа мэдсэн.


Чи зүгээр ч нэг хаалгач болохыг хүсээгүй.
Яг л Тома шиг хаалгач болохыг хүссэн.
Эрх чөлөөтэй, эрэлхэг, эрэмгий, дайчин.
Энэ тоглолтын минут секунд бүрээр чи өөрийгөө олсон. Хэн гэдгээ мэдэрсэн. Чиний амьдрал нүдний чинь өмнө бичигдэж байв. Камерун гоол оруулж тэргүүлж эхлэхэд чи тэднийг гоол алдчих вий гэхээс байж ядан бачимдсан.
Зүрх чинь амаар чинь гарах шахна. Амьсгал чинь давчдана.
Орноосоо чи үсэрч буугаад хоёрдугаар хагасыг зурагтны урдуур холхиж өнгөрүүлнэ. “Гоол л битгий алдаасай” гэж чи залбирна. Сүсэглэнэ. Камеруны хоёр дахь тоглогч улаан авч хөөгдөхөд чи бүр орох байх газраа олж ядна.
Тоглолтыг үзэх нь байтугай сонсох ч тэнхэл чинь хүрэхгүй.
Тэгээд сүүлийн таван минутыг зурагтны ард солиотой юм шиг суугаад өнгөрүүлнэ. Дууг нь хаачихсан. Хэдэн секунд болоод л урагшаа өнгийж юу болж байгааг харчихаад буцаад сууна.
Тэгээд нэг хартал Камеруныхан нэгнээ тэврэн баярлаж байв. Тийм ээ. Чи шууд л гадагшаа гүйж хараад таарсан эхний хүүхдээсээ асууна.
“Камеруныг харсан уу? Тэдний яаж хожсоныг харсан уу?”
Чамтай адилхан Камеруны фэн болчихсон хоёр ч хүүхэд байв. “Тийм ээ. Камерун урагшаа”
Тэр өдөр чиний дотор гал бий болсон. Дүрэлзэх цаг нь болоогүй ч бөхөхөөргүй баттай ассан гал. Камерун гэж байдаг юм байна. Тома Н’Коно гэж байдаг юм байна
Тэгвэл одоо би дэлхийд Буффон гэж байдгийг харуулна. Батална.
Энэ л чиний хөлбөмбөгч болсон шалтгаан. Мөнгө, алдар нэр, автомашин биш.
Тома Н’Коно.
Түүний айдасгүй, өөрийнхөөрөө, өвөрмөц байгаа байдал. Түүний зүрхэн дэх гал. Чи галыг нь харсан. Тэгээд өөртөө бас асаахыг хүссэн. Нэг юмыг санаж яв. Мөнгө, нэр алдар гол зорилго биш.
Хэрэв чи зүрх сэтгэлээ зоргонд нь хаяж, хөлбөмбөгөөс өөр зүйлээс урам зоригийг эрж хайхгүй бол уруудна.
Эргэн тойрныхоо орчлон ертөнцийг сониуч нүдээр харж бай. Залуу байгаа дээрээ. Энэ л миний чамд өгөх зөвлөгөө. Ийм байвал чи өөрийгөө болоод гэр бүлээ зовоохгүй байж чадна. Ядаж л зүрхийг нь шархлуулахгүй.
Хаалгач хүн хатан зоригтой байх хэрэгтэй. Үнэн.
Гэхдээ энэ чинь их зантай, үл тоомсорлогч бай гэсэн үг биш, Жижи.
Сэтгэл гутралын ангалд байхад чинь хачин хэрнээ гайхалтай зүйлс чамд тохиолдож эхэлнэ. Нэг өглөө чи тогтсон замаасаа гажиж, Турины очиж байгаагүй дүүрэгтээ, орж байгаагүй ресторандаа хоол идэхээр шийднэ. Зам мурийна. Тэгж явахдаа чи урлагийн музейн дэргэдүүр өнгөрнө. Өлгөсөн зарлал нь анхаарлыг чинь татна.
“ШАГАЛ”
Түүний хэн болохыг чи мэдэхгүй. Үнэндээ урлагийн талаар мэдэх зүйл чамд огт үгүй.
Гэхдээ юу гээч Жижи…
Чамд хийх ажил, мэдэх зүйлс байгаа.
Чи өөрийгөө олох замдаа явж байна.
Чи бол Буффон.
Гэхдээ Буффон гэж хэн юм?
Чи үнэндээ хэн юм бэ?
Чи өөрийгөө мэдэх үү?

Энэ бол захидлын минь хамгийн чухал хэсэг. Тэр өдөр тэр музей рүү чи ороx ёстой. Амьдралыг чинь бүхэлд нь өөрчлөх шийдвэрээ гарга.
Хэрэв музей рүү оролгүй, хөлбөмбөгчний амьдралаа цааш үргэлжлүүлбэл, супермэн чигээрээ үлдвэл, сэтгэл зүрх чинь торонд хоригдсон чигтээ зэвэрч, хэн гэдгээ чи хором хормоор мартана.
Харин дотогш орвол хана дагуу өлгөсөн Шагалын зуу зуун зургийг үзэх болно. Цэнхэр, ногоон, улаан өнгөнүүд. Гэхдээ ихэнх нь чамд онцгой сэтгэгдэл төрүүлэхгүй. Зарим нь сонирхолтой, зарим нь уйтгартай, зарим нь ойлгомжгүй.
Тэгж алхаж яваад нэг зурагны өмнө чи зог тусан зогсоно. Тэр мөчийг чи хэзээ ч мартахгүй. Хамаг бие чинь халуу дүүгж, амьсгаа чинь дээрдэнэ. Яг л аянганд цохиулсан мэт.
Зургийн нэр. “Алхсан нь”
Эрэгтэй, эмэгтэй хоёр цэцэрлэгт хүрээлэнд зугаалж байна. Эргэн тойронд нь мод. Цаана нь байшингууд. Гэхдээ энгийн нэг салхилалт биш. Ид шидийн зугаалга. Эмэгтэй нь тэнгэр өөд яг л сахиулсан тэнгэр мэт нисэж харин эрэгтэй нь гарыг нь атган газар дээр зогсож байна. Хоёул инээмсэглэнэ.
Яг л зүүд мөрөөдөл шиг. Хир буртаггүй хүүхдийн төсөөлөл шиг.
Энэ зураг зүрхэнд чинь булагдсан нэгэн зүйлийг амь оруулна. Улирч одсон хүүхэд насны чинь мэдрэмж. Илүү дутуу зүйлгүй энгийн л аз жаргал.
Тома Н’Коно бөмбөгийг 25 метр хол хатгахад төрсөн мэдрэмж.
Эмээ чинь гал тогооноос “Хоолоо идээрэй” гэж дуудахад төрсөн мэдрэмж.
Сүүлийн шүгэл хурдан дуугараасай гэж харанхуй өрөөнд зурагтны өмнө залбирч байсан мэдрэмж.
Цаг хугацааны явцад бид энэ мэдрэмжээ мартаж, харах өнцөг маань өөрчлөгддөг.
Музей рүү маргааш өдөр нь ч гэсэн бас очоорой. Мартаж болохгүй шүү.
“Өчигдөр чи үзчихээгүй билүү?” гэж тасалбар түгээгч тохуурхаж асуусан ч хамаагүй. Бүү тоо. Дотогш ор.
Энэ зурагнаас чи аз жаргалыг олох болно. Бас амар амгаланг.
Сэтгэлийн дарамтыг чинь нимгэлэх үүнээс илүү сайн эм гэж үгүй. Үзэх тоолондоо цээж чинь хөнгөрч, зурган дээрх бүсгүйтэй адил өөдөө, тэнгэр лүү, хөөрч буйгаа чи мэдэрнэ.
Заримдаа би боддог юм. Бидэнд зориулагдсан заяа тавилан, хувь төөрөг гэж байдаг байх. Хоорондоо холбоотой мэт хэлж тайлбарлахын аргагүй олон сайхан зүйлс амьдралд тохиолддог. Үл үзэгдэх шижмээр холбогдсон. Энэ бол тэдний нэг.
Пармагийн залуу тоглогч байхдаа чи нэг бодлогогүй алхам хийнэ. Үлдсэн амьдралд чинь арилшгүй хар толбо болон үлдэх ухамсаргүй үйлдэл. Нэг том тоглолтын өмнө чи өөрийгөө зоригтой, хүчирхэг, манлайлагч гэдгээ бусдад харуулахын тулд өмсгөл дээрээ ингэж бичнэ.

“Хулчгаруудад хутганы ир”


Дунд сургуульд байхдаа чи энэ үгийг анх ширээн дээр сийлсэн байхыг харсан.
Чамд энэ үг дайн тулааны уухай шиг санагдсан.
Гэтэл үнэндээ хэт-баруунтан фашистуудын уриа болохыг нь чи мэдээгүй.
Энгэр дээрээ ингэж бичсэнээрээ чи өөртөө болоод гэр бүлдээ асар их асуудал дагуулна. Шүүмжлүүлнэ. Сүрдүүлэгдэнэ.
Гэхдээ зүгээрээ. Хүн л болсон хойно алдаж эндэлгүй яах вэ. Харин гаргасан алдаанаасаа суралцаж төлөвших хэрэгтэй.
Алдаа бол “Чи болоогүй байна” гэсэн амьдралын сургамж. Сануулга.
Чамд ийм ухамсрын шанаа хэрэгтэй. Учир нь мэргэжлийн хөлбөмбөг хүнийг амархан өөрчилдөг. Өөрийгөө өргөмжилж, бусдаас онцгой гэж бодоход хүргэдэг. Чи тийм биш. Баарны зөөгч, байрны чинь цахилгаанчин чамаас ямар ч ялгаа байхгүй. Адилхан л амьдралын төлөө явж байгаа хүмүүс.
Ийм нүдээр ертөнцийг харж эхэлсэн өдрөө чи ахин төрнө. Чи тэдэнтэй насан туршийн найзууд болно.
Хорвоо дээр хүн болгон ижил. Хэнийг ч бүү өргөмжил бас хэнийг ч бүү басамжил. Энэ хандлага чамд зүг чигээ олоход чинь тусална. Сэтгэл гутралыг чинь ч эмчилнэ. Яг одоо чамд үүнийг ойлгоход ярвигтай санагдаж байгааг мэдэж байна. Гэхдээ санаж яв. Сул талаа хүлээн зөвшөөрч, дүр эсгэж далдлахгүй байна гэдэг л жинхэнэ зориг.
Амьдралын бэлгийг чи авах эрхтэй. Жижи. Бусадтай л адил. Үүнийг бүү мартаарай.
Орчлон ертөнц гэдэг хачин шүү. Бүх юм хоорондоо хэлхэлдэж холбогдсон байдаг. Бидний мэдэхгүй жимээр. Үүнийг ойлгох нас чинь одоохондоо ирээгүй байна. Цаг нь ирэхээр өөрөө тунгаана биз.
Ганцхан юманд л би харамсаж явдаг. Энэ бүхнийг арай эрт ухаарахгүй яавдаа гэж. Магадгүй энэ л Буффоныг Буффон болгодог зүйл байх. Туулсан зам нь л хүнийг хэн бэ гэдгийг тодорхойлдог шүү дээ. Эцсийн эцэст.
Дотор чинь дүрэлзэх гал 41 насанд чинь ч унтрахгүй гэдгийг амлаж байна, Жижи. Төөнөсөөр байх болно.
Чи сэтгэл ханахгүй. Тайвшрахгүй. Дэлхийн аваргын цомыг өргөсөн ч гэсэн илүү ихийг хүснэ.
Нэг ч гоол алдалгүй бүтэн улирлыг өнгөрүүлэх мөнхийн зорилгодоо тэмүүлсээр л байх болно. Биелэхэд хэцүү. Гэхдээ л урагшлах хүч өгөхөд хангалттай. Хэний ч хүрээгүй оргил руу чи үргэлж хараагаа бэлчээсээр ирсэн. Чи хэзээд ийм л байсан. Иймээрээ л дуусна.
Удинед байдаг авга ахындаа зочилсон анхны өвлөө санаж байна уу? Эсвэл үүнийг зөвхөн уйтгар гунигаар дүүрэн 41 настай эр л эргэн дурсах ёстой гэж үү?
Чи дөрвөн настай байсан. Хэзээ ч цас харж байгаагүй. Тэгээд өглөө сэрээд хөшгөө нээтэл юу байлаа?
Цав цагаан. Үлгэрийн орон. Зүүд мөрөөдөл.
Чи орноосоо үсэрч буугаад унтлагын хувцастайгаа шууд л гадагшаа гүйж гарсан. Цас гэж юу болохыг ч чи мэдээгүй. Гэхдээ гайхсан уу? Үгүй. Бодсон уу? Үгүй. Хүрмээ өмссөн үү? Үгүй.
Шууд л цасан овоолго руу үсрээд л орчихсон.
Ямар ч айдасгүй. Ямар ч эргэлзээгүй.
“Жанлуижи!!!!!! Буцаад ир! Хүрмээ өмс!”
Эмээгийн чинь дуу хадна.
Чи нов нойтон. Дүүрэн цас.
Цалгисан инээд.
Дараа нь чи долоо хоног халуурсан.
Гэхдээ ямар хамаа байна.
Хэнд хамаатай юм. Шууд л цас руу үсэр.
Энэ бол жинхэнэ чи.
Чи бол Буффон.
Чи дэлхий ертөнцөд байдаг гэдгээ харуулна.

2019.10.14 Эх сурвалж: The Players Tribune

Дель Пьеро, Де Росси, Вьери дасгалжуулагч болно

Бидний танил нэгэн цагийн Италийн цуут хөлбөмбөгчид дасгалжуулагч болохоор суралцаж байна. Алессандро Дель Пьеро, Даниеле Де Росси, Массимо Маккароне, Риккардо Монтоливо, Жампаоло Паццини, Кристиан Вьери гэсэн нэрс УЕФА-гийн А зэрэглэлийн дасгалжуулагчийн курст бүртгүүлээд байна.

Коверчиано (Флоренц) дахь Италийн Хөлбөмбөгийн Холбооны бэлтгэлийн төв баазад энэхүү сургалт явагдаж байгаа юм. 12 сар үргэлжлэх энэ курсын дараа амжилттай суралцагчид УЕФА-гийн А лицезтэй болж Европын аль ч дээд лигийн багийг удирдах эрхтэй болно.

Экс Ромагийн тоглогч Де Россид энэ зун олон багаас ажлын санал авсан ч зохих бичиг баримт байгаагүй учир хүлээж аваагүй. Энэ оны эхээр тэр Аргентиний Бока Хуниорст тоглож байгаад зодог тайлсан. Түүнтэй хамт 2006 онд Дэлхийн аварга болсон Италийн тоглогчдоос Пиппо Инзаги (Беневенто), Андреа Пирло (Ювентус), Женнаро Гаттузо (Наполи) нар аль хэдийн Сери А-д ажиллаж байгаа.

Дээрх экс тоглогчдоос гадна Федерико Бальзаретти, Иньяцио Абате, Давид Писарро, Алессандро Матри, Андреа Коста, Жанлука Курчи, Даниеле Гастальделло нар уг курст хамрагдаад байна.

Криштиану Роналду 21.6 сая ам.долларын торгууль төлнө

Италийн “Ювентус” клубийн довтлогч Криштиану Роналду Испанийн шүүхээс ял сонслоо.

Испанийн шүүхээс К.Роналдуг татвараас зугтсан хэрэгт нь 23 сарын ял оноолоо. Гэхдээ Испани улсын хуулиар хоёр жилээс бага хугацаанд ял авсан бол мөнгөн торгууль оноож, тэнсэн харгалзах ял руу шилжүүлдэг билээ. Тиймээс К.Роналду эрх чөлөөтэй хэвээр байх аж.

К.Роналдугийн татвараас зугтсан гэх хэрэг түүнийг “Реал Мадрид”-д 2010-14 оны хооронд тоглож байхад эхэлсэн гэж үздэг. Түүнийг дээрх хугацаанд олсон орлогодоо татвар төлөхөөс зайлсхийж, гадаадын татвар бага авдаг бүс нутгуудад мөнгөө байршуулсан, бага татвар төлөхийг оролдсон гэж буруутгасан юм.

Испани хэлээр мэдээлэл түгээдэг EFE мэдээллийн агентлагийн мэдээлснээр бол К.Роналду гадаадын дөрвөн банкинд байршуулсан нийт 5.7 сая евро бүхий дөрвөн хэргийг хүлээн зөвшөөрсөн гэнэ.

К.Роналдугийн шүүх хурал 15 минут үргэлжилж, нэрт хөлбөмбөгчин буруутай гэдгээ хүлээн зөвшөөрсөн бичигт гарын үсэг зураад гарчээ.

“Реал Мадрид”-ын хагас хамгаалагч асан Шави Алонсо энэ долоо хоногт шүүхэд дуудагдсан юм

Испанийн татварын асуудлаар шүүхийн хаалга татаагүй хөлбөмбөгчин хүн олон. Энэ долоо хоногт К.Роналдугаас гадна “Реал Мадрид”-д зүтгэж байсан Шави Алонсо мөн хуулийн өмнө буруутай эсэхээ хэлэлцсэн. Ш.Алонсог ойролцоогоор хоёр сая еврогийн татварын асуудалд буруутгасан юм. Тэднээс гадна Лионель Месси, Нэймар, Марсело нарын алдартнууд татвараас зугтсан асуудлаар шүүхийн хаалга татаж байв.

Криштиану Роналдугаас днк шинжилгээ шаардав

Италийн “Ювентус” клубийн довтлогч Криштиану Роналдуг 2009 онд америк бүсгүй Кэйтрин Майорга хэмээх бүсгүй өөрийг нь хүчирхийлсэн хэмээн буруутгасан. Энэ хэргийг Лас Вегас хотын цагдаагийнхан өнгөрсөн онд хохирогчийн хүсэлтээр сэргээж, шалгаж эхэлсэн юм.

Энэ явдалд К.Роналдугийн хуулийн зөвлөх Петер Кристиансен гайхсангүй. Тэрбээр цагдаагийнхан хуулийн дагуу мөрдөх ажиллагаа явуулж байгааг онцлоод өөрийн үйчлүүлэгчээ буруугүй гэдгийг тодотгосон юм. Кэйтриний хэрэг явдал намжиж амжаагүй байтал К.Роналдутай холбогдсон өөр нэгэн бүсгүй гомдол мэдүүлжээ. Их Британийн модель Жасмин Леннард хэмээх бүсгүй өөрийн цахим хуудсаар дамжуулан Кэйтринийг дэмжиж байгаагаа илэрхийлээд К.Роналдуг “өрөвдөх сэтгэлгүй, араатан” гэж бичсэн нь олны анхаарлыг татав.

Их Британийн модель Жасмин Леннард

Жасмин Леннард удалгүй өөрийн твиттерээ устгасан ч К.Роналду энэ явдлыг зүгээр хараад өнгөрөхгүй бололтой. Тэрбээр худал доромжлол хэмээгээд энэ явдлыг хуулийн дагуу шийдвэрлэнэ гэж ярьжээ. К.Роналду, модель, реалити шоуны од Ж.Леннардтай 10 жилийн өмнө холбоотой байсан. Гэхдээ тэдний хооронд амрагийн харилцаа байсан эсэх нь одоогоор тодорхойгүй асуудал. Харин К.Роналдугийн хуульчид сүүлийн 18 сарын хугацаанд Ж.Леннард эсвэл өөр хэн нэгэнтэй холбогдоогүй. Энэ бол ор үндэслэлгүй худлаа мэдээлэл гэж мэдэгджээ. Ж.Леннард сүүлийн 18 сарын хугацаанд К.Роналдутай холбоотой байсан гэж хэвлэлд ярилцлага өгсөн удаатай.

Златан Ибрагимович Итали руу буцах уу

“Лос Анжелес Галакси” багийн довтлогч Златан Ибрагимович Италийн “АС Милан” баг руу буцаж магадгүй бололтой. Хоёр тал хугацааны асуудлаар тохиролцчихвол гэрээ байгуулахад ойртсон гэнэ.

Италийн хэвлэлүүд болон Туринд төв нь байрладаг “Tuttosport” сонины мэдээлснээр “АС Милан” клубийн удирдлагууд өдгөө 37 настай швед довтлогчид зургаан сар гэрээ байгуулах санал тавьсан бол З.Ибрагимович 18 сарын гэрээ байгуулах хүсэлтэй байгаа аж.

Түүнчлэн жилийн 1.5 сая еврогийн цалин амласан гэх мэдээлэл байгаа юм.

Ахмад довтлогчийг ганцхан Итали руу буцах тухай цуу яриа тархаагүй. Английн “Манчестер Юнайтед” клуб ч буцааж авчрахыг хүсч байгаа тухай яриа бий.

Ямартай ч АНУ-ын хөлбөмбөгийн улирал дуусч байгаатай холбогдуулан З.Ибрагимович Европ тив руу буцах бололтой. Тэрбээр өнгөрсөн гуравдугаар сард “Лос Анжелес Галакси” багт ирж, MLS-т 27 тоглолтод оролцоод 22 гоол оруулсан. Харамсалтай нь, “Лос Анжелес Галакси” клуб хасагдах шатанд шалгарч чадаагүй юм. Гэхдээ түүний нэр Уэйн Рунигийн хамтаар MVP буюу улирлын үнэ цэнэтэй тамирчны шагналд нэрлэгдэж байгаа билээ.

Криштиану Роналду Германы сэтгүүлийг шүүхэд өгнө

Германы “Der Spiegel” сэтгүүл нэрт хөлбөмбөгчин Криштиану Роналдуг америк бүсгүй Кэйтрин Маяоргаг хүчиндсэн, үүнийгээ нуухын тулд хохирогч бүсгүйд мөнгө өгч, өгсөн гэх мэдээлэл цацаж, багагүй дуулиан тарьсан билээ. Энэ хэрэг 2009 онд Лас Вегасын зочид буудалд болсон гэж тэд мэдээлсэн юм.

Харин К.Роналду өөрийн 142 сая дагагчтай инстаграм хуудсаараа дамжуулан энэ бүхэн худал мэдээлэл гэж няцаагаад сэтгүүлчид миний нэрийг ашиглах явдал их байдаг. Энэ бол тэдний ажил, үүнд санаа зовохгүй байна гэх мэтээр тайлбар өгчээ.

Гэхдээ нэрт хөлбөмбөгчний хуулийн баг Герман сэтгүүлийг зүгээр өнгөрүүлэхгүй гэнэ. Тэд хэрээс хэтэрсэн энэ үйлдэлд гомдол мэдүүлж, шүүхэд хандахаар төлөвлөж байгаагаа зарлажээ.

Сэтгүүлд бичсэнээр бол уг хэрэг 2009 оны зургадугаар сард Испанийн “Реал Мадрид” клуб АНУ-д аялан тоглолт хийх үеэр болсон бололтой. Лас Вегасын нэгэн зочид буудалд тоглогчид наргисан бөгөөд тэр үдэш К.Роналду хохирогч гэх бүсгүйтэй нэг өрөөнд орсон гэнэ. Энэ үеэр бүсгүйд хүч хэрэглэж, үйл явдал болоод өнгөрсний дараа дуугүй байхаар тохиролцож, 375 мянган “ногоон” өгсөн гэнэ.

Харин К.Роналду тэр бүсгүйтэй холбоотой гэдгээ хүлээн зөвшөөрсөн ч энэ бол тохиролцсон харилцаа байсан гэж тайлбарласан бололтой. Хохирогч бүсгүй тухайн үед цагдаад хандаж, гэмтлийн зэргээ тогтоолгосон ч дараа нь олон нийтэд дэлгэхээс ичиж, тохиролцохоор шийдсэн гэж тайлбарласан байна. Америк бүсгүй гомдлоо дахин сэргээж, Невадагийн шүүхэд гомдол гаргасан талаар Германы сэтгүүл онцолжээ.

К.Роналду нэг тоглолт өнжинө

Дэлхийн шилдэг хөлбөмбөгчин Криштиану Роналду Италийн “Ювентус” клубт Аваргуудын лигийн эхний тоглолтоо Испанийн “Валенсиа” багийн эсрэг хийсэн тоглолтод өрсөлдөгч багийн тоглогчийн толгойд хүрсэн хэргээр улаан хуудас авч, талбайг чөлөөлсөн билээ. Тэгвэл холбооны хяналтийн зөвлөл түүнийг нэг тоглолт өнжих “ял” оноожээ. Ингэснээр ирэх аравдугаар сарын 2-нд Швейцарийн “Янг Бойс” багтай хийх тоглолтод оролцохгүй ч Английн “Манчестер Юнайтед”-ийн эсрэг тулаанд португал довтлогч талбайд гарах боломжтой боллоо.

Өдгөө 33 настай К.Роналду Аваргуудын лигт анх удаа улаан хуудас авсан юм.

Аваргуудын лигт Английн Премьер лигээс ялгаатай нь улаан хуудас авсан тоглогч шууд гурван тоглолтоор хөөгдөхгүй. Улаан хуудас авсан үйлдэл бүрийг дараа нь хянаж үзээд тохирох шийтгэлийг оноодог дүрэмтэй.

 

Сери А-гийн хоёр тоглолт хойшлогдлоо

Италийн Женова хотод 50 жилийн настай Моранди гүүр нурж, үүний улмаас 39 хүн нас барсан эмгэнэлт явдал гарсан билээ.

Болсон үйл явдалтай холбогдуулан, өдгөө итали даяар гашуудал зарлаад буй. “Сампдориа” багийн ерөнхийлөгч Массимо Ферреро “RMC Sport”-д өгсөн ярилцлагадаа Сери А-гийн нээлтийн тоглолтоо хойшлуулах хүсэлтэй байгаагаа илэрхийлсэн. Тус клуб осол болсон Женова хотын багийн эсрэг тоглох хуваарьтай байсан юм.

Түүнчлэн “Фиорентина” болон “АС Милан”-ы тоглолтыг ч хойшлуулах хүсэлт тавьсан аж.

Тэгвэл Италийн Сери А-гийн удирдлагууд дээрх хоёр тоглолтыг хойшлуулах хүсэлтийг хүлээн авсан юм. Харин бусад тоглолт хэвийн үргэлжлэх бөгөөд бүх багийн тоглогчид нэг минут дуугүй зогсож, хүндэтгэлийн тууз зүүх гэнэ.

Морандигийн гүүр нь нэрт инженер Рикардо Морандигийн бүтээл бөгөөд түүний нэрээр нэрлэгдсэн. 1963-1967 оны хооронд барьж дуусгасан гүүр аж. Харин чухам юуны улмаас гүүр ийн нурсан болохыг тогтоохоор ажиллаж буй. Эх сурвалжийн таамаглаж байгаагаар бол гүүрэнд аль хоёр жилийн өмнөөс их засвар хийх шаардлагатай байсан ч тоогоогүй бололтой.

 

Криштиану Роналду “FIFA 19” тоглоомны ковер болов

Криштиану Роналду “FIFA 19” тоглоомны ковер болох нь тодорхой боллоо.

Шинэ улиралд Италийн “Ювентус” клубт зүтгэхээр болсон португал довтлогч болон Францын “ПСЖ” клубийн бразил тоглогч Нэймар нар видео тоглоомны зурагт хуудсыг чимэх аж. Гэхдээ Нэймарын хувьд “Аваргууд” хувилбарынх нь ковер болох юм.

К.Роналду өнгөрсөн жил “Реал Мадрид”-ын гишүүн байхдаа “FIFA 18” тоглоомны ковер болж байв.

“Ювентус” клубийн хувьд энэ улиралд 100 сая евро төлж, К.Роналдуг өөрийн болгосон. Энэ нь 30 ба түүнээс дээш насандаа ийм үнэ хүрсэн анхны, бас Италийн лигийн хамгийн үнэтэй наймаа болсон түүхтэй.



“FIFA 19” тоглоом өнөө жил Аваргуудын лиг, Европа лиг болон Супер цомын тэмцээнийг багтаасан юм.

Уг тоглоом ирэх есдүгээр сарын 28-нд худалдаанд гарах аж.