ОХУ-ын хөл бөмбөгийн шигшээ багийн дасгалжуулагч Станислав Черчесовыг үүрэгт ажлаас нь чөлөөллөө. Хойд хөршийн баг сүүлийн таван жил түүний удирдлага доор нийт 57 тоглолт хийж 24 ялалт, 13 тэнцээ, 20 ялагдал амссан байна. Оросын шигшээг удирдаж байсан дасгалжуулагчдын дундаас тэрээр оролцсон тоглолтын тоогоор хоёрдугаар байрт байдаг билээ. Харин түүний урд 1994-1996, 1999-2002 онуудад шигшээгийн дасгалжуулагч байсан Олег Романцев бичигддэг юм.

Оросын холбооны улсын шигшээ багийн дасгалжуулагчид

ОХУ-ын шигшээ багийн шинэ ахлах дасгалжуулагчийн албан тушаалд нэр дэвшигчдийн жагсаалтад Германы шигшээ багийн экс дасгалжуулагч Иоахим Лёв, Португали мэргэжилтэн Андре Виллаш-Боаш, Германы залуучуудын шигшээ багийн ахлах дасгалжуулагч Стефан Кунз нар багтжээ. Мөн үүнээс гадна “өөрсдийн” хүмүүс буюу орос дасгалжуулагчид дундаас Казань хотын “Рубин” багийн  хуучин дасгалжуулагч Курбан Бердиев болон “Локомотив” багийг гурвантаа аваргын индэрт аваачсан Юрий Сёмин нар яригдаж байна.

Хорват 3:5 Испани

Хэсгийн шатны сүүлийн тоглолтоос эрхээ өвөртөлсөн хоёр баг энэ үдэш туллаа. Өнгөрөгч ДАШТ-ий дэд аварга Хорват болон ялагдашгүй армада. Тоглолт Копенхаген хотын “Паркен” цэнгэлдэхэд  явагдаж, цаг агаар нарлаг сайхан байсан хэдий ч талбай дээр гоолын бороо асгарлаа.

Эхний гоолыг Испанийн залуу авьяастан Педри өөрийн хаалганд оруулсан юм. Гэхдээ энэ түүний алдаа гэхээсээ илүү хаалгач Унай Симоны хариуцлагагүй үйлдэл байв. Тэрбээр Педригийн дамжуулсан сул бөмбөгийг тогтоож чадалгүй эх орныхоо хилийн зураас мэт шугамаар давуулчихав. Гэхдээ Луйс Энрикегийн залуус түүний алдааг засч эхлэв. Эхний хагасын төгсгөлд Пабло Сарабиа тоог тэнцүүлсэн бол завсарлагааны дараа Цезар Азпиликуэта, Ферран Торрес нар давамгайллыг авчирлаа. Ийнхүү тэргүүллийг авсан испаничууд хэт их тайвширсан уу гэмээр тоглолтыг энэ үеэс үзүүлж эхлэв. Гарааны хоёр ч хамгаалагчаа тоглолтын дундуур сольсон тэдний хамгаалалтын  зохион байгуулалт эрс муудлаа. Эсэргээрээ Златко Даличийн солилцоонууд үр дүнгээ өгч 85 дахь минутад Мислав Оршич, сунгасан цагт Марио Пасалич нар гоолдож ямартай ч бүтэн амьсгаа авахтай болов.

Гэхдээ өөр нэг эрхэм энэ тоглолтын шийдсэн гэхэд буруудахгүй. Тэр бол Испанийн шигшээ багийн довтлогч Алваро Мората. Испани эр энэ тоглолт төдийгүй тэмцээний турш тааруу формтой байж олон сайхан боломжийг салхинд хийсгэж байсан бол чухал мөчид баатар нь байж чадлаа. Тэрбээр 100 дахь минутад Дани Олмогийн дамжуулалтыг солгой хөлөөрөө солиотой төгсгөж давуу байдлыг авчирсан юм. Гэхдээ гоолын самбарт нэрээ гаргах тамирчин дуусаагүй л байлаа. Моратагийн гоолоос гуравхан минутын дараа “Реал Сосьедад” клубын довтлогч Микел Ояарзабал эцсийн цэгийг тавьж армадачууд аялалаа үргэлжлүүлэхээр боллоо. 

Тоглолтын дараа

Тоглолтын шилдгээр шалгарсан Испанийн шигшээ багийн ахлагч Серхио Бускетс: “Шөвгийн наймд шалгарна гэдэг бол бид сайн баг болсны илрэл. Өнөөдөр маш сайн байж хүнд өрсөлдөгчийг яллаа. ​​Бидний бэлтгэлжилт үнэхээр сайн байгаа бөгөөд тэмцээний турш сайжирсаар байна. “

Энэ тэмцээн сүүлийн евро нь байсан байх магадлалтай Лука Модрич “Бид азтай байдлаар тэргүүллийг авчихсан. Үүний дараа тэд илүү сайн байлаа. Бид зоондоо орж тэднийг довтлох боломж олгосон нь буруу байсан. Харин бид довтолж эхлэхэд нөхцөл байдал тэс өөр болсон. Нэмэлт цагийн эхлэлд бид тэднийг олсон дээр алхаж буй мэт л хүнд байдалд оруулсан. Хоёр ч сайхан боломжийг үүсгэсэн ч ашиглаж чадаагүй. Дараа нь тоглолт эргэсэн. Бидэнд дахиж эргэж ирэх хүч байсангүй.”

Франц 3:3 Швейцарь

4:5 Чөлөөт цохилт

Өдөр бүр өөр нэгэн сенсаци. Өчигдөрхөн нисдэг голландчууд гэртээ харьсан бол энэ удаад дэлхийн аваргууд үзэгч болно гэж хэн таамаглахав. Гарааны бүрэлдэхүүнээс харахад л Дидье Дешам гурван хамгаалагчтай хувилбар сонгож, Клемент Ленгле-ийг гаргасан нь түүнийг швейцарчуудаас жийрхсэн гэлтэй. Гэхдээ түүний сонгосон хамгаалагч хий ихтэй гэдгээрээ танигдсан залуу байлаа. 15 дахь минутад довтлогч Харис Сеферович түүний дээрээс салхийг хагаллаа.

Хэцүүхэн эхлэлтэй тулгарсан францчууд энэ үеэс уулгалан довтлох болов уу гэтэл тэгсэнгүй. Аюул тарихуйц довтолгоог ердөө зохион байгуулж чадахгүй байсан учир завсарлагаанаар Кингсли Команг сонгов. Энэ солилцоо ерөнхийдөө үр дүнгээ өгсөн гэхэд зөрөхгүй. Гэхдээ түүнээс өмнө багийн ахлагч Уго Ллорис 11 метрийн торгуулийн цохилтыг хаагаагүй бол тоглолт аль эрт шийдэгдэж магадгүй байв. Уг үйл явдлаас ердөө 4 минут 3 секундын дараа тооны харьцаа 2:1 болсон байлаа. Үүний дараа Пол Погба Португалын эсрэг хийх гээд чадаагүй гоолоо Янн Соммерын хаалганд хийж францчууд шөвгийн наймын тавцанд нэг хөлөө гаргачихав.

Гэхдээ бүх зүйл энэ үеэс өөрчлөгдлөө. 81 дахь минутад эхний гоолын эзэн Харис Сеферович тоог ойртуулсан бол сүүлийн минутад Марио Гавранович гоолдсоноор бид нэмэлт цаг үзэхээр боллоо. Гэхдээ 30 минутад нэмж хаалганы тор хөдлөлгүй байсаар торгуулийн цохилттой нүүр тулав. Чухал мөчид шилдэг тоглогчид алддаг ёсоор Килиан Мбаппе эцсийн цохилтыг алдаж том зорилго тээн ирсэн дэлхийн аваргууд хоосон хоцорлоо.

Тоглолтын дараа

Францын шигшээ багийн төвийн хамгаалагч Рафаел Варане “Үнэхээр сэтгэл дундуур байна. Эхний үед тэд биднийг бүтэн илүүрхсэн. Харин хоёрдугаар хагаст бид эргэж ирсэн ч мөн адил тэдэнд эргэж ирэх болом олгочихлоо. Торгуулын цохилтын тухайд энэ бол азны тоглоом шүү дээ. Бид нэмэлт цагт л гоол оруулж тоглолтын шийдэх ёстой байлаа.”

Килиан Мбаппегийн цохилтыг хаасан Янн Соммер “Ямар гээч тоглолт вэ, ямар янзын хөлбөмбөг вэ? Энэ бол үнэхээр гайхалтай зүйл. Бид өнөөдөр зүрх сэтгэлээрээ тоглолоо. Торгуулын цохилт алдсаны дараа үнэхээр хүнд нөхцөл байдал үүссэн. Гэхдээ залуус маань эргэн ирж чадсан. Тэднээр бахархаж байна. Бид үргэлж бие биедээ итгэдэг. ”

Нидерланд 0:2 Чех

Хөлбөмбөгийн арвин их түүхийн эзэд болох нисдэг голландчуудын аялал энэ хүрээд өндөрлөлөө. Тэд энэ тоглолтод эсрэг багаасаа бүхий л зүйлээрээ дутмаг байсан гэхэд хилсдэхгүй. Гэхдээ төвийн хамгаалагч Матиас Де Лигт талбайг орхих хүртэл нөхцөл байдал тийм ч муу байсангүй. Тэрбээр 55 дахь минутад хаалгачийн эсрэг гарч болзошгүй довтолгоог гараараа зогсоосны улмаас улаан хуудас хүртэж талбайг орхисон юм. Энэ үеэс л чехүүд тоглолтыг бүтэн хяналтандаа байлгаж эхлэв. Ийнхүү 68 дахь минутад хагас хамгаалагч Томаш Холеш салхийг хагалсан бол 80 дахь минутад Патрик Шик эцсийн цэгийг тависнаар тэд шөвгийн наймд шалгарлаа. Чехүүд хамгийн сүүлд 2012 онд энэ шатанд хүрч байсан юм. Тэдний дараагийн учраа Данийн шигшээ баг. Харин улбар шарууд 2008 оноос хойш анх удаа хасагдах шатанд шалгарсан ч эхний тоглолтдоо бүдэрлээ.

Тоглолтын дараа Матиас Де Лигт “Мэдээжийн хэрэг сэтгэл гонсойж байна. Бид үндсэндээ миний алдаанаас болж хожигдлоо. Одоо бодоход би бөмбөгийг ойлгох ёсгүй байж. Ерөнхийдөө бид тоглолтыг хяналтандаа авсан байсан. Ялангуяа эхний хагаст хэд хэдэн боломжийг үүсгэсэн. Харин чехүүд олон боломж үүсгэсэн гэж би бодохгүй байна. Гэхдээ улаан хуудас бүхнийг өөрчилчихлөө.”

Тоглолтын шилдгээр эхний гоолын эзэн Томаш Холеш шалгарсан юм. Тэрбээр энэ талаар “Би ихэвчлэн хамгаалалтын үүрэг гүйцэтгэдэг. Иймээс эсрэг багийн хамгаалагчид намайг довтолно гэж тооцоолдоггүй бөгөөд үүнийг зарим үед давуу тал болгон ашигладаг. Өнөөдөр сайн тоглосондоо баяртай байна.”

Бельги 1:0 Португал

Евро 2020 тэмцээний сонгодог нэгэн тулаан энэ үдэш явагдлаа. Цомыг хамгаалагч Португалын шигшээ багийн эсрэг улаан чөтгөрүүд. Талбайд гарсан 22 хөлбөмбөгч төдийгүй сэлгээний сандал дулаацуулж буй тоглогчид нь хүртэл дэлхийн шилдгүүдээс бүрдсэн хоёр багийн тоглолтыг дэлхий нийт таалан чих даран хүлээж байлаа. 

Нүдээ цавчих завгүй 90 минутын хөлбөмбөгийн ялагчаар Бельгийн шигшээ баг тодорлоо. Цорын ганц гоолыг 42 дахь минутад зүүн жигүүрийн хамгаалагч Торган Азар торгуулийн шугамны гаднаас цөм цохиж оруулсан юм. Энэ цагаас хойш португалчуудын довтолгоо улам ширүүсч тоглолтын турш хаалгаруу 23 удаа цохисон ч тусыг эс оллоо. Ийнхүү Кристиано Роналдогоор ахлуулсан европын бразилчууд гэртээ харихаар боллоо.

Бельгийн шигшээ баг дараагийн шатанд шалгарсандаа баярлаж болох ч тэд хоёр сүпер одоо бэртэлд алдлаа. Тэд бол ах Азар болон Кевин Де Брюйне. Тэдний бэртлийн талаар дасгалжуулагч Роберто Мартинез “Тэднийг яаж байгааг хэлэхэд эрт байна. Кевиний хувьд түүний шагай бэртсэн. Тэр хоёрдугаар үед тоглохыг оролдсон боловч бүтээгүй. Харин Эдений хувьд булчин зовиурласан. Ямартай ч бид тэдний оношлогооны хариуг хүлээх хэрэгтэй.”

Тоглолтын шилдгээр шалгарсан Торган Азар “Иймэрдүү тоглолтуудад гарсан боломжоо дээд зэргээр ашиглах хэрэгтэй. Бид чадлаа. Хаалгач намайг нөгөө буланд нь цохино гэж бодсон тул бөмбөг орлоо. Эх орныхоо төлөө гоол оруулсандаа баяртай байна.”

Португалийн дасгалжуулагч Фернандо Сантуш “Бид гунигтай байна. Зарим тоглогчид маань хувцас солих өрөөнд уйлж байна. Тэд бүх зүйлээ зориулсан шүү дээ. Бельги хаалгаруу 6 удаа цохиод л гоол оруулсан. Бид 29 цохилт хийж, хоёр ч удаа шон онолоо. Ялагдал бол ялагдал. Надад яг одоо хэлэх олон үг алга байна. Бид бүгд ялахыг хүсч байсан. Финалд шалгарч чадна гэдэгтээ ч итгэлтэй байлаа. Үр дүнд ямар ч шударга бус зүйл байхгүй ээ. Тэд гоол оруулсан. Харин бид чадсангүй.”

Уэльс 0:4 Дани

Хасагдах шатанд шалгарч олон хүний таамгыг эвдсэн уэльсчүүд өдрийн эхний тоглолтыг хийлээ. Тэдний эсрэг энэ тэмцээний хамгийн их бэртэл гэмтэлтэй тулгарч буй даничууд. Гэхдээ бэртэл гэмтэл ч бай, талбай дээр уэльсчүүд ч бай тэднийг зогсоож дийлэх зүйл энэ үдэш байсангүй. Тоглолтын эхнээс л аюул тарьж байсан тэд 27 дахь минутад зорилгодоо хүрч чадлаа. Гоолын эзэн Каспер Долберг. Тэрбээр хоёрдугаар хагас эхлээд удалгүй дахин нэг гоолыг хаалганд шигтгэснээр Уэльсийг улам л хүнд байдалд оруулав. Гэхдээ энэ байдлаас хэрхэн гарах аргаа тэд хараахан олж чадсангүй. 88 дахь минутад жигүүрийн хамгаалагч Жоаким Маехли энэ тэмцээний хоёр дахь гоолоо оруулсан юм. Тоглолтын эцсийн цэгийг азгүй, мэдрэмжгүй гэж олон фанатуудаас зэмлэл сонсдог “Барселона” клубын довтлогч Мартин Брэйтвейт оруулж энэхүү тэмцээнд анх удаагаа онооны самбарт нэрээ гаргалаа.  

Ийнхүү даничууд хамгийн сүүлд 2012 оны Еврод шөвгийн наймд хүрч байсан бол дахин тавцанд гарч ирлээ.

Энэ талаар дасгалжуулагч Каспер Хюлманд “Үүнийг бодит гэхэд итгэмээргүй юм. Залуусаа тэмцэж байгааг нь хараад би үнэхээр биширлээ. Хэн ч талбайд гарсан хийх ёстойгоо хийж маш сайн тоглож байна. Энэ залуучууд бол жинхэнэ дайчид.”

Харин тэмцээнийг орхиж буй Уэльсийн шигшээ багийн ахлагч Гарэт Бэйл “Тэд бол сайн баг. Бид өмнө нь тэдэнтэй тоглож байсан,тэр үед тэд маш сайн зохион байгуулалттай байсан. Энэ удаад ч ялгаагүй тийм байж чадлаа. Мэдээж хэрэг тэдний өрсөлдөөнд маш том амжилт хүсье. Харин бид гэртээ харих боллоо. Гэхдээ есөн сараас бид өөр нэгэн сорилтоо эхлүүлэх болно.”

Итали 2:1 Австри

Өдрийн сүүлийн тоглолтыг төгс амжилттай яваа италичууд хийлээ. Гэхдээ тэд төгс формоо хараахан үзүүлж чадсангүй. Учир нь Давид Алаба тэргүүтэй австричууд энэ тоглолтод маш сайн бэлдсэн байлаа. Тэд үндсэн цагт хаалганы торыг хөдөлгөж чадсан ч харамсалтай нь отон тоглолт болж тооцогдсонгүй. Ийнхүү өрсөлдөөнд 90 минутад хангалтгүй байлаа. 

Харин нэмэлт цагт Роберто Манчини сайн бэлджээ. Түүний хийсэн сэлгээнүүд тоглолтыг шийдэж орхив. Нэмэлт цаг эхлээд тавхан минут өнгөрч байхад “Ювентус” клубын залуу авьяастан Федерико Киеса багтаа тэргүүллийг авчирлаа. Удалгүй мөн л сэлгээгээр гарч ирсэн залуу Маттео Пессина тоог холдуулж италичууд энэ цагаас л тайвшрах шиг болов. Үлдсэн хугацаанд австричууд нэг гоолыг оруулсан ч ямар нэгэн тусыг эс оллоо. Ийнхүү тэд гэрийн зүг жолоо барилаа.

Тоглолтын шилдгээр Леонардо Спиназзола, тодорсон ба тэрбээр: “Ялалт байгуулсандаа сэтгэл хангалуун байна. Бид өнөө шөнө жинхэнэ багаараа тоглосон гэж бодож байна. Шаардлагатай үед бид хамтдаа хамгааллаа. ​​Нэмэлт цагийн өмнө бид эцсийн дамжуулалтууд дээрээ анхаарах хэрэгтэй гэж үзсэн. Эцэст нь гоолуудаа оруулж чадлаа. “

Австрын шигшээ багийн тоглогч Марко Арнаутович “Юу хэлэхээ мэдэхгүй байна. Хэрэв аз таарсан бол бид үндсэн цагт хожих байлаа. Бид үнэхээр сайн тоглож, боломж бүрдүүлсэн. Иймээс үүнийг илүү сайн үр дүнтэй дуусгаж болох байсан. Багийнхаа бүх хүмүүст талархал илэрхийлье. “

Украин 2:1 Хойд Македон

Энэ өдрийн эхний тоглолтыг Шевченкогийн залуус хийлээ. Тэдний эсрэг анх удаагаа зодоглож буй македончууд. Хоёр баг хэсгийн эхний тоглолтдоо ялагдал амссан учир зайлшгүй оноо хэрэгтэй байлаа. Энэ ч үүднээс довтолгоо зонхилсон тоглолт явагдаж багууд 30 удаа хаалгаруу цохиод амжжээ. Тоглолтын 29 дэх минутад өнгөрсөн тоглолтод гайхалтай нэгэн гоолыг оруулаад байсан Андрей Ярмоленко салхийг хагаллаа. Үүнээс ердөө тавхан минутын дараа тэрбээр ганган  дамжуулалт өгч Роман Яремчук гайхалтай төгсгөснөөр тоо улам холдлоо. Гэхдээ македончууд бууж өгсөнгүй. 57 дахь минутад Эзган Алиоски тооны харьцааг ойртуулсан ч үлдсэн хугацаанд онооны самбарт нэрээ гаргах хүн олдохгүй байснаар эцсийн шүгэлтэй золголоо. 

Сонирхолтой нь, багууд 11 метрийн торгуулийн цохилтыг аль аль нь алдсан юм.

Украины цохилтыг гүйцэтгэсэн Руслан Малиновский “Би жаахан харамсаж бас сэтгэл дундуур байна. Тоглолтын үеэр анхаарлаа төвлөрүүлэх хэрэгтэй. Иймээс үргэлжлүүлэн анхаарлаа алдахгүйг хичээж тоглосон учир ялж чадлаа. Хэрвээ бид оноо алдсан бол би маш их бухимдах байсан байх.”

Хойд Македонийн шигшээ багийн ахлагч Горан Пандев: “Ийм том тэмцээнд 45 минут сайн тоглох нь хангалтгүй юм. Бид бүх тоглолтод хоёрдугаар үед тоглосон шигээ тоглох ёстой. Ялагдсанд уучлаарай. Бид оноо авах боломжтой байлаа. Гэхдээ бид кареертаа анх удаа л ийм тоглолтод оролцож байна шүү дээ. “

Хэсгийн нөгөө тоглолтоос шалгаалан Хойд Македончууд хэсгээс гарах боломжгүй боллоо.

Дани 1:2 Бельги

Битүүхэндээ энэ тоглолт Эриксенд зориулагдлаа. Тоглолтын 10 дахь минутад тоглолт зогсч цэнгэлдэх даяараа түүнд баяр хүргэсэн юм.

Цэнгэлдэх дүүрэн хөгжөөн дэмжигчдийнхээ урд улаан чөтгөрүүдийг хүлээн авсан даничууд энэ тэмцээний нэгэн рекордыг тогтоолоо. 99 дэх секундэд Юсуф Поулсен багтаа тэргүүллийг авчирсан нь энэ тэмцээний түүхэнд 2-т орох хурдан гоол болсон байна. Хамгийн хурдан гоол 2004 онд Орос, Грекийн тоглолтын орсон ба грекчүүдэд ердөө 67 секунд хангалттай байжээ.

Гэхдээ энэ өдөр даничууд хүссэн үр дүнгээ авч чадсангүй. Тэдний эхний үеийн тоглолт тун давгүй болж байсан ч нэгэн эрхэм энэ бүхнийг үгүй хийлээ. Тэр бол Кевин Дэ Брюйне. Тэр талбайд гарч ирсэн даруйдаа л нөлөөгөө үзүүлж, 54 дэх минутад гоолын дамжуулалтыг Торган Азардад хаяж тоог тэнцүүллээ. Харин дүүгийнхээ дамжуулалтын өрийг ах Азар 70 дахь минатад дарсан юм. Түүний хаясан бөмбөгийг нөгөө л Кевин Дэ Брюйне хаалгачын баруун доод буланд төгсгөж улаан чөтгөрүүд хэсгээс гарах эрхээ авлаа. 

Тэрбээр гоолын баяраа тэмдэглээгүй бөгөөд энэ талаараа “Мэдээж хэрэг би үнэхээр баяртай байсан л даа. Гэхдээ би энд цугласан хөгжөөн дэмжигчдийг хүндэллээ. Би Эриксений унасан талбайн хэсэгт очсон. Тайван байхыг хичээлээ.”

Тоглолттой холбоотой үзүүлэлт:

• КДБ гоол түүний анхны ЕАШТ-ий гоол боллоо. Тэр өмнө нь 2012, 2016 онуудад оролцож байсан ч хараахан гоол оруулж амжаагүй байжээ.
• Дрис Мертенс шигшээ багийнхаа төлөө 10 дахь тоглолтдоо оролцлоо. Тэр энэ амжилтаараа улаан чөтгөрүүдийн бүх цаг үед тавдугаарт бичигдэж байна.
• Даничууд хамгийн сүүлд 2000 оны Еврод эхний хоёр тоглолтдоо хожигдож байжээ.
• Бельгүүд анх удаагаа хэсгийн эхний хоёр тоглолтдоо яллаа.

Нидерланд 2:0 Австри

Энэ өдрийг нисдэг голландчууд хаалаа. Тэд өнөөдөр тоглолтын бүхий л хэсэгт австричуудыг илүүрхэж ядах юмгүй буулгаж авлаа. 10 дахь минутад Дензел Думфрисын авчирсан торгуулийн цохилтыг Мемфис Дипай амжилттай гүйцэтгэж тэмцээний эхнээ гоолоо оруулсан юм. 

Хоёрдугаар хагас дундаа орж байхад М.Дипай гайхалтай довтолгооныг эхлүүлж нөгөө л Дензел Думфрис гүйцээснээр нисдэг голландчууд ялалт байгуулав. Тэд ингэснээр хэсгээс I байраар гарахаар боллоо.

Нидерландын дасгалжуулагч Франк Де Бур “Мемфис өнөөдөр пеналт амжилттай болгож мөн гайхалтай довтолгооныг эхлүүлээ. Гэхдээ тэр илүү ихийг хийж чадна. Өөрөө ч үүнийгээ мэдэж байгаа. Иймээс дараа дараагийн чухал тоглолтод тэр өөрийгөө батлах ёстой. Би түүнд итгэж байна.”

Тоглолттой холбоотой үзүүлэлт:

• Улбар шарууд сүүлийн 9 тоглолтдоо хоёр буюу түүнээс дээш гоол оруулаад байна.
• М.Дипай энэ тоглолтуудад 8 гоол оруулжээ.
• Нидерланд 7 тоглолт дарааллан Австрийг хожлоо. Австричууд 1990 оноос хойш тэднийг барсангүй

Финланд 0:1 ОХУ

Хэсгийн шатны хоёр дахь тоглолт үүгээр эхэллээ. Эхний тоглолтдоо тэс өөр үр дүн хүртсэн хоёр баг энэ удаад харилцан адилгүй зорилго тээж талбайд гарсан нь дамжиггүй. Учир нь оросуудад зөвхөн хожил хэрэгтэй бол финландууд оноо авах нь чухал байв. Таамаг ёсоор ч тоглолт эхэллээ. Оросууд санаачлагыг авч, сул орон зайг эрэлхийлж байв. Иймдээ ч эхний хагасын төгсгөлд Италийн “Аталанта” клубын довтлох чиглэлийн хагас хамгаалагч Алексей Миранчук өөрийн ур чадварыг гайхуулж буй мэт ганган гоолыг орууллаа. Хүссэн үр дүндээ хүрсэн оросууд үлдсэн хугацаанд сайн тоглолтоо хадгалснаар эхний оноогоо авлаа. Тэд хамгийн сүүлд 2012 оны Европын аваргын нээлтийн тоглолтод Чехийг хожсоноос /4:1/ хойш анх удаа ялалт байгуулжээ.

Гоолын эзэн Алексей Миранчук “Тийм ээ. Би гайхалтай гоол оруулсан. Гэхдээ энэ тийм ч чухал зүйл биш. Бид өнөөдөр зайлшгүй хожих шаардлагатай байсан. Иймээс бүгд л маш их хичээж тоглолоо. Гурван оноогоо ч авч чадлаа. Одоо энэ эрчээ алдахгүй байх хэрэгтэй. Учир нь энд зөвхөн шилдгүүд л цугларсан. Тиймээс тоглолт бүрт сайн байх нь чухал.”

Тоглолтын эхэнд финланд залуу Жоель Поханпало хаалганы торыг мялаасан ч тооцогдоогүй билээ. Энэ талаар багийн анд Паулус Арахури “Түүнийг хэр их зайтай отонд орсныг мэдэхгүй л дээ. Гэхдээ л бид тэргүүллийг авахад ойрхон байсан шүү. Ер нь тамирчид гоол ороход асар их эрч хүчийг мэдэрдэг. Харин тооцоогүй бол тэр эрч хүчийг сорох шиг л болдог. Вар өнөөдөр бидний талд байсангүй. Гэхдээ би залуустаа сэтгэл хангалуун байна. Хэдийгээр оросууд сайн байсан ч бидэнд хожих боломж байлаа шүү дээ.”

Турк 0:2 Уэльс

Тэмцээн эхлэхээс өмнө хамгийн шилдэг хамгаалалттай багийн нэгээр Турк нэрлэгдэж байлаа. Харин шүгэл дуугарсан цагаас тэд хараахан тийм байсангүй. Өмнөх тоглолтод гурван гоол алдсан тэд өнөөдөр хэрхэн хамгаалах нь сонирхол татаж байлаа. Тоглолтын эхнээс л Уэльсийн сүпер хослол болох Гарэт Бэйл, Аарон Рамси туркын хамгаалагчдыг ядах юмгүй аргалж байлаа. Энэ ч утгаараа 42 дахь минутад Гарэт Бэйлийн дамжуулалтаар Аарон Рамси салхийг хагаллаа. 

Сонирхуулахад, өмнө нь түүнийг гоолдсон тохиолдолд хэн нэгэн алдартан нас бардаг гэсэн статистик үргэлжилж байсан билээ. Гэхдээ энэ шөнө юу ч болсонгүй шүү. 

Хэсгээс гарахын тулд зайлшгүй оноо хэрэгтэй байсан туркууд үлдсэн хугацаанд бөмбөгийг илүүтэй эзэмшиж довтолж байсан ч төдийлөн аюул тарьж чадсангүй. Эсрэгээрээ Уэльсийн сөрөг довтолгоо аюултай болж байв. Иймдээ ч тоглолтын сүүлийн минутад Коннор Робертс эцсийн цэгийг тавьсан юм. Үдшийн шилдгээр багийн ахлагч Г.Бэйл тодорчээ. Гэхдээ тэрбээр энэ тэмцээний анхны 11 метрийн торгуулийн цохилт алдсан эрхэм болсон юм.

Тэрээр энэ талаар “Бид өнөөдөр хожлын төлөө талбайд гарсан. Ялалт байгуулсандаа баяртай байна. Мэдээж хэрэг би торгуулийн цохилт алсдсандаа бага зэрэг сэтгэл гонсойсон. Гэхдээ би үргэлжлүүлэн сайн тоглохыг хичээсэн. Иймдээ ч хоёр дахь дамжуулалтаа хаяж чадлаа. А.Рамсигийн хувьд тэр хэд хэдэн удаа торгуулийн талбай руу нэвтэрж орж байсан. Үүнийг нь би анзаарсан. Бидний ойлголцол сайн байлаа.”

Энэ тоглолт ЕАШТ-ий 300 дахь тоглолт болж түүхэнд үлдлээ.

Туркын шигшээ багийн дасгалжуулагч Шенол Гүнеш “Уэльсчүүд сайн байлаа. Ялангуяа урд талын гурав нь үнэхээр үр дүнтэй байж чадлаа. Тэд хэсгээс гарах сайхан боломжтой боллоо. Харин бид тоглолтыг тааруу эхлүүлсэн. Гэхдээ бага багаар хэмнэлээ олж эхэлсэн. Үүний дараагаар олон ч боломж үүсгэлээ. Гэвч гоол оруулж чадсангүй.”

Итали 3:0 Швейцарь

Энэ өдрийн сүүлийн тоглолт италичуудын давамгайллаар өндөрлөлөө. 26 дахь минутад Марко Верратиг орлон тоглож буй Мануэль Локателли Доменико Берардигийн гайхалтай дамжуулалтыг асуудалгүй төгсгөв. Гэхдээ онооны самбар дахь түүний гоол энэ хүрээд дууссангүй. Хоёрдугаар хагас эхлээд удалгүй тэрбээр торгуулийн шугамны гаднаас хаалгачийн зүүн буланд гайхалтай нэгэн цохилтоор бэлэг барьж тоог улам холдууллаа. Үлдсэн хугацаанд төдийлөн онцлох үйл явдал бололгүй тоглолт дуусах шатандаа орж байхад “Лацио” клубын довтлогч Чиро Иммобиле тэмцээний хоёр дахь гоолоо нэр дээрээ бүртгүүлж чадсан юм. Ийнхүү Роберто Манчинигийн залуус хэсгээс гарах эрхээ өвөртөллөө. Тэд хэсгийн сүүлийн тоглолтоо Уэльсийн эсрэг хийж хэдээр гарахаа шийдэх юм. 

Гэхдээ сайны хажуугаар саар мэдээ ч тэдэнд байлаа. Тоглолтын эхлэлд туршлагатай төвийн хамгаалагч Жоржио Кьеллинигийн гуянд зовуурь мэдрэгдсэн учир талбайг орхисон юм. Тэрээр маргааш өглөө Флоренцэд эмчийн үзлэгээр орохоор болжээ.

Тоглолтын шилдгээр Мануэль Локателли тодорсон юм. Итали залуу өмнө нь шигшээ багийн төлөө 11 тоглолтод оролцохдоо нэг гоолыг оруулж байсан бол өнөөдөр хоёрыг нэмлээ. 

Тэрбээр тоглолтын дараа “Шилдгээр нэрлэгдсэндээ баяртай байна. Гэхдээ би үүнийг багийхантайгаа хуваалцахыг хүсч байна. Учир нь бид нэг хамт олон шүү дээ. Эхний гоолыг би гэр бүлдээ зориулсан. Берардид бөмбөгөө дамжуулсны дараа би түүнийг юу хийхийг сайн мэдэх учир торгуулийн шугам руу дагаж гүйсэн. Ингээд л гоол орсон. Харин хоёр дахь гоолыг Италийн хөгжөөн дэмжигчдэд зориулсан юм. Учир нь бид тэднийг баярлуулахыг төлөө л тоглодог шүү дээ.”

Италичууд сүүлийн 10 тоглолтдоо гоол алдсангүй. Тэд энэ хугацаанд нэг тоглолтод хоёроос дээш гоол дунджилж нийт 31-ийг оруулжээ. Мөн 2018 оны 9 сард Португалд хожигдсоноос хойш 29 тоглолт дарааллан ялагдлын амтыг мэдрээгүй байна.

https://www.youtube.com/watch?v=3P41NnCrjiY

Унгар 0:3 Португал

Кристиано Роналдо тэргүүтэй европын бразилчууд гэгдэх Португалын шигшээ багийн аваргаа хамгаалах тэмцэл Унгарын шигшээгээр эхэллээ. Өмнөх тэмцээнээс ялгаатай нь энэ удаад байрлал бүр дээр дэлхийн шилдэгт тооцогдохуйц залуус эх орноо төлөөлөхөөр болжээ.

Шүгэл дуугарлаа. Тоглолтын эхнээс португалчууд бөмбөгийг илүүтэй эзэмшиж байсан ч аюул тарьж чадахгүй л байв. Эсрэгээрээ Унгарын хамгаалалт ч үнэхээр сайн ажиллаж байлаа. Гэхдээ тэд хүссэн үр дүнгээ авах боломжоо үндсэн цаг  дуусахаас зургаан минутын өмнө алдсан юм. Германы “Боруссиа Дортмунд” клубын зүүн жигүүрийн хамгаалагч Рафаэль Геррейро тун санамсаргүй байдлаас гоолдож орхив. Ийнхүү тэргүүллийг гартаа авсан ч португалчуудын сэтгэл ханасангүй. ЕАШТ-ий хамгийн олон гоол оруулсан амжилтын эзэн Кристиано Роналдо энэ үдэш ганзага хоосонгүй байж хоёр гоолыг хаалганд шигтгэсэн юм. Ийнхүү тэрбээр тус тэмцээнд 11 гоолтой боллоо. Гэхдээ түүний дээд амжилтууд үүгээр дууссангүй. Португал эр таван еврод оролцсон,мөн  гоолдсон анхны тоглогч болжээ.

Тэрбээр тоглолтын талаар “Мэдээж хэрэг хамгийн чухал зүйл бол ялалт байгуулах байдаг. Хэцүүхэн тоглолт боллоо. Учир нь унгарчууд маш сайн хамгааллаа. Гэхдээ бид гурван гоол оруулж чадсан. Мөн намайг хоёр гоол оруулахад тусалсан багийхандаа маш их баярлаж байна.”

https://www.youtube.com/watch?v=0dQMNYcwq6I

Франц 1:0 Герман

Өдрийн гэлтгүй энэ тэмцээний хамгийн онцлох тоглолт өнгөрөгч шөнө явагдлаа. Учир нь сүүлийн хоёр дэлхийн аваргууд “Аллианз Арена”-д хоорондоо тулсан юм. Том тоглолтыг жижиг алдаа шийддэг гэлцдэг. Яг л энэ зарчмаар, Германы шигшээ багийн туршлагатай хамгаалагч Матс Хуммельс тоглолтын 20 дахь минутад өөрийн хаалганд гоолдлоо. Ийнхүү герман машинууд тэнцээний гоолыг хайсаар байсан ч Францын хамгаалалт өөгүй байж чадлаа. 

Тоглолтын шилдгээр франц залуу Пол Погба нэрлэгджээ. Түүний талаар домогт тоглогч Роберт Пирес “Погба өнөөдөр үнэхээр гайхалтай байлаа. Бид түүнийг ямар техниктэй тоглогч вэ гэдгийг мэднэ. Үүнээс гадна тэр бие бялдрын хувьд ч ямар ч асуудалгүй байж чадлаа. Тоглолтын шилдгээр тодорсонд нь маргаад байх зүйл алга” гэжээ.

Германы шигшээг сүүлийн тэмцээндээ удирдаж буй Йоахим Лёв: “Ширүүн өрсөлдөөн байлаа. Залуус маань эцсээ хүртэл тэмцлээ. Би багаа илүү хичээх ёстой байсан гэж буруутгаж чадахгүй ээ. Тэд талбай дээр бүх зүйлээл зориуллаа.”

Хоёр багтай холбоотой:

• Дидье Дешамын залуус 19 тоглолт дарааллан ялагдсангүй. /16 хожил 3 тэнцээ/
• Францчууд Германтай хийсэн сүүлийн зургаан тоглолтондоо хожигдоогүй.
• Герман машин анх удаагаа Еврогийн нээлтэд хожигдлоо. Гэхдээ тэд энэ тэмцээний түүхэнд 50 тоглолт хийсэн анхны улс болжээ.

Шотланд 0:2 Чех

Өнөөдрийн эхний тоглолтыг 25 жилийн дараа тивийнхээ аваргад зодоглож буй шотландчууд хийлээ. Олон мэргэжилтнүүд сенсаци тарих багаар тэднийг нэрлэж байв. Харамсалтай нь бодит байдал дээр хараахан тийм байсангүй. Тоглолтын 42 дахь минутад “Байер 04 Леверкузен”  клубын довтлогч Патрик Шик тооны харьцааг нээж чехүүд эхний үеийг тэргүүлэв. Хоёрдугаар хагас эхлээд удалгүй өнөөх л чех эр дахин хаалганы торыг хөдөлгөснөөр багтаа гурван оноог авчирлаа. Түүний хоёр дахь гоол энэ тэмцээний түүхэнд үлдсэн байна. Учир нь хаалганаас 45.44 метрийн зайнаас хаалгачийг хэмжиж оруулсан нь ЕАШТ-ий хамгийн холоос оруулсан гоол болон бүртгэгджээ. 

Тэрбээр тоглолтын дараа “Эхний тоглолт гэдэг үнэхээр чухал байдаг. Шотландчууд хүнд өрсөлдөгч ч гэсэн бид тулаанд бэлэн байсан. Хожсондоо маш их баяртай байна. Хоёр дахь гоолын тухайд би хаалгачийг урагш гарсныг анзаарсан. Эхний үед иймэрхүү нөхцөл байдал үүсч магадгүй байсан л даа. Иймээс би дахиж боломж гарахыг хүлээж байлаа. Дараагийн тоглолт Хорват. Тэдэнтэй тоглох өнөөдрийхөөс өөр байх болно. Гэхдээ бид бэлтгэлээ сайн базаанаа. Бидний эсрэг тоглох ямар ч багийн хувьд хэцүү байна. Учир нь бид багаараа маш их хичээж тоглодог. ”

Өнөөдөр шотландчуудаас ганц гялтайх зүйл нь багийн ахлагч Энди Робертсон байлаа. Шотланд залуу тус тоглолтод зургаан түлхүүр дамжуулалтыг өгсөн байна. Тэрбээр сэтгүүлчдэд “Шотланд улс биднийг сайн тоглохыг хүлээж байсан байх. Бид ч маш их догдолж өөрсдөдөө итгэлтэй байлаа. Манай залуус өнөөдөр муу байлаа гэж би хэлмээргүй байна. Зүгээр л бид боломжуудаа ашиглаж чадсангүй. Том тэмцээнд хэн боломжоо ашигласан нь хождог. Чех чадсан, харин бид үгүй. Дараагийн удаа өшөө илүү хичээх хэрэгтэй. Өнөөдөр том сургамж боллоо. ”

https://m.youtube.com/watch?v=r6b-lSMw1rA

Польш 1:2 Словак

Өнөө цагийн хамгийн шилдэг довтлогчоор удирдуулсан Польшчууд тун тааруу тоглолтыг үзүүлэв. Тэд энэ өдөр гурван онооноос гадна багийн чухал нэгэн тоглогчоо мөн адил алдлаа. Тоглолтын 62 дахь минутад тэдний уураг тархи болсон хагас хамгаалагч Гжегорз Криховиак улаан хуудсаар торгуулсан юм. Тэр хүртэл эвийн гэрээрээг үргэлжилж байсан тоглолтын салхи ийнхүү эргэсэн. Ингээд 10-уулаа үлдсэн польшчууд үлдсэн хугацаанд юу ч хийж чадалгүй байсаар эцсийн шүгэлтэй золгосон юм. 

Роберт Левандовски тоглолтын талаар “Энэ тоглолтыг эргүүлсэн зүйл бол гарцаагүй улаан хуудас байлаа. Гэхдээ бид итгэл найдвараа алдалгүйгээр хоёр дахь гоолоо оруулахын төлөө тоглосон. Даанч маш хурдан эргээд гоол алдчихлаа.”

Словакын шигшээ багийн ахлагч Марек Хамшик “Итгэмээргүй үдэш байлаа. Цөөхөн хүн л өнөөдөр биднийг ялна гэж бодож байсан байх. Гэхдээ бид хожлын төлөө л талбайд гарсан. Би нэг сарын турш ногоон талбайдаа тоглолт хийгээгүй байсан. Үнэхээр сайхан байлаа.”

https://m.youtube.com/watch?v=O195fXqn8f4

Испани 0:0 Швед

ЕАШТ хамгийн олон удаагийн аварга ялагдашгүй “Армадачууд” аялалдаа гарлаа. Гэхдээ энэ бүхэн тийм ч сайхан эхэлсэнгүй. Тэд энэ үдэш 17 удаа хаалгаруу цохиж 86 хувьтай бөмбөг эзэмшсэн ч тусыг эс оллоо. Өмнө нь ийм өндөр хувьтай бөмбөг эзэмшиж байсан баг тэмцээний түүхэнд байсангүй. Мөн тэд нэг үед хамгийн их оновчтой дамжуулалт гүйцэтгэсэн рекордыг /419/ эвджээ. 

Эсрэгээрээ шведчүүд энэ өдөр ажлаа сайн хийсэн гэхэд хилсдэхгүй. Цэвэр хамгаалалтан дээр суурилсан тэдний хөлбөмбөг нэг оноо авчирлаа. Испанитай хийсэн сүүлийн 12 тоглолтын 11-т нь хаалгаа мялаалгаад байсан шведчүүд өнөөдөр салхинаас өөр зүйлийг үүдээрээ оруулсангүй.

Энэ өдөр дасгалжуулагч Луйс Энрике 18 настай хүү Педриг талбайд гаргасан нь тэмцээний түүхэн дэх хамгийн залуу “Спаниард” болголоо. Тэр энэ талаар “Энэ тэмцээнд дебютээ хийх нь хүүхэд бүрийн мөрөөдөл байдаг. Би аз жаргалтай байна. Тоглолтын тухайд бид маш олон боломж үүсгэсэн ч төгсгөж чадсангүй. Цаашдаа бид гоол оруулна гэдэгт би итгэлтэй байна Моратагийн хувьд тэр ч гэсэн хүн шүү дээ. Бүгд л алддаг. Түүнд дэмжлэг хэрэгтэй” хэмээн ярьжээ.

https://m.youtube.com/watch?v=L8qRSHDqpRg

Англи 1:0 Хорват

Европын АШТ-ий “D” хэсэгт багтсан Англи, Хорватын тоглолт хөлбөмбөг сонирхогчдын анхааралд байв. Гурван жилийн өмнө ДАШТ-ий мөнгөн медаль хүртэхдээ хагас шигшээд “Гурван арслангууд”-ыг хожсон хорватчуудаас хариугаа авах сайхан боломжийг алдсангүй.

Английн шигшээ багийн дасгалжуулагч Гарэт Саутгэйт сонирхолтой нэгэн гарааг энэ тоглолтод сонгосон юм. “Лийдс Юнайтед” клубын хагас хамгаалагч Кэлвин Филлипсийг бусдаас илүүд үзэж талбайд гаргасан нь нүдээ олсон шийдвэр байж, талбайн төв хэсэг түүний өргөн чөлөө мэт л гайхалтай гүйцэтгэлийг толилуулав. Мөн Пеп Гвардиолагийн удирдлага дор гараанд гарахаа больсон Рахим Стерлингийг талбайд гаргасанд олон хүн эргэлзсэн ч хоёрдугаар хагасын 57 дахь минутад орсон цор ганц гоолын эзнээр тодорсон юм. 

“Гурван арслангууд” тивийнхээ аваргын нээлтийн тоглолтод 10 удаа гарсан ч нэг ч хожил авч чадаагүй цувралдаа цэг тавилаа. Мөн тоглолтын 82 дахь минутад багийн ахлагч Харри Кэйний оронд 17 нас, 349 хоногтой Жул Беллингхэмийг талбайд гаргаснаар хамгийн залуудаа Еврод тоглосон англи тоглогч болжээ.

Дасгалжуулагч Саутгэйт тоглолтын дараа “Би их сэтгэл хангалуун байна. Эхний ялалт үнэхээр чухал. Хэрвээ бид хожигдсон бол маш их дарамт ирэх байлаа. Гэхдээ энэ бол эхний зорилго. Бүгчим халуун өдөр тоглогчид маань сайн тоглож, тоглолтыг хяналтан дороо байлгаж байлаа. Энэ бол том үйл явдал. Тоглогчид бөмбөгийг хурдан шилжүүлж, бид тоглолтын туршид Хорватыг маш цөөхөн боломжоор хязгаарлаж чадлаа” гэж сэтгүүлчдэд ярьжээ.

https://www.youtube.com/watch?v=kdtNtmALrGY

Тоглолтын үеэр нэгэн хөгжөөн дэмжигч үзэгчдийн хэсгээс унасан ба энэ талаар цэнгэлдэхийн хэвлэлийн төлөөлөгчөөс тодруулахад “Түүнд түргэн тусламжийг шуурхай хүргэсэн. Гэхдээ биеийн байдал нь хүнд байна” гэжээ. ЕХХ /УЕФА/ энэ явдлыг баталгаажуулсан боловч нууцлалын үүднээс нэмэлт тайлбар өгөхөөс татгалзажээ.

Австри 3:1 Умард Македон

Энэ тэмцээний нэгэн сонирхолтой баг бол австричууд. Тэдний бүрэлдэхүүн Германы шигшээгээс ч олон Бундеслигийн тоглогчтой гэдгээрээ анхаарал татаж буй. Тоглолтын нэгдүгээр үе эвийн гэрээгээр өндөрлөсөн бол сүүлийн хагаст Дэвид Алабагын гайхалтай дамжуулалт тоглолтыг эргүүлж Майкл Грегорич болон Марко Арнаутович нар хаалганы торыг мялааснаар гурван оноог эх орондоо авчирлаа. Энэ хожил тус тэмцээний түүхэн дэх Австри улсын анхны ялалт байснаараа онцлог байв.

Умард Македоны цор ганц гоолыг багийн ахлагч Горан Пандев оруулсан юм. Энэ нь македончуудын тэмцээний түүхэнд анхны гоол болон бүртгэгдлээ. Пандев шигшээ багийнхаа төлөө 20 жил зүтгэсэн төдийгүй 120 тоглолтын эцэст хамгийн дурсамжтай гоолоо ийнхүү шигтгэжээ.

https://www.youtube.com/watch?v=17AQyEWK7d0

Нидерланд 3:2 Украин

Тиймээ нисдэг голландчууд энэ өдрийг долоон жил хүлээжээ. Тэдний хөгжөөн дэмжигчдээс гадна дэлхий нийт ч улбар шаруудыг харахад таатай байсан биз. 

Тус тоглолт одоогийн байдлаар тэмцээний хамгийн их гоол орсон тоглолт болсон төдийгүй хамгийн сонирхолтой нь байсан гэхэд хилсдэхгүй. Тоглолтын эхнээс л нидерландчууд уулга алдуулсан олон довтолгоог гүйцэтгэж байсан ч хараахан амжилт олж чадсангүй. Гэхдээ хоёрдугаар хагас эхлээд удалгүй Жоржинио Вижнальдум долоон жилийн хүлээлтийг тайтгаруулсан мэт гоолыг оруулсан юм. Удалгүй Ваут Вегхорст тоог холдуулсан ч Андрей Шевченкогоор удирдуулсан украинчууд бууж өгөлгүй тэмцэж, ердөө дөрвөн минутын дотор тоог тэнцүүллээ. Гэхдээ энэ өдрийн гол баатар баруун жигүүрийн хагас хамгаалагч Дензел Дамфрис байлаа. Үндсэн цуг дуусахаас таван минутын өмнө Натан Акегийн хөндлөн дамжуулалтыг гайхалтай төгсгөж багтаа гурван оноо авчирлаа. 

Тоглолтын дараа гайхалтай нэгэн гоол оруулсан Андрий Ярмоленко “Хэцүү тоглолт байлаа. Эхний үед бидэнд хэд хэдэн боломж гарсан ч ашиглаж чадаагүй. Бид хүчтэй өрсөлдөгчийн эсрэг тоглож байгаагаа ойлгосон. 2:0-ээр ялагдаж байсан ч тоог тэнцүүлж дөнгөсөн. Гэхдээ эцсийн мөчид ялагдлаа. Үүнд сэтгэл дундуур байгаа ч бидэнд хоёр тоглолт бий. Өнөөдрийх шигээ хичээх болно. Хэрвээ бид хасагдах шатанд шалгарвал гайхалтай байх болно” гэлээ.

https://www.youtube.com/watch?v=JI0VqFn2xM0

Уэльс 1:1 Швейцарь 

Энэ өдрийн эхний тоглолтыг өнгөрөгч Европийн аваргын хамгийн том шуугианыг дэгдээсэн Уэльсийн шигшээ баг швейцарчуудын эсрэг хийлээ. Тоглолт Баку хотын Олимпын цэнгэлдэх хүрээлэнд явагдаж, эвийн гэрээгээр өндөрлөлөө. Шүгэл дуугарсан цагаас швейцарчууд тоглолтыг удирдаж илүүрхэж олон аюултай довтолгоо гүйцэтгэсэн ч хаалганы торыг хөдөлгөж чадсангүй. Харин хоёрдугаар үе эхлээд удалгүй довтлогч Брийл Эмболо багтаа тэргүүллийг авчирсан юм. Гэхдээ энэ цагаас уэльсчүүд ухаан орж, довтолгоондоо анхаарснаар , “Кардифф Сити” клубын довтлогч Киффер Мүүр 74 дэх минутад тооны харьцааг тэнцүүлснээр багтаа нэг оноо авчирлаа. 

Тоглолтын шилдгээр Брийл Эмболо тодорсон ба тэрбээр бүх тоглогчдыг үнэлгээгээр /8/ тэргүүлжээ. 

Уэльсийн шигшээ энэ тоглолтоос оноо салгаж чадсан ч тэдний довтолгоо асуудалтай хэвээрээ. Учир нь тэд урьдчилсан шатанд ердөө 10 гоол оруулсан ба энэ тоглолтод ч аюул тарих гоолын боломж төдийлөн үүсгээгүй юм. Мөн багийн ахлагч Гарэт Бэйл 2019 оны 10 сараас хойш 11 тоглолт дараалан хаалганы торыг хөдөлгөж чадаагүй байна. Харин Швейцарийн шигшээ баг сүүлийн есөн тоглолтод хожигдсонгүй.

https://www.youtube.com/watch?v=QWjTLGFbCXQ

Дани 0:1 Финланд

Хоёр дахь тоглолт Данийн “Копенхаген” клубын “Парк” цэнгэлдэхэд явагдлаа. Уг тоглолтын онцлох үйл явдал нь үр дүн бус Кристиан Эриксений эрүүл мэнд байлаа. Энд дарж уншина уу

Тоглолт дээрх шалтгааны улмаас түр хойшлогдсон ч хэсэг хугацааны дараа үргэлжлэв. Хоёрдугаар хагасын 59 дэх минутад Финландын шигшээ багийн довтлогч Жоэл Похжанпало багтаа тэргүүллийг авчирсан. Үлдсэн хугацаанд оноогоо хамгаалснаар тивийнхээ аваргад анхны хожлоо авлаа. Энэ тоглолтын цор ганц гоолыг оруулсан Жоэл гоолын баяраа тэмдэглэхээс татгалзжээ.

Ямартай ч тоглогчдын сэтгэлзүй тогтворгүй байсан ч ийнхүү тоглолт үргэлжилж дууссан юм. Тоглолтын дараа Данийн шигшээгийн дасгалжуулагч Каспер Хюлманд энэ оройн талаар “Амьдралын хамгийн чухал зүйл бол үнэ цэнэтэй харилцаа гэдгийг сануулсан орой байлаа. Бид тоглолтод хожигдсон ч бидний бүх бодол санаа Кристиан болон түүний гэр бүлтэй хамт байна. Бид түүний төлөө залбирч байна” хэмээжээ.

https://www.youtube.com/watch?v=hQARNgYtVjY

Бельги 3:0 ОХУ

Багийн уураг тархи Кевин Де Брюйнегийн эзгүйд бельгичүүд гайхалтай тоглолтоо үргэлжлүүллээ. Тоглолтын эхэнд ОХУ-ын төвийн хамгаалагч Андрей Семёнов уучилж боломгүй алдааг гаргасан ба үүнийг ч бельги довтлогч Ромелу Лукаку өршөөлгүй ашигласан юм. Тэрбээр гоолын баяраа багийн анд Эриксенд зориулсан бөгөөд камерын урд очин “Крис, Крис, би чамд хайртай” гэж хэлжээ.

Лукаку энэ тоглолтод хоёр гоолыг оруулсан юм. Энэ нь түүний шигшээ багийн төлөөх 62 дахь гоол болж бүртгэгдсэн ба тэрбээр 93 тоглолтод энэ амжилтыг үзүүлжээ.

Тэрбээр тоглолтын дараа “Энэ тоглолт гайхалтай байлаа. Гэхдээ миний бодол багийн анд Эриксентэй хамт байсан учир хэцүү байлаа. Түүнийг эрүүл байна гэж найдаж байна. Энэ тоглолтоо түүнд зориуллаа” гэсэн байна. Мөн Эриксений тухай сонссон талаараа тэрбээр “Мэдээжийн хэрэг би айсандаа маш их уйлсан. Би гэр бүлтэйгээ байхаас илүү их цагийг түүнтэй хамт өнгөрүүлдэг. Би түүний талаар болон гэр бүл эхнэр, хоёр хүүхдийнх нь талаар бодсон” гэж өгүүлжээ.

https://www.youtube.com/watch?v=Hn0tcXu6fkg

KOO.MN уншигчдадаа зориулж 2021 оны 6 сарын 11-ээс 7 сарын 11-ний хооронд болох XVI дахь удаагийн Европын аварга шалгаруулах тэмцээнд өрсөлдөх шигшээ багуудыг цувралаар танилцуулж байгаа билээ.

Энэ удаад бид Евро-2020 тэмцээний “А” хэсэгт багтсан Туркийн шигшээ багийн танилцуулга мэдээллийг хүргэж байна. 

Ерөнхий мэдээлэл

ЕАШТ-нд оролцсон тоо: 4

Амжилт: 2008 оны ЕАШТ-ний хагас шигшээ

Еврод: 15 тоглолт, 4 хожил, 2 тэнцээ, 9 хожигдол

Нийт: 13 гоол оруулж, 22 гоол хаалгандаа алдсан

            Туркийн шигшээ багийн бүрэлдэхүүн

Хаалгач: Мерт Гунок (Истанбул Басакшекир), Угурчан Чакир (Трабзонспор), Алтай Баяндир (Фэнэрбахчэ)

Хамгаалагч: Каан Аяхан (Сассуоло), Чаглар Союунчи (Лэйстэр сити), Мерих Дэмирал (Ювентус), Зеки Челик (Лилль), Умут Мерас (Ла Хаврэ), Озан Кабак (Ливэрпүүл), Ридван Елмаз (Бешикташ), Мэрт Мулдур (Сассуоло)

Хагас хамгаалагч: Абдулкадир Омур (Трабзонспор), Ченгиз Ундер (Лэйстэр сити), Хакан Чалханоглу (АС Милан), Окай Ёкуслу (Вэст Бромвич), Юсуф Язичи (Лилль), Ирфан Кавечь (Фэнэрбахче), Дорухан Токоз (Бешикташ), Оркун Кокчу (Фэйэноорд), Таялан Анталяли (Галатасарай)

Довтлогч: Бурак Елмаз (Лилль), Халил Ибрахим Дэрвишоглу (Галатасарай), Кенан Караман (Фортуна Дюсселдорф), Энэс Унал (Хетафе), Кэрэм Актуркоглу (Галатасарай)

Дасгалжуулагч: Сенол Гунес

Хэсгийн тоглолтын хуваарь

ТУРК – Итали
6 сарын 12-нд, Ром хот

ТУРК – Уэльс
6 сарын 17-нд, Баку хот

Швейцар – ТУРК
6 сарын 21-нд, Баку хот

            Онцлох тоглогч – Бурак Елмаз

Мэргэжлийн хөлбөмбөгт гялалзаж яваа 36 настай тоглогч дан ганц Криштиану Роналду гэвэл эндүүрэл болно. Өнгөрсөн улиралд Европын Топ 5 лигт Роналдугаас дутуугүй гангарсан нэгэн тоглогч бол Туркийн алдарт довтлогч Бурак Елмаз юм.

Нас хэвийсэн үедээ Францын “Лилль” клубт ирж, улмаар 10 жилийн дараа лигтээ дахин түрүүлсэн багийнхаа амжилтад Буракын гавьяа чамгүй бий. Тэрбээр лигийн 28 тоглолтод 16 гоол оруулсан нь багаа аваргын замд хөтлөхөд их нөлөө үзүүлсэн юм. Бурак Елмаз шигшээ багийнхаа төлөө 67 тоглолтод 29 гоол оруулсан амжилттай.

            Багийн талаар

ЕАШТ-д тав дахь удаагаа оролцох гэж буй Туркийн шигшээ баг энэ удаагийн тэмцээний нээлтийн тоглолтыг Италийн эсрэг хийсэн билээ. Тэд “А” хэсэгт Италиас гадна Швейцар, Уэльсийн багтай учраа таарсан. 2008 онд “галзуурсан” ах нарынхаа түүхийг давтахыг хэн байг гэхэв. Талбайд гарсан үедээ бүхнээ дайчилдаг турк залуусын тоглолт энэ Еврог чимэх нь гарцаагүй.

            Таамагласан гарааны XI

Б.Бадруул

“Евро 2020” хөлбөмбөгийн Европын АШТ-ий “B” хэсгийн Дани, Финляндын тоглолт цуцлагдлаа. Данийн шигшээ багийн Кристиан Эриксен тоглолтын эхний хагасын төгсгөлд талбай дээр ухаан алдаж унасан. Эмч нар түргэн тусламж үзүүлсний ачаар тоглогч ухаан орсон ч тоглолтыг цуцлах шийдвэр гаргажээ.

Энэ жил 29 настай Италийн “Интер Милан” клубын хагас хамгаалагч Кристиан Эриксен эхний хагасын төгсгөлд ухаан алдсан тул тоглолтыг цуцлах арга хэмжээ авчээ.

Эмч нар түүнд ойролцоогоор 20 минут орчим талбай дээр түргэн тусламж үзүүлсний ачаар ухаан орж, биеийн байдал нь тогтворжсон тул орон нутгийн нэгэн эмнэлэг рүү хүргэгдсэн байна.

Тоглолтыг түр цуцалсан байсан ч хоёр багийн тоглогчдын хүсэлтээр үргэлжлүүлэх болжээ.

Danimarka-Finlandiya maçında Christian Eriksen’in kalbi durdu. Eriksen’in bayılma anı kameralara böyle yansıdı
hadi eriksen dön bizlere pic.twitter.com/fKDSSZwwCl

— benniko (@nihatkosma) June 12, 2021

Хөлбөмбөгийн ертөнцөд өмнө нь ч талбай дээр иймэрхүү эмгэнэлт явдал болж байв. Английн холбооны цомын тоглолтын үеэр Фабрик Муамба талбай дээр ухаан алдаж, олныг сандаргасан удаатай. Тухайн үед “Болтон”-ы тоглогч байсан Ф.Муамбагийн зүрх 78 минут зогссон билээ.

Эмнэлгийн тусламж авч, амьдралд буцаж ирснийхээ дараа Ф.Муамба хөлбөмбөгийн спортоо орхиж, дасгалжуулагчийн ажилд шилжсэн. Өдгөө “Рочдэйл” клубын өсвөрийн багийг удирддаг аж.