Аваргуудын лигийн шигшээ тоглолтыг Португалд зохион байгуулах боллоо. Зохион байгуулагчид Английн “Уэмбл” цэнгэлдэхэд хийхээр төлөвлөж байсан ч бодлоо өөрчилжээ.

Аваргуудын лигийн шигшээ тоглолтыг Туркийн Истанбул хотод зохион байгуулахаар анх төлөвлөсөн ч цар тахлын улмаас боломжгүй болсон билээ. Европын хөлбөмбөгийн холбооноос “Уэмбл” цэнгэлдэхэд зохион явуулахаар Английн Засгийн газар болон зохих хууль ёсны байгууллагад хүсэлт гаргасан юм.

Европын хөлбөмбөгийн холбооноос ирэх тавдугаар сарын 29-нд цөөн тооны үзэгчидтэй явуулах хүсэлт гаргасан ч Их Британийн Засгийн газрын шийдвэрээр улаан жагсаалт буюу гадны аялагчид нутагтаа хүлээн авах боломжгүй байгаа аж. Харин Португал улсад одоогоор хориг тавигдаагүй.

“Порто”-гийн “Эстадио до Драгао” цэнгэлдэхэд энэ жилийн аваргуудын лигийн шигшээ тоглолт болно.

Их Британийн Засгийн газрын зүгээс цар тахалтай холбоотойгоор шинэ журам баталсан юм. Цахал цөөн тархсан зарим улс орныг ногоон бүсэд оруулж тэдгээр орнуудад зорчсон иргэд нь заавал хөл хорионд орох шаардлагагүй болжээ. Харин улаан бүсэд орсон орнуудад зорчсон иргэд нь 10 хоног “хоригдох” гэнэ. Энэ сарын 17-ноос дагаж мөрдөх шинэ журмаар Португал нь ногоон бүсэд орсон цөөн орны нэг аж.

Финландын хөлбөмбөгийн холбоо хижаб өмсдөг эмэгтэй хөлбөмбөгчдийг дэмжих зорилгоор хандивын аян өрнүүлэхээр болжээ.

Финландын хөлбөмбөгийн холбоо тус улсад эмэгтэй хөлбөмбөгийн холбоо байгуулагдсан 50 жилийнхээ ойгоор олон арга хэмжээ зохион байгуулж буй юм. Үүний нэг нь дэлхийн олон оронд тоглож буй муслим шашинт эмэгтэй хөлбөмбөгчдийг дэмжих зорилгоор олон тооны хижаб хандивлахаар болжээ.

Энэ талаар Финландын эмэгтэйчүүдийн хөлбөмбөгийн хөгжил хариуцсан захирал Хейди Пежала “Энэ хөтөлбөрийг хэрэгжүүлснээр хөлбөмбөгийг бүх хүнд эрх тэгш хүргэх зорилгодоо ойртох юм” гэж BBC-д өгсөн ярилцлагадаа онцолжээ.

Финланд улсад амьдрах олон үндэстний тоо эрс өсч байгаа тул ийм хөтөлбөр хэрэгжүүлж, спортоор дамжуулан тэднийг нэгтгэх нь чухал гэж Хейди үзэж байгаа аж.

Туриний “Ювентус” цэнгэлдэх хүрээлэнд 2022 оны УЕФА-ийн Эмэгтэйчүүдийн аваргуудын лигийн финалыг зохион байгуулахаар сонгосон бол 2023 онд Айндховены “ПСВ” цэнгэлдэх хүрээлэнд зохион байгуулах боллоо.

Европын хөлбөмбөгийн холбооны гүйцэтгэх хороо Амстердамд болсон хуралдаанаараа ийн шийджээ. 41500 хүний суудалтай “Ювентус” цэнгэлдэх 2011 онд тус клубын “Стадио делле Алпи”-гийн суурийн дээр босч, 2014 оны УЕФА Европын лигийн тоглолтыг энэхүү цэнгэлдэхэд хийж байжээ. 2016 онд “Лион”, “Вольфсбург” багийн хооронд болсон шийдвэрлэх тоглолтыг “Реджо Эмилия”-гийн “Стадио Китта дель Триколоре”-д хийснээс хойш хоёр дахь удаагаа Италид зохион байгуулагдах буй Аваргуудын лигийн шигшээ тоглолт болов.

Анх 1910 онд нээгдсэн 35000 хүний ​​багтаамжтай “ПСВ” цэнгэлдэх хүрээлэн нь 1978 оноос хойш УЕФА-гийн цомын шигшээ тоглолт, 1988 оны болон 2006 оны УЕФА-ийн Супер цомын тоглолт, “УЕФА ЕВРО 2000” дахь гурван тоглолт зэрэг томоохон тэмцээн зохион байгуулсан түүхтэй. Гурван жилийн өмнө энэ цэнгэлдэхэд Нидерландын бүсгүйчүүд Умард Ирландыг ялж эмэгтэйчүүдийн ДАШТ-д оролцох эрхээ авч байв. Уг тоглолт “ПСВ Айндховен” клубын талбай болох “Филипс” цэнгэлдэхэд болсон бөгөөд тоглолтыг 30238 хөгжөөн дэмжигчид цуглаж үзсэн нь Европын хөлбөмбөгийн холбооноос зохион байгуулж буй эмэгтэйчүүдийн тэмцээний урьдчилсан шатны хамгийн олон хүн үзсэн тоглолт болж бүртгэгджээ.

Буурал тивийн хөлбөмбөгийн аварга шалгаруулах тэмцээн хаяанд иржээ. Иймээс тус тэмцээний тухай түүх болон сонирхолтой баримтыг танилцуулъя.

1927 онд тухайн үеийн Францын хөлбөмбөгийн холбооны ерөнхий нарийн бичгийн дарга асан Анри Делаунай анх тивийн аварга шалгаруулах тэмцээн зохион байгуулах санааг гаргаж байжээ. Тухайн үед ажил хэрэг болж чадаагүй ч Делаунайг нас барснаас гурван жилийн дараа буюу 1958 онд түүний санаа ажил хэрэг болсон юм. Түүний дурсгалыг хүндэтгэн цомыг нэрлэж, 1960 онд Францад анхны буурал тивийн аварга “Европын үндэстнүүдийн цом” нэртэйгээр зохион байгуулагдсан юм. Анхны тэмцээний урьдчилсан шатанд 17 баг оролцож шигшээ шатанд дөрвөн баг өрсөлдсөний эцэст ЗХУ-ын залуучууд аваргаар тодорчээ. Энэ цагаас хойш дөрвөн жил тутамд зохион байгуулагдаж буй.  

Баримтууд

• Европийн аварга нь үзэгчээрээ ДАШТ-ий дараа орох хөлбөмбөгийн тэмцээн бөгөөд 2012 оны финалын тоглолтыг 300 сая, 2016 онд 284 сая хүн дунджаар үзсэн байдаг.
• Испани болон германчууд түүхэндээ гурван удаа түрүүлсэн амжилтаар тэргүүлдэг бол тэдний араас Франц улс хоёр түрүүтэй жагсдаг. 
• Испани нь 2008, 2012 онуудад дараалан түрүүлж байсан цор ганц баг.
• 1996 оноос эхлэн өнөөдрийн “Евро” нэрээр зохион байгуулагдаж буй.
• Тэмцээний бүх цаг үеийн мэргэн бууч бол Криштиану Роналду болон Мишель Платини. Тэд хоёул есөн гоолтой. Мөн Роналду хамгийн олон буюу 21 тоглолтод оролцсон.
• 2016 он хүртэл тэмцээний ялагчид холбооны цомын тэмцээнд оролцох эрх өгдөг байв.
• 2008 онд цомыг шинэчилсэн. Одоогийн цом нь мөнгөөр хийгдсэн бөгөөд найман кг жинтэй, 60 см өндөр.
• Тус тэмцээнд нийт 10 улс түрүүлж байсан юм.

Тэмцээний түүхэн үзүүлэлт

Тэмцээний он, зохиогдсон газар	Алт	Мөнгө	Хүрэл
1960 он Франц улс	ЗХУ	Югослав	Чекословак
1964 он Испани улс	Испани	ЗХУ	Унгар
1968 он Итали улс	Итали	Югослав	Англи
1972 он Бельги улс	Баруун Герман	ЗХУ	Бельги
1976 он Югослав улс	Чекословак	Баруун Герман	Нидерланд
1980 он Итали улс	Баруун Герман	Бельги	Чекословак
1984 он Франц улс	Франц	Испани	Дани, Португал
1988 он Баруун Герман улс	Нидерланд	ЗХУ	Итали, Баруун Герман
1992 он Швед улс	Дани	Герман	Нидерланд, Швед
1996 он Англи улс	Герман	Чех	Англи, Франц
2000 он Бельги, Нидерланд улс	Франц	Итали	Нидерланд, Португал
2004 он Португал улс	Грек	Португал	Чех, Нидерланд
2008 он Австри, Швейцарь улс	Испани	Герман	Орос, Түрк
2012 он Украйн, Польш улс	Испани	Итали	Герман, Португал
2016 он Франц улс	Португал	Франц	Герман, Уэльс

Цар тахлын улмаас нэг жил хойшлогдоод байсан XVI удаагийн буурал тивийн аварга шалгаруулах тэмцээн ирэх зургадугаар сарын 11-нд Италийн Ром хотын “Стадио Олимпико” цэнгэлдэхэд  хөшгөө нээнэ. Тус тэмцээнийг Ирланд, Шотланд, Уэльс улс хамтран, Гүрж, Азербайжан мөн Турк улс зохион байгуулах саналаа хүргүүлсэн ч 2012 оны арванхоёрдугаар сард ЕХХ-оос 2020 оны тэмцээнийг Европын янз бүрийн улс орнуудын хэд хэдэн хотод зохион байгуулж, хагас шигшээ ба шигшээ тоглолтыг Лондонд явуулна гэж мэдэгдсэн. Иймээс энэ удаагийн тэмцээнд анх удаа Европын 12 улс хамтран зохион байгуулах юм. (ЕАШТ-2020 арван хоёр өөр улсад болно)

Спортыг тэр дундаа хөлбөмбөгийг шимтэн үздэг хүмүүсийн дунд хамгийн эрэлт ихтэй, шуумаар тасардаггүй сэдэв бол яах аргагүй солилцоо наймааны цонх билээ.

Зарим тоглогчид эрэлт ихтэй байдаг учраас хэлэлцээр сунжирч заримдаа хугацаа дуусахаас өмнө үнэ нь өсөх тэр ч бүү хэл багаа солино гэсэн яриа зүгээр нэг цуу яриа төдийхөн болоод өнгөрөх нь олонтаа.
2020/21 улирал дуусч 2021/22 шинэ улирал эхлэх гэж буйтай холбогдуулан энэ зуны наймааны талаарх сонирхууштай мэдээллийг бэлтгэв.

Зуны солилцоо наймааны цонх хэзээ нээгдэх вэ?

Премьер лигийн хувьд 2021 оны 06 сарын 09-ний Мягмар гарагт нээгдэнэ. Нийт 12 долоо хоног үргэлжлэх бөгөөд 08 сарын 31-ний Лхагва гарагт 23:00 цагт дуусах юм.
Багууд “Евро-2020” эхлэхээс өмнө буюу 06 сарын 11-ны өдрөөс өмнө шилжүүлэгийн гэрээгээ хийж болно.

Лиг	Улс	Солилцооны цонх нээгдэх өдөр	Солилцооны цонх хаагдах өдөр
Премьер Лиг	Англи	09/06/2021	31/08/2021
Бундеслиг	Герман	01/07/2021	31/08/2021
Лиг 1	Франц	01/07/2021	31/08/2021
Ла Лиг	Испани	01/07/2021	31/08/2021
Сери А	Итали	01/07/2021	31/08/2021

Аль тоглогч багаа орхиж магадгүй вэ?

Өнгөрсөн дөрөвдүгээр сард гаргасан Супер Лигийн төлөвлөгөөнөөс үүдэн “Реал Мадрид”-ын Ерөнхийлөгч Флорентино Перез энэ зун наймаа хийхгүй байхыг уриалсан юм. Түүний энэ үйлдэл ньзуны солилцоо наймааны талаарх шуум, цуу ярианы эрчийг дарж чадсангүй.

Эрлинг Хааланд – Боруссия Дортмунд

“Реал Мадрид”, “Манчестер Сити” , “Парис Сайнт Жермен” баг түүнийг сонихож буй хэмээн яригдаж байгаа буй боловч “Боруссия Дортмунд” шилдэг тоглогчоо багтаа үлдээхийг хүсч байна.
Э.Хааландын агент Мино Райола энэ сард аль нэг багтай тохиролцоо хийж магадгүй гэсэн цуурхал тархсан. Энэ талаар М.Райола AS агентлагт өгсөн ярилцлагадаа “Германы багийн хувьд тоглогчоо авч үлдэх сонирхолтой байгаа. Харин би бол арай өөр өнцөгөөс харж байна. Хэрэв сайхан боломж гараад ирэх юм бол бид бүгд баяртай байх болно шүү дээ” хэмээн ярьсан юм.
Хааландыг ирээдүйд “Барселона”,”Байерн Мюнхен”,”Ювентус”-ын аль нэгэнд очно гэж агент нь онцолсон юм.

Лионель Месси – Барселона

Өнгөрсөн онд үнэнчээр зүтгэж явсан баг болох “Барселона”-гаас явна гэдгээ сүр дуулиантайгаар мэдэгдээд байсан Лионель Месси харин энэ жил хэрхэх эсэх нь одоогоор тодорхойгүй хэвээр л байсаар байгаа юм.
Клубын шинэ ерөнхийлөгч Жоан Лапорта “Аргентин тоглогч маань багтаа үлдэнэ гэдэгт би эргэлзэхгүй байна.” гэсэн бол Депортес Куатро “Би түүнийг үлдээхийн тулд клубын зүгээс бүхнийг хийнэ” гэсэн аж.
Клубээ орхино гэдгээ өнгөрсөн жил зарласан ч одоо хүртэл клубдээ хайртай байгаа нь нэг их нууц биш юм. Гэсэн хэдий ч тэрбээр Пеп Гвардиолатай дахин нэгдэн “Манчестер Сити” рүү явахыг эртнээс бодсоор ирсэн хэмээсэн билээ.
“Манчестер Сити”-гээс гадна “Парис Сайнт Жермен” Мессиг багтаа оруулахыг хүсдэг бөгөөд хэрэв наймаа амжилттай болвол Месси Неймартай дахин хамтрана гэсэн үг юм.

Килиан Мбаппе – Парис Сайнт Жермен

Бодит байдал дээр Мбаппег авах чадалтай баг “Манчестэр Сити” “Реал Мадрид” хоёроос өөр байхгүй.
“Мадрид”-ын ерөнхийлөгч Ф. Перезийн хэлсэн анхааруулгыг авч үзвэл тэр Испаний нийслэлд очих магадлал тун бага байгаа юм.

Жек Грилиш – Астон Вилла

“Астон Вилла”-гийн тууштай зүтгэлтэн Жек Грилиш 2020/21 улиралын төгсгөлд бэртэл авсан боловч энэ нь түүнийг сонирхож байгаа багуудад тийм ч сүртэй зүйл биш бололтой.
Олон улсын агент Жонаттан Барнет түүнтэй холбоотой хэд хэдэн наймааг өнгөрсөн 3 сард урьдчилан таамагласан бөгөөд хэрэв түүнийг “Атлетико” руу явбал олон амжилтыг эвдэж магадгүй гэсэн байна.

Жэдон Санчо – Боруссия Дортмунд

“Дортмунд”-ийн захирал Майкл Зорк өнгөрсөн жил Жэдон Санчотой клубыг тодорхой нөхцөлийн дор орхиж болох “эрхэм хүний тохиролцоо” хийсэн гэж германы өргөн дэлгэцийн ARD нэвтрүүлэгт хэлсэн.
Ж. Санчотой хамгийн их холбогдож байгаа клуб бол “Манчестэр Юнайтед”. Хэрэв тэр улаан чөтгөрүүдийн эгнээнд нэгдвэл, “Манчестер Сити” өөрийн бэлтгэсэн залуу бүтээгдэхүүнээ өрсөлдөгч багтай нь хамт байгааг харахыг тийм ч их хүсэхгүй л болов уу. Гэсэн хэдий ч Олд Траффорд түүний эцсийн зогсоол биш бөгөөд Ж. Санчогын төлөөх өөрсөлдөөнд “Челси” мөн “Ливерпүүл” байгаа юм.

УЕФА-гийн эмэгтэйчүүдийн аваргуудын лигийн шигшээд шалгарсан “Челси”, “Барселона”-гийн тоглолт Шведийн Готенбургын “Гамла Уллеви” цэнгэлдэхэд болно.
Хоёр багийн аль нь ч өмнө нь аваргуудын лигийн цом авч байгаагүй. Гэсэн хэдий ч ялагч болсон баг нь УЕФА-гийн эрэгтэй болон эмэгтэй аваргуудын лигт аварга болсон хамгийн анхны баг болох юм. “Челси” аваргуудын лигийн финалын анхны тоглолтоо хийж буй бол “Барселона” хоёр жилийн өмнө “Лион”-д 4:1-ээр хожигдож байсан юм.

Сүүлийн таван жил Аваргуудын лигт түрүүлсэн “Лион”-ы хаанчлалд шөвгийн наймд хүрээд “Парис Сайнт Жермен”-д хожигдсоноор дуусгавар болжээ. Харин аваргуудыг хожсон Францын багийг “Барселона” 3:2-оор буулган авснаар шигшээд тунасан юм. “Челси”-гийн хувьд шөвгийн дөрөвт “Байерн Мюнхен”-ийг хожсон бөгөөд 2007 оноос хойш Франц болон Германы баггүй хамгийн анхны финал болж байгаа юм.

Челси

Шөвгийн 32: “Бенфика” 8-0 харьцаатай хожсон
Шөвгийн 16: “Атлетико” 3-0 харьцаатай хожсон
Шөвгийн 8: “Вольфсбург” 5-1 харьцаатай хожсон
Хагас шигшээ: “Байерн Мюнхен” 5-3 харьцаатай хожсон
Улирлын мэргэн бууч: Фран Кирби (6 гоол)
Өмнөх гаргасан амжилт: Хагас шигшээ хүртэл тоглосон (2017/18, 2018/19)
2019/20: Ороогүй
2007 онд “Арсенал” аварга болсноос хойш финалд гарч ирсэн хоёр дахь англи баг.

Барселона

Шөвгийн 32: “ПСВ Эйндховэн” 8-2 харьцаатай хожсон
Шөвгийн 16: “Фортуна Шоүрин” 9-0 харьцаатай хожсон
Шөвгийн 8: “Манчестер Сити” 4-2 харьцаатай хожсон
Хагас шигшээ: “Парис Сайнт Жермен” 3-2 харьцаатай хожсон
Улирлын мэргэн бууч: Женни Эрмосо (6 гоол)
Өмнөх гаргасан амжилт: Дэд аврага (2018/19)
2019/20: Хагас шигшээ
“Барселона” 2019 онд финалд шалгарсан анхны испани баг болсон билээ. Хэрэв тэд энэ жил аваргуудын лигт түрүүлвэл Герман, Швед, Англи, Францаас гадна буюу тав дахь баг болно.

Тавдугаар сарын хоёрны өдөр Оросын премьер лигийн 28 дугаар тойрогт “Зенит” гэртээ “Газпром арена”- д Москвагийн “Локомотив”-г  6:1 харьцаатайгаар буулган авснаар гурван жил дараалан аварга боллоо. Питерын багаас Артем Зюба, иран довтлогч Сердар Азмун, Малком нар төмөр замчдын хаалгыг мялаажээ.

Сергей Семакын удирдлага дор “Зенит” анх удаагаа гэртээ аварга боллоо. 2018/2019 оны улиралд Петербургчууд Чечений Грозный хотоос харих замдаа онгоцонд аварга болж байсан бол өнгөрсөн онд Краснодар руу явах замдаа лигийн түрүүг хүртэж байв.  

Питерын довтлогч А.Зюба медалиа гардан авахдаа “Deadpool” – ийн өмсгөлтэй индэр дээр гарч ирснээр тоглолтын дараа ч анхаарлын төвд байж тэр өдрийн баатар нь гэдгээ дахин харуулав.

“Энэ бол Deadpool. Тэр бүх зүйлийг хийж чаддаг бөгөөд түүний бусад баатраас илүү зүйл бол нөхөн төлжих чадвар. Тэгэхээр энэ чанар нь надтай яг таарч байгаа юм. Би энэ костюмтай болоод удаж байна, ямар нэгэн байдлаар олны өмнө ил болохыг хүсч байсан маань ингээд биеллээ. Одоо хурдхан шиг хувцас солих өрөөнд очоод хувцсаа тайлъе. Энэ дуулганд бараг амьсгал хураалаа, маш халуун байна. Баяр дөнгөж эхлэж байна. Дараагийн өмсгөл юу байхыг би мэдэхгүй байна. Магадгүй Scorpio эсвэл Batman байж болох л юм ” гэж Артем “Матч” телевизийн эфирт сэтгэгдлээ хуваалцав.

ЕХХ-ны Шигшээ багуудын хороо өнгөрөгч Даваа гарагт хуралдлаа. Уг уулзалтаар Ковид-19 цар тахалтай холбогдуулан шигшээ багууд ирэх Евро 2020 тэмцээнд 26 тамирчны бүрэлдэхүүнтэй оролцохоор болсон байна.

Өмнө нь шигшээд 23 тоглогч дуудагддаг байсан бол энэ удаад 26 залуу буурал тивийн аваргын төлөө эх орноо төлөөлөхөөр болжээ. Энэхүү шийдвэр нь ирэх улирлын өмнө тоглогчдод ирэх ачааллыг бууруулах мөн коронавирус тархсан тохиолдолд дасгалжуулагч нарт илүү өргөн бүрэлдэхүүнтэй байх боломжийг олгож буй явдал юм.

Өнгөрөгч шигшээ багийн цугларалтын үеэр Бельгийн дасгалжуулагч Роберто Мартинес “Бүрэлдэхүүнд багтах тоглогчдын тоо нэмэгдэх нь сайн зүйл. Энэ нь дэлхийн хөлбөмбөгийн өнөөгийн нөхцөл байдалд гарсан өөрчлөлтүүд, таван сэлгээ хийх эрхтэй болсон, цар тахлын тодорхойгүй байдал, тоглогчдын ачааллаас үүдсэн бэртэл гэмтэлтэй холбоотой учир зайлшгүй шаардлагатай” хэмээн мэдэгдсэн. Мөн Италийн шигшээгийн дасгалжуулагч Роберто Манчинез үүнийг дэмжиж байгаа илэрхийлээд байсан ба ийнхүү тэдний хүсэл биелэлээ олжээ.

Тэгвэл уг шийдвэр хамгийн сайнаар нөлөөлөх багийг “Атлетик” сайтын зүгээс Английн шигшээг гэж үзэж байна. Учир нь тэдний сүүлд дуудагдсан бүрэлдэхүүнд олон авьяаслаг залуу тоглогч багтаагүй билээ. Энэ дунд Александр Арнолд, Жеймс Маддисон, Жек Грилиш, Харри Уинкс зэрэг клубдээ чухал үүрэг гүйцэтгэдэг залуус байсан юм.

Английн премьер лигийн Алдрын танхимд нэрээ мөнхөлж буй анхны хоёр тоглогчийн нэг нь Аугаа Арсеналын домогт довтлогч Тиерри Даниел Анри байх жамтай байжээ. Арсэн Вэнгэр түүнийг 1999 онд Ювэнтусаас авчирснаас хойш нийт 258 тоглолтод 175 гоол, 74 ассисттай Арсеналын замналаа өндөрлөсөн байдаг. Энэ хугацаанд хоёр удаа АПЛ-ийн түрүүг авахдаа дөрвөн удаа лигийн мэргэн буучаар тодорсон. Арсеналын бүх цаг үеийн мэргэн буучдын эгнээг тэргүүлдэг тэрбээр өөрөө ийнхүү ярьж байна.

Хөлбөмбөгийг өөрчилье гэж бодож байсан минь үнэн юм. Цом өргөх нэг хэрэг, гоолын тоогоор тэргүүлэх ч бас нэг хэрэг, харин чи өөрийн тоглодог байрлалаа өргөж чадсан уу гэдэг бол бүр өөр хэрэг шүү. Ноён Дэвид Дэйн надад Иан Райтын бичлэгтэй диск өгөөд “Тиерри, чи ийм юм л хийх ёстой” гэж хэлж байсныг санаж байна. Хөөх, оролдоод үзье ээ л гэсэн.

Алан Шийрэртэй зэрэгцээд ингээд Премьер лигийн Алдрын танхимд нэрээ мөнхлүүлнэ гэдэг бол ёстой онцгойгоос онцгой юм. Бага байхдаа зүгээр л хөлбөмбөгийн гуталтай болохыг л бодож явдаг байсан бол одоо ингээд Алдрын танхим яриад байж байх юм гэж хэн бодох билээ. Замналынхаа турш би зорилгын төлөө хамаг хүчээ дайчлан зүтгэсээр ирсэн, яагаад гэвэл фэнүүд үүнийг л харахыг хүсдэг. Анх тоглож эхэлж байхад минь чи алдрын танхимд нэрээ мөнхлүүлнэ гэсэн бол би итгэх ч үгүй байсан. Энэ бол жинхэнэ нэр төрийн хэрэг.

Өмнө нь Арсеналын мэргэн буучдыг тэргүүлж асан Иан Райт: Жигүүрээс төв рүү гоолоор бөмбөгдөөд л ороод ирсэн. Зүүн хөл, баруун хөл, хурд. Сүрдмээр гамшигт үзэгдэл чамайг чиглээд ирнэ л гэсэн үг.

Ливерпүүлийн төвийн хамгаалагч асан Жэми Каррагер Арсеналын 2003/04 улирлын босоо аварга “Ялагдашгүй” бүрэлдэхүүний эсрэг тулж байсан тухайгаа ийнхүү дурсав: Тиерри Анри, “Ялагдашгүй” багийн эсрэг тулна гэдэг миний бодлоор хөлбөмбөг дэх хамгийн хэцүү ажил болно. Мотоциклтой давхиад байгаа юм шиг л санагддаг байсан. Өөдөөс нь тоглоно гэж ёстой хар дарсан зүүд.

Ливерпүүл, Тоттенам клубын хагас хамгаалагч асан Жэми Рэднапп: Зарим нэг тоглогчдын эсрэг талбайд гарах гээд хонгилд зогсож байхдаа л “Өнөөдөр ч балрах нь дээ” гэж бодогддог. Үнэнийг хэлэхэд би түүнээс бүр балмагддаг байсан шүү.

Зургийн эх сурвалж: hierry-henry-first-inductees-premier-league-hall-fame

Мэдээлэл бэлдсэн: Д.Цогчулуун

Английн “Тоттенхэм” клуб дасгалжуулагч Жозе Моуриньюг халлаа. Өдгөө 58 настай португал мэргэжилтэн 2019 оны арваннэгдүгээр сард тус албанд очсоноосоо хойш буюу 19 сарын дараа үүрэгт ажлаасаа чөлөөлөгдөв.

Хойд Лондоны клуб өнгөрсөн даваа гарагт Жозе Моуринью болон түүний туслахаар ажиллаж байсан Жоа Сакрамэнто, Нуно Сантош, Карлос Лалин, Жиованни Керра нарыг халсан юм.

Ж.Моуриньюгийн халагдсан шалтгаан бүрэн тодорхой болоогүй байгаа ч “Тоттенхэм” клуб Европын супер лигт нэгдсэнийг эсэргүүцэн даваа гарагийн бэлтгэлээ тасалсан тул удирдлагууд нь ийм шийдвэр гаргалаа гэж Английн хэвлэлүүд онцолж байна.

Хэдийгээр албан ёсоор баттай болоогүй ч ийн хардах үндэслэл бий. Европын супер лигт орно гэж зарласнаас ердөө нэг хоногийн дараа, “Карабао” цомын шигшээд “Манчестер Сити”-тэй тулахаас зургаан хоногийн өмнө ийм шийдвэр гаргасан нь гэнэтийн явдал байв.

“Тоттенхэм” клуб аргентин мэргэжилтэн Мауриссио Почетинног үүрэгт нь ажлаас нь чөлөөлөөд Ж.Моуриньютой дөрвөн жилийн гэрээ байгуулсан. Энэ хугацаанд тэрбээр жилийн 19.3 сая ам.доллар халааслах гэрээтэй. Түүний энэ гэрээ тухайн үед Англидаа “Манчестер Сити”-гийн босс Пэп Гуардиолагийн дараа орох өндөр гэрээгээр тооцогдож байв.

Одоогоор түүний гэрээг хугацаанаас нь өмнө цуцалсан төлбөртөө хэдийг өгөх нь олон нийтэд зарлагдаагүй байна. Гэхдээ Ж.Моуринью өмнө “Челси” (хоёр удаа), “Манчестер Юнайтед” клубээс ойролцоогоор 50 сая фунтын нөхөн төлбөр авсан гэдэг. Тодруулбал, “Челси”-гээс анх гэрээгээ цуцлахдаа 23.07 сая фунт “халаасалсан” бол дараа нь 8.3 саяыг олжээ. Харин “Манчестер Юнайтед”-аас явахдаа 19.6 саяын төлбөр авсан гэнэ. Харин Испанийн “Реал Мадрид” түүнд хэдийг өгснөө олонд дэлгээгүй юм. Одоо “Тоттенхэм”-ээс “ажилгүйдлийн тэтгэмжээ” авбал нийт дүн нь 100 сая фунт давна гэж “football london” цахим сэтгүүл тооцоолжээ.

Жозегийн хувьд халагдаж байгаа нь сонин биш. Харин “Тоттенхэм”-д цом авч чадалгүй “хөөгдсөн” нь замналынх нь анхны тохиолдол болсон гэнэ.

Ж.Моуриньюг “Тоттенхэм”-ийн тоглогчдын хөгжил хариуцсан дасгалжуулагчаар ажиллаж буй Райан Мэйсон түр орлох юм. Р.Мэйсон одоо дөнгөж 29 настай ч гурван жилийн өмнө эрүүл мэндийн шалтгаанаар хөлбөмбөгчний замналаа төгсгөсөн. Үүнээс хойш “Спэрс”-ийн арын албанд ажиллаж буй.