Каталон хамгаалагчийн Сититэй байгуулсан гэрээ энэ улирлын төгсгөлөөр дуусна. Тиймээс тэр 2021 оны нэг сарын нэгнээс эхлэн англиас бусад орны багтай урьдчилсан гэрээ байгуулах боломжтой болно. Харин премьер лиг дотроо шилжилт хийх бол зун хүртэл хүлээх шаардлагатай. Гарсиа өнгөрсөн найман сард Манчестерийн багтай байгуулсан гэрээгээ сунгахгүй гэдгээ албан ёсоор мэдэгдсэн.

Виржил Ван Дейк, Жозеф Гомес аль аль нь хүнд бэртэл авсан учир Ливэрпүүл найдвартай, итгэл даах төвийн хамгаалагчийн эрэлд гараад байгаа. Ван Дейк өвдөгний чагтан холбоос, Гомес шөрмөсний бэртэл тус тус авч удаан хугацаагаар талбайд гарах боломжгүй болоод байгаа.

Испаний хэвлэлүүдэд бичсэнээр (AS, Marca) Ла Масиагийн суралцагч Эрик Гарсиа төрөлх багтаа буцах хүсэл их байгаа аж. Тиймээс Ман Ситигийн санал болгосон өндөр цалинтай саналыг хүлээж аваагүй юм байна. Блауграна өнгөрсөн зунаас эхлэн Гарсиаг идэвхтэй сонирхож эхлэн Сититэй тохиролцоонд хүрэхээр яриа хэлэлцээр хийж байгаа юм.
19 настай Гарсиа Барселон хотод төрж Ла Масиад суралцаж байгаад 2017 онд 16 настайдаа Английг зорьсон. 2019–20 оны улиралд тэр лигийн 13 тоглолтонд оролцсон бол энэ улиралд 3 удаа талбайд гараад байгаа.

Францын лигийн 14-р тойрогт Лионы эсрэг тоглохдоо бэртсэн Неймар Инстаграмдаа бэртлийнхээ тухай ам нээлээ. 12 сарын 13-нд “Парк-де-Пренс”-тээ ПСЖ 0:1-ээр хожигдоход Бразил довтлогч (Тьяго Мендес зүүн шагай руу нь жийсэн) бэртэж тоглолтын дараа яаралтай эмнэлэгт хүргэгдсэн.

“Өвдөлт, айдас, шаналал, зовнил, хагалгаа, суга таяг болон зүрх зүсэм дурсамжууд нүдэнд минь харагдан би орилсон”

“Үүнээс илүү дор байж болох байсан. Гэхдээ бурхан намайг ахин харж үзлээ”

“Эдгэж, эргэн ирэх өдрөө хүлээж байна” гэж тэр Инстаграмдаа зургийн хамт бичжээ.

ПСЖ-гийн эхний шинжилгээгээр Неймарын зүүн хөлийн шагай хугарч эсвэл цуураагүй гарсан. Гэхдээ 48 цагийн дотор хийлгэх дараагийн шинжилгээгээр бүх зүйл тодорхой болно.
Лионд хожигдсоноор ПСЖ хүснэгтийн 3-р байранд 28 оноотой бичигдэж байна. Тэдний урд Лилль, Лион тус бүр 29 оноотой явж байгаа.
Аваргуудын Лигийн хасагдах шатанд ПСЖ Барселонатай оноолт таарсан. Хэрвээ Неймарын бэртэл ноцтой биш бол хуучин багийн хамтрагчид, Месси – Неймар, хоёр сарын 16-нд Камп Ноуд эргэн уулзана.
2013–2017 оны хооронд энэ цэнгэлдэхэд Неймар хүчирхэг МСН довтолгооны гурвалын нэг хэсэг болж Европын хөлбөмбөгийг ноёрхсон. Месси, Суарес, Неймарын гурвал Ла лиг, Аваргуудын лиг, Копа дель Рей, Супер цом, Клубын ДАШТ гээд бүх цомыг хамтдаа өргөсөн юм.
Улмаар Бразил эр 222 сая еврогоор ПСЖ рүү шилжиж бүх цаг үеийн хамгийн үнэтэй хөлбөмбөгч болсон билээ.

Европын топ багуудын наймааны гол бай болж буй Эрлинг Хааландын зах зээлийн үнийг Mundo Deportivo зарлалаа. Испанийн хэвлэлд бичсэнээр 20 настай Норвег довтлогчийг авахыг хүсэж байгаа багууд дор хаяж 75 сая евротой байх ёстой гэнэ.

Тоглогчийн агент Мино Райола энэ суурь үнийг гаргасан бөгөөд үүн дээр агентийн шимтгэл, тоглогчийн гэр бүлд очих мөнгө мөн нэмэгдэнэ. Хааландыг Дортмунд 2020 оны өвлийн цонхоор 20 сая евро төлж авчирсан. Гэхдээ дээрх агентийн шимтгэл зэргийг тооцвол албан ёсны дүнгээс бараг хоёр дахин өндөр төлбөрийг Дортмунд гаргасан гэж Германы хэвлэлүүд мэдээлсэн. Реал Мадрид, Барселона зэрэг топ багууд бүгд Эрлингийг авах хүсэлтэй байгаа.

Ред Буллаас Бундеслигт ирээд Эрлинг эхний тоглолтдоо л хет-трик хийн сенсаац дэгдээсэн. Улмаар энэ гоолын цувралаа цааш нь үргэлжлүүлж клуб болон лигийн олон дээд амжилтуудыг эвдсэн юм. Одоогоор тэр бэртэлтэй байгаа бөгөөд 2021 оны нэг сард эргэн ирнэ гэж клуб нь мэдээлсэн.

Зэрэг шахуу хөлбөмбөгийн тавцанд гарч ирэн, тус тусын замаар алдрын оргилд хүрсэн Шави, Икер Касильяс нар сайн найзууд. Клубын түвшинд тэд эвлэршгүй хоёр багийг төлөөлдөг байсан ч эх орныхоо төлөө бол хамтдаа мөр зэрэгцэн тоглож олон цомыг өргөсөн. Харин тэдний талбайн гадна хэр дотны найзууд болохыг саяхан цацагдсан баримтат кино ил болголоо.

Касильясын амьдрал, карьерын талаарх The Movistar-н хийсэн тус баримтат кинонд хоёр эрхмийн нөхөрлөл чухал хэсгийг эзэлж байв.
2019 оны 5 сард Икер Портуд байхдаа зүрхний шигдээс болж эмнэлэгт хүргэгдсэн. Шави баримтат кинонд тэр үеийн тухай ийн дурссан юм.

“Инстаграмд онлайн байхыг нь хараад би түүн рүү бичсэн. – Икер, бие чинь яаж байна. Ноцтой биш биздээ? – “

“Пелопо минь (Шавигийн хоч), ийм л болох дөхлөө 💀”

Бие нь муудсаны дараа Икер хэсэг хугацаанд эмчилгээ хийлгэж, Португийн дасгалжуулалтын багт ажиллаж байгаад 2020 оны найман сард албан ёсоор зодог тайлсан. Испаний хэвлэлүүдэд бичсэнээр Икер одоо Флорентино Пересийн зөвлөхөөр ажиллаж байгаа ажээ. Харин Икерээс нэг ах Шави 2019 онд Катарын Аль-Саддад зодог тайлж, тэндээ дасгалжуулагчаар ажиллаж байгаа. Өнгөрсөн долоон сард Шави коронавирус тусаж эмчилгээ хийлгэн эдгэсэн юм.

Аваргуудын лигийн “ПСЖ”, “Истанбул” багийн тоглолтын үеэр гарсан дуулианаар олны анхаарлын төвд байгаа хүн бол Румыний шүүгч Себастьян Колтеску.

Арьс өнгөний үзэлтэй холбоотой маргаанаас болж, Аваргуудын лигийн тоглолт хойшлогдсон билээ.

Энэ тоглолтын дөрөвдүгээр шүүгчээр ажиллаж байсан Румын улсын иргэн Себастьян Колтеску талбайн шүүгчид хандан “Истанбул”-ын туслах дасгалжуулагч Пьер Вебог улаан хуудас авах ёстойг учирлахдаа “Тэр хар залуу” хэмээн төрөлх хэлээрээ хэлсэн нь маргааны эхлэлийг тавьсан юм.

Тэгвэл Себастьян Колтеску гэж хэн бэ?

Румыний Крайова хотод төрсөн Себастьян өдгөө 43 настай. Тэрбээр 2006 онд дөрөвдүгээр зэрэглэлийн шүүгч болсон юм. Гэвч хэд хэдэн тоглолт маргаантай шүүсний улмаас зэрэглэл буурч, Румыний хоёрдугаар дивизионы тоглолтыг шүүх болжээ. Нэг жил орчим доод дивизионд ажилласныхаа дараа чансаа ахиж, 2008 оноос дээд лигийн тоглолтыг дэнслэх болсон юм.

“Ла Октава Спорт” хэвлэлийн сэтгүүлч Жэйми Сандовалын мэдээлснээр С.Колтеску зэрэглэл буурсан нэг жилийн хугацаанд сэтгэл санаагаар унаж, хоёр ч удаа амиа хорлох оролдлого гаргаж байсан гэнэ.

С.Колтеску шүүгчийн замналдаа асуудалд орж буй анхны тохиолдол энэ биш. Одоогоос долоон жилийн өмнө Румыний лигийн “Петролул”, “Газ Метан” багийн тоглолтын үеэр С.Колтеску долоон улаан хуудас, 13 шар карт өргөж байв. Улаан хуудас авч талбайгаас хөөгдсөн нэгэн тоглогч шүүгчтэй маргалдах үеэр биед нь халдсан гэж гомдол мэдүүлсэн удаатай.

Энэ явдлаас хойш хоёр жилийн дараа мөн л Румыний лигийн “Астра”, “Стяуа” багийн тоглолтын үеэр орсон гурван гоолыг хүчингүйд тооцож, бас л бөөн маргаан дэгдээсэн эр.

С.Колтеску: Би арьс өнгөөр ялгаварлагч биш

Румын шүүгч талбайн шүүгчид хандан П.Вэбог улаан хуудас авах ёстой гэж үзэж байгаагаа илэрхийлэхдээ “Negru” хэмээх үг ашигласан аж. Энэ нь румын хэлээр бол “хар” гэсэн утгатай. Тэрбээр “хар залуу” гэх утгаар энэ үгийг ашиглаагүй гэж өөрийнхөө үйлдлийг тайлбарлажээ. “Ойрын өдрүүдэд хэвлэлээс хол байж, сэтгэл санаагаа тайван байлгахыг хичээж байгаа. Намайг мэддэг хүмүүс арьс өнгөөр ялгаварлагч биш гэдгийг мэднэ. Ядаж л үүнд найдаж сууна” гэж ойр дотныхоо хүмүүст ярьсан гэнэ.

Аваргуудын лигийн хойшлогдсон тоглолт өнөө шөнө явагдана. Тоглолт маргаанаар завсарласан 15 дахь минутаас хойш үргэлжлэх юм. Харин Европын хөлбөмбөгийн холбооноос тус тоглолтыг шүүх багийг өөрчилжээ. Талбайд нидерланд шүүгч Дэнни Маккеле ажиллах бол түүний нутаг нэгт Марио Дикс, Польшийн Марсин Бониек туслах шүүгчээр гарна. Харин дөрөвдүгээр шүүгчээр Польшийн Бартош Фрэнковски, VAR-ын хяналтын шүүгчээр Италийн Марко ди Белло, Маурицио Мариани нар ажиллах аж.

Арьс өнгөний үзэлтэй холбоотой маргаанаас болж өнгөрсөн шөнө явагдах ёстой байсан Аваргуудын лигийн ПСЖ – Истанбул Башакшехир багуудын тоглолт хойшилжээ. “Парк-де-Пренс” цэнгэлдэхэд шүгэл дуугараад 14 минут өнгөрч байхад Туркийн багийн туслах дасгалжуулагч Пьер Вебо улаан хуудас авжээ.

Тоглолтын үеэр зохисгүй авир гаргасан учир туслах шүүгч түүнд улаан хуудас өгөхийг талбайн шүүгчид хэлсэн аж. Тэгэхдээ “Тэр хар залуу” гэсэн нь асуудлын эх үүсвэр болсон байна. Румын дөрөвдүгээр шүүгчийн ийнхүү хэлснийг Пьер Вебо “Намайг негро гэлээ” гэж маргалдан улмаар аль аль багийнхан тоглолтыг цааш үргэлжлүүлэхээс татгалзсан байна. Сэлгээнд сууж байсан экс-Челсигийн довтлогч Демба Ба мөн маргаанд оролцон улаан хуудас авжээ.

Туслах шүүгч Себастиан Колтескугийн оронд VAR хариуцсан шүүгч ирж тоглолт цааш үргэлжлэх ёстой байсан ч хөлбөмбөгчид цааш тоглохоос татгалзсан. Уг тоглолт лхагва гарагт явагдана.

Аваргуудын лигийн H буюу энэ хэсэгт Лейпциг Манчестер Юнайтедийг 3:2-оор хожсоноор 12 оноотой тэргүүн байраар плей-офф шатанд шалгарлаа. Харин Юнайтед ПСЖ-Истанбулын тоглолтын үр дүнгээс үл хамааран тэмцээнийг цааш үргэлжлүүлэх боломжгүй болсон. Тэд Европа лиг руу шилжиж байгаа юм.

“Ред Булл Арена”-д явагдсан тус тоглолтонд Анхелиньо, Амаду Айдара, Жастин Клюйверт нар Лейпцигээс дараалан гоол хийсэн. Бруну Фернандеш, Поль Погба нар 80, 82 дахь минутанд гоолдсон ч Юнайтедийн эргэн ирэлтийг гүйцээх тоглогч байсангүй.

Криштиану Роналдугийн хоёр пенальти, Уэстон Маккеннигийн акробат гуядалт “Камп Ноу”-д явагдсан Барселона – Ювентусын тоглолтын үр дүнг шийдлээ. Ювентус 3:0-ээр ийнхүү хожиж G хэсгийг тэргүүлэн хасагдах шатанд шалгарч байгаа бол Барселона хоёроор цааш шалгарч хүнд сугалаа татахаар болов.

Роналду – Мессигийн хоёр жилийн дараах “уулзалт” гэдгээрээ энэ тоглолт олны анхаарлын төвд байлаа. Хоёр клубээс аль талд нь жинхэнэ “GOAT” байгаа тухай твиттерт өрнүүлсэн ёж дайралтууд ч тоглолтын хүлээлтийг ихэсгэсэн.
10 сарын 28-нд Барсаг Туринд зочлоход Роналду Ковид 19-н улмаас талбайд гараагүй юм. Тус учраанд Дембеле, Месси гоол хийн Барса 2:0-ээр хожиж байв. Хожлынхоо дараа Барса твиттертээ “GOAT-г та нар өөрийн талбайдаа харсандаа баяртай байгаа байх” гэж жиргэсэн.

Харин энэ удаа Ювентус “Та нар буруу толь бичиг ашигласан бололтой. Жинхэнэ GOAT-ыг өнөөдөр Камп Ноуд та нар харлаа” гэж хариугаа авсан.

Барсагаас Пике, Дембеле, Ансу Фати, Сержи Роберто нар бэртэлтэй байсан учир дасгалжуулагч Куман – Сержиньо Дест, Рональд Араухо, Тринкан гэсэн залуу тоглогчдод боломж олгон талбайд гаргасан. Харин зочин багаас Кьеллини, Мерих Демирал нар байсангүй.

Араухо 13 дахь минутанд эсрэг талдаа пенальти өгч Роналду амжилттай гүйцэтгэн багтаа тэргүүлэл авчирсан. 7 минутын дараа Ювентусын багийн ажиллагаа үр дүнд хүрч Маккенни Куадрадогийн дамжуулалтаар үзүүштэй гоолыг бүртгүүлсэн юм. Аваргуудын лигт Барса талбайдаа эхний 20 минутанд хоёр гоол алдаж байгаа анхны тохиолдол энэ юм байна. 22 настай дээрх Америк залууг Юве өнгөрсөн зун Шалькегээс зээлээр авчирсан юм.

Месси үүний дараа хариуг нь барихаар хэд хэд оролдсон ч Буффон туршлага заан хаалгаа хуурай байлгасан.

Маккенни Мессиг 16 дотор унагасныг торгуулийн цохилт гэж талбайн эзэд маргасан ч шүүгч тэдний талд шийдвэр гаргасангүй. Улмаар 52 дахь минутанд Лангле бөмбөгөнд гар хүрснийг шүүгч VAR ашиглан хянаад Ювентуст энэ өдрийн хоёр дахь пенальтийг өгөв. Харин шүүгч Ланглед хоёр дахь шарыг нь өгөлгүй “харж үзсэн” (31 дэх минутанд шар хуудас аваад байсан). Роналду дубль хийх боломжоо алдаагүй юм.
Барса 2016 оны 11 сараас хойш Аваргуудын лигийн хэсгийн шатанд хожигдоогүй байсан нь ийнхүү төгсгөл болов. (25 тоглолт) Мөн Ювентус Камп Ноуд гурван гоол хийсэн анхны италийн баг боллоо.

Энэ хооронд Динамо Киев Унгарын Ференцварошийг 1:0-ээр хожиж хэсгийн гуравт бичигдэв. Тэд европын аяллаа цааш Европа лигээр үргэлжлүүлнэ. Киевийн “Олимпийский” цэнгэлдэхэд явагдсан тоглолтын цорын ганц гоолыг Денис Попов оруулсан.

РОНАЛЬД КУМАН (Барселонагийн дасгалжуулагч):
“Бид тоглолтыг эхний 30 минутанд алдчихлаа. Манай хамгаалалт тааруу байснаас гадна дундын шугам хангалттай шийдэмгий байж чадсангүй. Харин Ювентус эсрэг талд бүхнийг зөвөөр хийсэн. Ялалт авах бүрэн эрхтэй тоглолоо”

“Эхний торгуулийн цохилтыг би маргаантай гэж үзэж байна. Тийм зүйлд пенальти зааж байгаа бол Месси дээр гаргасан зөрчилд ч пенальти өгөх ёстой байсан юм”

“Бид Ювентустай хоёр тоглосныг мартаж болохгүй. Туринд манайх 2-0-ээр хожсон. Манай гаргасан бүрэлдэхүүнд залуус олон байсан учир сайн хичээл болсон байх. Тэд хойшид өөрсдөдөө итгэлтэй, зоригтой тоглох хэрэгтэй”

АНДРЕА ПИРЛО (Ювентусын дасгалжуулагч):
“Дербигийн ялалтын эрчимээ (12 сарын 5-нд Ториног 2:1-ээр хожсон) алдалгүй ээлжит нэгэн хожлоо бид авлаа. Төвлөрөл, тууштай, шийдэмгий чанар байхад үр дүн үргэлж гардаг”

“Маккенниг урагш сайн явуулж, дундын шугаманд тэдний хоёр хагасыг өөрсдийн гурваар ноёрхох төлөвлөгөөг бид боловсруулаад байсан. Энэ маань ч үр дүнгээ өгч олдсон гоолын боломжоо залуус маань сайн ашиглалаа”

“Мөнхийн өрсөлдөгчийнхөө эсрэг Роналду энгийнээс илүү хичээх нь ойлгомжтой байсан. Түүнийг ийм сэтгэл зүйтэй байхад зогсооно гэдэг хэцүү. Энэ хожил чимээ дуулиантай ч гэсэн улиралд олон тоглолт байгаа. Сери А гэсэн гол байгаа бид нар умартаж болохгүй. Түүндээ төвлөрч, тогтвортой формыг үүсгэх нь чухал”

Барселона (Испани) 0 : 3 Ювентус (Итали)

Роналду, 13-пен, 52-пен, Маккенни, 20

“БАРСЕЛОНА” (Испани): тер Штеген, Араухо, Лангле, Дест, Альба, Пьянич, де Йонг, Тринкау, Месси, Педри, Гризманн.

“ЮВЕНТУС” (Итали): Буффон, Де Лигт, Бонуччи, Данило, Артур, Маккенни, Алекс Сандро, Куадрадо, Рэмси, Роналду, Мората.