Category: Хөлбөмбөг

Катар 2022: Буурал тивийн сугалаа гарлаа

“Катар 2022” хөлбөмбөгийн ДАШТ-ий Европын хэсгийн урьдчилсан шатны сугалаа боллоо.

Хөлбөмбөгийн ДАШТ-д 32 баг оролцоно. Харин буурал тивээс 13 баг Катарыг зорих юм. Энэ эрхийн төлөө тус тивийн 55 баг өрсөлдөх юм. Тус бүр 10 хэсэгт хуваагдсан бөгөөд хэсгээ тэргүүлэгчид шууд эрхээ авна. Харин хэсэгтээ удаалсан 10 баг, хэсгээ тэргүүлж чадаагүй ч Үндэстний лигт хамгийн өндөр амжилт үзүүлсэн хоёр багийн хамтаар хасагдах шатанд өрсөлдөх учиртай. Тус 12 баг гурван хэсэгт хуваагдаад тэргүүлсэн баг нь ДАШТ-д оролцох аж.

Сугалаа

Катар 2022: Европын хэсгийн урьдчилсан шатны сугалаа
  • Group A: Португал, Серб, Ирланд, Люксембург, Азербайжан
  • Group B: Испани, Швед, Грек, Гүрж, Косово
  • Group C: Итали, Швейцарь, Хойд Ирланд, Болгар, Литви
  • Group D: Франц, Украин, Финланд, Босни ба Херцеговина, Казахстан
  • Group E: Бельги, Уэйлс, Чех, Беларусь, Эстони
  • Group F: Дани, Австри, Шотланд, Израиль, Фарерын арлууд, Молдав
  • Group G: Нидерланд, Турк, Норвеги, Монтенегро, Латви, Гибралтар
  • Group H: Хорват, Словак, ОХУ, Словен, Кипр, Малта
  • Group I: Англи, Польш, Унгар, Албани, Андорра, Сан Марино
  • Group J: Герман, Румын, Исланд, Хойд Македони, Армен, Лехтейнштен

Хуваарь

  • 2021.III: Тоглолт 1-3
  • 2021.IX: Тоглолт 4-6
  • 2021.X: Тоглолт 7-8
  • 2021.XI: Тоглолт 9-10
  • 2022.III: Хасагдах шат

ДАШТ хэзээ болох вэ?

Катарын ид халуунаас сэргийлж, хөлбөмбөгийн ДАШТ анх удаа өвөл болно. 2022 оны арваннэгдүгээр сарын 21-нд нээлтээ хийгээд арванхоёрдугаар сарын 18-нд өндөрлөнө.

Нийт 32 баг таван хотын найман цэнгэлдэхэд хүч сорих юм.

Алтан бөмбөг 2020: Бэлгэдлийн XI шалгаруулах санал хураалт эхэллээ

Монголын хөлбөмбөгийн холбооноос жил бүрийн арванхоёрдугаар сарын 12-нд “Алтан бөмбөг” шагнал гардуулах ёслолын ажиллагааг зохион байгуулдаг. Энэ жил цар тахлын улмаас тус үйл ажиллагааг цахим хэлбэрээр зохион байгуулах юм.

МХХ, SPS телевизтэй хамтран зохион байгуулах энэ арга хэмжээнд “Бэлгэдлийн XI” болон “Оны шилдэг гоол” тодруулах санал асуулга эхэлжээ.

Холбооны зүгээс энэ удаагийн санал асуулгыг онлайнаар явуулах болсон юм. “Бэлгэдлийн XI”-д 1:4:4:2 хувилбараар буюу нэг хаалгач, дөрвөн хамгаалагч, дөрвөн хагас хамгаалагч, хоёр довтлогч хувилбаар санал өгөх аж.

Уншигч та санал өгөхийг хүсвэл энд дарна уу.

Санал асуулгын эцсийн хугацаа энэ сарын 10-нд дуусна.

https://youtu.be/F7GGv1mk8DE
“Оны шилдэг гоол”-д нэр дэвшигчид

“Алтан бөмбөг” ёслолд тодруулах шагналууд:

  • Оны шилдэг эмэгтэй тоглогч
  • Оны шилдэг футзалын тоглогч
  • Оны шилдэг эрэгтэй багийн дасгалжуулагч
  • Оны шилдэг эмэгтэй багийн дасгалжуулагч
  • Оны шилдэг футзалын багийн дасгалжуулагч
  • “Алтан шүгэл” оны шилдэг шүүгч
  • Оны шилдэг гоол – олон нийтийн саналаар
  • Эрэгтэй “Бэлгэдлийн XI” тоглогч – олон нийтийн саналаар
  • МХХ-ны Ерөнхийлөгчийн нэрэмжит шагнал

Шилдэг эрэгтэй, эмэгтэй нэр дэвшигчдийг МХХ-ноос гаргасан ажлын хэсэг тухайн жилийн тамирчдын үзүүлсэн амжилтыг харгалзан гаргах юм. ШИЛДЭГ ЭРЭГТЭЙ хөлбөмбөгчин болон ШИЛДЭГ ЭРЭГТЭЙ БАГИЙН ДАСГАЛЖУУЛАГЧ тодруулахад 52 хүн оролцоно. Тодруулбал, Дээд болон Нэгдүгээр лигийн багийн ахлах дасгалжуулагч, багийн ахлагч нар, Спортын сэтгүүлчдийн холбоонд харьяалалтай, хөлбөмбөгийн талаар тууштай бичиж мэдээллэдэг 10 сэтгүүлч, МХХ-ны Техникийн захирал болон шигшээ багийн ахлах дасгалжуулагч нар оролцох аж. Харин ШИЛДЭГ ЭМЭГТЭЙ БАГИЙН ДАСГАЛЖУУЛАГЧ, ШИЛДЭГ ЭМЭГТЭЙ, ФУТЗАЛЫН ШИЛДЭГ тамирчинг тодруулахад 34 хүн санал өгнө.

Дель Пьеро, Де Росси, Вьери дасгалжуулагч болно

Бидний танил нэгэн цагийн Италийн цуут хөлбөмбөгчид дасгалжуулагч болохоор суралцаж байна. Алессандро Дель Пьеро, Даниеле Де Росси, Массимо Маккароне, Риккардо Монтоливо, Жампаоло Паццини, Кристиан Вьери гэсэн нэрс УЕФА-гийн А зэрэглэлийн дасгалжуулагчийн курст бүртгүүлээд байна.

Коверчиано (Флоренц) дахь Италийн Хөлбөмбөгийн Холбооны бэлтгэлийн төв баазад энэхүү сургалт явагдаж байгаа юм. 12 сар үргэлжлэх энэ курсын дараа амжилттай суралцагчид УЕФА-гийн А лицезтэй болж Европын аль ч дээд лигийн багийг удирдах эрхтэй болно.

Экс Ромагийн тоглогч Де Россид энэ зун олон багаас ажлын санал авсан ч зохих бичиг баримт байгаагүй учир хүлээж аваагүй. Энэ оны эхээр тэр Аргентиний Бока Хуниорст тоглож байгаад зодог тайлсан. Түүнтэй хамт 2006 онд Дэлхийн аварга болсон Италийн тоглогчдоос Пиппо Инзаги (Беневенто), Андреа Пирло (Ювентус), Женнаро Гаттузо (Наполи) нар аль хэдийн Сери А-д ажиллаж байгаа.

Дээрх экс тоглогчдоос гадна Федерико Бальзаретти, Иньяцио Абате, Давид Писарро, Алессандро Матри, Андреа Коста, Жанлука Курчи, Даниеле Гастальделло нар уг курст хамрагдаад байна.

Неймар “Месситэй ахиж хамт тогломоор байна”

Урьд шөнө Манчестер Юнайтедтэй хийсэн Аваргуудын лигийн тоглолтын дараа Неймар ийнхүү хэллээ. Бразил эрийн хоёр гоолын ачаар ПСЖ өрсөлдөгчөө 1:3-ээр талбайд нь буулган авсан юм. Үлдсэн нэг гоолыг нь Маркиньос оруулсан.

“Би Месситэй ахин хамт тоглохыг хүсэж байна. Үүнээс өөр хүсэх зүйл надад алга. Түүнтэй хамт тоглосон минут бүр маань надад сайхан байсан. Ирэх жил бид эргээд нэгдэнэ гэж найдаж байна” хэмээн 28 настай довтлогч ESPN-д ярьсан.

https://twitter.com/SiqueRodriguez/status/1334278717544259591

Томас Тухель дасгалжуулагчтай ПСЖ дээрх ялалтыг авснаар H хэсгээ 9 оноотой Юнайтедийн хамт тэргүүлж байна. Гэхдээ Лейпциг бас адил 9 оноотой учир сүүлийн тойргоос хэн нь энэ хэсгээс гарах нь шийдэгдэнэ.

Харин лигтээ бол тэд ойрын өрсөлдөгчдөөсөө хоёр онооны илүүтэй хүснэгт тэргүүлж байгаа. Неймар 2013 онд сүр дуулиантайгаар Барселонд ирж Месси, Суаресын хамтаар алдарт “MSN” довтолгооны гурвалыг бүрдүүлсэн юм.

Улмаар дөрвөн жилийн дараа ахин сенсаац дэгдээн дэлхийн хамгийн үнэтэй хөлбөмбөгч болон ПСЖ рүү шилжсэн билээ. Парист тэр лигийн түрүүг хангалттай олон удаа хүртсэн ч Аваргуудын лигт түрүүлэх хүсэл нь биелж амжаагүй байна. Энэ жил ПСЖ түрүүлэхэд ойрхон ирсэн ч Байерн Мюнхенд хожигдсон.

Дуулиан: Диего Марадонагийн эмчийг шалгаж байна

Аргентинийн прокурорын байгууллагаас нэрт хөлбөмбөгчин Диего Марадонаг эмчилж байсан эмчийг буруутай эсэхийг шалгахаар болжээ.

Нэрт хөлбөмбөгчин асан Диего Марадона нас барахаасаа хоёр долоо хоногийн өмнө тархиндаа мэс засал хийлгэсэн билээ. Тэгвэл Аргентинийн хууль сахиулагчид нэрт хөлбөмбөгчний хувийн эмч Леополдо Лукег хагалгааны дараах эмчилгээнд хайнга хандсан эсэх тал дээр шалгалт хийж байгаа аж.

Буэнос Айрес хотын цагдаагийн байгууллагаас Л.Лукегийн гэр, хувийн эмнэлэг зэрэгт нь нэгжлэг хийсэн байна.

Энэ нэгжлэгийг Д.Марадонагийн охидынх нь хүсэлтээр хийсэн юм. Нэрт хөлбөмбөгчний ар гэрийн зүгээс эцгийнхээ эмчилгээний талаарх тодорхой мэдээлэл авах хүсэлт тавьжээ. Үүгээр ч зогсохгүй хөлбөмбөгчний өмгөөлөгч Матиас Морла ч үйчлүүлэгчийнхээ нас барсанд эмч буруутай эсэхэд мөрдөн шалгах ажиллагаа явуулахыг шаардсан билээ.

Доктор Л.Лукегийн ажлын газар, гэрийг орон нутгийн 30 гаруй цагдаа нар хамгаалж байна

М.Морлагийн хэвлэлийнхэнд ярьснаар бол түргэний дуудлага өгөөд ойролцоогоор 30 минутын дараа талийгаачийн гэрт очсон гэнэ. Гэхдээ эмнэлгийн зүгээс энэ мэдэгдлийг няцаасан юм.

Д.Марадонад хагалгаа хийсэн доктор Л.Луке ч хууль сахиулагчидтай хамтран ажиллаж байгаа юм. Өнөөдөр Буэнос Айрес хотод эмчийн гэрт 30 гаруй цагдаа нар нэгжлэг хийсэн. Мөн төдий тооны цагдаа нар хувийн эмнэлгийг нь шалгажээ.

Одоогоор эмчийг гэм буруутай гэж үзэн, ямар нэгэн ял тулгаагүй. Зөвхөн хувийн эмч нь байсан тул эмчлэх явцад ямар нэг зөрчил гарсан эсэхийг л албаныхан шалгаж байгаа юм.

Бурханы хүүгийн сүүлийн ярилцлага

Диего Армандо Марадона 60 насныхаа ойн өдөр Кларин сонинд энэ ярилцлагыг өгчээ.

Таны амьдралд тохиолдсон хамгийн сайн болон муу зүйл юу байв? Ямар нэг зүйлд харамсдаг уу?

– Би маш их жаргалтай амьдарч, одоо ч жаргаж л байна. Хөлбөмбөг надад бүгдийг өгсөн. Надад байгаа бүх зүйлийг, бүр төсөөлснөөс илүү ихийг өгсөн. Энэхүү донд хөтлөгдөөгүй бол дахиад олон жил тоглох байлаа. Гэвч энэ бүгд өнгөрсөн зүйл болж, би одоо сайн байна. Хөгшчүүд минь байхгүй болсонд хамгийн их харамсдаг. Тота (Ээжийнх нь хүндэтгэлийн нэр)-тай дахиад нэг өдөр хамт байхсан гэж үргэлж боддог. Гэвч ээж минь тэнгэрээс надаар бахархаж, их жаргалтай байгааг би мэдэж байна.

Та төрсөн өдрийнхөө хундагыг өргөж, аргентинуудад ерөөл хайрлаач..

– Энэ тахал хурдан арилаасай, миний Аргентин энэнээс хурдан ангижраасай л гэж хүсч байна. Бүх аргентин хүн сайн байгаасай. Манай эх орон сайхан, Ерөнхийлөгч маань биднийг энэ хэцүү байдлаас гаргаж чадна гэдэгт итгэдэг. Олон хүүхэд идэх хоолгүй байгаад би их харамсдаг. Өлсөх гэдэг юу болохыг, хэдэн өдөр юм идэхгүй байхад ходоод юу мэдэрдэгийг би мэднэ. Ийм зүйл миний эх оронд болох ёсгүй. Энэ бол миний хүсэл, бүх аргентин хүн аз жаргалтай, ажилтай, өдөр бүр хоол идэж байгаасай.

Тахал таныг ойрхон нэрвэжээ. Хүргэн ах тань өнгөрч, эгч Лили тань бас тахалд өртөж. Та ч бас өөрийгөө тусгаарлах хэрэгтэй болсон. Та коронавирусээс айж байна уу?

– Энэ бол бидэнд тохиолдсон хамгийн онцгүй зүйл, хэзээ ч ийм юм харж байсангүй. Латин Америкийг илүү их доргиож байна. Хурдан алга болоосой, энэ тахалд нэрвэгдэж, хөлд нь үрэгдэж байгаа хүмүүс их байна. Олон хүн ажилгүй болж, талхаа олж идэх гэж зүдэрч байна. Би Путинд итгэж байна, удахгүй вакцин гаргаад авчих биз. Ингэж удаан тэсэхгүй дээ.

Хүмүүс тань руу ойртож ирээд, таныг хараад, таньд хүрээд нүүр царай нь хэрхэн өөрчлөгдөж байгааг мэдэрдэг биз?

– Би тэдэнд үргэлж талархдаг. Тэд өдөр бүр намайг гайхуулдаг. Аргентины хөлбөмбөгийн тойрогт ороод амьдарсан, үзсэн зүйлээ би хэзээ ч мартахгүй. Төсөөллөөс ч илүү ихийг олж харсан. Учир нь би олон жил гадаадад байсан. Заримдаа хүмүүс намайг хайрласан хэвээр, мэдэрсэн хэвээр байх болов уу гэж өөрөөсөө асуудаг байлаа. Gimnasia-гийн дасгалжуулагч болж талбай дээр гарсан тэр өдөр тэрхүү хайр, хүндлэл хэзээ ч дуусахгүй юм байна гэдгийг мэдэрсэн дээ.

Аргентины тэнгэрийн хөх болон цагаан өнгийг хамгаалж тоглоно, тамирчин болно гэдэг нэр төрийн хэрэг биз?

– Бид хар залуугаараа явж, гадаадад олон жил амьдарсан болохоор эх орноо их санадаг. Шигшээ багт дуудагдвал сэлээд ч хамаагүй хурдан очихыг боддог байлаа. Эх орондоо эргэж ирнэ, далбаагаа хамгаалан тоглоно гэдэг их гоё, биднийг өөр болгож, өөр юмыг мэдрүүлдэг. Аргентин хүн өрсөлдөж л байвал би бүгдийг үздэг. Аргентины далбаа намирч л байвал би дэмжээд суучихдаг. Ялан дийлж байгаа аргентин тамирчинг харах л юм бол сэтгэл хөдлөөд явчихдаг.

Месси-Бартомеу-Барселонагийн хэрэг явдлыг хэрхэн хүлээж авсан бэ. Та Мессигийн оронд байсан бол яах байсан бэ?

– Бүх юм муугаар төгсөж Лео Барсагаас явах байх гэж бодож байлаа. Надад бас ийм зүйл тохиолдож байсан. Барселона амар клуб биш. Тэр тэнд олон жил болсон, түүнтэй зохих ёсоор харьцаагүй. Тэр бүхнээ өгч, Барсаг хамгийн өндөрт гаргасан. Тэгээд нэг өдөр явахыг хүссэн ч түүнд үгүй гэж хэлсэн. Хаалга савж гарах нь амар биш ээ. Гэрээ хэлцэл гэж байна, Барса ямар том клуб билээ.. Чамайг хайрладаг хүмүүс байна. Би Наполид ийм зүйл хийгээгүй.

Либертадоресийн цомд хэн түрүүлэхээр байна? Ривер, Бока.. Аль нь вэ?

– Бока сайн байгаа, надад таалагдаж байгаа. Мигель Руссо Бокагийн хамгаалалтыг сайжруулж, хоёр гурван ч тоглогч илт сайжраад байна. Ривер Гайардотой ажиллаад удаж байна, энэ их чухал. Тэд бие биенээ сайн ойлголцдог болсон. Гэхдээ би Бокад илүү найдаж байна.

Орчуулсан: Б.Нямдорж

Дуулиан: Аргентин улс гурав хоногийн гашуудал зарлав

ХХ зууны шилдэг хөлбөмбөгчин Диего Марадона 60 насандаа таалал төгслөө. Италийн хэвлэлд бичсэнээр түүнийг Буэнос-Айрос дахь гэртээ зүрхний шигдээсээр өөд болсныг зарласан юм.

Талийгаач өнгөрсөн аравдугаар сарын 30-нд 60 насныхаа төрсөн өдрийг тэмдэглээд маргааш нь бие нь муудаж эмнэлэгт хүргэгдсэн билээ. Улмаар тархинд нь цус хурсан оноштойгоор хагалгаанд орсон юм.

Хагалгаа амжилттай болж, эмнэлгээс Буэнос Айрос дахь гэртээ буцсан нэрт хөлбөмбөгчин эр хоёр долоо хоногийн дараа гэртээ зүрхний шигдээсээр өөд боллоо.

Нэрт хөлбөмбөгчнөө бурхны оронд одсонд Аргентин улсын төрийн тэргүүн Алберто Фернандес улс орон даяар гурав хоногийн гашуудал зарлаж буйг мэдэгдэв.

Уншигч таньтай хамт Диего Марадонагийн таван түүхэн мөчийг хамтдаа дурсая.

Анхны тоглолт

“Аргентинос Хуниорс” багийн ерөнхий менежер Хуан Карлос Монтес 1976 оны аравдугаар сарын 20-нд “Таллерес де Кордоба” багийн эсрэг тоглолтод залуу авьяастан, дөнгөж 15 настай байсан Диего Марадонаг талбайд гаргасан юм. Талбайд гарсан анхны тоглолтод бөмбөгөнд хүрсэн хоёр дахь оролдлогоороо Д.Марадона эсрэг багийн хамгаалагч Хуан Доменго Кабрераг чадварлаг хуурсан нь өдгөө үлгэр домог мэт яригддаг. Хожим их түүхийн гэрч болсон энэ тоглолт телевизээр гараагүй бөгөөд гэрэл зурагчин Хумберто Эсперанзагийн авсан зургийг “Эль Графико” сэтгүүл 2001 онд олонд дэлгэж байв.

Шийтгэл

1994 оны ДАШТ бол Д.Марадонагийн амьдралд хар толбо үлдсэн тэмцээн билээ. Энэ тэмцээний үеэр допингийн асуудалд холбогдсон аргентин эр хөөгдөж нутаг буцсан юм. Олон улсын хөлбөмбөгийн холбооноос Диегог нэг жилийн хугацаанд тэмцээнд оролцохыг хориглосон түүхтэй.

Залуучуудын ДАШТ

Аргентинийн шигшээ багийн ахлах дасгалжуулагч асан Цесарь Луис Менотти 1978 оны насанд хүрэгчдийн ДАШТ-ий шигшээд тухайн үед 17 настай байсан довтлогч Диего Марадонаг дуудаагүй юм. Харин дараа жил нь Японд болсон 20 хүртэлх насны залуучуудын ДАШТ-д үе тэнгийнхээ залуусаас онцгой чадвараараа эрхгүй ялгарч, дэлхий даяар нэрээ танилцуулсан билээ. Энэ тэмцээнд аргентинчууд анх удаа түрүүлж, Д.Марадона тэмцээний шилдэг тоглогчоор тодорчээ.

Итали

Испанийн “Барселона” клубэд төдий л амжилт гаргаж чадаагүй Д.Марадона 1984 онд Италийн “Наполи”-д ирэв. Энд тэр өмнө нь тоймтой амжилт үзүүлж байгаагүй даруухан багийн ахлагчаар талбайд гарч, 7 жил тоглохдоо лигийн аваргаар хоёр удаа тодорсон юм.

ХХ зууны шилдэг гоол

https://twitter.com/i/status/1331639508375396357

1986 оны ДАШТ-д Английн эсрэг оруулсан хоёр гоол нь түүхэнд нэрээ үлдээсэн. Нэг нь алдарт “Бурханы гар”. Харин бичлэг дээрх гоолыг өнгөрсөн зууны шилдэг гоол хэмээн мэргэжилтнүүд үнэлдэг билээ.

TV: “Ла Лига” Монголд ирлээ

Хөлбөмбөг сонирхогчид удтал хүлээсний эцэст Испанийн хөлбөмбөгийн дээд лиг болох “Ла Лига”-г Монголд шууд үзэх эрхтэй боллоо. SPS телевиз энэ сарын 21-ээс эхлээд шууд дамжуулах болсноо зарлав.

Испанийн Ла Лигаг зохион байгуулагчид 2013 оноос хойш олон улсад телевизийн эрх өгөх ажлаа эрчимжүүлсэн. Үүний үр дүнд өдгөө дэлхий даяар олон оронд Испанийн лигийг шууд хүлээн авч үздэг. Тодруулбал, зөвхөн Ази тивд гэхэд албан ёсоор 23 улс (Төв Азийн бүс нутгууд багтана) шууд хүлээн авч үзэх боломжтой аж.

Хүн ам олонтой Энэтхэг улсад өнгөрсөн жилээс хойш “Facebook”-тэй хамтарч, туршилтын журмаар тоглолт шууд дамжуулаад эхэлсэн. Түүнчлэн “Youtube” сувгаар дэлхийн 155 оронд Испанийн хоёрдугаар дивизионы тоглолтыг үзэж сонирхдог болоод буй.

Тэгвэл Монголын спортын төрөлжсөн суваг SPS албан ёсны эрхтэйгээр Ла Лигийг хөлбөмбөг сонирхогчдод үзүүлэх болсноо зарлав.

Гэхдээ одоогоор Ла Лигийн албан ёсны сайтад манай улсад шууд дамжуулах эрхтэй гэж зарлаагүй байна.

Та бүхэн аль улсад ямар телевизээр үзэх боломжтойг харахыг хүсвэл энд дарна уу!

Тун удахгүй энэ жагсаалтад Монгол нэмэгдэх биз ээ.

“LA LIGA” МОНГОЛД!

Эх сурвалж: ЭсПиЭс Телевиз

Азийн хөлбөмбөг албан ёсоор ирлээ

Юнител компани Монгол улсаас анхны гэрээг үзэглэлээ хэмээн Азийн хөлбөмбөгийн холбооноос мэдээллэлээ.

Үүрэн холбоо, интернэтийн хосолсон үйлчилгээ үзүүлэгч Юнител компани Азийн хөлбөмбөгийн холбооны бүх түвшний тэмцээнүүдийг Монгол улсад шууд дамжуулах эрх бүхий гэрээг байгуулжээ. Гэрээний дагуу 2021-2024 он хугацаанд болох улс болон клубуудын түвшний тэмцээнүүдийг бид бүхэн UniLive суваг болон Look TV-ээр үзэх боломжтой болж байна.

“Бид Монгол улстай хамтран ажиллаж байгаадаа баяртай байна. Монгол улс өсөн дэвжиж, сайжирч буй Азийн хөлбөмбөгийн нэгэн төлөөлөл юм. Энэхүү гэрээ нь Азийн хөлбөмбөгийн холбооны тэмцээнүүдийн үнэ цэнийг илтгэнэ. Монгол улсаас анх төлөөлөл боло хамтран ажиллаж байгаа Юнител компанид баярлалаа.”

Азийн хөлбөмбөгийн холбооны ерөнхий нарийн бичиг Дато.

‘’Бид Азийн нэр хүндтэй тэмцээн, тоглолтуудыг шууд дамжуулахаар болж байгаадаа баяртай байна. Хөлбөмбөгийн спорт Монгол улсад хурдацтай хөгжиж, сонирхогч, үзэгчдийн тоо өсөн нэмэгдэж байгаа. Тиймээс хөгжөөн дэмжигчдэдээ Азийн хөлбөмбөгийн холбооны тэмцээнүүдийг шууд дамжуулахын зэрэгцээ, хөлбөмбөгийн спортыг сурталчлан таниулах олон хөтөлбөр, арга хэмжээнүүдийг зохион байгуулах болно.’

Контэнт стратеги төлөвлөлтийн газрын захирал Э.Мөнхбат.

‘’Бид Юнител компанитай түншилж, Монгол улсад үйл ажиллагаагаа нэвтрүүлж байгаад баяртай байна. Хөлбөмбөгийн спорт Монгол улсад хурдацтай хөгжиж, сонирхогчдын цар хүрээ тэлж байгаа бөгөөд Юнител компани бүс нутагтаа хөлбөмбөгийн улам бүр өргөжүүлэхээр төлөвлөж, хэрэгжүүлж байгаад талархалтай байна.’’

Football Marketing Asis-ийн Удирдах зөвлөлийн гишүүн, Гүйцэтгэх захирал Патрик Мурфи.

Монголын улсынхаа шигшээ баг, клубуудын аваргад оролцож буй баг болон бүх насны тэмцээнүүдийг шууд үзэх нь дээ гоё. Баярлалаа Юнител.

Эх сурвалж: https://www.the-afc.com

Дуулиан: Артем Зюба шигшээ багаасаа хөөгджээ

ОХУ-ын нэрт хөлбөмбөгчин Артем Зюба гар хангалаг хийж буй үйлдлээ бичиж, цахим ертөнцөд тавьсан нь дуулиан тарив.

“Зенит” багийн довтлогч Артем Зюба энэ бичлэгийнхээ талаар ямар нэг тайлбар хийсэнгүй. Тэрбээр өөрийн инстаграм хуудсандаа сэтгэгдэл бичих хэсгийг түр хаасан аж.

Шигшээ багийн ерөнхий дасгалжуулагч Станислав Черчесовт багийн гол тоглогчийнх нь дээр увайгүй үйлдэл огт таалагдсангүй. Молдав, Турк, Сербийн эсрэг хийх шигшээгийн бүрэлдэхүүнээс А.Зюбаг хассан байна. Үүгээр ч зогсохгүй ахлагчийн туузыг өөр хүнд шилжүүлэхээр болжээ.

Энэ жил 32 настай А.Зюбагийн оронд 30 настай, “Локомотив Москва” багийн довтлогч Фёдор Смоловыг шигшээд дууджээ. Одоогоор Испанийн “Сельта” багт зээлээр тоглож буй Ф.Смолов 2012 оноос хойш шигшээдээ 39 тоглолтод оролцож, 14 гоол оруулсан юм.

Ман.Ютд 0 – 1 Арсенал

Олд Траффорд

Ман.Ютд 0 – 1 Арсенал

Обамэянг, 69’ пен

Олэ Гуннар Сулшерын 100 дахь тоглолтоор хожигдол бэлэглэв. Ийнхүү Юнайтедыг талбай дээр нь хожилгүй 14 жил болсон муухай цувралыг “топ 6 багийг талбай дээр нь хожоогүй” гэх 29 тоглолт үргэлжилж асан өөр нэгэн муухай цувралын хамт дуусгав аа.

ХЭН ЮУ ГЭВ

Сулшер өгүүлрүүн:

– Манайхан ер нь тоглосонгүй, ялангуяа эхний хагаст. Үүн дээр голчлон анхаарах ёстой байна, учир нь залуус хэр сайн тоглох боломжтой вэ гэдгийг бид сайн мэднэ. Энэ тоглолт энэ долоо хоногийн том тоглолт гэдгийг мэдэж байсан. Харамсалтай нь эхний хагаст бид олигтой тоглож чадсангүй. Хоёрдугаар хагаст арай дээр тоглосон ч хамгаалалтаа нягт байлгаж чадахгүй байх шиг байсан. Хамгаалах ёстой газраа удаан байж, айлд пенальт өгчихлөө. Хаалганаас холдоод явж байгаа хүний бөмбөг рүү орох хэрэггүй л байсан юм. Нэг их хүчтэй хүрсэн юм байгаагүй, гэхдээ пенальт байх л даа. Манайханд дэвшил байгаа эсэхийг өөр хүмүүс хэлэх биз ээ.

Пагваа өгүүлрүүн:

– Муу тоглосон гэдгээ бид мэдэж байгаа. Миний хувьд иймэрхүү алдаа гаргаж болохгүй. Бөмбөгөнд хүрчих юм шиг санагдсан, даанч хүрээгүй. Өнөөдрийн алдсан гоол, пенальт миний буруу байлаа. Жижиг зүйлсийг сайн хийх хэрэгтэй байна. Бид улам сайжрах хэрэгтэй, багаараа, надаас эхлээд хийх хэрэгтэй. Хөлд нь хүрчих шиг санагдсан, бас 16 дотор байгаагаа мэдэж байсан. Иймэрхүү маягаар алдаа өгөөд байж болохгүй. Амьсгаадаж явснаас болоод ийм тэнэг алдаа хийсэн байж ч магадгүй.

Микэл Артэта өгүүлрүүн:

– Өөрсдөдөө итгэх итгэл бий болгох гэж би хичээсэн, бүгдээрээ өөрсдийнхөөрөө байцгаа гэж хэлсэн. Манайхан үнэхээр зоригтой, нэрээ хичээж тоглоцгоосонд нь би их баяртай байна. Айл дөрвөн хагастай, тэдний хоёр нь манай арын дөрвийг байнга татаад их явдалтай схемээр тоглосон. Эхний үед бараг хоёр ч гоол хийх боломжтой байсан, тиймэрхүү тохиолдлуудаа сайн ашиглах хэрэгтэй байна. Нэлээн дарамттай тоглолт боллоо, бусад талбайнуудаас өөр л дөө. Хувь тоглогчдын хувьд бол тулаанууддаа ялж, тухайн тоглолтын түвшинд өөрсдийгөө өргөж тоглох хэрэгтэй байдаг, өнөөдөр бол бүх тоглогч нар маш дээд зэргийн тоглолт үзүүллээ.

ТООН ҮЗҮҮЛЭЛТҮҮД

– Премьер лигийн хүрээнд Юнайтедыг талбай дээр нь 16 удаа хожоод байгаа энэ үзүүлэлт бол Челсигийн 18 хожлын дараа хоёрдугаарт орох үзүүлэлт гэнэ.

– Юнайтед энэ улирлын нээлтийн зургаан тоглолтоос долоон оноо хүртээд байгаа нь 2013/14 улиралд Дэвид Моесын 7 оноо авсантай ижил байгаа бөгөөд тухайн улиралд нөхөд долоо дугаар байрт улирлыг өндөрлүүлж байжээ.

– Олд Траффорддоо дээд лигийн эхний 4 тоглолтод хожиж чадаагүй тохиолдол тэртээ 1972/73 улиралд тохиож байсан бөгөөд тэгэхэд 18 дугаар байранд улирлыг өндөрлүүлж байсан гэнэ.

– Нөхөд бас гэртээ хийсэн лигийн сүүлийн долоон тоглолтдоо пенальт алдаад байгаа юм байна. Тэрнээс өмнө бол Олд Траффорддоо таван ширхэг пенальтыг лигийн 101 тоглолт хийж байж алдсан байдаг ажээ.

–  Сулшерын удирдлага доор Погба гурван пенальт айлд өгсөн ба энэ хугацаанд Манчестер Юнайтедын ямар ч тоглогч нэгээс олон удаа пенальт бэлэглээгүй гэнэ.

– Обамэянг бол Олд Траффорд дахь Премьер лигийн тоглолтод пенальт хийсэн Арсеналын анхны тоглогч. Өмнөх хоёр удаад нь хоёул чадаагүй. 2011 онд Робин ван Перси, 2006 онд Жилберто Силва.

ДАРААГИЙН ТОГЛОЛТ:

Юнайтедын дараагийн тоглолт Аваргуудын лигт. Лхагва гарагт Истанбул Басакшэхир клубтэй тоглоно. Дараа нь 11 сарын 7-нд Эвэртоны талбай дээр Премьер лигийн тоглолттой.

Арсенал харин Сулшерын хуучин баг Молдэ клубтэй Европа лигийн тоглолттой ба дараа нь 11 сарын 8-нд Астон Виллаг талбай дээрээ хүлээн авч хожих болно оо. 

Орчуулсан: Д. Цогчулуун

Жианкарло Инфантиногийн шинжилгээний хариу эерэг гарчээ

Олон улсын хөлбөмбөгийн холбооны Ерөнхийлөгч Жианни Инфантиногийн КОВИД-19 шинжилгээний хариу эерэг гарлаа.

Олон улсын хөлбөмбөгийн холбооны тэргүүн Ж.Инфантиногийн шинжилгээний хариу тааруу гарсныг FIFA-гаас албан ёсоор баталсан юм. Бага зэрэг халуурч, бие нь тавгүйтсэн Жианни 10 хоног бусдаас тусгаарлагдана гэж албаны хүн мэдээлжээ.

Өдгөө 50 настай Ж.Инфантинотой ойрын хэд хоногт уулзсан бүх хүмүүсийг давхар шинжилгээнд оруулсан байна.

КОВИД-19 цар тахлын улмаас Ж.Инфантино бусад нутгаар зорчих нь эрс багассан ч өнгөрсөн сард АНУ-ын нийслэлд зочилж, цагаан ордоноор ороод гарсан билээ.

Европын орнуудаар цар тахлын цар хүрээ багассан шинжгүй байгаа. Швейцарьт гэхэд нийт 127 мянган хүн корона туссан бөгөөд өнгөрсөн баасан гаригаас хойш 23 мянган тохиолдол бүртгэгдсэн аж.